Batumelebi

ადგილობრივი თვითმმართველობის არჩევნების მეორე ტურში, ცენტრალური საარჩევნო კომისიის წინასწარი მონაცემებით, არჩილ ჩიქოვანი ბათუმის მერი გახდა.

ცესკოს მონაცემებით, ხმები დათვლილია ბათუმის 105-ვე საარჩევნო უბანზე.

წინასწარი მონაცემების თანახმად, „ერთიანი ნაციონალური მოძრაობის“ მერობის კანდიდატმა გიორგი კირთაძემ ბათუმში ამომრჩეველთა ხმები 48.982 პროცენტი მიიღო – 36 710 ხმა, „ქართული ოცნების“ მერობის კანდიდატმა არჩილ ჩიქოვანმა კი – 51.018 პროცენტი, 38 236 ხმა.

არჩევნების პირველ ტურში, რომელიც 2 ოქტომბერს გაიმართა, არჩილ ჩიქოვანმა 30 776 ხმა მიიღო, გიორგი კირთაძემ კი – 31 443 ხმა.

ბათუმში ხმა მისცა 76 944 -მა მოქალაქემ – რეგისტრირებულ ამომრჩეველთა 52 პროცენტმა.

30 ოქტომბრის არჩევნების შემდეგ „ნაციონალური მოძრაობის“ ბათუმის ოფისში გაერთიანებულმა ოპოზიციამ ბრიფინგი გამართა და მედიას აცნობა, რომ ამ არჩევნების შედეგების შეგუებას ისინი არ აპირებენ.

ამავე თემაზე: 

„ეს არ არის არჩევნები, ამას არ შევეგუებით“ – გაერთიანებული ოპოზიცია ბათუმში

See more

აჭარის მთავრობის თავმჯდომარე, თორნიკე რიჟვაძე ამბობს, რომ აჭარაში არჩევნების მეორე ტურში „ოცნების“ გამარჯვება განაპირობა იმ ფაქტორმა, რომ მათ „ოპოზიციის სიძულვილის ენას“ სიყვარული დაუპირისპირეს. ამის შესახებ თორნიკე რიჟვაძემ ტელეკომპანია „იმედის“ ეთერში განაცხადა.

„პირველი ტურის წინ ჩვენი საარჩევნო კამპანიის ძირითადი შინაარსი იყო ორიენტირებული მაქსიმალურად საქმეზე, კონკრეტულ პროგრამებზე და ჩვენ მაქსიმალურად ვცდილობდით, რომ საზოგადოებისთვის არ შეგვეხსენებინა ის ოპონენტი, რომელსაც თავისი მმართველობის დროს არაერთი დანაშაული და ცოდვა აქვს ხალხის წინაშე ჩადენილი.

თუმცა ოპონენტების მხრიდან ეს მიზანმიმართული დისკრედიტაცია ჩვენი კანდიდატების, გაუგონარი ჭორაობის მოგონება, აისახა საზოგადოების განწყობებზე და ჩვენ დაგვჭირდა მეორე ტური ბათუმსა და ხელვაჩაურში.

შემდეგ უკვე მაქსიმალური მობილიზაციით, მათ შორის იმით, რომ  ჩვენ ჩვენი ოპონენტების და პირველ რიგში ნაცნოძრაობა მაქვს მხედველობაში, სიძულვილის ენას დავუპირისპირეთ სიყვარული, დავუპირისპირეთ ლანძღვას პატივისცემა. ამ ყველაფერმა ჩვენს ამომრჩეველზე, მათ შორის რიგით ბათუმელებზე, გადაწყვეტილების მიღების დროს იქონია არსებითი და პრინციპული მნიშვნელობა“ – განაცხადა თორნიკე რიჟვაძემ.

ამავე თემაზე: 

რას ამბობენ „ოცნება“ და კირთაძე სიძულვილის შემცველ ახალ პლაკატებზე – „გამყიდველია“

See more

 

ცესკოს წინასწარი მონაცემების თანახმად, ხელვაჩაურის მერი არჩევნების მეორე ტურის შედეგად ზაზა დიასამიძე გახდა, „ქართული ოცნების“ კანდიდატი.

„ქართული ოცნების“ ხელვაჩაურის მერობის კანდიდატმა ზაზა დიასამიძემ ამომრჩეველთა ხმების 55.007 პროცენტი მიიღო – 13 382 ხმა, „ერთიანი ნაციონალური მოძრაობის“ კანდიდატმა მიშა ბოლქვაძემ კი 44.993 პროცენტი – 10 946 ხმა.

ამ დროისთვის ხელვაჩაურში 47 უბნიდან  უბნიდან ყველა დათვლილია.

არჩევნების პირველ ტურში, რომელიც 2 ოქტომბერს გაიმართა, ზაზა დიასამიძემ 10 967 ხმა მიიღო, მიშა ბოლქვაძემ კი – 9 942 ხმა.

ცესკოს მონაცემებით, ხელვაჩაურში ხმა მისცა 24 768-მა მოქალაქემ – რეგისტრირებულ ამომრჩეველთა 55.75 პროცენტმა.

2021 წლის ადგილობრივი თვითმმართველობის არჩევნებზე ხელვაჩაურში სულ 44 423 ამომრჩეველი იყო რეგისტრირებული.

ამავე თემაზე: 

„ხელვაჩაურში მცირე პრობლემებია დარჩენილი“ – „ოცნების“ მერობის კანდიდატი 

See more

„ნაციონალური მოძრაობის“ ბათუმის ოფისში გაერთიანებულმა ოპოზიციამ ბრიფინგი გამართა და მედიას აცნობა, რომ ამ არჩევნების შედეგების შეგუებას ისინი არ აპირებენ.

ბრიფინგზე გაერთიანებული ოპოზიციის პოზიცია ბათუმის მერობის კანდიდატმა, გიორგი კირთაძემ გააცნო მედიას.

გიორგი კირთაძემ პოლიტიკურ განცხადებასთან ერთად დღეს საარჩევნო უბნებზე დაფიქსირებულ დარღვევებზეც ისაუბრა:

„რა მივიღეთ კენჭისყრის დღეს: დაპირისპირება პრაქტიკულად ყველა საარჩევნო უბანზე, ეგრეთ წოდებული ძველი ბიჭების მობილიზება უბნებზე, რომლებსაც ყველაფერთან ერთად ბეიჯებიც ჩამოკიდეს. ფიზიკური დაპირისპირება, მათ შორის ქალებთან, ჟურნალისტებთან, ჩვენი საუბნო კომისიის წევრთან…

როგორც კი საარჩევნო უბნები დაიხურა, „ქართული ოცნება“ უფრო მასშტაბურ გაყალბებაზე გადავიდა. მე მინდა წარმოგიდგინოთ რამდენიმე ბიულეტენი, რომელიც ბათილია. გადახაზულია ჩემი კონკურენტი, შემოხაზულია გიორგი კირთაძე და ის ჩაითვალა ბათილად. ასეთი უამრავი ბიულეტენი გააბათილა „ქართულმა ოცნებამ“.

აღმოჩნდა, რომ 37-ე საარჩევნო უბანზე, საუბნო კომისიის შემაჯამებელ ოქმზე ზემოდან დევს 83-ე საუბნო კომისიის ბიულეტენი. ამას დააკვირდა ჩვენი წარმომადგენელი და აღმოაჩინა. ამ ფორმით „ქართულმა ოცნებამ“ ჩვენს ამომრჩეველს წაართვა არჩევანის უფლება.

ეს ნამდვილად არ იყო არჩევნები. ჩვენ არ ვაპირებთ შეგუებას და ვაპირებთ ბრძოლის გაგრძელებას ყველა კონსტიტუციური მეთოდით“.

___

ენმ-ს განცხადებამდე ცოტა ხნით ადრე, ბრიფინგი გამართეს „ქართული ოცნების“ ბათუმის ოფისშიც, სადაც თქვეს, რომ მათ ხელთ არსებული ოქმების თანახმად, არჩევნებს ბათუმში იგებს მათი პარტიის წარმომადგენელი, არჩილ ჩიქოვანი.

უმაღლესი საბჭოს დეპუტატმა „ქართული ოცნებიდან“, ირაკლი ჭეიშვილმა ასევე მიმართა ოპონენტებს და თქვა, რომ „მათ აუცილებლად მოუწევთ ამ შედეგების აღიარება“.

ცესკოს ოფიციალური ვებგვერდის თანახმად, ამ დროისთვის [01:30 სთ] ბათუმში 105 საარჩევნო უბნიდან 57 უბნის მონაცემებია ატვირთული. ამ მოცემულობით ხმები ასე ნაწილდება: არჩილ ჩიქოვანი – 50.827%, გიორგი კირთაძე – 49.173%.

ადგილობრივი თვითმმართველობის არჩევნების მეორე ტური 30 ოქტომბერს ხელვაჩაურის ორ მაჟორიტარულ ოლქში გაიმართა.

ორივე ოლქში ერთმანეთის კონკურენტები იყვნენ „ქართული ოცნებისა“ და „ერთიანი ნაციონალური მოძრაობის“ კანდიდატები. ცესკოს წინასწარი მონაცემების მიხედვით, ორივე ოლქი „ოცნების“ კანდიდატებმა მოიგეს.

ხელვაჩაურის №5 საარჩევნო ოლქში „ოცნების“ კანდიდატმა, ელიზბარ ზოიძემ ამომრჩევლის ხმათა 51.995 პროცენტი მიიღო, 1488 ხმა, მისმა კონკურენტმა, „ერთიანი ნაციონალური მოძრაობის“ კანდიდატმა მამუკა ჯევაიშმა კი ამომრჩევლის ხმათა 48.045 პროცენტი – 1376 ხმა.

ხელვაჩაურის №6 საარჩევნო ოლქში „ოცნების“ კანდიდატმა შოთა ფუტკარაძემ ამომრჩეველთა ხმების 51.349 პროცენტი მიიღო – 1732 ხმა, „ერთიანი ნაციონალური მოძრაობის“ კანდიდატმა დავით დუმბაძემ კი ამომრჩეველთა ხმების 48.651 პროცენტი – 1641 ხმა.

 

ადგილობრივი თვითმმართველობის არჩევნების მეორე ტური 30 ოქტომბერს ხულოში ორ მაჟორიტარულ ოლქში გაიმართა.

აქ ერთმანეთის კონკურენტები იყვნენ „ქართული ოცნებისა“ და „ნაციონალური მოძრაობის“ და „გახარია – საქართველოსთვის“ და „ნაციონალური მოძრაობის“ კანდიდატები.

ცესკოს წინასწარი მონაცემებით, ხულოს №1მაჟორიტარული ოლქი „გახარია – საქართველოსთვის“ კანდიდატმა, ირაკლი ბოლქვაძემ მოიგო. მან ამომრჩეველთა ხმების 57.576 პროცენტი მიიღო, 342 ამომრჩევლის ხმა, მისმა კონკურენტმა „ერთიანი ნაციონალური მოძრაობიდან“ კი ამომრჩეველთა ხმების 42.424 პროცენტი მიიღო, 242 ხმა.

ხულოს №2 მაჟორიტარული ოლქი კი, წინასწარი მონაცემებით, მოიგო „ქართული ოცნების“ კანდიდატმა, ნადიმ დეკანაძემ. მან ამომრჩეველთა ხმების 53.504 პროცენტი მიიღო – 1191 ხმა. მისმა კონკურენტმა, „ერთიანი ნაციონალური მოძრაობის“ წევრმა, თენგიზ შანთაძემ კი ხმების 46,.496 პროცენტი მიიღო – 1035 ხმა.

არჩევნების მეორე ტურზე ხულოში ამომრჩეველთა 52.44 პროცენტი მივიდა.

„ქართული ოცნების“ ბათუმის ოფისში პარტიამ ბრიფინგი გამართა და მედიას აცნობა, რომ მათ ხელთ არსებული ოქმების თანახმად, არჩევნებს ბათუმში მათი პარტიის წარმომადგენელი, არჩილ ჩიქოვანი იგებს.

„ქალაქ ბათუმში დაახლოებით 80 უბანი გვაქვს დათვლილი 103 უბნიდან და ჩვენი კანდიდატი პრაქტიკულად ლიდერობს. პრაქტიკულად არჩევნები ბათუმში გვაქვს მოგებული. დარჩა რამდენიმე უბანი დასათვლელი. დაახლოებით 2 000 ხმით ვართ წინ“, – ეს ინფორმაცია მედიას ბრიფინგზე უმაღლესი საბჭოს დეპუტატმა „ქართული ოცნებიდან“, ირაკლი ჭეიშვილმა მიაწოდა.

ირაკლი ჭეიშვილმა ასევე მიმართა ოპონენტებს და თქვა, რომ „მათ აუცილებლად მოუწევთ ამ შედეგების აღიარება“.

ცესკოს ოფიციალური ვებგვერდის თანახმად, ამ დროისთვის [00:30 სთ] ბათუმში 105 საარჩევნო უბნიდან 30 უბნის მონაცემებია ატვირთული. ამ მოცემულობით ხმები ასე ნაწილდება: არჩილ ჩიქოვანი – 53.884%, გიორგი კირთაძე – 46.116%.

 

ცესკოს მონაცემებით, ადგილობრივი თვითმმართველობის არჩევნების მეორე ტურში ბათუმში ამომრჩეველთა 52 პროცენტმა მიიღო მონაწილეობა, 0,36 პროცენტით ნაკლებმა პირველ ტურთან შედარებით.

კერძოდ, დღეს, 30 ოქტომბერს, ადგილობრივი თვითმმართველობის არჩევნების მეორე ტურში ბათუმში მონაწილეობა მიიღო ამომრჩეველთა 52 პროცენტმა – 76 944 ამომრჩეველმა, ხოლო 2 ოქტომბერს, პირველ ტურში – ამომრჩეველთა 52.36 პროცენტმა – 77 494 ამომრჩეველმა.

რაც შეეხება მთელი ქვეყნის მონაცემებს, ცესკოს მონაცემებით, არჩევნების მეორე ტურში მონაწილეობა მიიღო ამომრჩეველთა 49.09 პროცენტმა.

ბათუმის 49-ე საარჩევნო უბანზე ამომრჩეველსა და კომისიის წევრს შორის სიტყვიერი და ფიზიკური დაპირისპირება იყო. ერთ-ერთი დამკვირვებლის განცხადებით, უბანზე შევიდა ამომრჩეველი, რომელმაც ხმის მიცემის შემდეგ გინება დაუწყო უბანზე მყოფ პირებს.

„უბანზე შემოვიდა საკმაოდ აგრესიული ამომრჩეველი, ყველას შეურაცხყოფას აყენებდა, ვინც „ოცნებას“ არ აძლევდა ხმას. მივმართე თავმჯდომარეს, რომ აღმოეფხვრა ეს ინციდენტი, ამის შემდეგ მან მომაყენა შეურაცხყოფა, შემეხო ფიზიკურადაც. აგინებდა ყველას, ვინც არ იყო „ოცნების“ ამომრჩეველი“ – ამბობს საოლქო საარჩევნო კომისიის წევრი „ნაციონალური მოძრაობიდან“ ირმა ხოროიშვილი.

კიდევ ერთი დამკვირვებელი ამბობს, რომ  კაცი ფიზიკურად დაუპირისპირდა უბანზე მყოფ პირებს.

აღნიშნული პირი პოლიციამ გადაიყვანა. „ბათუმელების“ კითხვაზე თუ რა მუხლით გადაჰყავდათ პირი, პოლიციამ არ გვიპასუხა.

„რა მუხლით დამაკავეს და სიმართლის მუხლით, ქართულ ოცნებას გაუმარჯოს“ – იძახდა დაკავებული კაცი.

ამ დროისთვის დაკავებულის ვინაობა არ არის ცნობილი.

ადგილობრივი თვითმმართველობის არჩევნების მეორე ტურის დასრულებამდე ერთი საათით ადრე ერთიანი ნაციონალური მოძრაობის ბათუმის ოფისში ბრიფინგზე განაცხადეს, რომ ამ არჩევნებზე დარღვევების მთავარი ხაზი იყო ამომრჩევლის ნების კონტროლი.

„ძირითადი ხაზი დარღვევებისა გახლდათ ამომრჩევლის ნების კონტროლი, ეს ხდებოდა მოსყიდვით, ზეწოლით თუ შანტაჟით, მათ შორის ე.წ. ბეიჯიანი ძველი ბიჭებით.

ასევე, ზეწოლას განიცდიდნენ საჯარო მოხელეები და საბიუჯეტო დაფინანსებაზე მყოფი ადამიანები, მათ დავალება ჰქონდათ ხელმძღვანელობისგან, საარჩევნო უბანზე შემოხაზული ბიულეტენისთვის გადაეღოს ფოტოსურათი და გაეგზავნათ „ქართული ოცნების“ შტაბში.

ამომრჩეველთა დიდმა ნაწილმა ეს შეასრულა, ოღონდ ამის შემდეგ  ხაზავდნენ „ქართული ოცნების“ კანდიდატის და ხდებოდა მათთვის სასურველი კანდიდატის შემოხაზვა. ეს მტკიცებულებები ჩვენ გვაქვს ხელთ. ესეც მიუთითებს ამომრჩევლის ნების კონტროლზე“ – განაცხადა მირდატ ქამადაძემ, ნაციონალური მოძრაობის წევრმა ბრიფინგზე.

მან წარმოადგინა საარჩევნო ბიულეტენის ფოტოს ქსეროასლი, რომელზეც შემოხაზულია ბათუმის მერობის ორივე კანდიდატი, თუმცა „ოცნების“ კანდიდატი გადახაზულია.

„ქართული ოცნების შტაბიდან გაიცა დავალება საუბნო-საარჩევნო კომისიის წევრებზე, რომ მსგავსი ბიულეტენები გამოცხადდეს ბათილად და არ ჩაეთვალოს ოპოზიციონერ კანდიდატს. სინამდვილეში ხედავთ, რომ ამ ბიულეტენებზე გამოხატულია ამომრჩევლის ნება. თუ რომელიმე კომისიის წევრი შეეცდება მსგავსი ბიულეტენების ბათილად ცნობას, არ უნდა მივცეთ ამის საშუალება“ – განაცხადა მირდატ ქამადაძემ.

ცესკოს მონაცემებით, ბათუმში, ადგილობრივი თვითმმართველობის არჩევნების მეორე ტურში, 17 საათის მონაცემებით, ხმა მისცა ამომრჩეველთა 42.2 პროცენტმა, სულ 62 379-მა ამომრჩეველმა.

ამ მონაცემების მიხედვით, მეორე ტურში ბათუმში ამომრჩეველთა აქტივობა მცირედით, მაგრამ მაინც უფრო მაღალია. თვითმმართველობის არჩევნების პირველ ტურში, 17 საათის მონაცემებით ამომრჩეველთა 42 პროცენტს ჰქონდა ხმა მიცემული – 62 182 ამომრჩეველს.

პირველ ტურთან შედარებით, ამომრჩეველთა აქტივობა დაბალია ხელვაჩაურში. ცესკოს 17 საათის მონაცემებით, ხელვაჩაურში ხმა მისცა ამომრჩეველთა 43.7 პროცენტმა [19 402 ამომრჩეველი], მაშინ როცა პირველ ტურში, 17 საათზე ამომრჩეველთა 46.1 [20 468 ამომრჩეველი] პროცენტს ჰქონდა ხმა მიცემული.

ქვეყნის მასშტაბით, 17 საათის მონაცემებით, საქართველოში ამომრჩეველთა 39.5 პროცენტი მივიდა არჩევნებზე.

„ბათუმელებმა“ ბათუმის #41-ე საარჩევნო უბანზე, ყუთში ჩაყრილი ცესკოს აკრედიტაციის სავარაუდოდ გაყალბებული მოწმობების ქსეროასლები აღმოაჩინა. ქსეროასლების მიხედვით, აკრედიტაციები გაცემულია სხვადასხვა პირზე, ზოგ შემთხვევაში ერთი და იმავე პირზე ორი სხვადასხვა მოწმობის ასლიც აღმოჩნდა.

აკრედიტაციების ქსეროასლებზე მითითებულია, რომ ეს პირები წარმოადგენენ შემდეგ ორგანიზაციებს: „საზოგადოებრივი აზრის შემსწავლელი ცენტრი“, „ALL MEDIA“, „ახალგაზრდა თაობა“, „მომავლის ნათება“.

„ბათუმელების“ კითხვაზე, თუ როგორ აღმოჩნდა აკრედიტაციის მოწმობის ქსეროასლები უბანზე, ყუთში, ერთ-ერთმა დამკვირვებელმა უთხრა, რომ „აკრედიტაციები ორ-ორად დაიბეჭდა და ეს უკვე მაკულატურაა“.

აკრედიტაციის ბარათი, რომელსაც ცესკო გასცემს ორგანიზაციის დამკვირვებელზე, გაიცემა მხოლოდ ერთ ეგზემპლარად.

„ბათუმელებმა“ გადაამოწმა ის ორგანიზაციები, რომელთა დასახელებაც იყო მითითებული საარჩევნო უბანზე აღმოჩენილ ქსეროასლებზე.

ცესკოს მონაცემებით, „საზოგადოებრივი აზრის შემსწავლელი ცენტრს“ არჩევნებზე აკრედიტაცია აქვს. მეტიც, ამ ორგანიზაციამ არჩევნების მეორე ტურზე დამკვირვებლების რაოდენობა გაზარდა. თუ პირველ ტურში ამ ორგანიზაციის სახელით არჩევნებს აკვირდებოდა 483 პირი, მეორე ტურზე დამკვირვებლების რაოდენობაა – 702.

„ახალგაზრდა თაობას“ არჩევნების პირველ ტურზე 1052 დამკვირვებელი ჰყავდა, მეორე ტურზე კი 1172 დამკვირვებელი ჰყავს;

„ALL MEDIA“-ს პირველ ტურზე 668 დამკვირვებელი ჰყავდა, მეორე ტურზე კი 1353 დამკვირვებელი ჰყავს;

„მომავლის ნათებას“ არჩევნების პირველ ტურზე 1393 დამკვირვებელი ჰყავდა, მეორე ტურზე კი 1545 დამკვირვებელი ჰყავს.

მაგალითად, ALL MEDIA-სთან დაკავშირებით, 2016 წლის არჩევნების დროს საქართველოს ახალგაზრდა იურისტთა ასოციაცია [საია] წერდა: „აღმოჩნდა, რომ ამ უბანზე მედია საშუალება „All media წარმომადგენლის მონაცემები (სახელი და გვარი) არ დაემთხვევა ცესკოს მიერ აღნიშნული შტრიხკოდით გაცემულ დამკვირვებლის მოწმობას. ოქმი იქნა შედგენილი მედია საშუალების წარმომადგენლის მიმართ და ამ საფუძველზე გაძევებულ იქნა უბნიდან. გამოძახებულ იქნა პატრულიც, რომელიც ჩაერთო საქმეში. დამატებით მოვიდა პოლიცია და გამოკითხეს კომისიის წევრები“.

„ბათუმელების“ ინფორმაციით, სარჩევნო უბანზე აღნიშნული ფაქტის გამო საჩივარი არ დაწერილა.

41-ე საარჩევნო უბნის კომისიის მდივანი, გვანცა ქათამაძე ამბობს, რომ უბანზე რამდენიმე დამკვირვებელი იმყოფებოდა იმ სახელის და გვარის, ვისზეც არის აკრედიტაციები გაცემული.

„მაგალითად, გოჩა ტრაპაიძე და ლეილა ჯინჭარაძე იყო უბანზე დამკვირვებლად, თუმცა თინა ჯიჯავაძე არ ყოფილა. ეს ქსეროასლები ჰქონდათ მათ უბანზე. რატომ ჰქონდათ ქსეროასლები არ ვიცი“, – გვეუბნება კომისიის მდივანი.

ცესკოს სპიკერის ნათია იოსელიანის თქმით კი, „ეს საკითხი გასარკვევია“.

„ჯერ უნდა დადგინდეს, ვის ეკუთვნოდა ეს კონკრეტული აკრედიტაციის მოწმობები. შესაძლებელია, კონკრეტული ორგანიზაციის დამკვირვებლებს დარჩათ საუბნო საარჩევნო კომისიაში. მოსაკითხია ეს ამბავი. აუცილებლად გავარკვევთ. თუმცა კანონდარღვევასთან არ გვაქვს საქმე“, – ამბობს  ნათია იოსელიანი.

„შემოვიდა ინფორმაცია, რომ გონიოში მობილიზებულები იყვნენ ქუჩის ბიჭები. გავედით ჩვენ და „ფორმულა“. გადავიღეთ – ვიკითხეთ, რას აკეთებდნენ უბანთან და წამოვედით. როცა ჩავსხედით მანქანაში „ფორმულას“ მანქანას ქვა ესროლეს“, – აცხადებს  ბათუმში მთავარი არხის კორესპონდენტი თეა ვარშალომიძე გონიოს ინციდენტს.

მას შემდეგ, რაც ჟურნალისტებმა თავდამსხმელს ჰკითხეს, რატომ ესროლა ქვები, „ფორმულას“ რეპორტიორის თქმით, მას ერთ-ერთმა კაცმა თმაზე მოქაჩა. „დაგვესივნენ ყველა, ძველი ბიჭები, კოორდინატორები. გვაგინებდნენ. ერთმა თმაზე მომქაჩა“, – უთხრა „ბათუმელებს“ თამარ თადიშვილმა. ის „ფორმულას“ რეპორტიორია ბათუმში.

თეა ვარშალმიძის თქმით, მათ მალევე გამოიძახეს პოლიცია, რომელიც ადგილზე ოპერატიულად მოვიდა. „სწრაფად მოვიდნენ, მაგრამ გაოცებული ვარ, ჩვენზე თავდამსხმელებს ვერაფერი ვერ უთხრეს. ვერ ჩაერივნენ საერთოდ“, – აცხადებს თეა ვარშალომიძე.

კოალიცია მედიის ადვოკატირებისთვის, დღეს, 30 ოქტომბერს ადგილობრივი თვითმმართველობის არჩევნების მეორე ტურის გაშუქებისას დაფიქსირებულ დარღვევებზე საუბრობს.

ორგანიზაციის განცხადებით, დღეს, 16:00 საათამდე, არჩევნების მეორე ტურის მიმდინარეობისას დაფიქსირდა შემთხვევები, როცა ჟურნალისტებს და ოპერატორებს არ ჰქონდათ შესაძლებლობა თავისუფლად შეესრულებინათ მათი პროფესიული მოვალეობა.

„მმართველი პარტიის წარმომადგენლები აყენებდნენ სიტყვიერ შეურაცხყოფას და მათ „აქტივისტებს“, „ზონდერებს”, „დეზინფორმატორებსა“ და „ოპოზიციის წარმომადგენლებს“ უწოდებდნენ.

კოალიცია „მედიის ადვოკატირებისთვის“ წევრი ორგანიზაციები მოუწოდებენ საარჩევნო სუბიექტებს და მათ წარმომადგენლებს დაიცვან საქართველოს კანონმდებლობა და არ შეუშალონ ხელი ჟურნალისტებს და ოპერატორებს პროფესიული მოვალეობის შესრულებაში.

კოალაცია მოუწოდებს „ქართული ოცნების” წარმომადგენლებს შეწყვიტონ სიტყვიერი თავდასხმები და აგრესიის წახალისება ჟურნალისტების მიმართ.

„ასევე მივმართავთ საქართველოს შინაგან საქმეთა სამინისტროს დაუყოვნებლივ მოახდინოს რეაგირება ჟურნალისტურ საქმიანობაში უკანონო ხელშეშლის შემთხვევებზე.

__________________

ფოტოზე: კადრი TV 25-ის ვიდეოდან. კაცმა, რომელიც კადრში ჩანს, TV 25-ის ჟურნალისტს მიაყენა სიტყვიერი შეურაცხყოფა.

ბათუმში, „ნაციონალური მოძრაობის“ ოფისში ბრიფინგი გაიმართა საარჩევნო დარღვევებთან დაკავშირებით. ენმ-ს წარმომადგენლის, მირდატ ქამადაძის განცხადებით, დღეს, ამ დრომდე პარტიის დამკვირვებლებმა დაწერეს 30 საჩივარი, მათ შორის ოთხი საჩივარი დაიწერა საოლქო კომისიაში.

მირდატ ქამადაძის თქმით, მერვე უბანზე იყო შემთხვევა როცა ამომრჩეველი მივიდა ხმის მისაცემად, მაგრამ სამაგიდო სიაში მათი გვარის გასწვრივ ხელი უკვე მოწერილი იყო. „მათ არ მიეცათ ხმის მიცემის საშუალება, რაც აჩენს ეჭვს, რომ კარუსელს ატრიალებს სახელისუფლებო პარტია.

როგორც ვიცით, საარჩევნო უბანზე ასი მეტრის რადიუსში არ შეიძლება გარეშე პირების ყოფნა, თუმცა „ქართულმა ოცნებამ“ ახალი ნოუ ჰაუ შემოგვთავაზა და ე.წ ძველ ბიჭებს ბეიჯი ჩამოკიდა და თითქოს ლეგალური გახადა მათი იქ ყოფნა. რეალურად, ეს ადამიანები იმიტომ იმყოფებიან უბანზე, რომ ამომრჩევლის ნებაზე მოახდინონ გავლენა.

24-ე საარჩევნო უბნის მიმდებარედ, ჯავახიშვილის ტერიტორიას ეკუთვნის ეს უბანი, დადასტურებულია თანხის გადაცემის ფაქტი და ამის ვიდეომასალებს მოგაწვდით ჟურნალისტებს.

უბნიდან ასმეტრიანი რადიუსის დარღვევის ხშირი ფაქტებია, რაზეც პოლიციას არაერთხელ მივმართეთ თუმცა ხშირად პოლიციელები არიან ინერტულები“ – ამბობს მირდატ ქამადაძე.

მან ასევე განაცხადა, რომ „ქართული ოცნების“ კომისიის წევრები შეგნებულად აზიანებენ ბიულეტენებს:

„როცა ჩვენი მხარდამჭერები მიდიან უბანზე და ცნობენ მათ სახეზე „ქართული ოცნების“ კომისიის წევრები, ან ბეჭდს აკლებენ ბიულეტენს, ან ხელი არ არის მოწერილი, რაც საბოლოოდ ამ ბიულეტენის ბათილობას გამოიწვევს. ამ ფაქტებზეც დაწერილია საჩივარი“ – ამბობს მირდატ ქამადაძე.

ამავე თემაზე: 

რა დარღვევებზე საუბრობს ბათუმში „სამართლიანი არჩევნები“

See more

ხელვაჩაურში, #2 საბავშვო ბაღის შენობაში მდებარე 101-ე საარჩევნო უბანზე, ამომრჩეველი ბავშვთან ერთად მივიდა, რომელსაც ხელში პარტია „ქართული ოცნების“ სიმბოლიკიანი დროშა ეჭირა.

მიუხედავად იმისა, რომ საარჩევნო უბანზე აკრძალულია საარჩევნო სუბიექტის სიმბოლიკებისა და ნიშნის რაიმე ფორმით ტარება, მოქალაქისთვის, რომელსაც ბავშვი ახლდა, შენიშვნა არავის მიუცია.

კერძოდ, არჩევნების დღეს კენჭისყრის შენობაში აკრძალულია წინასაარჩევნო აგიტაცია. ასევე, დაუშვებელია კენჭისყრის შენობის შესასვლელიდან 25 მეტრის მანძილზე სააგიტაციო მასალის განთავსება. ეს მასალა ჩამოხსნას/დემონტაჟს/აღებას ექვემდებარება.

„ბავშვი იყო, დიდი ხომ არ შემოსულა (დროშით), პატარა ბავშვი იყო…“ – უთხრა დამკვირვებელს უბნის კომისიის თავმჯდომარემ.

 

30 ოქტომბრის მონაცემებით, გასულ 24 საათში აჭარაში კოვიდის 154 ახალი შემთხვევა დადასტურდა.

ამავე პერიოდში რეგიონში 6 ადამიანი გარდაიცვალა კორონავირუსით.

დღეის მონაცემებით, აჭარის კოვიდკლინიკებშია 506 პაციენტი, კოვიდსასტუმროში იმყოფება 184 ინფიცირებული.

ავტორი: ანა შენგელია 

დღეს, 30 ოქტომბერს, საქართველოში ადგილობრივი თვითმმართველობის არჩევნების მეორე ტური იმართება. არასამთავრობო ორგანიზაცია „სამართლიანი არჩევნები“ აქვეყნებს დარღვევების ჩამონათვალს, რომელიც ამ ორგანიზაციის დამკვირვებლებმა შენიშნეს საარჩევნო უბნებზე 11 საათამდე. 

„სამართლიანი არჩევნები“ ბათუმში შემდეგ დარღვევებზე საუბრობს:

• მე-100 საარჩევნო უბანზე დაირღვა წილისყრის პროცედურა – კერძოდ, საკონტროლო ფურცელი შეივსო და ყუთში მოთავსდა ამომრჩევლის მიერ ბიულეტენის ჩაგდების შემდეგ. 
• #51 საარჩევნო უბანზე რეგისტრატორმა ბიულეტენი კომისიის ბეჭდითა და ხელმოწერით დამოწმების გარეშე გადასცა ამომრჩეველს.
• 59-ე საარჩევნო უბანზე  ერთ-ერთმა ამომრჩეველმა ხელი არასათანადო ადგილას მოაწერა. 
• მე-6 საარჩევნო უბანზე მარკირების შესამოწმებელი ხელსაწყო გაუმართავი იყო. „სამართლიანი არჩევნების“ ცნობით, საუბნო საარჩევნო კომისიამ ახალი ხელსაწყო საოლქო საარჩევნო კომისიისგან მიიღო. 

„სამართლიანი არჩევნები“ ასევე აქვეყნებს მონაცემებს საარჩევნო უბნის გარეთ არსებულ დარღვევებზეც.

ორგანიზაციამ სავარაუდო მოსყიდვის 2 ფაქტი დააფიქსირა ბათუმში:

• #85 საარჩევნო უბანთან შედგა სავარაუდო მოსყიდვასთან დაკავშირებული კომუნიკაცია. ორი ამომრჩეველი შეხვდა მესამე პირს, რომელმაც მათ ჰკითხა, იყვნენ თუ არა ხმის მისაცემად და მისცეს თუ არა მათ ფული, რომელსაც დაჰპირდნენ;
• #45 საარჩევნო უბანთან, მანქანაში მყოფმა სავარაუდოდ პარტია „ქართული ოცნების“ წარმომადგენელმა უბნიდან გამოსულ ერთ-ერთ ამომრჩეველს ფული გადასცა.

„სამართლიანი არჩევნები“ აცხადებს, რომ ბათუმში შეინიშნება კოორდინატორების მობილიზება საარჩევნო უბნებთან:

• #45 საარჩევნო უბანთან, მანქანაში, მობილიზებულნი არიან პარტია “ქართული ოცნების” კოორდინატორები, რომელთაც ხელში სახელობითი სიები უჭირავთ და ეკონტაქტებიან ამომრჩევლებს, როგორც უბანში შესვლამდე, ისე უბნიდან გამოსვლის შემდეგ; 
•  #98 საარჩევნო უბანთან შეინიშნება კოორდინატორების ყოფნა, რომლებიც კომუნიკაციაში შედიან ამომრჩევლებთან. ამ ეტაპზე დაუდგენელია მათი პარტიული მიკუთვნება; 
• #85 საარჩევნო უბანთან, 100 მეტრის რადიუსში, შეინიშნება პარტია ,,ქართული ოცნების” კოორდინატორების შეკრება, რომელთაც კომუნიკაცია აქვთ ამომრჩეველთან. 

დღეს, 30 ოქტომბერს, ბათუმში, ფრიდონ ხალვაშის გამზირზე ავტომობილი ქვეითად მოსიარულეს დაეჯახა. შემთხვევას შს სამინისტრო ადასტურებს.

სასწრაფო სამედიცინო დახმარების ცენტრის ინფორმაციით, ასაკოვანი ქალი, რომელსაც მანქანა დაეჯახა, ზედაპირული დაზიანებებით გადაყვანილია კლინიკა “მედინაში”.

ავტომანქანა, რომელიც ქვეითს დაეჯახა, „ენერგო-პრო ჯორჯიას“ საკუთრებაა. კომპანიაში „ბათუმელებს“ უთხრეს, რომ მომხდარზე გამოძიება დაწყებულია და კომპანია იმოქმედებს კანონით გათვალისწინებული ღონისძიებების ფარგლებში.

არასამთავრობო ორგანიზაცია „სამართლიანი არჩევნები“ ამომრჩევლის სავარაუდო მოსყიდვის ფაქტებზე ავრცელებს ცნობას.

ორგანიზაციის ცნობით, მათმა დამკვირვებლებმა 11 საათისთვის ამომრჩევლის სავარაუდო მოსყიდვის ორი შემთხვევა დააფიქსირეს ბათუმში.

„#79 ბათუმის საარჩევნო ოლქის #45 საარჩევნო უბანთან, მანქანაში მყოფმა სავარაუდოდ პარტია „ქართული ოცნების“ წარმომადგენელმა უბნიდან გამოსულ ერთ-ერთ ამომრჩეველს ფული გადასცა“, – აცხადებს „სამართლიანი არჩევნები“.

ამასთან, ორგანიზაციის ცნობით, ბათუმის #85 საარჩევნო უბანთან შედგა სავარაუდო მოსყიდვასთან დაკავშირებული კომუნიკაცია. ორი ამომრჩეველი შეხვდა მესამე პირს, რომელმაც მათ ჰკითხა, იყვნენ თუ არა ხმის მისაცემად და მისცეს თუ არა მათ ფული, რომელსაც დაჰპირდნენ.

ავტორი: ევა ართმელაძე 

დღეს, 30 ოქტომბერს, ადგილობრივი თვითმმართველობის არჩევნების მეორე ტურზე ხმა მისცა საქართველოს პრეზიდენტმა, სალომე ზურაბიშვილმა.

„მე ძალიან დიდი იმედი მაქვს, რომ ეს პოლარიზაცია, რაც ჩვენ ვნახეთ წინა საარჩევნო პერიოდში, დასრულდება, იმიტომ, რომ ამ ქვეყნისთვის უნდა დასრულდეს. თუ არა – ხეირობს მხოლოდ ერთი, ჩვენი მეზობელი“ –  განაცხადა სალომე ზურაბიშვილმა მედიასთან.

მან აღნიშნა, რომ ხმა მისცა „ერთიანობას, სიწყნარესა და სიმშვიდეს“. 

დღეს საქართველოს მოსახლეობა ადგილობრივი თვითმმართველობის არჩევნების მეორე ტურში ირჩევს მერებს 5 თვითმმართველ ქალაქსა და 15 მუნიციპალიტეტში, ხოლო 24 საარჩევნო ოლქში – საკრებულოების 42 მაჟორიტარ წევრს.

 

დღეს, 30 ოქტომბერს, ადგილობრივი თვითმმართველობის არჩევნებზე ხმის მისაცემად მისულ „ოცნების“ მერობის კანდიდატს, არჩილ ჩიქოვანს, საარჩევნო უბანზე სამოქალაქო აქტივისტი ალექსანდრე მილორავა დახვდა ფოტოსურათით, რომელზეც არჩილ ჩიქოვანი და მიხეილ სააკაშვილი არიან გამოსახული.

ალექსანდრე მილორავას განმარტებით, მას არჩილ ჩიქოვანისგან ავტოგრაფი სურდა ამ ფოტოზე:

„აქ არის გამოსახული ბატონი არჩილ ჩიქოვანი, ქართული ოცნების მერობის კანდიდატი, გამოსახულია მიხეილ სააკაშვილთან ერთად, რომელიც დღეს იმყოფება ბიძინა ივანიშვილის პოლიტიკურ ტყვეობაში. ამ ადამიანს ხედავთ, რომ ძალიან მეგობრული შეხვედრა აქვს სუფრასთან, დღეს მისი გუნდის წევრები გამოირჩევიან სიძულვილის ენით, მათ პირად ტყვეობაშია მიხეილ სააკაშვილი და ეს ადამიანი უჭერს მხარს ამ პოლიტიკურ ტყვეობას.

მე უბრალოდ მინდოდა, რომ ამ ფოტოზე მოეცა ავტოგრაფი ბატონ არჩილს.

მე ბატონ არჩილთან ძალიან ბევრჯერ მქონდა შეხვედრის სურვილი, მაგრამ ყოველთვის გვემალებოდა, დღეს იყო ერთადერთი შანსი, როდესაც ის მოვიდა და დავხვდი საარჩევნო უბანზე, მისი პოზიციაა რომ სულ გარბის, ასე რომ სადაც შევძელი იქ დავხვდი” – თქვა ალექსანდრე მილორავამ ჟურნალისტებთან საუბრისას, მას შემდეგ რაც მას საარჩევნო უბანი დაატოვებინეს.

ბათუმის მერობის კანდიდატმა, არჩილ ჩიქოვანმა მომხდარს პროვოკაცია უწოდა.

დღეს, 30 ოქტომბერს საქართველოში ადგილობრივი თვითმმართველობის არჩევნების მეორე ტური მიმდინარეობს. ცესკოს მონაცემებით, 10 საათისთვის საქართველოში ამომრჩეველთა 7.38 პროცენტმა მისცა ხმა.

რაც შეეხება აჭარის იმ მუნიციპალიტეტებს, სადაც არჩევნების მეორე ტური მიმდინარეობს, 10 საათის მონაცემებით ყველაზე მაღალი აქტივობა ბათუმშია.

• ბათუმი – ხმა მისცა ამომრჩეველთა 7.8 პროცენტმა
• ქედა – ხმა მისცა  ამომრჩეველთა 7.2 პროცენტმა
• ხელვაჩაური – ხმა მისცა ამომრჩეველთა 8.6 პროცენტმა
• ხულო – ხმა მისცა ამომრჩეველთა 4.9

აჭარაში ბათუმსა და ხელვაჩაურში მერის არჩევნების მეორე ტური მიმდინარეობს, ქედაში, ხულოსა და ხელვაჩაურში კი მაჟორიტარი დეპუტატების არჩევნებია.

არჩევნების მეორე ტურზე საქართველოში ხმას აძლევს სულ 2 088 722 ამომრჩეველი. არჩევნების მეორე ტურში საქართველოს მოსახლეობა ირჩევს მერებს 5 თვითმმართველ ქალაქსა და 15 მუნიციპალიტეტში, ხოლო 24 საარჩევნო ოლქში – საკრებულოების 42 მაჟორიტარ წევრს.

30 ოქტომბრის მონაცემებით, საქართველოში დადასტურდა კოვიდის 4 610 ახალი შემთხვევა. ჩატარდა 55 815 ტესტი კორონავირუსზე.

გასულ 24 საათში 42 პაციენტი გარდაიცვალა კოვიდით.

დღეს ქვეყანაში გამოვლენილი ინფიცირების 4 610 ახალი შემთხვევიდან თბილისში გამოვლენილია 1 663 შემთხვევა, აჭარაში – 154, იმერეთში – 871, ქვემო ქართლში – 324, შიდა ქართლში – 324, გურიაში – 118, სამეგრელო – ზემო სვანეთში – 316, კახეთში – 577, მცხეთა-მთიანეთში – 83, სამცხე-ჯავახეთში -133, რაჭა-ლეჩხუმსა და ქვემო სვანეთში – 47.

დადებითობის დღიური მაჩვენებელი არის 8.26%, ბოლო 14 დღის მანძილზე – 8.96% ხოლო 7 დღის მანძილზე – 8.82%.

„ეს არჩევნები არც თავისუფალი იყო და არც სამართლიანი. თუ არ დავფიქრდით არჩევნებში ადმინისტრაციული რესურსის როლზე და პოლიტიკურად ნეიტრალურ საჯარო კლასზე, საერთოდ არჩევნებმა შეიძლება აზრი დაკარგოს“ – განაცხადა დღეს, 30 ოქტომბერს, არჩევნების მეორე ტურზე ხმის მიცემის შემდეგ პარტია „საქართველოსთვის“ ლიდერმა, გიორგი გახარიამ.

მან ჟურნალისტებთან არ დააკონკრეტა ვის მისცა ხმა – კახა კალაძეს, ნიკა მელიას თუ ორივე კანდიდატი გადახაზა:

„როცა ჩვენ არჩევანის უფლებას გვართმევენ, როცა ორივე პარტია გვიმტკიცებს, რომ მეორე უარესია, ვიდრე თვითონ და გვაიძულებენ არჩევანი გავაკეთოთ ცუდს და ცუდს შორის, მე ხმას ვაძლევ საქართველოსთვის“ – თქვა მან.

გახარიამ ასევე კომენტარი გააკეთა პარტიის ყოფილი წევრის, ირაკლი თავდგირიძის გადაწყვეტილებაზე, რომელმაც გუშინ, 29 ოქტომბერს პარტია „საქართველოსთვის“ დატოვა.

„ჩემმა კოლეგებმა გუშინ ძალიან კარგი კომენტარი გააკეთეს, ვინც გასაყიდია, უნდა გაიყიდოს.

ველოდები და მზად ვარ იმისთვის, რომ როგორც დაანონსდა, ღიად თქვეს, რომ ვიყიდით, დავაშინებთ, „ქართული ოცნება“ ამას გააგრძელებს. ვიღაცები ამას გაუძლებენ, ვიღაცები ვერ გაუძლებენ, მაგრამ ჩვენთვის ეს მხოლოდ პოზიტიური პროცესია“ – აღნიშნა მან.

მან ასევე განაცხადა, რომ დღეის მდგომარეობით, პარტიას „საქართველოსთვის“ არ ექნება არავისთან კოალიცია – „იქ სადაც თანამშრომლობის შესაძლებლობა იყო და ეს იყო „ლელოსთან“, ჩვენ კი, ვთანამშრომლობთ“ – დასძინა მან.

„ქართული ოცნების“ თავმჯდომარემ ირაკლი კობახიძემ, დღეს, 30 ოქტომბერს, არჩევნების მეორე ტურზე ხმის მიცემის შემდეგ ჟურნალისტებთან საუბრისას განაცხადა, რომ მისი ინფორმაციით, საქართველოს ექს-პრეზიდენტი მიხეილ სააკაშვილი დღეს ცუდად გახდომის სიმულირებას გეგმავს:

„სააკაშვილს რაც შეეხება და მის იმიტირებულ შიმშილობას, ჩვენ გვაქვს ასეთი ინფორმაცია, რომ ის მაინცდამაინც დღეს აპირებს, რომ გახდეს ცუდად, ანუ აპირებს სიმულირებას იმისთვის, რომ თავის მხარდამჭერებში რაღაც ემოციები აღძრას.

როგორი სიმულაციაც არ უნდა განახორციელოს დღეს სააკაშვილმა, ამას ვერ ექნება ვერანაირი წარმატება.

შიმშილობაზე პასუხისმგებელია მოშიმშილე, რომელიც არის უმძიმესი დამნაშავე… ეს არის სამარცხვინო კაცი, ამის გამო მან უნდა მოინანიოს, კი არ უნდა იშიმშილოს. დაველოდოთ უწყებებს და ისინი წარმოადგენენ მტკიცებულებებს (იმიტირებული შიმშილობის შესახებ).

… მთელი ციხე იცინის იმაზე, რომ დღეში სამ ლიტრ ლიმონათს სვამს ეს კაცი, ყიდულობს. დღეში სამი ლიტრა ლიმონათი არის იმ სირცხვილის გაგრძელება, რასაც წარმოადგენს მიხეილ სააკაშვილი“ – თქვა მან.

საქართველოს მესამე პრეზიდენტი მიხეილ სააკაშვილი საქართველოში პირველ ოქტომბერს დააკავეს და მას შემდეგ შიმშილობს. ხელისუფლება კატეგორიულად ეწინააღმდეგება მის გადაყვანას სამოქალაქო ტიპის სამკურნალო დაწესებულებაში. თავად სააკაშვილი კი უარს ამბობს ციხის საავადმყოფოში გადასვლაზე, რადგან მიიჩნევს, რომ მას იქ საფრთხე ემუქრება.