Batumelebi | ლაქები ფეხის გულებსა და თითებზე – COVID19-ის კიდევ ერთი შესაძლო სიმპტომი ლაქები ფეხის გულებსა და თითებზე – COVID19-ის კიდევ ერთი შესაძლო სიმპტომი – Batumelebi

ლაქები ფეხის გულებსა და თითებზე – COVID19-ის კიდევ ერთი შესაძლო სიმპტომი

იტალიელი და ესპანელი მედიკოსების აზრით, ფეხის გულებზე ლაქები შესაძლოა კორონავირუსით დაინფიცირების მანიშნებელი იყოს. ეს ვარაუდი პირველმა სპანეთის ორთოპედთა კოლეჯების გენერალურმა საბჭომ გამოთქვა.

BBC წერს, რომ საფრანგეთში, ესპანეთსა და იტალიაში აღინიშნა ბევრი შემთხვევა, როცა კოვიდ-19-ის მქონე პაციენტებს ფეხის გულებზე ჩალურჯებების ან ჩუტყვავილას გამონაყარის მსგავსი ნიშნები/ლაქები აღმოაჩნდათ.

„ლაქები ფეხის გულებზე ყველაზე ხშირად უვლინდებათ ბავშვებს. ლაქები ყველა შემთხვევაში არ ვლინდება, მაგრამ მათი არსებობა შესაძლოა გახდეს კორონავირუსზე შემოწმების მიზეზი,“ – წერენ ესპანელი ორთოპედები.

ფოტო: Mazzotta F., Troccoli T.
Dermatologia Pediatrica, Bari

გაზეთი Metro წერს, რომ თითქმის ამავე დროს მსგავსი აღმოჩენა გააკეთა ბავშვთა დერმატოლოგმა იტალიაში. მაცოტა ტროკოლი, ექიმი იტალიის ქალაქ ბარიდან, წერს, რომ ლაქები ფეხის გულებზე აღენიშნება დაახლოებით ყოველ მეხუთე პაციენტს.

„თუ ჩვენ შევძლებთ შემდეგი დაკვირვებებით დავადასტუროთ, რომ ეს კოვიდ-19-ის კლინიკური ნიშანია, ის დერმატოლოგიური ნიშანი შეიძლება გამოვიყენოთ იმ ბავშვების და ზრდასრულების გამოსავლენად, რომელთაც ინფექციის სუსტი ფორმა ან საწყისი ეტაპი აქვთ, მაგრამ შეუძლიათ სხვების დაინფიცირება,“ – წერს ის.

ახალი კორონავირუსის, Covid-19-ის ყველაზე გავრცელებული სიმპტომებია: მშრალი ხველა, ტემპერატურის მატება, სუნთქვის გაძნელება, სურდო, დიარეა, გემოსა და ყნოსვის დაკარგვა.

_______________________________

მთავარი ფოტო ესპანეთის ორთოპედთა კოლეჯების გენერალური საბჭოს ანგარიშიდან.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან