Batumelebi

ავტორი: ანა შენგელია 

ავღანეთი ახლა მსოფლიოში ერთ-ერთი ყველაზე მძიმე ჰუმანიტარული კრიზისის წინაშეა.

გაეროს ცნობით, ავღანეთს ნოემბერში მასშტაბური შიმშილი ემუქრება და ამის თავიდან ასაცილებლად გადაუდებელი ზომების მიღებაა საჭირო. 

გაერთიანებული ერების ორგანიზაციის შეფასებით, ავღანეთის მოსახლეობის ნახევარს, თითქმის 23 მილიონ ადამიანს, საკვების მწვავე დეფიციტი აქვს. 

როგორც გაეროს სურსათისა და სოფლის მეურნეობის ორგანიზაციის გენერალური დირექტორი კუ დონჟუ აცხადებს, საჭიროა სწრაფი მობილიზაცია დახმარების გასაწევად:

„ეს არის სიკვდილ-სიცოცხლის საკითხი. ჩვენ არ უნდა ვისხდეთ ხელდაკრეფილები და არ უნდა ვაკვირდებოდეთ, როგორ ხდება ეს ტრაგედია ჩვენ თვალწინ. ეს დაუშვებელია.“

გაეროს მონაცემებით, ავღანეთში აპრილის შემდეგ 37 პროცენტით გაიზარდა იმ ადამიანების რიცხვი, რომლებიც ებრძვიან შიმშილს. 

რისკის ჯგუფში 5 წლამდე ასაკის 3,2 მილიონი ბავშვია. 

გაეროს ცნობით, თუ ავღანეთში ადრე ძირითადად სოფლად მცხოვრებთათვის იყო პრობლემატური საკვების მოპოვება, დღეს სავალალო მდგომარეობაშია ქალაქის მოსახლეობაც.

მასობრივი უმუშევრობა, სავარაუდოდ, გააღატაკებს საშუალო ფენას და კიდევ უფრო გაზრდის შიმშილობის მაჩვენებელს.

გაეროს ჰუმანიტარული გეგმა ავღანეთში მხოლოდ ერთი მესამედით ფინანსდება, „ეს წვეთია ზღვაში“ –  აცხადებს გაერო და მოუწოდებს დონორებს, სასწრაფოდ გამოყონ დაპირებული თანხები. 

______________

ფოტო: გაეროს სურსათისა და სოფლის მეურნეობის ორგანიზაცია

დღეს, 27 ოქტომბერს, თბილისში მმართველი პარტია, „ქართული ოცნება“ აქციას მართავს.

„ოცნების“ აქცია დაანონსდა მას შემდეგ, რაც თბილისში 14 ოქტომბერს გაიმართა ხალხმრავალი აქცია მიხეილ სააკაშვილის პატიმრობიდან გათავისუფლების მოთხოვნით.

მმართველი პარტია აცხადებს, რომ ეს არის არა კონტრაქცია, არამედ აქცია „მშვიდობისა და სტაბილურობისთვის“.

„27 ოქტომბერს დაგეგმილი აქციის მიზანი არის შემდეგი: მოგეხსენებათ, რომ ჩვენი სურვილი და ამოცანაა, მაქსიმალური მობილიზაცია გამოვაცხადოთ და ჩვენი ყველა ამომრჩეველი მივიდეს არჩევნებზე. ახლა არ არის მოდუნების დრო. ვიცი, რომ ყველას, მათ შორის ჩვენს ამომრჩეველს სჯერა, რომ ამ არჩევნებს, მეორე ტურებს ყველგან მოვიგებთ, მაგრამ ჩვენ გვინდა, რომ ეს იყოს ძლიერი მოგება და ყველა მუნიციპალიტეტში ძლიერი, დიდი განსხვავებით მოვიგოთ არჩევნები. სწორედ ამ მიზნით უნდა ჩავატაროთ დიდი, მშვიდობიანი აქცია.

ეს არ არის საპროტესტო აქცია. გავიგე, რომ ოპოზიციონერების წარმომადგენლებმა თქვეს, რომ ეს არის კონტრაქცია. ეს არის ჩვეულებრივი მშვიდობიანი აქცია. ჩვენს მოქალაქეებს კიდევ ერთხელ უნდა შევახსენოთ, რომ ჩვენ გვჭირდება მშვიდობა, სტაბილურობა და განვითარება“,- განაცხადა პრემიერ-მინისტრმა ირაკლი ღარიბაშვილმა 2 დღის წინ.

აქცია თბილისში, თავისუფლების მოედანზე, 17:00 საათზე დაიწყება.

_____________

ფოტოზე: მარჯანიშვილის გადაკეტილი მოედანი თბილისში. ფოტო: ნეტგაზეთი

ბათუმის იაშვილის კლინიკაში კორონავირუსზე 34 ბავშვი მკურნალობს. როგორც კლინიკაში „ბათუმელებს“ უთხრეს, მათგან ოთხი ბავშვი ჟანგბადდამოკიდებულია. „30 ბავშვის მდგომარეობა კი საშუალო სიმძიმისაა“.

27 ოქტომბრის მონაცემებით, აჭარაში კორონავირუსის 115 ახალი შემთხვევა დადასტურდა. ბოლო 24 საათში აჭარაში კოვიდით 3 პაციენტი გარდაიცვალა.

ქვეყნის მასშტაბით კი მდგომარეობა გაცილებით მძიმეა. ბოლო 24 საათში 4 337 ახალი შემთხვევა დადასტურდა და 42 პაციენტი გარდაიცვალა. დადებითობის მაჩვენებელი 8.12 პროცენტია.

დაავადებთა კონტროლის ეროვნული ცენტრის ხელმძღვანელის, ამირან გამყრელიძის ინფორმაციით, საქართველოში კოვიდით მთლიანობაში 103 927 ბავშვი და მოზარდი დაინფიცირდა [0-დან 18 წლამდე]. მათ შორის 9 გარდაიცვალა.

27 ოქტომბრის მონაცემებით, აჭარაში კორონავირუსის 115 ახალი შემთხვევა დადასტურდა. ამავე პერიოდში 3 პაციენტი გარდაიცვალა კოვიდით.

რეგიონში 496 პირს მკურნალობენ კოვიდზე კლინიკებში.

ამ დროისთვის აჭარაში კოვიდსასტუმროში იმყოფება 205 ადამიანი.

27 ოქტომბრის მონაცემებით, საქართველოში კოვიდის 4337 ახალი შემთხვევაა, 42 ადამიანი გარდაიცვალა კოვიდით გასულ დღე-ღამეში.

საქართველოს პროკურატურის ინფორმაციით, 2021 წლის 25 იანვარს ხელვაჩაურში ტაქსისტის დაყაჩაღებაში ბრალდებულებს 9 და 8 წლით თავისუფლების აღკვეთა მიესაჯა.

„ხელვაჩაურის რაიონულმა სასამართლომ სრულად გაიზიარა ბრალდების მხარის მიერ წარდგენილი მტკიცებულებები და ჯგუფურად ჩადენილ ყაჩაღობაში ბრალდებული ორი პირი დამნაშავედ ცნო.

ბრალდების მხარის მიერ სასამართლო პროცესზე წარდგენილი მტკიცებულებებით დადასტურდა, რომ 2021 წლის 25 იანვარს ქურდობისთვის ნასამართლევი პირები დანის დემონსტრირებით და სიცოცხლისთვის და ჯანმრთელობისთვის საშიში ძალადობით თავს დაესხნენ ტაქსის მძღოლს და  ავტომობილი გასტაცეს.

სამართალდამცველებმა ბრალდებულები 2021 წლის 26 და 28 იანვარს დააკავეს. მათ ბრალდება საქართველოს სისხლის სამართლის კოდექსის 179-ე მუხლის მე-2 ნაწილით (ყაჩაღობა, ჩადენილი ჯგუფურად, სატრანსპორტო საშუალების წინააღმდეგ, არერთგზის და დიდი ოდენობით ნივთის დაუფლების მიზნით)  წარედგინათ და აღკვეთის ღონისძიების სახით პატიმრობა  შეეფარდათ“-ნათქვამია პროკურატურის განცხადებაში.

ამავე წყაროს ცნობით, ხელვაჩაურის რაიონულმა სასამართლომ ორივე ბრალდებული დამნაშავედ ცნო წარდგენილ ბრალდებებში და სასჯელის სახედ და ზომად 9 წლით და 8 წლით თავისუფლების აღკვეთა მიუსაჯა.

27 ოქტომბრის მონაცემებით, საქართველოში დადასტურდა კოვიდის 4 337 ახალი შემთხვევა. ჩატარდა 53 434 ტესტი კორონავირუსზე.

გასულ 24 საათში 42 პაციენტი გარდაიცვალა კოვიდით.

დღეს ქვეყანაში გამოვლენილი ინფიცირების 4 337 ახალი შემთხვევიდან თბილისში გამოვლენილია  1 412 შემთხვევა, აჭარაში – 115, იმერეთში – 873, ქვემო ქართლში – 356, შიდა ქართლში – 362, გურიაში – 92, სამეგრელო – ზემო სვანეთში – 279, კახეთში – 614, მცხეთა-მთიანეთში – 108, სამცხე-ჯავახეთში – 89, რაჭა-ლეჩხუმსა და ქვემო სვანეთში – 37.

ამ ეტაპზე ქვეყანაში კოვიდით ინფიცირების 50 681 მიმდინარე აქტიური შემთხვევაა, 6 228 ადამიანი მკურნალობს საავადმყოფოში.

26 ოქტომბრის მდგომარეობით, დადებითობის დღიური მაჩვენებელი არის 8.12%, ბოლო 14 დღის მანძილზე – 8.91% ხოლო 7 დღის მანძილზე – 8.80%.

ბათუმში, ყოფილი მანქანათმშენებელი ქარხნის ტერიტორიაზე, შპს „შინჩიბა“ ოთხი ცათამბჯენის აშენებას გეგმავს. კომპანიაში აცხადებენ, რომ მიწის ნაკვეთზე განაშენიანების გეგმის მომზადების მიზნით ბათუმის მერიას უკვე მიმართა და თანხმობაც მიიღო.

შპს „შინჩიბა“ „მეტრო ჰოლდინგთან“ დაკავშირებული კომპანიაა – 80 პროცენტს ოზგურ ქურთი, 10 პროცენტს „მეტრო ატლას ჯორჯია“, ხოლო დარჩენილი 10 პროცენტს ბინ ლიანგ ჰუანგი ფლობენ.

ოზგურ ქურთი არის ასევე შპს „ვესთ თაუერის“ აქციების მფლობელი. ეს კომპანიაც „მეტრო ჰოლდინგთან“ არის დაკავშირებული და ბათუმში, ფიროსმანის #12ა-ში, ბათუმის იუსტიციის სახლთან, 240 მეტრი სიმაღლის ცათამბჯენის მშენებლობას გეგმავს.

242 მეტრი სიმაღლე და 72 სართული – ახალი, ყველაზე მაღალი თაუერი ბათუმში

„მეტრო ჰოლდინგის“ ერთ-ერთი დირექტორის, რაულ კახაძის ინფორმაციით, ყოფილი მანქანათმშენებელი ქარხნის ტერიტორიაზე მრავალფუნქციური კომპლექსის მშენებლობა იგეგმება.

„იქნება თანამდროვე სტანდარტების ბიზნესცენტრები, სავაჭრო ცენტრი და ასე შემდეგ, განხორციელდება 220 მილიონი დოლარის ღირებულების ქართული და უცხოური ინვესტიცია“, – ირწმუნება რაულ კახაძე. მისივე ინფორმაციით, უცხოური ინვესტიცია დუბაიდან იქნება – „ინვესტორებს დუბაიში ბიზნესცენტრები აქვთ“.

ორი ნაკვეთი ყოფილი მაქანათმშენებელი ქარხნის ტერიტორიაზე, თითქმის ერთი ჰექტარი [9 904 კვ.მ] ბათუმში, ცენტრალური სტადიონის მიმდებარედ, ბათუმის მერიამ ერთ ლოტად, პირობიანი აუქციონის წესით, 18 მაისს გაყიდა.

ნაკვეთების საწყისი ფასი 9 მილიონ 095 428 ლარი იყო, კომპანიამ ის კონკურენციის პირობებში 15 მილიონ 94 428 ლარად იყიდა. ხელშეკრულების თანახმად,  კომპანიას ამ დროისთვის ქონების ღირებულების მხოლოდ 60% უნდა ჰქონდეს გადახდილი.

ბათუმის მერიას ამ აუქციონთან დაკავშირებით კიდევ ერთი განსაკუთრებული პირობა ჰქონდა დაწესებული, გასხვისებული ნაკვეთების მომიჯნავედ არსებულ მიწის ნაკვეთზე მერია ქუჩის მოწყობას გეგმავს, რომელიც არსენა ოძელაშვილის ქუჩას უნდა შეუერთდეს.

მერია წერდა, რომ ქუჩის მოწყობის საშუალებას არ აძლევდა ოძელაშვილის #4-ში მდებარე 171 კვ.მეტრი მიწის ნაკვეთი და მასზე განთავსებული შენობა, ამიტომაც აუქციონის პირობით მყიდველი დაავალდებულა გამოესყიდა ეს ნაკვეთი თავისი შენობის ჩათვლით, გაეთავისუფლებინა ის და მუნიციპალიტეტისთვის გადაეცა საკუთრებაში.

საჯარო რეესტრის ამჟამინდელი მონაცემებით, ეს ნაკვეთი უკვე ბათუმის მუნიციპალიტეტის საკუთრებაშია.

„ეს არ უნდა მეკითხა მე“ – გვიპასუხა ბათუმის 79-ე საოლქო კომისიის თავმჯდომარე ციალა შავაძემ, რომელმაც ჟურნალისტის საჩივრის დაკმაყოფილებაზე 25 ოქტომბერს უარი თქვა და სხდომის დასრულების შემდეგ ვკითხეთ: გაიხსენეთ თქვენი, ან კომისიის რომელიმე წევრის ერთი კითხვა მაინც, რომლითაც ეცდებოდით გაგებას: თავს დაესხნენ თუ არა ჟურნალისტს რეალურად საუბნო კომისიის წევრები?

ბათუმის საოლქო კომისიას საჩივრით „ბათუმელების“ ჟურნალისტმა თამარ ნერგაძემ 2 ოქტომბრის შემდეგ მიმართა, თუმცა კომისიამ მის განხილვაზე უარი თქვა, რადგან ჟურნალისტი არაა უფლებამოსილი საარჩევნო დავა წამოიწყოს. საოლქო კომისია საჩივარზე სამსჯელოდ მას შემდეგ შეიკრიბა, როცა ბათუმის საქალაქო სასამართლოში მოსამართლე ჯუმბერ ბეჟანიძემ საოლქო კომისიის იურისტს ჰკითხა: „მაგრამ დისციპლინური საქმისწარმოებისთვის რა არის საჭირო? არ შეუძლია ნებისმიერ პირს დარღვევაზე მოგაწოდოთ ინფორმაცია და ეს განიხილოთ?”

ჟურნალისტმა საჩივარში ჩაწერა, რომ ბათუმის 34-ე საარჩევნო უბანზე მას შემდეგ შეუშალეს ხელი პროფესიულ საქმიანობაში, როცა ფეისბუქლაივით უბანზე ერთ-ერთი პრობლემა გაასაჯაროვა.

„კომისიის მდივანმა აგრესიულად მომთხოვა პასუხი ჟურნალისტური საქმიანობის გამო, მომმართავდა შემდეგი სიტყვებით: „ჩვენ ოჯახივით მიგიღეთ, საჭმელზე გეპატიჟებოდით და შენ ეს რა გამომიქვეყნე გოგო“, „ქუჩის ჟურნალისტი ხარ“, „რას გავხარ“, „დავრეკეთ შესაბამის ადგილას და იყო ჩვენთან ზარები, გვითხრეს, ვიცით უკვე რა ბინძური სულის ჟურნალისტი არის ჩვენთან“, „სკოლაში გაზრდი დებილს და დაინახავ მერე ტელეფონით ხელში დგას და ჟურნალისტი გამხდარა“, „დაწერე განცხადება და გაეთრიე აქედან“, „ქალი რომ ასეთი ინტრიგანი იქნები, დადგები და იღებ ყველაფერს,“ – საჩივარში პროფესიული საქმიანობის ხელშეშლის სხვა ფაქტებთან ერთად ეს ციტატები გაიხსენა ჟურნალისტმა.

საოლქო კომისიის წევრებმა, მათ შორის კომისიის თავმჯდომარე ციალა შავაძემაც ბევრი კითხვა დასვეს, თუმცა ერთი კითხვითაც არ უცდია კომისიას იმის გარკვევა, რაც იყო დავის საგანი, ანუ ხელი შეუშალეს თუ არა რეალურად ჟურნალისტს. პირიქით, საოლქო კომისიამ დავის საგანს სხდომის დასაწყისშივე გადაუხვია და იმის გარკვევით დაკავდა: ხომ არ დაარღვია ჟურნალისტმა წესები?

„მიზეზი რა იყო ამ კონფლიქტის? ტყუილად არ მოხდებოდა,“ – იკითხა მაგალითად, საოლქო კომისიის წევრმა, რამაზ კაკალაძემ და საუბნო კომისიის წევრებს გადახედა, რომლებიც ასევე ესწრებოდნენ საოლქო კომისიის გუშინდელ სხდომას.

„ჟურნალისტს თუ აქვს უფლებები, ჩვენ არ გვაქვს უფლებები?“ – ეს რადენჯერმე იკითხეს კომისიის წევრებმა პოლიტიკოსების პათოსით.

„როგორ შევუშალეთ ხელი, როცა თავიდან მოვიდა, ტელეფონი ჰქონდა დასამუხტი და შევაერთებიე…“ – თქვა 34-ე საარჩევნო უბნის თავმჯდომარე გივი მამულაძემ.

„გადაუღო ფოტო ისეთ პოზიციაში, რომელი პოზიციაც ჩვეულებრივ სიტუაციაში მიუღებელია… საჯდომი გადაიღო და ასე შემდეგ,“ – ჟურნალისტის საქმიანობისგან შეწუხებულმა საუბნო კომისიის თავმჯდომარემ „ბრალდებების“ ჩამოთვლა დაიწყო.

საუბნო კომისიის წევრების თქმით, ჟურნალისტმა უხერხული ფოტო გადაიღო და გაასაჯაროვა.

ამ ფოტოზე ხმების დათვლის მიტოვებული პროცესია გადაღებული. საოლქო კომისიამ არ სცადა გამოერკვევა, ამ ფოტოს გასაჯაროვების შემდეგ მიაყენეს თუ არა შეურაცხყოფა ჟურნალისტს უბანზე. საოლქო კომისიამ თავისი კითხვებით და შეფასებებით კვერი დაუკრა საუბნო კომისიას, რომ ჟურნალისტს პრობლემის ამსახველი ფოტო არ უნდა გადაეღო.

უფრო ზუსტად კი კომისიამ „მიაგნო“ პრობლემას – ფანჯარაში მომზირალი ქალის დაფიქსირებაა პრობლემა და ჟურნალისტმა ეს ჩაიდინა.

„მე გახსოვართ?“ – ჟურნალისტს მოულოდნელად საოლქო კომისიის წევრმა მზია მჟავანაძემაც გაახსენა თავი, რომელიც 2 ოქტომბერს უბანზე გადაღებულ ლაივში მოხვდა.

„მიგითითეთ, რომ თქვენი ადგილი დაგეკავებიათ… შვილმა ჩამიგდო, რა კომენტარებსაც მიწერდნენ, შეურაცხყოფას მაყენებდნენ,“ – ბრაზი ჟურნალისტის მიმართ საოლქო კომისიის არც ამ წევრმა დამალა.

„თქვენ ამბობთ, რომ ჟურნალისტებმა არ გადაიღონ არაფერი და კითხვები არ დასვან? ჟურნალისტი ასრულებდა თავის პროფესიულ მოვალეობას,“ – საოლქო კომისიის წევრებს მიმართა იურისტმა ნათია კაპანაძემ, რომელიც ჟურნალისტის ინტერესებს იცავს. იურისტმა საოლქო კომისიას რამდენჯერმე მოუწოდა დავის საგანზე ემსჯელათ და არა იმაზე, დაარღვია თუ არა წესები ჟურნალისტმა, რადგან ჟურნალისტმა თუკი კენჭისყრის შენობაში რამე დაარღვია, კომისიის თავმჯდომარეს იქვე უნდა მიეთითებინა ამისკენ. თუ კანონიერ მოთხოვნას ჟურნალისტი, ან დამკვირვებელი არ ემორჩილება, კომისიას მისი გაძევებაც შეუძლია.

საუბნო კომისიის წევრების თქმით, ჟურნალისტი სამაგიდო სიებს იღებდა, რის უფლებაც არ ჰქონდა და ასევე არ იკავებდა მისთვის განსაზღვრულ ადგილს. მათ ამის მტკიცებულება არ წარმოუდგენიათ.

„გაოგნებული გისმენთ. თუ ასეთი ამბავი იყო, გაგეძევებინათ,“ – მიმართა კომისიის წევრებს ირმა ხოროიშვილმა, ის საოლქო კომისიის წევრია „ნაციონალური მოძრაობიდან.“ მან საოლქო კომისიას ასევე შესთავაზა ერთად ენახათ უბანზე „ნაციონალური მოძრაობის“ მიერ გადაღებული ვიდეო კადრები.

„მე ვნახე და გაოგნებული დავრჩი, ისე მიმართავდით ჟურნალისტს, სირცხვილია… თქვენ მეორე ტურის წინ ახალისებთ კომისიებს,“ – უთხრა სხდომის მონაწილეებს ირმა ხოროიშვილმა.

საოლქო კომისიამ ოპოზიციონერ წევრს საერთოდ არ უპასუხა და არც ვიდეოჩანაწერის ნახვის სურვილი გამოუხატავს. კომისიის წევრებმა საუბნო კომისიის წევრების „ბრალდების“ მოსმენა განაგრძეს.

„პირდაპირ მოვიდა, თქვა, რომ გამოგზავნილი ვარო და ყველაფერს გადავიღებო, დააკომპლექსა კომისია, დააბულინგა… არ გავთიშავ მე ლაივს და თქვენს ყველა მოქმედებას გადავიღებო,“ – საოლქო კომისიის სხდომაზეც აშკარად კარგად იგრძნო თავი 34-ე საუბნო კომისიის მდივანმა, სოფიო საფარიძემ.

„ჩემი ლაივები ჯამში 9 წუთს არ აჭარბებდა,“ – უთხრა საოლქო კომისიის წევრებს ჟურნალისტმა თამარ ნერგაძემ. საარჩევნო კანონმდებლობით ჟურნალისტებს საარჩევნო უბანზე უწყვეტად შეუძლიათ ფოტო და ვიდეო გადაღება, თუმცა გადაადგილების უფლებით მხოლოდ 10 წუთი.

„დადიოდა მთელს ტერიტორიაზე  და კომისიის წევრებს უღებდა ფოტოებს. ვთხოვე, არ გადაეღო და არ დაედო, მაგრამ შემდეგ მეც გადამიღო,“ – საოლქო კომისიას შესჩივლა საუბნო კომისიის კიდევ ერთმა წევრმა.

„რატომ ჩათვალეთ, რომ გქონდათ უფლება ჟურნალისტისთვის გეთქვათ, რა გადაეღო, ან რა გაესაჯაროვებინა? თქვენ ხართ მისი რედაქტორი? მსგავს საკითხებს რედაქტორი წყვეტს…“ – საუბნო კომისიის წევრს მიმართა ჟურნალისტის ინტერესების დამცველმა, ნათია კაპანაძემ.

კომისიის წევრი იურისტს აღარ შეპასუხებია. იურისტის მიმართვა თითქოს ვერ გაიგონეს საოლქო კომისიის წევრებმაც, რომლებსაც ნათია კაპანაძემ მოუწოდა საქმიანი ყოფილიყვნენ და დავის საგანზე ემსჯელათ. ნათია კაპანაძემ საოლქო კომისიას 5 ივლისს ჟურნალისტების მიმართ გამოვლენილი მასობრივი თავდასხმაც შეახსენა და ის, რომ მსგავსი მიდგომით კიდევ უფრო ახალისებენ აგრესიას ჟურნალისტებზე და საბოლოოდ ეს არჩევნების შედეგზე აისახება.

„დამერწმუნეთ, ეს კავშირში არაა არჩევნების შედეგებთან“, – განხილვა დასრულებულად გამოაცხადა ციალა შავაძემ, ბათუმის საოლქო კომისიის თავმჯდომარემ.

ბათუმის 79-ე საოლქო კომისიამ ჟურნალისტის საჩივარი არ დააკმაყოფილა, კომისიის წევრებს შენიშვნაც კი არ მისცა.

34-ე უბანზე ბათუმის მერის მეორე ტურის არჩევნებს იგივე შემადგენლობა ჩაატარებს.

„თუ რაღაც პირადული შელაპარაკება იყო, ამ განხილვაში არ შევსულვართ, ამ კუთხით არც ჟურნალისტი ჩამორჩებოდა საუბნო საარჩევნო კომისიას… ეს მათი პირადი საუბარი იყო,“ – „პირად შელაპარაკებად“ შეაფასა „ბათუმელებთან“ განმარტების დროს ციალა შავაძემ ის, რაც ჟურნალისტმა თავდასხმად მიიჩნია და კომისიას მიმართა.

რეაგირების ნაცვლად ჟურნალისტზე თავდასხმას ხომ არ ახალისებს საოლქო კომისია? – ესეც ვკითხეთ ციალა შავაძეს.

„საჩივარში მითითებული იყო, რომ საუბნო კომისიამ ხელი შეუშალა ჟურნალისტს პროფესიული საქმიანობის განხორციელებაში, მაგრამ ხელშეშლა არ დადასტურდა. ჩვენ მოვუსმინეთ მხარეებს… კომენტარების განხილვაში ჩვენ არ შევსულვართ, რადგან ამის ვალდებულება არ გვქონდა ვინმეს მივუთითოთ, რა უნდა დაწეროს კომენტარებში,“ – დასძინა ციალა შავაძემ, ბათუმის საოლქო კომისიის თავმჯდომარემ.

ამ თემაზე:

ავტორი: ანა შენგელია

კორონავირუსის ინფექციის პარალელურად ქვეყანაში სეზონური გრიპიც ვრცელდება, რომლისაგან თავის დაცვა გრიპის საწინააღმდეგო ვაქცინით არის შესაძლებელი.

არის თუ არა გრიპის ვაქცინა აჭარაში? – „ბათუმელები“ ესაუბრა აჭარის საზოგადოებრივი ჯანდაცვის ცენტრის ხელმძღვანელს – რუსუდან შავიშვილს.

მისი თქმით, ამ ეტაპისთვის აჭარის მასშტაბით სეზონური გრიპის საწინააღმდეგო 5 200 ვაქცინაა. სეზონურ გრიპზე ვაქცინაცია რისკჯგუფში მყოფ მოქალაქეებს უფასოდ შეუძლიათ. 

რუსუდან შავიშვილის თქმით, აჭარაში სეზონის განმავლობაში 200 000-მდე სეზონური გრიპის ვაქცინას შემოიტანენ რისკჯგუფებისთვის. 

რიკსჯგუფებში არიან, შესაბამისად, გრიპზე უფასოდ აცრა შეუძლიათ: ორსულებს, დიალიზზე მყოფ პაციენტებს, სამედიცინო სფეროში დასაქმებულ პირებს, დიაბეტით დაავადებულ პირებს, ხანდაზმულებს – 60 წელს გადაცილებულებს, ბავშვთა და მოხუცთა სახლების ბენეფიციარებსა და პერსონალს, C ჰეპატიტისა და აივ ინფექცია/შიდსის მქონე პირებს. 

„სამიზნე ჯგუფების სივრცე ვაქცინის მარაგის შევსებასთან ერთად გაფართოვდება“ – აღნიშნა „ბათუმელებთან“ რუსუდან შავიშვილმა. 

მისი თქმით, გრიპზე უფასო ვაქცინაცია შესაძლებელია აჭარის მუნიციპალიტეტის იმ პოლიკლინიკებში, სადაც მოქმედებს საყოველთაო ჯანდაცვის სისტემა და მუშაობს ოჯახის ექიმი. 

რაც შეეხება ფასიან ვაქცინას, „ბათუმელები“ დაუკავშირდა ბათუმში არსებულ რამდენიმე პოლიკლინიკას.

მათგან „ევექსის“ კლინიკაში დაგვიდასტურეს, რომ გრიპის საწინააღმდეგო ფასიანი ვაქცინის მათ კლინიკებში გაკეთება დილის 10 საათიდან საღამოს 6 საათამდე არის შესაძლებელი და ვაქცინის ღირებულება 80 ლარია. 

ვაქცინის შემდეგ სეზონურ გრიპზე იმუნიტეტის ჩამოყალიბებას 2-3 კვირა სჭირდება. ვაქცინაციისთვის საუკეთესო დრო ოქტომბრის ბოლო, ნოემბრის დასაწყისია. 

სპეციალისტების თქმით, ამ სეზონზე სეზონური გრიპის ვაქცინის გაკეთება განსაკუთრებით მნიშვნელოვანია, რადგან მოსალოდნელია ე.წ. ტვინდემია, კოვიდთან ერთად გრიპის ვირუსის გავრცელებაც. 

ავტორი: ანა შენგელია 

საქართველოში კორონავირუსით ინფიცირებულთა 15% მოზარდია – განაცხადა დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა ამირან გამყრელიძემ დღეს, 26 ოქტომბერს,  გამართულ ბრიფინგზე.  

მისი თქმით, კოვიდ 19-ით  ინფიცირებულია 103 927 არასრულწლოვანი, მათგან 6979-ს დასჭირდა ჰოსპიტალური მკურნალობა, ხოლო 9 მოზარდი კოვიდით გარდაიცვალა. 

ამირან გამყრელიძემ აღნიშნა, რომ კოვიდით გარდაცვლილ არასრულწლოვნებს, სამი ჩვილის გამოკლებით, თანმხლები გენეტიკური დაავადება ჰქონდათ.

ბრიფინგისას ამირან გამყრელიძემ ქვეყანაში არსებული ეპიდსიტუაციაც განიხილა. მისი თქმით, პანდემიის მაჩვენებელი უარესდება. 

მან ასევე განაცხადა, რომ გაერთიანებულ სამეფოსა და რუსეთში გავრცელებული დელტა პლუს შტამი საქართველოში ჯერჯერობით არ დაფიქსირებულა.

დღეს, 26 ოქტომბერს, საქართველოში კორონავირუსით ინფიცირების 4762 ახალი შემთხვევა დადასტურდა, 43 პაციენტი გარდაიცვალა. 

„ეპიდსიტუაციის გაუმჯობესება პირდაპირ კავშირშია ვაქცინაციის გაზრდასთან… მათ შორის, შემცირდება სიკვდილიანობის მაჩვენებელი,“ – აღნიშნა დღეს, 26 ოქტომბერს, საკოორდინაციო საბჭოს სხდომის შემდეგ ამირან გამყრელიძემ. დაავადებათა კონტროლის ეროვნული ცენტრის ხელმძღვანელს ჟურნალისტებმა კორონავირუსის გამო სიკვდილიანობის გაზრდილ მაჩვენებელზე ჰკითხეს.

ამირან გამყრელიძე პირდაპირ უკავშირებს ვაქცინაციას სიკვდილიანობის მაჩვენებელს. მან ამის საილუსტრაციოდ ბალტიისპირეთის ქვეყნები დაასახელა, სადაც ასევე ბოლო პერიოდში ინფიცირების მაღალი მაჩვენებელია, მაგრამ სიკვდილიანობა არ არის მაღალი.

„მოგეხსნებათ, ბალტიისპირეთის ქვეყნებში მდგომარეობა გართულდა – იქაც, ორი, სამი, ოთხი ათასი შემთხვევაა ყოველდღე, მაგრამ სიკვდილიანობა დაბალია, რადგან ვაქცინაციის მაჩვენებელი არის მაღალი, მოსახლეობის 50 – 60 პროცენტი აცრილია,“ – განაცხადა ამირან გამყრელიძემ.

ბოლო 24 საათის მონაცემებით, კორონავირუსით ქვეყანაში 43 ადამიანი გარდაიცვალა, გუშინ – 46.

აჭარის რეგიონში კორონავირუსით დღეს 8 ადამიანი გარდაიცვალა.

26 ოქტომბრის მონაცემებით, აჭარაში კორონავირუსის 179 ახალი შემთხვევა დადასტურდა. ამავე პერიოდში 8 პაციენტი გარდაიცვალა კოვიდით.

რეგიონში 479 პირს მკურნალობენ კოვიდზე კლინიკებში, მათგან 30 ხელოვნური სუნთქვის აპარატზეა.

ამ დროისთვის აჭარაში კოვიდსასტუმროში იმყოფება 203 ადამიანი.

18 ოქტომბრის მონაცემებით, საქართველოში კოვიდის 4762 ახალი შემთხვევაა, 43 ადამიანი გარდაიცვალა კოვიდით გასულ დღე-ღამეში.

ქალაქ თბილისსა და იმერეთის რეგიონში ყალბი კოვიდპასპორტებისა და კორონავირუსის ლაბორატორიული კვლევის უარყოფითი შედეგების ამსახველი დოკუმენტების 2 ფაქტი გამოავლინეს, რის გამოც პასუხისგებაში მიეცა ცხრა პირი, მათ შორის, ერთი დააკავეს.

„გამოძიებით დადგინდა, რომ ერთ შემთხვევაში, ბრალდებულმა თბილისში მდებარე ტურისტულ კომპანიაში, კოვიდვაქცინაციის გარეშე საზღვარგარეთ გამსვლელი მგზავრებისათვის სავალდებულო კარანტინისაგან თავის არიდების მიზნით, მოქალაქეს დაუმზადა ორი ყალბი ე.წ. კოვიდპასპორტი, თითოეული 70 ევროს სანაცვლოდ, რომელშიც შეიტანა ყალბი მონაცემები დოკუმენტის მიმღები პირის მიერ ჩატარებული კოვიდვაქცინაციის სრული კურსისა და ლაბორატორიული კვლევების უარყოფითი შედეგების თაობაზე, რის შემდეგაც დოკუმენტები დაამოწმა საქართველოს იუსტიციის სამინისტროს სსიპ იუსტიციის სახლის ყალბი, კუსტარულად დამზადებული სველი ბეჭდით.

საგამოძიებო მოქმედებების შედეგად ამოღებულ იქნა როგორც ხსენებული ყალბი დოკუმენტები და ბეჭდები, ასევე, სხვა მოქალაქეებზე გასაღების მიზნით დამზადებული ყალბი კოვიდპასპორტები და მათ დასამზადებლად გამოყენებული კომპიუტერული ტექნიკა“ – წერს ფინანსთა სამინისტროს საგამოძიებო სამსახური.

იმერეთის რეგიონში კი ამხილეს რვა პირი, რომლებმაც სახელმწიფო საზღვრის კვეთისას, კორონავირუსის გავრცელების აღკვეთის რეგულაციებისათვის თავის არიდების მიზნით, შეიძინეს და გამოიყენეს თითქოსდა სამედიცინო დაწესებულებების სახელით გაცემული კორონავირუსის PCR ლაბორატორიული კვლევის უარყოფითი შედეგების ამსახველი ყალბი დოკუმენტები.

ფინანსთა სამინისტროს საგამოძიებო სამსახურის ცნობით, გამოძიება მიმდინარეობს საქართველოს სისხლის სამართლის კოდექსის 362-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 3 წლამდე ვადით.

26 ოქტომბრის მონაცემებით, საქართველოში დადასტურდა კოვიდის 4762 ახალი შემთხვევა. ჩატარდა 48 090 ტესტი კორონავირუსზე.

გასულ 24 საათში 43 პაციენტი გარდაიცვალა კოვიდით.

დღეს ქვეყანაში გამოვლენილი ინფიცირების 4 762 ახალი შემთხვევიდან თბილისში გამოვლენილია 1 523 შემთხვევა, აჭარაში – 179, იმერეთში – 933, ქვემო ქართლში – 273, შიდა ქართლში – 378, გურიაში – 116, სამეგრელო – ზემო სვანეთში – 378, კახეთში – 658, მცხეთა-მთიანეთში – 166, სამცხე-ჯავახეთში – 103, რაჭა-ლეჩხუმსა და ქვემო სვანეთში – 55.

25 ოქტომბრის მდგომარეობით, დადებითობის დღიური მაჩვენებელი არის 9.90%, ბოლო 14 დღის მანძილზე – 9.05% ხოლო 7 დღის მანძილზე – 8.97%.

შესავლის მაგივრად

დილით გაღვიძება ყოველთვის მიჭირდა. განსაკუთრებით სკოლის პერიოდში, როცა ზამთარი იდგა და მაშინ თენდებოდა, როცა უკვე პირველ გაკვეთილზე ვისხედით. მაშინ ერთადერთი რაც ამ დროს ჩემში აღტაცებას იწვევდა, იყო სკოლის ფანჯრიდან დანახული ზღვის ჰორიზონტზე გაწოლილი თოვლიანი კავკასიონი, რომელსაც ამომავალი მზე ალისფერს აძლევდა.

მერვე კლასში ვიქნებოდი ალბათ, როცა სანაპიროზე, ჩემი სკოლის უბანში პირველი მაღალსართულიანი კორპუსის მშენებლობა დაიწყო, რამაც ეს ზამთრის ხედი ძალიან მალე დაფარა. მაშინ ვერ მივხვდი ზუსტად რა მეწყინა, რა გამომეცალა სამუდამოდ ხელიდან. ახლა უფრო და უფრო ცხადია, რომ საზოგადოდ ბევრი რამ გამოგვეცალა, რაღაც ისეთი რამეები, რაც ყოფით პრობლემებს ცოტა ხნით მაინც გვავიწყებდა: ცა, ხედები, მზე, საჯარო სივრცეები, შეკრების ადგილები, სიწყნარე, ჰორიზონტი, კიდევ ალბათ, ბევრი ჯერ კიდევ უცნობი რამ, რაც მოგვიანებით აუცილებლად შეგვახსენებს თავს.

ვინილი (ანუ ვაინილი, როგორც ამას უცხოელები ეძახდნენ)

ბოლო რამდენიმე წელია ვინილს ვემშვიდობებით. მორჩა, ზაფხული რომ გავა, სამუდამოდ დაიკეტებაო და იმდენჯერ გავიდა ასეთი შიშიანი ზაფხული, რომ ახლა ნამდვილად აღარ ვიცი რა ვიფიქრო. ვნახე კარ-ფანჯარა გამოცილილი, ვინილებაყრილი “ვინილი”, ბოლოს გარედან ფანერიც ააკრეს და ასე დასრულდა რამდენიმე დღის წინ ვინილის არსებობა.

2010 წელს, როცა გაიხსნა, ვინილი იმაზე ბევრად პატარა იყო, ვიდრე ბოლოს. 5-6 მაგიდა იდგა, მათ შორის ერთი შავი ტელეფონისთვის (რომელიც არსად რეკავდა) და კიდევ მარცხენა კედელზე ჩამოკიდებული იყო პატარა კარდონზე მიკრული ჩარლზ ბუკოვსკის ლექსი “სტილი”, რომელმაც, ალბათ, იქონია გავლენა ჩემს სამომავლო გემოვნებაზე პოეზიაში. ძალიან ბევრი ადამიანი გავიცანი ვინილში და ახლა ყველას ერთი კითხვა გვაქვს, აწი სად უნდა წავიდეთ, სად უნდა ვნახოთ ისეთმა ნაცნობებმა ერთმანეთი, რომლებიც მხოლოდ ვინილის შიგნით და ირგვლივ ვიკრიბებოდით? სწორედ ამ კითხვამ გააჩინა ამ ტექსტის დაწერის სურვილიც.

ვინილის გაქრობამ ყველას გაგვიჩინა იმის შიში, რომ ერთმანეთს ვეღარ ვნახავთ. რა თქმა უნდა, ეს სიტყვები გადაჭარბებული შეიძლება იყოს, მაგრამ ასე თუ ისე, გამოხატავს ქალაქში ურბანიზაციის ამ ტალღით გამოწვეულ დაშორებებს. რაღაცებმა ზღვასთან დაგვაშორა, რაღაცებმა მიწასთან, რაღაცებმაც ერთმანეთთან. ქალაქი კი იცვლება. ქარავანი, ასე ვთქვათ, მიდის.

„ბათუმელების“ მკითხველს ვთხოვეთ, გამოეგზავნათ ფოტოები, რომელიც ვინილში ჰქონდათ სხვადასხვა დროს გადაღებული, ამით ვეცადეთ შეგვეგროვებინა მეხსიერება, რომელიც რჩება ხოლმე დაკიდებული გამქრალი სივრცეების თავზე და იქ გავლისას ჟღარუნით გვახსენებს წარსულს:

“ვინილში პირველად 2011 წელს ჩემმა მეგობარმა მიმიყვანა. იმის მერე ეს ადგილი ჩემთვის ბათუმის განუყრელი ნაწილი გახდა, თუ ბათუმში ჩავდიოდი და “ვინილში” ვერ ვახერხებდი მისვლას, აღარ იყო ჩემი ბათუმში ჩასვლა სრულყოფილი. მეგობრები დამყავდა, მარტო გარეთ ჩამოჯდომაც მიყვარდა. ბევრი მოგონება არ მაკავშირებს ამ ადგილთან, მაგრამ რაც იყო სულ სიხარულით ვიხსენებ. ძალიან დამწყდა გული, რომ ბათუმს აღარ აქვს ეს სივრცე, რომელიც ნამდვილად ძვირფასი იყო ბათუმლებისთვის. ბევრად უფრო მეტი ვიდრე ჩვეულებრივი კაფე”, – გვწერს ლეილა მაჭავარიანი.

“ჩემი 4 წლიანი ბათუმში ცხოვრების განუყრელი ნაწილი იყო ვინილი. ჯერ კვამლიანი, მერე გარეთ მოწევით. ბევრი რამ დამამახსოვრდა, თუმცა ჭადრაკის პარტიები დაუვიწყარია. განსაკუთრებით ნუკრისთან, ვისაც ვერასდროს ვუგებდი, მაგრამ არ ვაღიარებდი” – იხსენებს გიორგი ნადირაშვილი.

“2018 წელი, მე და ანი იმნაძე ვართ ვინილში, მოდის უსაყვარლესი კაცი და გვჩუქნის წიგნს. ბევრი საყვარელი მოგონება გვაკავშირებს ამ ადგილთან”, – წერს სალო დეკანაძე.

“გუკამ (შეყვარებული) პირველად რომ ჩამომაკითხა ბათუმში 2017 წელს, ეგრევე აქ წავიყვანე” – ნინო ბოლქვაძე.

“ეს ანა და ილია არიან. მათ ერთმანეთი ვინილში გაიცნეს. ახლა ერთად არიან, ოჯახი შექმნეს”, – გვწერს ფოტოს ავტორი მარიამ ათაბაგი.

“ეს ფოტო ვინილის ბოლო დღეს გადავიღეთ, იმედია, ხეს მაინც არ მოჭრიან” – ამბობს ჯემალ კახიძე.

___

ორგანიზაცია „პარტნიორობა ადამიანის უფლებებისთვის“ – PHR აცხადებს, რომ გორის რაიონულმა სასამართლომ პროკურატურას დარღვევა დაუდგინა.

ორგანიზაცია „პარტნიორობა ადამიანის უფლებებისთვის“ 12 წლის ბავშვის უფლებებს იცავს, რომელსაც, ორგანიზაციის ინფორმაციით, ხილის უნებართვოდ მოკრეფისთვის ხეხილის ერთ-ერთმა მეპატრონემ  პლასტმასის მილით ფიზიკური დაზიანება მიაყენა ფეხზე.

„მეორე პირმა ბავშვი ძალის გამოყენებით ჩამოიყვანა ხიდან, რამდენჯერმე გაარტყა სახეში ხელი, დაარტყა ფეხი, მიაყენა სიტყვიერი შეურაცხყოფა, ძალის გამოყენებით წელზემოთ გააშიშვლა, აიძულა შარვლის გახდა და ამ მდგომარეობაში ბავშვი ქუჩაში გაუშვა. მოზარდს სხეულზე ფიზიკური დაზიანების კვალი აღენიშნებოდა.

ბავშვის მშობელმა იმავე დღეს მიმართა პოლიციას და აღნიშნულ ფაქტზე დაიწყო გამოძიება. ბავშვს გაეწია სასწრაფო სამედიცინო დახმარებაც“ – წერს „პარტნიორობა ადამიანის უფლებებისთვის“.

„პარტნიორობა ადამიანის უფლებებისთვის“ ითხოვდა ბავშვის დაზარალებულად ცნობას დამამცირებელი მოპყრობის მუხლით, თუმცა პროკურატურამ არ გაიზიარა ბავშვის ადვოკატის პოზიცია და ბავშვი დაზარალებულად ცნო მხოლოდ ერთი პირის მხრიდან ფიზიკური ძალადობის (სსკ მუხლი 126) ნაწილში, ხოლო მეორე პირის მხრიდან სავარაუდოდ განხორციელებული ფიზიკური ძალადობის ფაქტი სამართლებრივი შეფასების მიღმა დატოვა.

„PHR-ის წარმომადგენელმა სწორი კვალიფიკაციით ბავშვის დაზარალებულად ცნობის მოთხოვნით რამდენჯერმე მიმართა პროკურორს. პროკურორის უარი გასაჩივრდა ზემდგომ პროკურორთანაც, თუმცა უშედეგოდ. პროკურატურამ უარი განაცხადა ბავშვის მიმართ განხორციელებული ქმედებების დამამცირებელ მოპყრობად შეფასებაზე. ხოლო მილის დარტყმით მიყენებული დაზიანების ნაწილში საერთოდ არ იმსჯელა ბავშვის დაზარალებულად ცნობაზე.

PHR-მა ერთი პირის მხრიდან ბავშვის მიმართ დამამცირებელი მოპყრობისა და მეორე პირის მხრიდან ბავშვის მიმართ ძალადობის მუხლით დაზარალებულად ცნობის შესახებ პროკურატურის უარი სასამართლოში გაასაჩივრა.

2021 წლის 15 ოქტომბერს გორის რაიონულმა სასამართლომ (მოსამართლე ლევან დარბაიძე) პრეცედენტული გადაწყვეტილება მიიღო. მიუხედავად იმისა, რომ საქართველოს სისხლის სამართლის საპროცესო კანონმდებლობა პირდაპირ არ ითვალისწინებს სწორი კვალიფიკაციით დაზარალებულად ცნობაზე უარის სასამართლოში გასაჩივრებას, სასამართლოს განმარტების თანახმად, პირის დაზარალებულად ცნობა მოიაზრებს სწორი კვალიფიკაციით დაზარალებულად ცნობას.

შესაბამისად, საქართველოს კონსტიტუციის, ბავშვის საუკეთესო ინტერესების პრიორიტეტულობის პრინციპისა და საერთაშორისო კანონმდებლობის საფუძველზე, ასევე, ნორმის მიზნიდან გამომდინარე, რომ პირის დაზარალებულად ცნობის შესახებ პროკურატურის გადაწყვეტილება სასამართლო კონტროლს ექვემდებარება, სასამართლომ განიხილა წარდგენილი საჩივარი და გაიზიარა ადვოკატის არგუმენტაცია, რომ სავარაუდო დამნაშავის მხრიდან ბავშვის მიმართ განხორციელებული ქმედებები, მათი ხასიათის, ინტენსივობის, ბავშვის ასაკისა და სხვა გარემოებების გათვალისწინებით, მთლიანობაში ცდებოდა ფიზიკური ძალადობის შემადგენლობას და წარმოადგენდა დამამცირებელ მოპყრობას. ხოლო მეორე პირის მხრიდან მილის დარტყმის ფაქტი შეაფასა ბავშვის მიმართ ფიზიკურ ძალადობად.

სასამართლომ, აგრეთვე იმსჯელა გამოძიების ხარისხსა და პროკურატურის მხრიდან გამოძიების პროცესში ბავშვის საუკეთესო ინტერესების უგულებელყოფაზე. მოსამართლემ მიუთითა, რომ მოწმე ბავშვის ადვოკატის გარეშე გამოკითხვა, არღვევს ბავშვის უფლებას და ბავშვის დაზარალებულად ცნობის პროცესში პროკურატურას უპირატესობა უნდა მიენიჭებინა ბავშვის საუკეთესო ინტერესებისათვის.

გამომდინარე აქედან, სასამართლომ გააუქმა პროკურატურის უარი სწორი კვალიფიკაციით ბავშვის დაზარალებულად ცნობის შესახებ და გორის რაიონულ პროკურატურას დაავალა ბავშვის დაზარალებულად ცნობა დამამცირებელი მოპყრობისა და ფიზიკური ძალადობის ფაქტზე. სასამართლოს აღნიშნული გადაწყვეტილება არ საჩივრდება“ – იუწყება „პარტნიორობა ადამიანის უფლებებისთვის“.

ორგანიზაციის ცნობით, ზემოაღნიშნულის მიუხედავად სასამართლოს გადაწყვეტილებას პროკურატურა დღემდე არ ასრულებს.

„მე ვარ პრემიერ-მინისტრი და არა ექიმი. თუ გაქვთ რაიმე შეკითხვები, მიმართეთ ექიმებს“ – ასე უპასუხა ირაკლი ღარიბაშვილმა დღეს, 25 ოქტომბერს, ჟურნალისტების მიერ დასმულ შეკითხვას, რომელიც ექსპრეზიდენტ სააკაშვილის საავადმყოფოში გადაყვანას შეეხებოდა.

ღარიბაშვილს დღეს ასევე ჰკითხეს, მის პასუხისმგებლობაზე, იმ შემთხვევაში, თუ ქვეყნის მესამე პრეზიდენტი დაიღუპება.

„მე მოგიწოდებთ ყველას, მეტი სიყვარულით ილაპარაკოთ, მათ შორის თქვენს ბელადზეც. როგორ შეიძლება, რომ ცოცხალ კაცზე ასე ლაპარაკობთ…

ჩვენ დეტალური ინფორმაცია გავავრცელეთ, თუ რა პირობებია ციხის საავადმყოფოში. იქ არის აბსოლუტურად ყველა პირობა. დამშვიდდით, პატიმარ სააკაშვილს კარგად ვუპატრონებთ,“ – აღნიშნა ირაკლი ღარიბაშვილმა.

მიხეილ სააკაშვილი 25 დღეა შიმშილობს პენიტენციურ დაწესებულებაში.