Batumelebi

18 აპრილის [11 სთ] მონაცემებით, საქართველოში 84 პაციენტი გამოჯანმრთელდა კორონავირუსისგან.

ბოლო მონაცემებით, სულ საქართველოში დადასტურებულია ახალი კორონავირუსის 385 შემთხვევა.

მათგან გამოჯანმრთელდა 84 ადამიანი, გარდაიცვალა – 3.

ბოლო მონაცემებით, საქართველოში კარანტინის რეჟიმში იმყოფება 4971 ადამიანი,  სტაციონარში მეთვალყურეობის ქვეშ კი – 519. 

ასევე, უცხოეთიდან სამკურნალოდ გადმოყვანილია საქართველოს 3 მოქალაქე.

_________________

ფოტო: ევროპის პრესფოტო სააგენტო. EPA/Kiko Huesca

აჭარის ჯანდაცვის მინისტრის მოადგილის ნინო ნიჟარაძის განცხადებით, აჭარაში კოვიდ 19 -ის ოთხი ახალი შემთხვევა დაფიქსირდა.  ოთხივე  პაციენტი კარანტინში იმყოფებოდა, ამათგან  ერთი ქობულეთის კლასტერს უკავშირდება, ხოლო სამს თურქეთში მოგზაურობის ისტორია აქვს. ოთხივე პაციენტი ზრდასრულია.

პაციენტები კლინიკა „მედალფაში“ არიან გადაყვანილი, შესაბამისად კლინიკაში ამ დროისთვის კოვიდ-19-ით ინფიცირებული 41 პაციენტი მკურნალობს.

ამ მონაცემის მიხედვით, აჭარაში, ქობულეთის კლასტერს უკავშირდება ინფიცირების უკვე 33 შემთხვევა. მათ შორის არიან ბავშვები.

ქობულეთის კლასტერთან დაკავშირებით მოძიებულია 465 კონტაქტი, მათგან 230 პირთან ჩატარებულია ლაბორატორიული დიაგნოსტიკა, ამ 230-დან არის სწორედ ის 33 კონტაქტი, რომლებსაც კოვიდ-19 დაუდასტურდათ.

ქობულეთის კლასტერი უკავშირდება პაციენტს, რომლის ინფიცირების წყარო უცნობია. მას შემდეგ, რაც მას კორონავირუსი დაუდგინდა, ეპიდემიოლოგიური კვლევით დადასტურდა ახალი შემთხვევები. კორონავირუსი აღმოაჩნდათ მასთან კონტაქტში მყოფ პირებს, მათ შორის, ოჯახის წევრებს, მეზობლებს და მეზობლებთან კონტაქტში მყოფ პირებსაც.

18 აპრილის დილის მონაცემებით კორონავირუსის დადასტურებული შემთხვევების რაოდენობა საქართველოში, გუშინდელთან შედარებით 15-ით გაიზარდა და არის 385.

მათ შორის გამოჯანმრთელდა – 84, ხოლო გარდაიცვალა – 3.

ბოლო მონაცემებით კარანტინის რეჟიმში 5053 მოქალაქე იმყოფება, სტაციონარში მეთვალყურეობის ქვეშ კი – 527.

დილის ათის ნახევრისთვის უკვე ეკიპირებულია. ეს იმას ნიშნავს, რომ აცვია სპეციალური ტანსაცმელი, უკეთია ნიღაბი, ფარი და ხელთათმანები, ექიმი თეა დანელია დღის განმავლობაში ასე „შეიარაღებული“ 12 საათს ატარებს საავადმყოფოში, სადაც Coivid 19-ით  დაინფიცირებულებს მკურნალობენ. თეა  „მედალფას“ ექიმია და, შესაბამისად, თავადაც დაინფიცირების რისკის ქვეშაა.

„12 სათის შემდეგ, 24 საათი უნდა დავისვენო. ასეთია რეჟიმი, მაგრამ უკვე რამდენი ხანია ამ რეჟიმით არც ვცხოვრობთ და არც ვმუშაობთ, ჩვენი ყოველი წუთი დაკავებულია“, – ამბობს თეა.

გვიყვება, რომ დავირუსებულ პაციენტებთან მუშაობის დაწყებამდე ეკიპირების სწორად ტარების ტრენინგები გაიარა და კარგად აქვს გააზრებული, რომ ეს წესები ყოველ წამს უნდა ახსოვდეს. თუმცა ამბობს, რომ პაციენტის და ექიმის ურთიერთობაში დაინფიცირებისგან დაზღვევა არ არსებობს. მისი თქმით, ამას 100 პროცენტით ეკიპირება და ვერც წესების დაცვა უზრუნველყოფს.

„რამდენად  დისტანციურია ექიმის და ექთნის მუშაობა პაციენტთან, ვერასდროს გაზომავ – ზოგს დახმარება უნდა, თავისით ვერ იღებს საკვებს. მანიპულაცია უნდა ჩაატარო, ეს საკმაოდ დიდ სირთულესთან არის დაკავშირებული, რადგან ამ დროს ზოგს ხველა აქვს “.

როცა საქმე გადამდებ ვირუსთან გაქვს, დღის მძიმე რეჟიმს სხვა დამატებითი წესებიც ახლავს: „12 საათის განმავლობაში საკვების, წყლის მიღებაც კი შეზღუდულია ჩვენთვის. ეს ყველაფერი იმისთვის, რომ დაინფიცირების რისკი არ გავზარდოთ“.

როგორც მოგვიყვა, მისთვის ერთნაირი მნიშვნელობის სამუშაოა ბრძოლა ვირუსთან და პაციენტის განწყობასთან, მის ემოციებთან გამკლავება.

„პაციენტების უმეტესობა გაღიზინებულია, მოგეხსენებათ ისეთი ვირუსია, რომ  შეშინებულები, აფორიაქებულები არიან. ჩვენი პირველი კონტაქტი სწორედ ემოციას უკავშირდება, ჩივილებზე მეტად ემოციებს გვიზიარებენ. ზოგი აგრესიულია, ჩვენ კი მაქსიმალურ სიმშვიდეს ვინარჩუნებთ, ეს გვევალება. ხანდახან თანადგომა კოლეგასაც სჭირდება, ერთმანეთის დახმარება, გამხნევება ჩვენი დამატებითი ფუნქციაა“.

დილის ათის ნახევრიდან პაციენტების შემოვლა იწყება, შემდეგ საორგანიზაციო საკითხების დრო დგება:

„ამ 12 საათის განმავლობაში პაციენტებს მაქსიმალური ყურადღება, დინამიკაში მეთვალყურეობა სჭირდებათ – სასიცოცხლო მაჩვენებელი ყოველ წამს უნდა ვაკონტროლოთ“.

ექიმის თქმით, დავადებას მომენტალური დამძიმება ახასიათებს:

„შესაძლოა მიმდინარეობდეს სტაბილურად და უცებ, რამდენიმე წუთში დამძიმდეს. ეს იწვევს ფილტვებში ძალიან მძიმე მდგომარეობას, ანუ იწყება ფილტვის შეშუპება. თუ ჩვენება შესაბამისია, პაციენტი გადაგვყავს აპარატზე. დამძიმების წინა პერიოდი არ არის ხანგრძლივი – იწვევს სუნთქვის უკმარისობას და ამ დროს შესაძლოა დასჭირდეს ფილტვის ხელოვნური ვენტილაცია. ამის შემდეგ როგორ გამოვა მდგომარეობიდან და გადალახავს ამას ორგანიზმი, ეს დაავადების მიმდინარეობაზეა დამოკიდებული, ამიტომ პნევმონია ვისაც აქვს, ყველა რისკის ქვეშაა.“

ექიმის ნაამბობით, პაციენტები მათ ხშირად უსვამენ კითხვებს როგორი შეიძლება იყოს პროგნოზი, ითხოვენ თანადგომას:

„ჩვენ გვიწევს ვირუსის მიმდინარეობაზე, მის სიმძიმეზე მივიტანოთ ინფორმაცია პაციენტამდე თავიანთი ენით. ბევრი იგებს, იმედიანიც არის და მოგყვება. ზოგადად, მორალურად დატვირთულები არიან. ეს ჩვეულებრივი სიტუაცია არ არის, ეს სხვა დაავადებაა, ამიტომაც ვართ მთელი დღე დაძაბულები და მობილიზებულები“.

ექიმმა გვიამბო იმის შესახებაც, რომ განსაკუთრებით ემოციურები არიან პაციენტები, რომელთა ოჯახის წევრებიც იმავე კლინიკაში მკურნალობენ, მათ ერთმანეთის ნახვა უნდათ: „ამ მხრივ უფრო ჯიუტები არიან ასაკოვნები, ისინი ხშირად აგრესიითაც გამოირჩევიან. მეტ-ნაკლებად ვუმკლავდებით, მაგრამ ძალიან რთულია… მესმის, ძნელია იზოლირებულად ყოფნა“.

ექიმი ამბობს, რომ ნაკლები ინფორმაცია ვირუსზე და ოჯახთან დიდი ხნით დაშორება, მათ მუშაობასაც ართულებს:

„ძალიან გვიჭირს ჩვენც, ჩვენც არ ვიცით რა დაავადებასთან გვაქვს საქმე, მთელი მსოფლიო ჯერ მისი შესწავლის რეჟიმშია. ჩვენც ვართ ადამიანები, რომლებმაც გამოვიხურეთ ოჯახის კარები და არ ვიცით, რამდენ ხანს ვერ ვნახავთ ოჯახის წევრებს და ვერ გავუზიარებთ ჩვენს განცდებს. კიდევ კარგი, რომ ამაზე ფიქრისთვის დიდი დრო არ გვრჩება.“

თეა ამბობს, რომ მერამდენე კვირაა, სამსახურიდან სახლში არ მიდის, არ ნახულობს მეგობრებს:

„იზოლირებული ვარ, ასევე ჩემი კოლეგებიც ჩვენი სამსახურიდან დასასვენებლად სახლში კი არა, სასტუმროში მივდივართ და იქაც ერთმანეთისგან იზოლირებულად ვცხოვრობთ“.

თეა სათქმელი აქვს მათთვისაც, ვინც არ დაინფიცირებულა, ეშინია და წესებს ითვალისწინებს, ან საფრთხე ჯერ გააზრებული არ აქვს:

„მე მესმის თქვენი, მესმის, რომ რთულია უცებ ყველაფერს მოწყდე, მაგრამ იმდენად გამოუცნობი სიტუაციაა, იმდენად რთული ვირუსია. აუცილებლად გამოვიჩინოთ ყურადღება. თუნდაც შიდა გადადება რომ შევზღუდოთ, აუცილებლად გვჭირდება, რომ დროებით ერთმანეთისგან აბსოლუტურად იზოლირებული ვიყოთ. დავიცვათ ერთმანეთი, ძნელი წარმოსადგენია რა ხდება შიგნით, იქ, სადაც ჩვენ ვმუშაობთ. არ ვიცით, ეს დაავადება როგორ წარიმართება და როდის დამძიმდება, ძალიან დიდი საფრთხის წინაშე აღმოვჩნდებით. როგორმე შევასრულოთ, რაც ჩვენზეა დამოკიდებული და მალე დავამარცხოთ ეს საფრთხე“.

და როცა ეს ყველაფერი დამთავრდება, თეა აპირებს, რომ რაც აქამდე არ გაუკეთებია, გააკეთოს ყველაფერი, საკუთარ თავს უარი არაფერზე უთხარა:

„პირველ რიგში დავრწმუნდები, რომ ყველასთვის უსაფრთხო ვარ, ეს აუცილებელია. იმდენად დავიტვირთე ემოციურად, რომ ალბათ ყველაფერს გავაკეთებ – ჩემი ცხოვრების წესი შეიცვლება, ყველას ვნახავ, ყველასთან მივალ, ოჯახი უსაშველოდ მენატრება, ქალაქი, მეგობრები, ხალხი მენატრება. თუ იყო მომენტი დაღლის და რაღაცას ვერ ვაკეთებდი, ვამბობდი არ შემიძლია, ამის შემდეგ აღარ ვიტყვი, ყველაფერს შევძლებ, ყველა კარგად უნდა ვიყოთ“.

თეა დანელიამ გვთხოვა, აუცილებლად მოხვდეს მასალაში მისი მადლობა, რომელსაც ის მთელი მსოფლიოს ექიმებს უთვლის, რომლებიც ახლა, ამ წუთებში კორონავირუსისგან პაციენტების დაცვას ცდილობენ.

საქართველოს საპატრიარქომ დღეს დილიდანვე გაავრცელა ინფორმაცია, რომ მღვდლებს, სტიქაროსნებსა და მგალობლებს, შეზღუდვების მიუხედავად, ავტომანქანით გადაადგილების უფლება ექნებათ. არადა მთავრობის განკარგულებაში მსგავსი ჩანაწერი სასულიერო პირებთან დაკავშირებით არ გვხვდება.

დამატებითი შეზღუდვების ამოქმედების შემდეგ, მართლმადიდებელი ეკლესიის სასულიერო პირებისთვის დაწესებულ (თუ თვითაღიარებულ) პრივილეგიებს ვიდეო მიმართვით გამოეხმაურა საქართველოს ევანგელურ-ბაპტისტური ეკლესიის ეპისკოპოსი რუსუდან გოცირიძე, სადაც ის ხელისუფლების დისკრიმინაციულ მიდგომაზე საუბრობს.

„ახლა გავიგეთ, რომ თურმე არსებობს სპეციალური საშვები, რომლითაც შესაძლებელია ქალაქში გადაადგილება. ეს არის სახელმწიფოს მხრიდან საკუთარი მოქალაქეების სერიოზული დაცინვა და სახელმწიფო ძალიან ბინძურ პოლიტიკურ თამაშს თამაშობს.

ჩვენი ქვეყნის ხელისუფლებავ, ამ ქვეყანაში არ არის მხოლოდ ერთადერთი რელიგიური თემი და დღევანდელი დღე არა მხოლოდ ერთი კონკრეტული რელიგიური თემისთვის მნიშვნელოვანი რელიგიური დღესასწაული, თუ შეიძლება კეთილი ინებეთ და როგორც სეკულარულ, დემოკრატიული სახელმწიფოს ხელისუფლება შეეფერება ისე იმოქმედეთ“, – ამბობს რუსუდან გოცირიძე ვიდეოში.

„ბათუმელებმა“ მას ჰკითხა, ჰქონდა თუ არა ინფორმაცია სპეციალური საშვთან დაკავშირებით ან ხომ არ მიიღო მთავრობისგან რაიმე ოფიციალური დასტური იმაზე, რომ მას, როგორც სასულიერო პირს, მართლმადიდებელი მღვდლების მსგავსად შეუძლია თავისუფალი გადაადგილება ქალაქში?  რუსუდან გოცირიძე ამბობს, რომ – არა.

„ახლა რომც მომცენ ავტომანქანით გადაადგილების უფლება, უკვე ისედაც დისკრიმინაციულია, რადგან საპატრიარქომ მანამდე გამოაცხადა ეს, სანამ მთავრობა იტყოდა რაიმეს. შესაძლოა ეს შეთანხმება მანამდე იყო ან ჯერ საპატრიარქომ გამოაცხადა და შემდეგ მიყვნენ მის ნათქვამს.  არცერთი ვერსია არ არის ჯანსაღი. ამ ეტაპზე უკვე არ არსებობს თანაბარი მიდგომა და ეს ძალიან ცუდია“, – გვეუბნება რუსუდან გოცირიძე.

მისი თქმით, ხელისუფლების მიერ დაწესებული შეზღუდვები ისევ კანონმორჩილ მოქალაქეებს აწვება და არა იმ ჯგუფს, ვის გამოც საჭირო გახდა დამატებითი ზომების მიღება.

„იმიტომ ვბრაზობ, რომ ვის გამოც მე დღეს ფეხით ვიარე წერეთლის ქუჩიდან სოფელ დიღმამდე, ისინი მაინც მანქანებით დადიან და მე, რომელიც ვემორჩილები კანონს და ყველა რეგულაციას ვიცავ მკაცრად, მე მომიწია ფეხით სიარული და ასე მოუწევს ყველა კანონმორჩილ მოქალაქეს“, – გვეუბნება ეპისკოპოსი.

„ბათუმელები“ სხვა ევანგელური ეკლესიების სასულიერო პირებსაც ესაუბრა. მაგალითად, ბათუმის პროტესტანტული ეკლესიის პასტორი ვარლამ რამიშვილიც ამბობს, რომ ავტომანქანით გადაადგილების ნებართვაზე დაზუსტებული ინფორმაცია არც მას აქვს. „რელიგიის სახელმწიფო სააგენტოს ელაპარაკა ერთ-ერთი პასტორი და როგორც უთხრეს, ახლა მიდის მსჯელობა მაგ საკითხზეო. უთხრეს, თუ მღვდლებს მიეცემა უფლება, ყველა რელიგიის მსახურს მიეცემა ნებართვაო“, – ამბობს ვარლამ რამიშვილი.

„ბათუმელები“ ასევე ესაუბრა საქართველოს მუფთს ადამ შანთაძეს, რომელიც ამბობს, რომ რელიგიის საკითხთა სააგენტო მათ მთავრობასთან შუამდგომლობას დაჰპირდა.

„გვეტყვიან, როცა დაიშვება საშვები ჩვენთვისაც. როგორც მითხრეს, შუამდგომლობაზე მუშაობენ“, – ამბობს ადამ შანთაძე.

კითხვაზე, გადაადგილდება თუ არა თავად ავტომანქანით ქალაქში, ადამ შანთაძე ამბობს, რომ საშვს ელოდება. „როგორც ვიცით, სასულიერო პირებზე ყველაზე ვრცელდება დაშვება“, – გვეუბნება მუფთი.

მოექცა თუ არა ხელისუფლება სხვა რელიგიური დენომინაციების სასულიერო პირებს დისკრიმინაციულად, ან უნდა დაეშვა თუ არა სახელმწიფოს გამონაკლისი სასულიერო პირებთან დაკავშირებით? – ამ კითხვით სახალხო დამცველსაც მივმართეთ. ომბუდსმენის აპარატში გვპასუხობენ, რომ ჩამონათვალში, სადაც მითითებულია, ვის შეუძლია შეუფერხებლად გადაადგილება ავტომანქანით, არსად წერია რელიგიური ორგანიზაციები ან სასულიერო პირები. „ამიტომ არ ვიცით, რის საფუძველზე გადაადგილდებიან სასულიერო პირები“.

„ბათუმელები“ ამ საკითხთან დაკავშირებით რამდენიმე საათია ცდილობს კომენტარის მიღებას საქართველოს მთავრობისგანაც, თუმცა მთავრობის პრესსამსახურში ზარებს არ პასუხობენ.

„ტოლერანტობისა და მრავალფეროვნების ინსტიტუტის“ სამართლებრივი პროგრამის ხელმძღვანელის მაკო ღავთაძის შეფასებით, მართლმადიდებელი სასულიერო პირებისთვის ავტომობილით გადაადგილების უფლება არა მარტო დისკრიმინაციულია სხვა რელიგიური სასულიერო პირების მიმართ, არამედ ყველა იმ მოქალაქის მიმართ, ვინც სოციალური პრობლემების და სხვა კრიზისების მიუხედავად, ემორჩილება საგანგებო წესებს.

„როგორც საპატრიარქოში ამბობენ, სატელეფონო ზარით მოაგვარეს გადაადგილების საკითხი. ეს იმას ნიშნავს, რომ სახელმწიფოს და საპატრიარქოს ურთიერთობა გასულია კონსტიტუციური ჩარჩოებიდან.

ეს წრე – სასულიერო პირებით, სტიქაროსნებით, მგალობლებით ძალიან დიდი იქნება ალბათ, ამიტომ ბუნდოვანია, როგორ შეათანხმეს ამდენი ადამიანის გადაადგილება სახელმწიფოსთან. ან რა საჭიროება დგას იმის, რომ სასულიერო პირები ავტომანქანებით გადაადგილდებიან? რა ლოგიკა იყო ამ შეზღუდვაში, თუკი ამდენი ადამიანი იმოძრავებდა ქუჩაში“, – ამბობს მაკო ღავთაძე.

მისი თქმით, შეზღუდვას რაიმე შედეგი უნდა მოჰყვეს, ხალხი კი ამას ვერ ხედავს.

„ორი პარალელური სამყარო არსებობს. ერთში, ადამიანები საღი აზრიდან გამომდინარე ამ შეზღუდვებს ემორჩილებიან, მეორე სამყაროში კი კორუფციული გარიგება და ვაჭრობაა საპატრიარქოსთან. ამ ყველაფრის მსხვერპლი არიან ის ადამიანები, რომლებსაც, საბოლოო ჯამში, ყველაზე დიდი ეკონომიკური და ფინანსური ზიანი მიადგათ“, – ამბობს ღავთაძე.

მისი შეფასებით, მაშინ, როცა ამდენი პრივილეგიების ფონზე სასულიერო პირებისგან აშკარა მუქარა მოდის და კანონის იგნორირება, სახელმწიფო ზეწოლის მსხვერპლი მაინც რელიგიური უმცირესობები არიან.

ქვეყანაში კორონავირუსის მზარდი შემთხვევების გამო, მთავრობამ დამატებითი შეზღუდვები დღეს 12:00 საათიდან აამოქმედა. ახალი წესები მსუბუქი ავტომანქანებით გადაადგილებას სრულად ზღუდავს. იმ ავტომანქანების ჩამონათვალში, რომელსაც  გადაადგილების შეუზღუდავი უფლება აქვს, არ არის მითითებული სასულიერო პირები.

დამატებითი შეზღუდვა ასევე ავალდებულებს ყველა მოქალაქეს საჯარო სივრცეში ატაროს პირბადე, რასაც მართლმადიდებელი ეკლესიის სასულიერო პირების ნაწილი არ ემორჩილება.

___

მთავარი ფოტო: საპატრიარქოს ტელევიზია ერთსულოვნება

აჭარაში, ქობულეთის კლასტერთან დაკავშირებული ოთხი ადამიანის სწრაფი, ანტისხეულების ტესტის შედეგები დადებითია, თუმცა ოქროს სტანდარტად მიჩნეული PCR ტესტის პასუხი, რომლითაც დგინდება აქვს თუ არა ადამიანს ახალი კორონავირუსი – უარყოფითი. რაზე მიუთითებს ეს? რატომ არის ტესტების პასუხებს შორის განსხვავება? – ამ თემაზე „ბათუმელები“ აჭარის ჯანდაცვის მინისტრის მოადგილეს, ნინო ნიჟარაძეს ესაუბრა.

• ქალბატონო ნინო, რასთან გვაქვს საქმე ამ შემთხვევაში, რას ნიშნავს ანტისხეულების აღმოჩენა?

ანტისხეულები კორონავირუსთან მიმართებაში არის ორი სახის: G და M. M ნიშნავს მწვავე დაავადებას, G – ქრონიკულ დაავადებას. კლინიკა „მედალფაში“ წევს პაციენტი, რომელიც არის G და M-ით დადებითი, თუმცა PCR-დიაგნოსტიკით ის არის უარყოფითი, ანუ მას ახლა დაავადება არ აღენიშნება. მაგრამ რადგან პაციენტი სწრაფი ტესტით დადებითია, არის მოსაზრება, რომ ამ პაციენტს აქვს უფრო ხანდაზმული დაავადება, უკვე გადატანილი. ის ახლა კორონავირუსის მწვავე ფაზაში არ იმყოფება, მაგრამ ვინაიდან აქვს პნევმონია, წევს საავადმყოფოში და მკურნალობს.

გარდა ამისა, გვყავს კიდევ სამი პაციენტი, რომელთაც სწრაფი ტესტით მსგავსი შედეგი აქვთ, მაგრამ PCR-ტესტით, რაც არის კონფირმაციისთვის მოწოდებული, უარყოფითი შედეგი აღენიშნებათ. ეს იმას ნიშნავს, რომ ამ პაციენტებს მწვავე დაავადება ამ ეტაპზე არ აქვთ, თუმცა გარკვეულ ეტაპზე დაავადების გამოხატულება ჰქონდათ, იმუნური პასუხი სახეზეა, რაც არის ანტისხეულების კვლევის შედეგი, მაგრამ ამ პაციენტებს ახლა არც პნევმონია აქვთ, არც რაიმე ჩივილები, ამიტომ ისინი მხოლოდ ზედამხედველობის ქვეშ იმყოფებიან საკარანტინე სივრცეში.

რაც შეეხება ანტისხეულების დადებითობას. ნებისმიერი ინფექციური დაავადების ეპიდემური პროცესის დროს, მოსახლეობაში არის ერთეული შემთხვევები პაციენტებისა, რომლებიც არიან G ანტისხეულების მატარებლები. მათ არც ამ ეტაპზე, არც ადრე დაავადების განსაკუთრებული გამოვლენა არ ჰქონიათ, ვერ მიაქციეს ყურადღება ან არ იყო დაავადება კარგად გამოხატული და მსუბუქად გადაიარეს ეს ფაზა. ეს ყველა ინფექციურ დაავადებას ახასიათებს და მათ შორის კორონავირუსსაც, მაგრამ როდესაც ჩვენ ვსაუბრობთ რამდენიმე შემთხვევაზე, ესე იგი ეს არის კარგად კონტროლირებადი პროცესი, ასეთმა შემთხვევებმა შეიძლება მოიმატოს, თუმცა ჩვენ ვალდებული ვართ ყველა შემთხვევა მაქსიმალურად დროულად გამოვავლინოთ იმ ფაზაში, როცა ის საინტერესოა გადამდებლობის თვალსაზრისით და მაშინვე გავაკეთოთ მათი იზოლაცია და მკურნალობა.

სავარაუდო შემთხვევა [როცა  COVID-19-ზე ტესტირებისას არის გაურკვეველი შედეგი] – ასე ხდება მსგავსი შემთხვევების დეფინიცია ეპიდემიოლოგიაში. არის კიდე ორი განსაზღვრება – ლაბორატორიულად დადასტურებული, როცა PCR-კვლევით გვაქვს დადებითი პასუხი და, ასევე, შესაძლო შემთხვევა – ანუ როცა პაციენტს ჩივილები [სიმპტომები] აქვს და კვლევა ჯერ არ ჩატარებულა.

• კორონავირუსის დიაგნოზის დასმისას გადამწყვეტი არის PCR -ტესტი?

დიახ და ამ ტესტის პასუხი ამ ადამიანებთან მიმართებაში არის უარყოფითი.

• ანუ ამ 4 შემთხვევაში ეს ადამიანები არ მკურნალობენ კორონავირუსზე?

დიახ, არ მკურნალობენ. ეს ადამიანები არ შედიან იმ საერთო სტატისტიკაში, რომელიც საქართველოშია stop.gov.ge-ზე მითითებული, რადგან ეს არ გახლავთ ლაბორატორიულად დადასტურებული შემთხვევები.

• რით აიხსნება ის, რომ სწრაფ ტესტზე პასუხი დადებითია და PCR კვლევით – უარყოფითი?

G ანტისხეულებს გვიჩვენებს სწრაფი ტესტი. ცხვირ-ხახის ნაცხის ანალიზით PCR-კვლევა გვიჩვენებს, რომ ადამიანს ახლა აქვს კორონავირუსის მწვავე ფაზა და ეს პროცესი არის ლოკალიზებული ცხვირ-ხახაში, რესპირატორულ ტრაქტში… ამ შემთხვევაში [ოთხი ადამიანის შემთხვევაში] უარყოფითი PCR ნიშნავს, რომ ამ ადამიანებს დაავადების მწვავე ფაზა არ აქვთ. ანტისხეულების ქონა არის ორგანიზმის საპასუხო რეაქცია იმაზე, რომ მან ეს პროცესი უკვე გადაიარა.

• გერმანელი სპეციალისტები ამბობენ, რომ ანტისხეულების ტესტების დადებითი შედეგი შეიძლება მიუთითებს იმასაც, რომ ადამიანს გადატანილი აქვს კორონავირუსების ჯგუფის სხვა ვირუსი და არა ახალი Covid 19 [მოსაზრების ავტორია ქრისტიან დროსტენი, SARS-ვირუსის თანააღმომჩენი, „შარიტეს“ პროფესორი]. ეს შესაძლებელია?

შესაძლოა. ამაზე კონკრეტული პასუხი არ მაქვს, ეს ერთ-ერთი მოსაზრებაა, მაგრამ, რადგან ვირუსი ახალია, ტესტები ახალია, ამ ყველაფერზე კლინიკური კვლევა და დაკვირვება ახლა მიმდინარეობს. სავარაუდო შემთხვევებზე სხვადასხვა მოსაზრება არსებობს ეპიდემიოლოგებს შორისაც. ჯერ ხდება დაკვირვება ვირუსზე და ტესტებზე. ჩვენ ვართ დაკვირვების ეტაპზე, ერთად ვსწავლობთ ყველაფერს იმ პრაქტიკული გამოცდილებიდან გამომდინარე, რაც აქვს მსოფლიოს, ჩინეთს, ევროპის რეგიონს, ჩვენს ქვეყანას.

• როგორც კი კორონავირუსმა გავრცელება დაიწყო, ბევრი ადამიანი გამოჩნდა, რომლებიც ამბობენ, რომ მათ ჰქონდა ეს სიმპტომები იანვარსა და თებერვალში, სანამ ახალი კორონავირუსის პანდემია დადასტურდებოდა.

დიახ, ჩვენ რამდენიმე გავტესტეთ კიდეც და ყველა უარყოფითია. ყველა მინდა დავარწმუნო, იანვარში რომ მართლა ყოფილიყო კორონავირუსი, დღეს ჩვენ გვექნებოდა ძალიან ცუდი სურათი. წარმოიდგინეთ, როგორი სურათი მივიღეთ ათი დღის განმავლობაში ქობულეთში. იანვარში, თუნდაც ბათუმში რომ ყოფილიყო ეს, გვექნებოდა ინციდენტობის ძალიან მაღალი მაჩვენებელი. ამიტომ მოსახლეობას მინდა ვუთხრა, მათ ნამდვილად არ ჰქონდათ კორონავირუსი იანვრის თვეში.

• ეპიდემიოლოგები ამ ვერსიას სერიოზულად არ განიხილავენ?

არა, რა თქმა უნდა. ათი დღის წინ და ორი კვირის წინ ოთხმა შემთხვევამ მოიტანა სამი ათეული შემთხვევა რეგიონში. ეს რომ იანვარში ყოფილიყო, დღეს ჩვენ გვექნებოდა უპრეცედენტოდ მაღალი მაჩვენებელი.

• თუმცა მაშინ არ ხდებოდა კვლევა [ტესტირება] და არ არსებობდა ეჭვი ახალ ვირუსზე.

ვერ დამალავდა თავს. პნევმონიები და გრიპისმაგვარი დაავადებები მოიმატებდა ელემენტარულად. ასეთ დროს არ შეიძლება არ მოიმატოს არც გრიპმა, არც რესპირატორულმა დაავადებამ, არც პნევმონიების რაოდენობამ. ასე მარტივად ხალხი ვერ მორჩება.

იანვარში არაფრის მატება არ გვქონდა ჩვენ, გარდა სეზონური დაავადებების დამახასიათებელი მატებისა. მსგავსი უჩვეულო მატება რომ ყოფილიყო, ეს აუცილებლად მოექცეოდა ყურადღების ცენტრში.

• თქვენ აღნიშნეთ, რომ რამდენიმე ასეთ ადამიანს ჩაუტარეთ კვლევა. რამდენ ადამიანზეა საუბარი?

ერთეულ შემთხვევებზე, 2-3 ადამიანზე. კვლევა ჩატარდა არა იმიტომ, რომ მათ იანვარში ჰქონდათ მსგავსი სიმპტომები, არამედ იმიტომ, რომ უგრძელდებოდათ ხველა, ყელის ტკივილი და რომ გამოგვერიცხა რაიმე, ამიტომ ჩავატარეთ კვლევა.

აჭარის ჯანდაცვის სამინისტროს ინფორმაციით, ქობულეთის კლასტერთან დაკავშირებით ინფიცირების კიდევ ერთი შემთხვევა დადასტურდა.

ინფიცირებულია 6 წლის ბავშვი, რომლის ოჯახის ორ წევრს, დედასა და ძმას აქამდე უკვე დაუდასტურდათ კორონავირუსი.

აჭარის ჯანდაცვის სამინისტროს ინფორმაციით, არასრულწლოვანი სამკურნალოდ თბილისში გადაიყვანეს.

ბოლო მონაცემებით აჭარაში ქობულეთის კლასტერს უკავშირდება ინფიცირების უკვე 32 შემთხვევა. მათ შორის არიან ბავშვები.

„…ექიმები, რომლებიც კორონავირუსით დაინფიცირებულ პაციენტებთან მუშაობენ, მუშაობენ სხვა პაციენტებთანაც. ეს გვაშინებს და ამას არავინ ითვალისწინებს,“ – ეს ინფორმაცია ბათუმის რესპუბლიკური საავადმყოფოს ერთ-ერთმა ექთანმა მოგვაწოდა. ის ამ კლინიკის ერთ-ერთ განყოფილებაში მუშაობს ექთნად და ამბობს, რომ მისი განყოფილების ექიმები სასწრაფო-სამედიცინო დახმარების ექიმებიც არიან.

„არიან სასწრაფოს ექიმები, რომლებსაც გადაჰყავთ ცხელების ცენტრში ის ადამიანები, რომლებსაც შესაძლოა კორონავირუსი ჰქონდეთ. სასწრაფოს ცვლის შემდეგ ეს ექიმები ჩვენს განყოფილებებში რიგით პაციენტებს იღებენ, რისკის ქვეშ ვართ ჩვენც…“ – გვითხრა ბათუმის რესპუბლიკური საავადმყოფოს ექთანმა.

სამედიცინო პერსონალი, რომელიც კონკრეტულად Coivid 19-ით დაინფიცირებულ პაციენტებს ემსახურებიან, მუშაობენ თუ არა ჩვეულებრივ ექიმებად და აქვთ თუ არა მათ შემხებლობა სხვა პაციენტებთან, ან ექიმებთან? – კითხვით აჭარის ჯანდაცვის სამინისტროს მივმართეთ, რომლის პრესცენტრში გვითხრეს, რომ სამედიცინო პერსონალს სხვებთან, მათ შორის, რიგით პაციენტებთან შეხება არ აქვთ.

აჭარის ჯანდაცვის სამინისტროს პრესცენტრის ინფორმაციით, კლინიკა „მედალფაში“, სადაც COVID 19-ით დაინფიცირებული ადამიანები მკურნალობენ, სამედიცინო პერსონალი საერთოდ აღარ მიდის სახლში და მათთვის სპეციალურად სასტუმრო დაიქირავეს. ინფექციურ საავადმყოფოში მომუშავე ექიმები კი, სხვაგან არსად მუშაობენ და ცვლის დასრულების შემდეგ ოჯახებში ბრუნდებიან.

რაც შეეხება ბათუმის რესპუბლიკურ საავადმყოფოს, სადაც ახალ შენობაში მოწყობილ ცხელების ცენტრში პაციენტების მიღება 14 აპრილიდან დაიწყეს, აჭარის ჯანდაცვის სამინისტროს ინფორმაციით, სამედიცინო პერსონალი ორკვირიანი ცვლით მორიგეობს, 14 დღის გასვლის შემდეგ მათ ექიმების სხვა შემადგენლობა ჩაანაცვლებს.

აჭარის ჯანდაცვის სამინისტროს ინფორმაციით, რესპუბლიკური საავადმყოფოს მენეჯმენტმა უარყო სასწრაფო დახმარების ექიმების ჩვეულებრივ განყოფილებაში მუშაობის შემთხვევები, თუმცა მას შემდეგ, რაც პრესცენტრს კონკრეტული სამი ექიმის ვინაობა დავუსახელეთ, გვითხრეს, რომ რესპუბლიკურის დირექტორმა ექიმები უკვე გააფრთხილა და ისინი ამავე კლინიკის ჩვეულებრივ განყოფილებაში აღარ იმუშავებენ.

ექთანი, რომელიც ჩვენ დაგვიკავშირდა, გვითხრა, რომ დღეს უკვე შეუზღუდეს სამედიცინო პერსონალს, რომელიც კორონავირუსით დაავადებულ პაციენტებთან მუშაობენ, რესპუბლიკურის სხვა რომელიმე განყოფილებაში მუშაობა.

მედპერსონალში 5 პირის კორონავირუსით დაინფიცირების შემთხვევაზე ინფორმაცია გუშინ, 16 აპრილს აჭარის ჯანდაცვის მინისტრმა ისაუბრა.

დღეს, 17 აპრილს, ბათუმის საკათედრო ტაძარში გარდამოხსნის რიტუალს მრევლი და ეკლესიის მსახურები პირბადეებით ესწრებიან. დაცულია დისტანციაც. მრევლის ნაწილი ეკლესიაში ესწრება მსახურებას, ნაწილი კი – ეკლესიის ეზოში.

დახურულ საჯარო სივრცეში პირბადის ტარება 17 აპრილიდან გახდა სავალდებულო.

დღესვე ამოქმედდა კიდევ ერთი შეზღუდვა, რომელიც მანქანით გადაადგილებას ეხება. ეკლესიაში ამბობენ, რომ დღეს მრევლიც და სასულიერო პირებიც ტაძარში ფეხით მივიდნენ.

„ყველაფერში შეიძლება დავინახოთ დადებითი, რადგან მედალს აქვს ორი მხარე.

დღევანდელ დღეს რომ აიკრძალა მანქანებით მიმოსვლა, მოგეხსენებათ დღეს წითელი პარასკევია, ყველაზე მძიმე დღეა წელიწადში როდესაც კაცობრიობისათვის, ჩვენი ცოდვებისათვის, მაცხოვარი იესო ქრისტე ჯვარზე იქნა გაკრული.

ჯვარცმამდე სისხლიან ჯვარს მიათრევდა ფეხით გოლგოთაზე. იერუსალიმში ესეთი ტრადიციაა, ვია დოლოროსას ეძახიან ამ გზას, ფეხით გადიან მორწმუნენი. ამაშიც მე რაღაც დადებითი ვნახე, როდესაც ფეხით მოვდიოდი ეკლესიაში უფრო მეტად ამაღლებული და სულიერი განწყობა შემექმნა“ – თქვა ჟურნალისტებთან ეპარქიის პრესსპიკერმა იოანე გორელიშვილმა.

გორელიშვილის განცხადებით ეპარქიის მღვდელმთავრებზე დაშვებულია საშვები და ისინი შეუფერხებლად შეძლებენ გადაადგილებას სამების მონასტრამდე, სადაც ღამის 12 საათზე დაიწყება სააღდგომო ლიტურგია. მსახურება აჭარის ტელევიზიით პირდაპირ ეთერში გადაიცემა.

ამავე თემაზე: 

საქართველოს ევანგელური ეკლესიების ალიანსი განცხადებას ავრცელებს, სადაც აღნიშნულია, რომ „საქართველოს ევანგელურმა ეკლესიებმა გამოიჩინეს მაღალი სამოქალაქო და სულიერი პასუხისმგებლობა, შეცვალეს რა ღვთისმსახურების ფორმა, რაც პირდაპირ შეესაბამება უფლის მცნებებს: „გიყვარდეს მოყვასი შენი, ვითარცა თავი შენი“ (მთ 22:39) და: „არ გამოსცადო უფალი ღმერთი შენი“ (მთ 4:7)“.

„ამავე დროს აბსოლუტურად მიუღებლად მიგვაჩნია გარკვეული რელიგიური მოღვაწეების მხრიდან ჩვენს ამ ყოველმხრივ მართებულ საქციელზე მცირედმორწმუნეობისა თუ შიშის იარლიყის მიწებება.

შესაბამისად, ვაცხადებთ, რომ ეპიდემიის შესაძლო მასიურ გავრცელებაზე ჩვენს ქვეყანაში, სრული პასუხისმგებლობა ეკისრება ყველა იმ რელიგიურ მოღვაწეს, რომელმაც არ გაითვალისწინა ქვეყნის წინაშე არსებული საფრთხე და არ დაემორჩილა მიღებულ საგანგებო წესებს.

მოვუწოდებთ მთავრობას უზრუნველყოს, მის მიერვე მიღებული საგანგებო რეჟიმის წესების აღსრულება ყველა რელიგიის მიმართებაში ყოველგვარი დისკრიმინაციის გარეშე.

მოვუწოდებთ აგრეთვე, საქართველოს ყველა მოქალაქეს, მაქსიმალურად მოერიდოს საზოგადოებრივი თავშეყრის ადგილებს – იქნება ეს ტაძრები, სამლოცველო სახლები თუ მეჩეთები – ეპიდემიის საფრთხის გადავლამდე, რადგან მიგვაჩნია, რომ ამ ვითარებაში მხოლოდ ასეთი მიდგომა წარმოაჩენს წრფელ სიყვარულს ღვთისა და მოყვასისადმი“ – ნათქვამია ალიანსის განცხადებაში, რომელიც დღეს, 17 აპრილს გავრცელდა.

საქართველოს საპატრიაქრო განცხადებას ავრცელებს, რომლის თანახმადაც მსუბუქი ავტომობილებით გადაადგილების აკრძალვა სასულიერო პირებს და სტიქაროსნებს არ ეხებათ.

„გუშინ, 16 აპრილის საღამოს, მთავრობის ადმინისტრაციამ განაცხადა, რომ 17 აპრილს, ანუ ვნების პარასკევს 12 სთ-დან მსუბუქ მანქანებს ეკრძალებათ გადაადგილება, რამაც მოსახლეობაში და რა თქმა უნდა სასულიერო პირთა და მორწმუნეთა შორისაც, დიდი უკმაყოფილება გამოიწვია.

აღნიშნული აკრძალვა საქართველოს საპატრიარქოსთან შეთანხმებული არ ყოფილა. როგორც შემდეგ სატელეფონო საუბრით გაირკვა, სასულიერო პირებს, მგალობლებს, სტიქაროსნებს გადაადგილების საშუალება ექნებათ როგორც დღევანდელი, ისე სააღდგომო მსახურებისთვის.

სამწუხაროდ, მრევლს ამის შესაძლებლობას არ აძლევენ,” – წერია საპატრიარქოს განცხადებაში.

საქართველოს მთავრობის მიერ მიღებული ახალი გადაწყვეტილებით, 17 აპრილის 12:00 საათიდან, საგანგებო მდგომარეობის მოქმედების ვადით, ანუ  21 აპრილის ჩათვლით, სრულად იკრძალება მთელი ქვეყნის მასშტაბით მსუბუქი ავტომობილებით გადაადგილება.

17 აპრილის დღის 12:00 საათიდან საქართველოში იკრძალება მექანიკური სატრანსპორტო საშუალებებით [მათ შორის მსუბუქი ავტომობილებით] გადაადგილება გარდა მოტოციკლისა.

[checklist]

•  საერთაშორისო და ადგილობრივ სატვირთო გადაზიდვებს;
• საქართველოში აკრედიტებული დიპლომატიური კორპუსის წარმომადგენლების სამსახურებრივი საქმიანობიდან გამომდინარე გადაადგილებას;
• საერთაშორისო ორგანიზაციების ჰუმანიტარული მიზნებისთვის გადაადგილებას;
• სამედიცინო დაწესებულების თანამშრომლების სამსახურებრივი საქმიანობიდან გამომდინარე გადაადგილებას;
• სამედიცინო მომსახურების გაწევის/მიღების მიზნით გადაადგილებას;
• ჟურნალისტური საქმიანობის განხორციელების მიზნით, ოპერაციულ შტაბთან შეთანხმებულ სიაში მყოფ მედიასაშუალებების წარმომადგენელთა გადაადგილებას;
• შენობების საერთო დასუფთავებისა და დეზინფექციის მომსახურების გაწევის მიზნით გადაადგილებას;
• ფიზიკური პირის გადაადგილებას საჯარო დაწესებულებაში მისვლის მიზნით (გარდა ამავე საჯარო დაწესებულებაში დასაქმებული ფიზიკური პირისა), რაც დასტურდება საჯარო დაწესებულების მიერ მისთვის გაგზავნილი შეტყობინებით/უწყებით;
• ფულადი სახსრების, ძვირფასი ლითონებისა და სხვა ფასეულობათა ინკასირებას;
• ბანკომატების, თვითმომსახურების კიოსკებისა და პოსტერმინალების უწყვეტი ფუნქციონირებისათვის საჭირო საქმიანობის განხორციელების მიზნით გადაადგილებას;
• კერძო დაცვითი საქმიანობის განხორციელების მიზნით გადაადგილებას;
• მიცვალებულის გადასვენების/დაკრძალვის მიზნით გადაადგილებას, ასევე სარიტუალო მომსახურების გაწევის მიზნით გადაადგილებას;
• საფოსტო და საკურიერო მომსახურების მიზნით გადაადგილებას;
• საკვები პროდუქტის, სურსათისა და სამედიცინო დანიშნულების საქონლის/ფარმაცევტული პროდუქტის მიტანის მომსახურების (ე.წ. „დელივერი სერვისი“) გაწევის მიზნით გადაადგილებას;
• სასოფლო-სამეურნეო მანქანის/ტექნიკის გადაადგილებას;
• დაშვებული ეკონომიკური საქმიანობის განხორციელების მიზნით, სამშენებლო მანქანის/ტექნიკის გადაადგილებას;
• ევაკუატორით მომსახურების მიზნით გადაადგილებას;
• ელექტროენერგიის, ბუნებრივი გაზის, წყლის წარმოების/გადაცემის/განაწილების/მიწოდების, ასევე სატელეკომუნიკაციო და ნარჩენების მართვასთან დაკავშირებული მომსახურების მიწოდების მიზნით გადაადგილებას;
• მომეტებული ტექნიკური საფრთხის შემცველი ობიექტების (მათ შორის ლიფტი, გაზსადენი და სხვა), ასევე წყლის/გაზის/ელექტროენერგიის/ინტერნეტის შეკეთების მომსახურების გაწევის მიზნით გადაადგილებას;
• საჯარო დაწესებულებების მიერ ოპერაციულ შტაბთან შეთანხმებულ სიაში მყოფ პირებს, რომელთა გადაადგილებაც კრიტიკულად აუცილებელია საგანგებო მდგომარეობის დროს სამსახურებრივი მოვალეობის შესასრულებლად;
• ბრალდებულების/მსჯავრდებულების გადაყვანას;
• დაშვებული ეკონომიკური საქმიანობის უზრუნველყოფის მიზნით, გათვალისწინებული M2 და M3 კატეგორიების ავტოსატრანსპორტო საშუალებების გადაადგილებას.

[/checklist]

დღეს, 17 აპრილის 12:00 საათიდან აკრძალულია ასევე სასაფლაოს ტერიტორიაზე შესვლა.

[checklist]

• ეს აკრძალვა არ ეხება სასაფლაოს ტერიტორიაზე იმ ღონისძიებების განხორციელების მიზნით შესვლას და გადაადგილებას, რომელიც აუცილებელია მიცვალებულის დაკრძალვისათვის.

[/checklist]

ამ თემაზე:

მას შემდეგ, რაც კორონავირუსით დაინფიცირებულთა სტატისტიკა საქართველოში ყოველდღიურად  ათეულობით იზრდება, უფრო ხშირად საუბრობენ იმაზე, რომ ხელისუფლებამ გონივრულად უნდა გამოიყენოს დრო ეპიდაფეთქებამდე პროპორციული ეკონომიკური გადაწყვეტილებების მისაღებად, რადგან იგივე სიმწვავით დგას საკითხი ე.წ. მეორე ფრონტზეც. მოქმედების რა შესაძლებლობებს ხედავს ექსპერტი და როგორ აფასებს იმ ნაბიჯებს, რომლებიც მთავრობამ ამ დრომდე გადადგა. ამ და სხვა კითხვებს ეკონომისტი აკაკი ცომაია პასუხობს.

• ბატონო აკაკი, ვიდრე კონკრეტულ საკითხებს შევეხებოდეთ, ზოგადად რომ შეგვიფასოთ, რა ვითარება გვაქვს ე.წ. მეორე ფრონტზე, რომ აგვიხსნათ ვითარების სიმწვავე, მისი ხარისხი რომ გახდეს უფრო მარტივად აღქმადი?

რაც ხდება იქედან გამომდინარე, საქართველოს ვერ განვიხილავთ იზოლირებულად მსოფლიოსგან – საქართველოში იწყება ძირითადი ეკონომიკური მაჩვენებლების მკვეთრი შემცირება. პირველი, ცხადია, გახლავთ ტურიზმი. ტურიზმის სექტორი, ფაქტობრივად, მთლიანად გაჩერდა, ასევე მასთან ასოცირებული სექტორები – კაფეები, რესტორნები და ასე შემდეგ. უკვე გვაქვს მასშტაბური უმუშევრობა. ამასთან, თანდათან ზომები გაამკაცრეს, შემოიღეს საგანგებო მდგომარეობა, დაიხურა თითქმის ყველა საცალო სავაჭრო ობიექტი, რამაც კიდევ უფრო მეტად დაამძიმა მდგომარეობა. ამას დაემატა ონლაინ გაყიდვების აკრძალვა უმეტესი მიმართულებით, რამაც კიდევ უფრო მეტად გაზარდა უმუშევრობის დონე საქართველოში. ფაქტობრივად, უკვე შეგვიძლია ვთქვათ, რომ საკმაოდ მძიმე ეკონომიკური კრიზისის, ანუ რეცესიის ზღვარზე ვართ და არც უახლოესი მომავალი გვაძლევს ოპტიმისტური პროგნოზის შესაძლებლობას. როგორც ამბობენ, ჯერ კიდევ ველოდებით პიკს და უფრო მეტად მოსალოდნელია ზომების გამკაცრება, ვიდრე მათი შერბილება.

ამ ფონზე ყოველი შემდგომი დღე უფრო მძიმე იქნება თითოეული ჩვენგანისთვის. ყოველი მეტი დღე მოგვიტანს მეტ დანაკარგს, თანაც ეს დანაკარგი პროგრესირდება. როგორც ვირუსის გავრცელება იწყებს ზრდას, ასევე დანაკარგიც პროგრესირდება. რაც უფრო მეტ ხანს ვიქნებით გაჩერებული, უფრო მეტ და მეტ დანაკარგს იღებს საქართველოს ეკონომიკა, ეს არის რეალობა.

• რამდენად სწორი, ეფექტური და საკმარისი იყო ხელისუფლების ნაბიჯები ამ მიმართულებით?

სხვადასხვა ტიპის აქტივობის შეზღუდვა იყო აუცილებელი, ამაზე შეგვიძლია ვიდავოთ, ყოველი შემთხვევისთვის დღის წესრიგში არ დგას ახლა საკითხი, უნდა შეგვეზღუდა თუ არა აქტივობები. დავუშვათ, რომ ეს სწორი გადაწყვეტილება იყო, მაგრამ ყველაფერს აქვს თავისი ადგილი. გარკვეული მოქმედებები მთავრობის მაინცა და მაინც არ არის ახსნადი. მაგალითად, კომენდანტის საათი საღამოს ცხრა საათის შემდეგ.

როდესაც რაღაცას ვზღუდავთ, ამ შეზღუდვის სარგებელი და ხარჯი უნდა შევადაროთ ერთმანეთს, ამ კონკრეტულმა შეზღუდვამ უნდა მოახდინოს რაღაცის პრევენცია. საღამოს ცხრა საათის შემდეგ შეზღუდვამ, რამდენით შეამცირა ვირუსის გავრცელების ტემპი, ეს უნდა დავითვალოთ და მეორე მხარეს დავითვალოთ პირობითად ზარალი, რომელიც შეიძლება მიეღო საზოგადოებას. ონლაინ გაყიდვების აკრძალვა მაშინ, როცა ჰიპერმარკეტებში, სუპრემარკეტებში უამრავი ადამიანი შედის დახურულ სივრცეში, რომელიც არ ნიავდება, სადაც მაღალია ვირუსის გავრცელების რისკი, ონლაინ გაყიდვების აკრძალვამ რა სარგებელი მისცა დამატებით საზოგადოებას? – უფრო მეტად ხომ ვერ გაიზრდებოდა გავრცელების ალბათობა, ვიდრე სუპერმარკეტებსა და ჰიპერმარკეტებში შეიძლება გაიზარდოს. ზოგადად, ონლაინ გაყიდვების სპეციფიკა არის ძალიან მცირეა კონტაქტი. ეს კონტაქტი ხდება ღია სივრცეში და მათი რაოდენობა მცირეა, ანუ გავრცელების მასშტაბი არ იყო მაღალი. ონლაინ გაყიდვების აკრძალვით ჩათვალეთ, რომ მაღაზიებს, რომლებიც ახლა დახურულია – ტექნიკის იქნება ეს თუ სხვა, აღარა აქვთ შესაძლებლობა, რომ პროდუქცია გაყიდონ, ზარალი აქ ძალიან დიდია. ანუ კიდევ უფრო მეტი უმუშევარი დაემატა, კიდევ უფრო ნაკლები ეკონომიკური აქტივობა გვაქვს. შესაბამისად, ნაკლები ტრანზაქცია სრულდება, ანუ  დანაკარგი აქ ცალსახად არის, მაგრამ გაურკვეველია ამით რა მოვიგეთ.

აგრარული ბაზრებში, რომლებიც ღია სივრცეს, ვკრძალავთ  ეკონომიკურ აქტივობას და ისევ სუპერმარკეტებსა და ჰიპერმარკეტებში ვუშვებთ. იქ არის უფრო მეტად გავრცელების რისკი, ვიდრე აგრარულ ბაზრებში, ღია სივრცეში შეიძლება იყოს? რატომ ვზღუდავთ ამ აქტივობებს? – ეს ხომ ისევ და ისევ ადამიანების შემოსავლებზე მოქმედებს. რა აზრი აქვს ამას – ამით ვახდენთ დაავადების გავრცელების პრევენციას?  მინიმალური პრევენცია და დიდი ზარალი რამდენად შეესაბამება ერთმანეთს? – ასიმეტრია გვაქვს, თითოეული მოქმედება უნდა განვიხილოთ ამ ჭრილში.

ბევრი ასეთი მოქმედება არის გაუგებარი, განსაკუთრებით, როდესაც ისეთი მკაცრი შეზღუდვები წესდება, რაც ეკონომიკურ აგენტებს მთლიანად აჩერებს. ამ დროს ძალინ დიდი რისკის კერებს, ეს არის ეკლესიებში შეკრება, სადაც ნამდვილად არსებობს დავადების გავრცელების რისკი,ადამიანების ძალიან დიდ ჯგუფს, მთავრობა ვერ აკონტროლებს. შესაბამისად, ფასი, რომელსაც ვიხდით – ვართ გაჩერებულები, ეკონომიკური აქტივობა დაღმასვლის გზაზეა და ეს ძალიან მწვავედ მოგხვდება, კიდევ უფრო მეტად მოგვიწევს სახლში გამოკეტვა, ანუ კიდევ უფრო მეტი ზარალი უნდა მივიღოთ იმის გამო, რომ ყველაზე მაღალი რისკის კერები სადაც არის, მათ მთავრობა უბრალოდ ვერ უვლის, არის ძალიან მაღალი. არ ვიცი, რა დავარქვა ამ მოქმედებას. აი, ეს მოქმედებები არის გაუგებარი და ძალიან არაეფექტური.

ცხადია, ჯობს თითოეული ჩვენგანი უფრო აქეთკენ იყოს მიმართული, ევროპაც ხომ ამაზე გადადის, ყველა მთავრობამ და საზოგადოებებმა დაინახა, რომ ამ ვირუსთან ერთად უნდა მოგვიწიოს ცხოვრება. უკვე ემზადება მსოფლიო ამისათვის და ეს ნიშნავს, რომ უნდა ვიცოდეთ ერთმანეთთან ურთიერთობების წესები, რომლებიც უნდა შეიცვალოს. ამ წესების დაცვით უნდა გაგრძელდეს  ეკონომიკური აქტივობა.

• რამდენიმე სცენარი რომ განვიხილოთ, თუ კრიზისი ზაფხულის განმავლობაში ან შემდეგაც გაგრძელდა, რა შეიძლება მივიღოთ? – თუ ზაფხულში შესუსტდა ვირუსის გავრცელება და შესაძლებელი გახდა შეზღუდვების მოხსნა, მაშინ რას მივიღებთ?

გრძელვადიანი პერიოდიც საკმაოდ არასახარბიელო ჩანს მოცემულ მომენტში საქართველოსთვის – ჩვენი ეკონომიკის სექტორული განვითარება იყო ისეთნაირად მოწყობილი, რომ მეხუთედი შემოსავლებისა მოდიოდა ტურიზმზე. სავარაუდოდ, ტურიზმი ასე სწრაფად ვერ აღდგება მთელი მსოფლიო რომც გაიხსნას, ისეთი გახდეს, როგორიც იყო პანდემიამდე. ტურისტები ვერ დაიწყებენ ასე სწრაფად სიარულს, საქართველო ვერ მიიღებს ტურისტების იმ ნაკადს, რასაც იღებდა ადრე. ამას დრო სჭირდება, ადამიანები ჯერ ფეხზე უნდა წამოდგნენ, ეკონომიური შემოსავლები უნდა ჰქონდეთ, დანაზოგები უნდა შექმნან, ამას ალბათ დასჭირდება წლები. ამიტომ ჩვენ ვერ დავუბრუნდებით ზრდის იმავე ტემპს და თუ ტურიზმი ვერ დაბრუნდება ზრდის ტემპს, ეს ნიშნავს, რომ მშენებლობა, რომელიც იყო ნაწილობრივ დამოკიდებული ტურიზმის ზრდის ტემპზე, იმავე ტემპით ვეღარ გაიზრდება, ტრანსპორტი, რომელიც ასევე დამოკიდებული იყო ტურიზმის ზრდის ტემპზე, იმავე ტემპით ვერ გაიზრდება. ანუ ჩვენი ეკონომიკა უფრო დაბალი ტემპით დაიწყებს  განვითარებას, ჩვენ დაგვაკლდება შემოსავლები და კიდევ უფრო მეტად მძიმე მდგომარეობაში აღმოვჩნდებით. ამიტომ საჭიროა რაღაც ახალი ძრავა, ლოკომოტივი, ინვესტიცია, რომელმაც ეს ქვეყანა უნდა გაიყვანოს გლობალურ ბაზარზე.

ეს ინვესტიცია შეიძლებოდა ყოფილიყო თუნდაც ანაკლიის პორტი, ის იყო კარგი ტრამპლინი ამ მიმართულებით. ერთგვარი ტრამპლინი იქნებოდა იმისათვის, რომ რაღაცა ახალი მიმართულება, ახალი გეზი მიგვეცა, საერთაშორისო ბაზარზე ახალი ადგილი დაგვემკვიდრებინა. მთავრობა ამ მიმართულებითაც დუმს. თუ ჩუმად მუშაობს და სიურპრიზსს გვიმზადებს, არ ვიცი, მაგრამ მე ამის იმედი ნამდვილად არა მაქვს. ეს მატარებელი ჩაივლის, ანუ გაივლის ეს შესაძლებლობა, ცხადია, დაიკარგება და მერე ძალიან რთული იქნება ათვისებულ ბაზარზე შესვლა. ანაკლიის პორტს ჰყავდა საკმაოდ კარგი ინვესტორები, სერიოზული კორპორაციები, რომლებიც ამაში მონაწილეობდნენ. მათ უარი უთხრა და ახლა რთული იქნება ელაპარაკო მსხვილ ინვესტორებს, რომ საქართველოში რამე გააკეთონ. იმისათვის, რომ ეს ინვესტიცია მოიზიდო, უნდა გქონდეს დემოკრატიული, თავისუფალი ქვეყანა, სამართლიანი სასამართლო და გამართული სასამართლო პროცესი. ამისთვის არ არის მზად ეს ქვეყანა. შესაბამისად, უშვებს შანსს, რომ გახდეს ეკონომიკური ზრდის საკმაოდ კარგი მაგალითი.

• რა შეიძლება დაემართოს ამ პერიოდში ლარს?

პროგნოზი შეუძლებელია. სცენარი ბევრნაირი შეიძლება იყოს, შემიძლია ისეთი სცენარიც გითხრათ, რომ ლარი გამყარდეს, მოთხოვნა ბაზარზე მცირდება, ყველაფერი გაჩერებულია, არაფერი აღარ იყიდება. შესაბამისად, დოლარზე მოთხოვნა არ არის და ლარი მყარდება. სცენარი მეორე: მთელი მსოფლიო ყიდულობს დოლარს, რადგან სურს დაარეზერვოს თავისი დანაზოგი დოლარში. ეს ნიშნავს, რომ დანარჩენი ქვეყნების ვალუტები უფასურდება და ეს გამოიწვევს ანალოგიურ ტალღას საქართველოში. ვისაც აქვს დანაზოგები ლარში, გადაიყვანენ დოლარში, რაც გამოიწვევს ლარის გაუფასურებას. ვთქვათ, უცხოური ვალუტის შემოდინების კლებამ დაასწროს იმპორტს, ანუ აღმოჩნდეს, რომ დოლარის მიწოდება შემცირდა, ეს გამოიწვევს დოლარის დეფიციტს, რაც ასევე გამოიწვევს ლარის გაუფასურებას, ანუ  ყველაფერია მოსალოდნელი – შეიძლება ლარი გამყარდეს, შეიძლება გაუფასურდეს. ჯერჯერობით, ლარი სტაბილურია და ასე თუ გაგრძელდა შეიძლება უფრო მეტად გამყარდეს, ვიდრე გაუფასურდეს.

• ბიზნეს-ჯგუფებმა შეიმუშავეს რეკომენდაციები მთავრობისთვის, რაც გულისხმობს რიგი გადასახადების [საშემოსავლო და ქონების გადასახადების, საპენსიო შენატანის] შეჩერებას 6 თვით და დღგ-ს გადახდის გადავადებას პროდუქციის განბაჟებიდან მისი რეალიზაციის ეტაპამდე – რას იტყვით ამაზე? ასეთ შემთხვევაში წლის ბოლოს ბიუჯეტს რამდენიმე მილიონი დააკლდება?

ბიუჯეტის ძირითადი ნაწილი ივსება არა მცირე და საშუალო ბიზნესით, არამედ მსხვილი ბიზნესით. დიდი კომპანიები ასე თუ ისე აგრძელებენ თავიანთ საქმიანობას. ცხადია, ბიუჯეტის შემოსავალს დააკლდება რაღაცა თანხა და საშემოსავლო ნაწილი ვერ შესრულდება. თუმცა, როდესაც ვსაუბრობთ ამ ორმილიარდიან დახმარებაზე, სინამდვილეში ეს არის არა დახმარება – ჩვენ ასე გვაწვდიან, ასე ფუთავენ თითქოს ორი მილიარდი ლარი იდება ეკონომიკაში – ეს არის გადავადება. ამ ორ მილიარდში საბანკო სექტორის ვალების გადავადებაც ითვლება. ამ შემთხვევაში დახმარება გამოიხატება იმაში, რომ ჩვენ კრიზისის პერიოდში გვეძლევა შესაძლებლობა, ხელში დავიჭიროთ ლიკვიდობა, ფულის ქრონიკული დეფიციტის მდგომარეობაში რომ  არ აღმოვჩნდეთ. საბანკო კრედიტების გადავადებაც ამის მაგალითია. გადასახადის გადავადებაც ამის მაგალითია, მაგრამ ექვსი თვის შემდეგ ხომ უნდა გადავიხადოთ ის გადასახადები, რომლებიც გადავადდა, იმასთან ერთად, რაც დამატებით დაირიცხება. ანუ აქ კერძო სექტორში ფულის ჩატოვებაზე არ არის საუბარი. ეს არის ამ ექვსი თვის განმავლობაში ლიკვიდობის მართვის, შერბილების მცდელობა. ერთადერთი, რაც დარჩა კერძო სექტორში არის ის, რომ მთავრობამ კომუნალური გადასახადები დაგვისუფსიდირა კონკრეტულ ჯგუფს.

• რამდენად შეიძლება ასეთ ვითარებაში საერთაშორისო დახმარების იმედი გვქონდეს, როცა ყველაგან კრიზისია?

იმ პირობებში, როგორშიც არის მსოფლიო დღეს, საქართველოს საკმაოდ სოლიდური დახმარება ექნება. ყოველ შემთხვევაში ცნობილია, რომ 1.5 მილიარდი დოლარი ფინანსურ სექტორს მოხმარდება საჭიროების შემთხვევაში. თუ ფინანსურ სექტორს შეექმნა ლიკვიდობის პრობლემა, მაგალითად მოხდება ისე, რომ გადავადების შემდეგაც ადამიანები ვერ აბრუნებენ კრედიტებს და ფინანსურ სექტორს არ აქვს უკვე საკმარისი ვალუტა, რომ დააკმაყოფილოს კლიენტის მოთხოვნები.  ფინანსური სექტორი ამ ვალდებულებებს ვერ გადაავადებს, ლიკვიდობა, რომელიც უნდა ჰქონდეს მისი მდგრადობისთვის, ეს აუცილებელია და თუ ფინანსურ სექტორს გაუჭირდება, მაშინ ამისთვის მზადყოფნა არსებობს. მეორე მხრივ არის სავალუტო ფონდის 87 მილიონი, რომლის ნაწილიც ეროვნულ ბანკში შევა რეზერვის სახით. მნიშვნელოვანია, რომ ეროვნულმა ბანკმა შეძლოს ცეცხლის ჩაქრობა დოლარის დეფიციტის შემთხვევაში, რაც იმიტომ არის მოსალოდნელი, რომ ტურიზმი გაჩერებულია და ფულადი გზავნილები მკვეთრად შემცირდება.

• საერთაშორისო სავალუტო ფონდის (IMF) პროგნოზით, 2020 წელს საქართველოს მთლიანი შიდა პროდუქტი (მშპ) 4%-ით შემცირდება, ბიუჯეტის დეფიციტი კი მშპ-ს 8.5%-მდე გაიზრდება. ეს რას ნიშნავს ამ ქვეყნის მოქალაქეებისთვის?

ეს პროგნოზები არაფერს ნიშნავს, ჯერ ერთი პროგნოზების გაკეთება საკმაოდ რთული საკითხია, ვინც არ უნდა აკეთებდეს ამას, სავალუტო ფონდი იქნება ეს თუ სხვა. ძალიან ბევრი სცენარი გაქვს, როგორ შეიძლება განვითარდეს მოვლენები. ამ მოვლენების განვითარების შესაძლო ალბათობებს ადგენ და ამ ალბათობების მიხედვით ითვლი კონკრეტულ მაჩვენებლებს. ამის მიხედვით გამოგყავს გრაფიკები და შემდეგ იღებ გამოსახულებას. ეს არ ნიშნავს, რომ რეალობაც ასეთი იქნება. ყველაზე მთავარი კი ის არის, რომ პროგნოზის გაკეთება შეუძლებელია. სულ მცირე უნდა ვიცოდეთ, როდის მორჩება მსოფლიო სახლში ჯდომას და დაიწყებს მუშაობას. მანამდე შეუძლებელია იმის პროგნოზირება, თუ რამდენი იქნება ეკონომიკური ზრდის ტემპი. ეს პროგნოზი მე, პირადად, არაფერს მეუბნება, პირიქით ვვარაუდობ, რომ უფრო მაღალი იქნება რეცესია, ვიდრე სავალუტო ფონდი პროგნოზირებს. ვგრძნობ, რომ 10 მაისს არ დასრულდება კარანტინი და კიდევ გაგრძელდება.

ჩვენთან შემოსავლები ასიმეტრიულად არის გადანაწილებული, განსაკუთრებით 2012 წლის შემდეგ. არ ვიცი რატომ მოხდა ასე, მაგრამ საზოგადოებაში გამოიკვეთა ძალიან მდიდარი ადამიანები და ეს ადამიანები განსაკუთრებით გამდიდრდნენ ბოლო პერიოდში, კლასტერი შეიქმნა [მოდაშია ეს სიტყვა], რომლებიც ბიუჯეტს ჭამენ. ასევე აქვთ არანორმალური ხელფასებიც, გარდა იმისა, რომ საბიუჯეტო ტენდერებში სავარაუდოდ მონაწილეობენ. არის კომპანიები, რომლებიც ამ ტენდერებს იგებენ, შემდეგ საერთო ფონდში რიცხავენ თანხებს არჩევნების წინ, შემდეგ კი ჩნდებიან ადამიანები, რომლებსაც უგროვდებათ არანორმალური ოდენობის ქონება… საშუალო შემოსავალიც გვაქვს, რომელიც სტაბილურად იზრდებოდა ეკონომიკის კვალდაკვალ, მაგრამ გადანაწილება ძალიან არაპროპორციულია. ეს ნიშნავს, რომ ადამიანების დიდი ნაწილი ძალიან გაღარიბდა, მაშინ როცა მცირე ნაწილი ძალიან გამდიდრდა. ეს კიდევ უფრო მეტ მწვავე ფონს შექმნის, ანუ რეცესია ამ სურათს კიდევ უფრო დაამძიმებს. სოციალური ფონი ძალიან დამძიმდება.

• პრემიერმა განცხადა, რომ მოიცლის ყველასთვის, ვინც თანამშრომელს ხელფასი არ გადაუხადა – ამაზეც მაინტერესებს თქვენი მოსაზრება. ვიცით, რომ დიდი კომპანიების უმეტესობამ მარტის ხელფასები გადაუხადა დასაქმებულებს, მაგრამ მათ არ ჰქონდათ პასუხი კითხვაზე აპრილთან დაკავშირებით, თუ შეზღუდვები გაგრძელდებოდა.

მოგაკითხავთ ყველას, ასეთი მსჯელობა, მეტყველების ასეთი სტილი პრემიერისგან, რომელიც ბიზნესს ელაპარაკება, არათუ არაეთიკურია, ძალიან საგანგაშოა. ქვეყანაში, რომელიც ამბობს, რომ კერძო საკუთრებაზე დგას [კონსტიტუციურად საზოგადოება ქმნის დოვლათს კერძო საკუთრების მეშვეობით], ელაპარაკო ბიზნესს ასეთი ენით, ეს, რა თქმა უნდა, რბილად რომ ვთქვათ, ძალიან არასწორია, არც ეთიკურია. პრემიერმა იგულისხმა სამართლებრივი ასპექტი – შრომის კოდექსით როცა უშვებ ადამიანს, კომპენსაცია უნდა გადაუხადო. მაგრამ ბიზნესი არ გაჩერებულა თავისი ნებით და თავისი არასწორი გადაწყვეტილებებით, მთავრობამ გააკეთა, თქვა – თქვენ უნდა გაჩერდეთ, სახლში უნდა იჯდეთ, ეს ფორსმაჟორია. ეს ტონი და მეტყველების სტილი დაუშვებელია, მით უმეტეს ეს ის პრემიერია, რომელმაც ახალგაზრდებს თვალები დათხარა, ეს ის პრემიერია, რომელიც რევერანსებს უკეთებს საპატრიარქოს, ვერ მიუხედია ელემენტარული პრობლემისთვის და საზოგადოებისკენ იშვერს ხელს, რომ ჩვენ უნდა ავიღოთ პასუხიმგებლობა იმაზე, რაც ცალსახად მისი პასუხისმგებლობაა. ის ამ ლაქას ვერასოდეს ვერ მოიშორებს.

17 აპრილის [10:20 სთ] მონაცემებით, საქართველოში დადასტურებულია ახალი კორონავირუსის 370 შემთხვევა.  გუშინდელ მონაცემებთან შედარებით ინფიცირებულთა რიცხვი 22-ით გაიზარდა.

ინფიცირებული 370 პირიდან გამოჯანმრთელდა 77 ადამიანი, გარდაიცვალა – 3.

ბოლო მონაცემებით, საქართველოში კარანტინის რეჟიმში იმყოფება 5079 ადამიანი,  სტაციონარში მეთვალყურეობის ქვეშ კი – 558. 

ასევე, უცხოეთიდან სამკურნალოდ გადმოყვანილია საქართველოს 3 მოქალაქე.

ამავე თემაზე: 

საქართველოს მთავრობის მიერ მიღებული ახალი გადაწყვეტილებით, 17 აპრილის 12:00 საათიდან, საგანგებო მდგომარეობის მოქმედების ვადით, ანუ  21 აპრილის ჩათვლით, სრულად იკრძალება მთელი ქვეყნის მასშტაბით მსუბუქი ავტომობილებით გადაადგილება. საქართველოს მთავრობის ადმინისტრაციამ გამოაქვეყნა დეტალური განმარტება, ახალი შეზღუდვების შესახებ, რომელსაც უცვლელად გთავაზობთ.

რომელი სატრანსპორტო საშუალებით მეზღუდება გადაადგილება?

იკრძალება გადაადგილება ყველა სახის მექანიკური სატრანსპორტო საშუალებით, გარდა მოტოციკლისა.

 რომელი სატრანსპორტო საშუალებით შემიძლია გადაადგილება?

არ იკრძალება მოტოციკლით, მოპედით და ველოსიპედით გადაადგილება.

ეხება თუ არა შეზღუდვა ტაქსებს?

შეზღუდვა ეხებათ ტაქსით გადაადგილების მომსახურებასაც.

როგორ შემიძლია მოვიპოვო საშვი მანქანით გადაადგილებისთვის?

იმ შემთხვევაში, თუ თქვენ ეწევით დასაშვებ ეკონომიკურ საქმიანობას, საშვის მოსაპოვებლად უნდა მიმართოთ დარგობრივ სამინისტროს (მაგ.: სოფლის მეურნეობის ან ეკონომიკის სამინისტრო).
თუ თქვენ ეწევით ისეთ საქმიანობას, რომელზე ზედამხედველობასაც არ ეწევა არცერთი დარგობრივი სამინისტრო და თქვენი გადაადგილება, თქვენი საქმიანობიდან გამომდინარე, წარმოადგენს უკიდურეს აუცილებლობას, უნდა დარეკოთ ცხელ ხაზზე – 144.

ვმუშაობ დაშვებული ეკონომიკური საქმიანობის ფარგლებში. როგორ უნდა მივიდე სამსახურამდე?

თქვენი გადაადგილება საცხოვრებლიდან სამსახურამდე და პირიქით, უნდა უზრუნველყოს თქვენმა დამსაქმებელმა.

ვარ დაშვებული ეკონომიკური საქმიანობის განმახორციელებელი კომპანია. როგორ უნდა გადაადგილდნენ ჩემი თანამშრომლები სამსახურამდე?

დაშვებული ეკონომიკური საქმიანობის განმახორციელებელი სუბიექტი ვალდებულია, უზრუნველყოს თანამშრომელთა გადაადგილება M2(მიკროავტობუსით) და M3(ავტობუსით) კატეგორიების ავტოსატრანსპორტო საშუალებით. აღნიშნული ნებართვის მისაღებად, კომპანიამ უნდა მიმართოს შესაბამის მუნიციპალიტეტს. მუნიციპალიტეტი უზრუნველყოფს M2 და M3 კატეგორიის ავტოსატრანსპორტო საშუალებებით მგზავრთა გადაყვანის მიზნით მარშუტების განსაზღვრას, ოპერაციულ შტაბთან შეთანხმებით.

როგორ უნდა გადავაადგილდე სამედიცინო მომსახურების მისაღებად?

სამედიცინო მომსახურების მიღების მიზნით გადაადგილება დასაშვებია.

თუ თქვენ გაქვთ სამედიცინო მომსახურების მიღების აუცილებლობის აშკარა ნიშნები (მაგ.: დაგეწყოთ მშობიარობა, გაქვთ მოტეხილობა და ა.შ.), ნებადართულია გადაადგილება სამედიცინო მომსახურების მისაღებად (თანხმლებ პირთან ერთად).

თუ გჭირდებათ აუცილებელი გეგმიური სამედიცინო მომსახურების მიღების მიზნით (მაგ.: დიალიზი, ონკოლოგიური მკურნალობა და ა.შ.) გადაადგილება, თან უნდა იქონიოთ სამედიცინო დაწესებულების მიერ გაცემული ცნობა.

იმ შემთხვევაში, თუ არ გაქვთ მსგავსი ცნობა, უნდა დაუკავშირდეთ მკურნალ ექიმს/სამედიცინო დაწესებულებას, რომელიც, თავის მხრივ, მიზანშეწონილობის გათვალისწინებით, ჯანდაცვის სამინისტროს ელექტრონულად აწვდის შესაბამის ინფორმაციას. აღნიშნულის საფუძველზე, თქვენზე გაიცემა მიზნობრივი გადაადგილების ელექტრონული ნებართვა. ელექტრონული ფორმით ცნობის ვერმიღების პირობებში, ცნობის მისამართზე მიტანას უზრუნველყოფს სსიპ – სოციალური მომსახურეობის სააგენტოს რაიონული განყოფილება.

შემიძლია თუ არა სასურსათო პროდუქტის ან/და ფარმაცევტული პროდუქტის გამოძახება?

საკვები პროდუქტის, სურსათისა და სამედიცინო დანიშნულების საქონლის/პროდუქტის მიტანის მომსახურების გაწევის მიზნით გადაადგილება დასაშვებია. შესაბამისად, შეგიძლიათ ისარგებლოთ ე.წ. „დელივერი“ სერვისით.

შემიძლია თუ არა სასაფლაოზე წასვლა?

იკრძალება სასაფლაოს ტერიტორიაზე შესვლა. აკრძალვა არ ეხება მხოლოდ მიცვალებულის დაკრძალვასთან დაკავშირებული ღონისძიებების განხორციელების მიზნით სასაფლაოს ტერიტორიაზე შესვლასა და გადაადგილებას.

სასაფლაოზე შესვლა მხოლოდ ქალაქში იზღუდება, თუ ყველგან?

სასაფლაოს ტერიტორიაზე შესვლა აკრძალულია ქვეყნის მასშტაბით.

პირბადის ტარების ვალდებულება რომელ დაწესებულებებში მაქვს?

პირბადის ტარების ვალდებულება გაქვთ ყველა დახურულ საჯარო სივრცეში (მაგ.: აფთიაქში, სასურსათო მაღაზიაში და სხვ.).

შემიძლია თუ არა გადაადგილება სასოფლო-სამეურნეო საქმიანობის განსახორციელებლად?

სასოფლო-სამეურნეო საქმიანობის განსახორციელებლად დაშვებულია მხოლოდ სასოფლო-სამეურნეო დანიშნულების მანქანის ან ტექნიკის გადაადგილება (მაგ.: ტრაქტორი, კომბაინი და სხვ.). სხვა სახის მექანიკური სატრანსპორტო საშუალებით გადაადგილება აკრძალულია.

მაქვს სამსახურებრივი მიზნით ავტომანქანით გადაადგილების უფლება. შემიძლია თუ არა ამ ავტოსატრანსპორტო საშუალებით, ოჯახის წევრის ან სხვა პირის გადაყვანა?

არა. ავტოსანტრანსპორტო საშუალებით უნდა გადაადგილდეთ მხოლოდ თქვენ, სამსახურებრივი მიზნით.

მაქვს სამსახურებრივი მიზნით, ავტომანქანით გადაადგილების უფლება. შემიძლია თუ არა თანამშრომლის გადაყვანა ჩემი სატრანსპორტო საშუალებით?

დიახ, სამსახურებრივი მიზნით, თქვენი სატრანსპორტო საშუალებით, თანამშრომლის სამსახურში გადაყვანის უფლება გაქვთ, ავტომობილში მგზავრთა განთავსების წესების დაცვით.

„ზოგადად მეცნიერებაში და მედიცინაში აუცილებელია, რომ მტკიცებულებებზე დაყრდნობით იყოს ყველაფერი, ამაზე სამეცნიერო კვლევები არ არსებობს, შესაბამისად, მე ამის შესახებ მტკიცებულებით პასუხს ვერ გაგცემთ“ – ასე უპასუხა ჯანდაცვის მინისტრმა ეკატერინე ტიკარაძემ ჟურნალისტის კითხვას, შესაძლოა თუ არა ზიარების კოვზი იყოს ინფექციის გადამტანი.

მინისტრმა ისაუბრა ასევე იმ რისკებზე, რაც მისი აზრით შესაძლოა დადგეს იმის გამო, რომ მოქალაქეები არ იცავენ იმ წესებს, რასაც ვირუსის პრევენციის თვალსაზრისით გაცემული რეკომენდაციები ითვალისწინებს:

„ჩვენ აუცილებლად დავდგებით კატასტროფის წინაშე, ეს წარმოადგენს იმ რეალობის ასახვას, რომლის წინაშეც ჩვენ შეიძლება დავდგეთ თუ ამ წესებს არ დავიცავთ.“

მინისტრმა აქცენტი  გააკეთა ასევე საკარანტინო სივრცეების მოწესრიგებაზე, რომლებსაც გამოიყენებენ იმ პაციენტებისთვის, რომლებსაც დაუფიქსირდებათ კორონავირუსი, მაგრამ მათი მდგომარეობა იქნება მსუბუქი.

16 აპრილს მინისტრი აჭარაში იმყოფებოდა, ის შეხვდა აჭარის მთავრობის თავმჯდომარეს, იმყოფებოდა რესპუბლიკურ საავადმყოფოში და ადგილზე გაეცნო ვითარებას.

აჭარაში კორონავირუსის 7 ახალი შემთხვევა გამოვლინდა. აქედან ორი ქობულეთის კლასტერს უკავშირდება. ეს ის პირები არიან, რომლებიც ამ კლასტერთან დაკავშირებით საკარანტინე სივრცეში იმყოფებოდნენ – ამის შესახებ 16 აპრილს აჭარის ჯანდაცვის მინისტრმა, ზაალ მიქელაძემ განაცხადა.

5 ინფიცირებული კი სამედიცინო დაწესებულების მედპერსონალია. მინისტრმა არ დააზუსტა, უკავშირდება თუ არა ეს ხუთი შემთხვევაც ქობულეთის კლასტერს, რადგან, მისივე თქმით, ამ დეტალების დაზუსტების შემთხვევაში მედიკოსების პირადი მონაცემები გახდება ცნობილი.

„მათი თხოვნით, არ ვასახელებთ სამედიცინო პერსონალის ადგილსამყოფელს, საიდანაც ისინი არიან.

მათი ოჯახის წევრებმა ამის შესახებ არ იციან, მათ არ სურთ ოჯახის წევრებს დამატებით სტრესული მდგომარეობა შეუქმნან. ეს ადამიანები იყვნენ იზოლაციაში და არ ჰქონდათ სხვა ადამიანებთან ურთიერთობა“ – განაცხადა ზაალ მიქელაძემ.

მინისტრის განცხადებით, ქობულეთის კლასტერთან სულ 445 კონტაქტირებული პირია დაკავშირებული. იგი არ გამორიცხავს, რომ ამ კლასტერიდან უახლოეს დღეებში კიდევ გამოვლინდნენ ინფიცირებული პირები.

ზაალ მიქელაძის განცხადებით, ინფიცირებული პირების ჯანმრთელობის მდგომარეობა ამ დროისთვის დამაკმაყოფილებელია.

შვიდივე პაციენტი ბათუმში, კლინიკა „მედალფაში“ გააგრძელებს მკურნალობას. ამჟამად „მედალფაში“, ახალი შემთხვევების ჩათვლით, 37 პაციენტს მკურნალობენ ახალ კორონავირუსზე.

ქობულეთის კლასტერს კი დადასტურებულად უკვე ინფიცირების 31 შემთხვევა უკავშირდება, თუმცა, თუ კი მედპერსონალი, რომელთაც ახალი კორონავირუსი დაუდასტურდათ, ამ კლასტერთან არიან კავშირში, მაშინ კლასტერი კიდევ უფრო მრავალრიცხოვანია.

ქობულეთის კლასტერი უკავშირდება პაციენტს, რომლის ინფიცირების წყარო უცნობია. მას შემდეგ, რაც მას კორონავირუსი დაუდგინდა, ეპიდემიოლოგიური კვლევით დადასტურდა ახალი შემთხვევები. კორონავირუსი აღმოაჩნდათ მასთან კონტაქტში მყოფ პირებს, მათ შორის, ოჯახის წევრებს, მეზობლებს და მეზობლებთან კონტაქტში მყოფ პირებსაც.

საფრანგეთში მცხოვრებმა სტუდენტმა, 28 წლის მარიკა მეგრელიშვილმა და მისმა მეუღლემ კორონავირუსის 2 ტალღა გადაიტანეს. მარიკამ საკუთარ გამოცდილებაზე სოციალურ ქსელშიც დაწერა და „ბათუმელებთან“ 25 დღიან ავადმყოფობაზე, კარანტინის რეჟიმზე და  უკვე გადატანილ ვირუსზე საუბრობს.

„ჩემი მეუღლე საფრანგეთში კარანტინის გამოცხადებისთანავე, 16 მარტს გახდა ავად, მეორე დღეს მეც დამეწყო სიმპტომები. არ გვიფიქრია, რომ კოვიდ 19-ის ვირუსი შეგვხვდა, გვქონდა ოდნავი სისველე ცხვირის და ყელის უმნიშვნელო ტკივილი. ჩავთვალეთ, რომ გავცივდით და ჯანჯაფილიანი, ლიმონიანი ჩაის სმით გამოვიდოდით.

მაგრამ შუაღამისას ჩემი მეუღლის საშინლად აჩქარებულმა პულსმა გაგვაღვიძა, ხელებსა და ფეხებზე თითები დაულურჯდა, სასწრაფო გამოვიძახეთ და წაიყვანეს. ყვებოდა მხოლოდ ამერიკულ ფილმებში მაქვს მსგავსი ნანახიო: კუსტარულად დამზადებულ კომბინიზონებსა და ნიღბებში გამოწყობილი ექიმები, რადგან საფრანგეთმა ვერ უზრუნველყო ექიმთა აღჭურვა საკმარისად.

14 საათის შემდეგ გამოუშვეს, ცხვირში გაკეთებულმა ტესტმა უარყოფითი პასუხი აჩვენა კოვიდ 19-ის ინფექციაზე.

საღამოს ისევ დაგვირეკეს და გვითხრეს – მხოლოდ ტესტი არ არის სანდო და დაკვირვების ქვეშ უნდა დარჩეთო.

დავკარგეთ გემოს, სუნის შეგრძნება, თავს ვაძალებდით საკვები მიგვეღო, შხაპს ვიღებდით დამჯდარი, ფეხზე დგომა არ შეგვეძლო. ძალებს მხოლოდ ჰიგიენის ელემენტარული ნორმების დაცვისა და კვებისთვის ვიყენებდით, სრულ დაღლილობას ვგრძნობდით. ვერც კი ვსაუბრობდით მოთენთილობისგან. ყრუდ, მთელი ძალით გვტკიოდა ტანი.

ტესტირებაზე, პარიზის ერთ-ერთ ყველაზე დიდ საუნივერსიტეტო კლინიკაში ვიყავით, საშინლად გადატვირთული იყო.

25 დღე ვიყავით სრულიად უუნაროდ. როგორც აგვიხსნეს, ჩვენი ვირუსი არ იყო მიღწეული ფილტვებამდე და ამ მხრივ გაგვიმართლა.

სპეციალურ აპლიკაციას ვავსებდით სახლიდან, დიაგნოზის დასმის დღიდანვე ჩავერთეთ. გვყავდა ჩვენი ექიმი დისტანციურად. ჰოსპიტალში ვერ მოგვათავსეს, ადგილები არ იყო და რადგან სუნთქვის მსუბუქი გაძნელება გვქონდა, შინ მკურნალობა დაგვინიშნეს. კლინიკაში მიჰყავთ ისინი, ვისაც ფილტვები აღარ ეხსნება სუნთქვისას. აღარ არის რეანიმაციაში მათი ადგილებიც, საფრანგეთში რეანიმაციის 5000 საწოლი იყო სულ და ახლა ამ განყოფილებაში 7000-ზე მეტ პაციენტს მკურნალობენ.

სახლიდან ვავსებდით აპლიკაციაში ჩვენს ყოველდღიურ მონაცემებს: ტემპერატურას, ხველას, სუნთქვის სიძნელეს, ყველაფერს. ექიმი დღეში 2, 3 ჯერ გვირეკავდა, თუ საჭიროა ექიმი მოდის ბინაზე.

ჩვენ მარსელის პროტოკოლით დაგვენიშნა მკურნალობა, ანუ ანტიბიოტიკით, ამით ვირუსს არ მივეცით საშუალება ჩაეღწია ფილტვებამდე. როგორც ექიმმა გვითხრა, გაგვიმართლა და ფილტვებამდე რომ მისულიყო სხვაგვარად იქნებოდა ყველაფერი. დაგვინიშნეს იმუნიტეტის გასაძლიერებელი ვიტამინების კომპლექსიც. ზემოთჩამოთვლილი სიმპტომები გრძელდებოდა 10 დღე და ავადმყოფობიდან ორი კვირის თავზე გავხდით უკეთ, მაგრამ ორი დღის შემდეგ ჩემი მეუღლე ისევ ავად გახდა და აღმოჩნდა, რომ ორივეს გვქონდა ვირუსის მეორე ტალღა. ეს ნიშნავდა, რომ კიდევ რამდენიმე დღე ვიქნებოდით ავად. გვითხრეს, რომ ასე ხშირად არ ხდება და ვირუსის მეორე ტალღა ყველას შესაძლოა არ განუვითარდეს. ზოგადად ექიმები ერიდებიან ვირუსზე კონკრეტული ინფორმაციის გაცემას. გეუბნებიან, რომ ეს არის ,,სიურპრიზებით” სავსე ვირუსი და ჯერ კიდევ არ იციან ყველაფერი მის შესახებ.

გამოჯანმრთელების შემდეგ გადავწყვიტეთ პლაზმის გაცემა, რაც ექიმებს დაეხმარება ვირუსის წინააღმდეგ ჩატარებულ კვლევებში და ჩვენს მიერ გამომუშავებული ანტისხეულები რამდენიმე პაციენტის გადარჩენისთვის გამოდგება.

პლაზმის ჩაბარება ერთსაათიანი პროცედურაა. გაგვიკეთეს ტესტი, რომ გაეგოთ გამოგვიმუშავდა თუ არა ანტისხეულები და გამოსადეგი იქნებოდა თუ არა სხვა პაციენტებისთვის ჩვენი პლაზმა. მრავალი სხვა ტესტიც, მალარიის, ჰეპატიტის და ა.შ. რახან ახალგაზრდები ვართ, არ გვქონდა თანხმლები დაავადებები და გამოვჯანმრთელდით, ჩვენი ანტისხეულები და პლაზმაც იყო გამოსადეგი. ახლა გვაქვს ოფიციალური პასუხი, რომ ვირუსი აღარ გვაქვს.

ავადმყოფობის დროს, ცხადია, გარეთ არ და ვერ გავდიოდით, ვიყავით ძალიან სუსტად. არამალფუჭებადი პროდუქტი ვირუსის აფეთქებისთანავე მოვიმარაგეთ და დავამზადეთ 3 ლიტრი სადეზინფექციო ხსნარი შინ, მსოფლიო ჯანდაცვის ორგანიზაციის რეკომენდაციის მიხედვით. ჩვენი ფრანგი მეგობრები დაგვცინოდნენ კიდეც, ომი ხომ არ იწყებაო.

როცა დავინფიცირდით გარეთ გასვლის საჭიროება არ გვქონია, ხილს და ბოსტნეულს ჩემი მეუღლის დედა გვიტოვებდა კარებთან.

კარანტინის წესებით იკრძალება სახლიდან ერთ კილომეტრზე მოშორებით წასვლა. გასვლა ნებადართულია მხოლოდ მაღაზიასა და აფთიაქში, მაგრამ პოლიცია მკაცრად არ აკონტროლებს გარემოს და ხალხი ხშირად სეირნობს.

თავიდან პანიკამ მოიცვა ქალაქი, დახლები იყო ცარიელი და დღემდე, როცა საყიდლებზე კვირაში ერთხელ გავდივართ, არის რაღაც პროდუქტები, რასაც ვერ იყიდი, უბრალოდ აღარ არის. პურის ფქვილი და ალკოჰოლი 70 %-იანი მაგალითად, ნიღბები და რეზინის ხელთათმანები, სადეზინფექციო ხსნარები.

ორი კვირის წინ საფრანგეთის ჯანდაცვის მინისტრი გვეუბნებოდა, რომ საფრანგეთის მოსახლეობას არაფერი ემუქრებოდა, მაგრამ ქვეყანაში უკვე 17 ათასზე მეტი გარდაცვლილია და ეს რიცხვი ყოველდღიურად იზრდება.

თუ ეს დაემართა საფრანგეთს, რა შეიძლება დაემართოს საქართველოს, სადაც მხოლოდ 800 საწოლია რეანიმაციებში?

წესების უგულებელყოფის შემთხვევაში წარმოდგენაც არ მინდა, რა შეიძლება დატრიალდეს საქართველოში.

რა სჭირდებათ იმის გასაგებად ადამიანებს, რომ ეს ვირუსი მართლაც საშიშია? თუ ჩვენ ადვილი ფორმა შეგვხვდა და 25 დღის მანძილზე საწოლს მიგვაჯაჭვა, მაშინ რას გრძნობენ ისინი, ვისაც ვირუსის რთული ფორმა აქვთ?..

სანამდე მოვიგონებთ შეთქმულების თეორიებს ვირუსის შექმნის და გავრცელების შესახებ?

რატომ არასოდეს არ ვიღებთ პასუხისმგებლობას ჩვენ, ადამიანები და რატომ გვჭირდება მუდმივად უჩინარი მტრის ხატის შექმნა?

თუ უბრალოდ სახლში დარჩენით სხვისი სიცოცხლის გადარჩენა შეგვიძლია, რატომ არ ვიჩენთ სამოქალაქო პასუხისმგებლობას?

სანამ დავიწყებთ გაუთავებელ კრიტიკას მთავრობის, ამერიკის, ჩინეთის, ზოგიერთი კულტურის, ეკლესიის, ღმერთის, მასონების და ა.შ. ჩვენ, ინდივიდები, დამოუკიდებელი ადამიანები, ჩვენს წილ რომელ საქმეს ვაკეთებთ?“.

შენიშვნა: მასალას თავიდან ერქვა ,,მე და ჩემი მეუღლე Covid 19-ით ორჯერ დავინფიცირდით” რაც არ შეესაბამება რეალობას და ნაგულისხმევი იყო, რომ წყვილმა ვირუსის ორი ტალღა გადაიტანა – მსოფლიო ჯანდაცვის ორგანიზაციის მონაცემებით ,,მეორედ დაინფიცირება” და ,,ვირუსის მეორე ტალღა” ორი სხვადასხვა რამეა.

საქართველოს მთავრობის მიერ მიღებული ახალი გადაწყვეტილებით, 17 აპრილის 12:00 საათიდან, საგანგებო მდგომარეობის მოქმედების ვადით, ანუ  21 აპრილის ჩათვლით, სრულად იკრძალება მთელი ქვეყნის მასშტაბით მსუბუქი ავტომობილებით გადაადგილება.

შეზღუდვა არ ვრცელდება ტვირთების გადაზიდვაზე და სადისტრიბუციო მანქანებზე.

პრემიერის პრესსპიკერის, ირაკლი ჩიქოვანის განცხადებით, სასურსათო მაღაზიები, აფთიაქები და ყველა სხვა ობიექტი, რომელიც აქამდე მუშაობდა, ჩვეულ რეჟიმში გააგრძელებს მუშაობას. ასევე მუშაობას აგრძელებს მიტანის სერვისები.

კომპანიებმა თანამშრომლების სახლიდან სამსახურში და უკან ტრანსპორტირების ნებართვის მისაღებად შესაბამის დარგობრივ სამინისტროებს უნდა მიმართონ.

ასევე  17 აპრილიდან დახურულ საჯარო სივრცეში აუცილებელი ხდება პირბადის ტარება. პასუხისმგებლობა ამ მოთხოვნის შესრულებაზე ეკისრებათ იურიდიულ პირებს. პირბადის ტარების წესის დარღვევისთვის  ჯარიმა 15000 ლარია.