Batumelebi | გადადის თუ არა კორონავირუსი კოღოს და სხვა მწერის ნაკბენით? გადადის თუ არა კორონავირუსი კოღოს და სხვა მწერის ნაკბენით? – Batumelebi

გადადის თუ არა კორონავირუსი კოღოს და სხვა მწერის ნაკბენით?

ზაფხულის მოახლოებასთან ერთად უკვე გამოჩნდნენ კოღოები და ჩნდება კითხვა, გადადის თუ არა ახალი კორონავირუსი კოღოსა ან ბუზის ნაკბენით?

ჯანდაცვის მსოფლიო ორგანიზაციის ინფორმაციით, COVID-19 კოღოს ნაკბენით არ გადადის.

„ამ დრომდე არანაირი ინფორმაცია, ან მტკიცებულება, რომ ახალი კორონავირუსი გადადის კოღოს ნაკბენით არ არსებობს” – აცხადებს ჯანმო.

არსებობს ვირუსები, რომლებიც კოღოს ნაკბენით გადადის, მაგრამ კორონავირუსი არ არის მათ შორის. ილინოისის უნივერსიტეტის ვეტერინარული მედიცინის კოლეჯის, პროფილაქტიკური მედიცინისა და საზოგადოებრივი ჯანმრთელობის კათედრის დოცენტი უილიამ სანდერსი Time-თან განმარტავს, რომ წინა კვლევებმა სხვა ტიპის კორონავირუსებზე განსაზღვრა, რომ მწერებს, მათ შორის კოღოებსა და ბუზებს, არ შეუძლიათ მისი გავრცელება.

ამერიკის კოღოს კონტროლის ასოციაციის განცხადებით, არ არსებობს მტკიცებულება, რომ ახალი კორონავირუსი ტკიპას ნაკბენით გადადის.

„იმისთვის, რომ ვირუსი ადამიანს კოღოს ან ტკიპას ნაკბენით გადაედოს, ვირუსს უნდა შეეძლოს მწერის ორგანიზმში გამრავლება“, – წერს კოღოს კონტროლის ასოციაცია.

ახალი კორონავირუსი წარმოადგენს რესპირატორულ ვირუსს, რომელიც ვრცელდება ძირითადად იმ წვეთებით (ნერწყვი, ცხვირიდან გამონადენი), რომელსაც ინფიცირებული ადამიანი ხველის, ცემინების ან ლაპარაკის დროს გამოაფრქვევს.

ამავე თემაზე: 

როგორ დავიცვათ თავი კორონავირუსისგან – WHO რეკომენდაციები

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან