Batumelebi | გახარია: ოჯახის ექიმები გახდებიან ვირუსისგან დაცვის წინა ხაზის მებრძოლები გახარია: ოჯახის ექიმები გახდებიან ვირუსისგან დაცვის წინა ხაზის მებრძოლები – Batumelebi

გახარია: ოჯახის ექიმები გახდებიან ვირუსისგან დაცვის წინა ხაზის მებრძოლები

პრემიერ-მინისტრ გიორგი გახარიას განცხადებით, კორონავირუსთან ბრძოლაში ოჯახის ექიმები ჩაერთვებიან. მისივე თქმით, მათ ტელეფონით უნდა დაუკავშირდნენ პაციენტები, რომლებსაც აქვთ „შეგრძნება ან ცხელება“. გარდა ამისა, ისინი უნდა ჩაერთონ იმ პაციენტების მკურნალობაში, რომელთა შემთხვევაშიც ვირუსი მსუბუქად მიმდინარეობს.

„პირველადი ჯანდაცვა, ისევე როგორც ოჯახის და სოფლის ექიმები, უახლოეს დღეებში და აქ საუბარია ერთ-ორ დღეზე, გახდებიან ვირუსისგან დაცვის ყველაზე წინა ხაზის ყველაზე ძირითადი მებრძოლები. თითოეულ ადამიანს, რომელსაც ექნება შეგრძნება ან ცხელება, ექნება კონკრეტული მიმართულება, სადაც უნდა დარეკოს, სადაც უკვე სატელეფონო ზარით მოემსახურება კონკრეტული ოჯახის ექიმი და აქედან დაიწყება რისკის შემცველი პოტენციური პაციენტის მართვა.

ამის მიზანი გახლავთ ის, რომ მოგეხსენებათ, ვირუსის დიდი პროცენტი ზოგ შემთხვევაში საერთოდ უსიმპტომოდ მიმდინარეობს, ზოგ შემთხვევაში –  ძალიან მსუბუქად. ჩვენი მოხუცების, მშობლების რისკი რომ შევამციროთ, ასევე ქრონიკულად დაავადებული ადამიანების, რომელ შემთხვევაშიც ვირუსი უფრო მძიმე პირობებში ვითარდება, მათთვის უნდა შევინარჩუნოთ რესურსების მაქსიმალური მოცულობა.

იმ შემთხვევაში, თუ ვირუსი არ მიმდინარეობს მძიმედ, მას მარტივად უნდა გავუმკლავდეთ სახლის პირობებში. ამაში უნდა მოგვეხმაროს ჯანდაცვის სისტემა და სწორედ ოჯახის და სოფლის ექიმები,“ – განაცხადა გიორგი გახარიამ ბრიფინგზე.

ნეტგაზეთის მასალების სხვა გამოცემებში გადაბეჭდვის წესი
ავტორი