C ჰეპატიტის პროგრამის მონაწილეები მომსხურებას, დროებით, შესაძლებლობის მიხედვით, დისტანციური წესითაც მიიღებენ. პროგრამებით გათვალისწინებული მედიკამენტის გადაცემა/მიწოდება კი, შესაძლებელი იქნება განმახორციელებელი დაწესებულების მიერ შემუშავებული გამარტივებული წესითაც.
პროგრამას ახორციელებს ბათუმის ინფექციური პათოლოგიის, შიდსის და ტუბერკულოზის რეგიონული ცენტრი, სადაც „ბათუმელებს“ უთხრეს, რომ ამ დროისთვის რაიმე ახალი მექანიზმი ბენეფიციართა დისტანციურად მომსახურებასა თუ მედიკამენტების გაცემაზე ჯერ შემუშავებული არ აქვთ.
„ჩვენი ინფექციონისტები ძირითადად ჩართულნი არიან კოვიდ 19-ის მართვაში, ამიტომ C ჰეპატიტის პროგრამის მონაწილეები მომსხურებას ამ დროისთვისაც იმ წესით იღებენ, როგორც აქამდე იყო. მათთვის საავადმყოფოში არის ცალკე შესასვლელი“, – გვითხრეს ბათუმის ინფექციურში.
შესაბამისი ცვლილება გუშინ, 2020 წლის 16 აპრილს შევიდა, „C ჰეპატიტის მართვის სახელმწიფო პროგრამის დამტკიცების შესახებ“ საქართველოს მთავრობის დადგენილებაში, რომლის მიხედვითაც პროგრამას დაემატა შემდეგი მუხლი:
„ქვეყანაში ეპიდემიოლოგიური სიტუაციის გაუარესების (ეპიდემია, პანდემია, ეპიდემიური აფეთქება) დროს:
ა) პროგრამის ფარგლებში ბენეფიციარებისთვის, შესაძლებლობის შესაბამისად, სერვისების მიწოდება დროებითი ღონისძიების სახით, შესაძლებელია, განხორციელდეს დისტანციური წესით მიმწოდებლის მიერ განმახორციელებელ დაწესებულებასთან შეთანხმებული ფორმატით;
ბ) პროგრამის ბენეფიციარებზე (მ.შ. იზოლაციაში (კარანტინი/თვითიზოლაცია) მყოფებზე) სახელმწიფო პროგრამებით გათვალისწინებული მედიკამენტის გადაცემა/მიწოდება, დროებითი ღონისძიების სახით, შესაძლებელია, განხორციელდეს განმახორციელებელი დაწესებულების მიერ შემუშავებული გამარტივებული მექანიზმების გამოყენებით.“.
ეს ცვლილება 2020 წლის 1 მარტიდან წარმოშობილ ურთიერთობებზე გავრცელდება.
