ბათუმის ახალ რესპუბლიკურ საავადმყოფოში პაციენტების მიღება დაწყებულია. კლინიკა ამ ეტაპზე მუშაობს როგორც ცხელების ცენტრი. დღევანდელი მონაცემებით იქ უკვე 20-მდე პაციენტი იმყოფება, რომლებსაც კვლევისთვის სინჯები აუღეს კოვიდ-19-ზე. აჭარის ჯანდაცვის სამინისტროს ინფორმაციით ლაბორატორიის პასუხები დღეს, 16 აპრილს, დღის ბოლოს გახდება ცნობილი.
„ვიღებთ იმ პაციენტებს, ვისაც ცხელება აქვს. დღემდე მიღებულ პაციენტებს შორის ამ დროისთვის არავის აქვს დადასტურებული ახალი კორონავირუსული ინფექცია. ერთი პაციენტი, რომელსაც თირკმელთან დაკავშირებული პრობლემები დაუდგინდა, სამკურნალოდ ახალი კლინიკიდან რესპუბლიკურ საავადმყოფოში [ძველ შენობაში – ავტ.] გადმოვიყვანეთ,“ – გვითხრა ბათუმის რესპუბლიკური საავადმყოფოს დირექტორმა, სოლომონ ფუტკარაძემ.
ამ დროისთვის ახალ კლინიკაში მზად 65 საწოლია, აპრილის ბოლომდე კი იგეგმება საწოლების 170-მდე გაზრდა. კლინიკა სწორედ 170 საწოლზეა გათვლილი.
________________________
ახალი კლინიკის შენობის ნაწილი covid 19-ით ინფიცირებული პაციენტების მისაღებად 9 აპრილს გახსნეს.
აჭარის მთავრობის თავმჯდომარემ და ჯანდაცვის მინისტრმა მაშინ თქვეს, რომ შენობა პაციენტების მისაღებად მზად იყო, თუმცა, პროცესი რამდენიმე დღით შეფერხდა.
სოლომონ ფუტკარაძის თქმით, სამედიცინო-კლინიკური კუთხით ყველაფერი მზად იყო, მაგრამ საჭირო გახდა დამატებითი მოწყობილობების მონტაჟი სავენტილაციო სისტემაში.
ამ თემაზე:
