Batumelebi

ორშაბათ, 17 იანვრიდან სოციალური მომსახურების სააგენტოს 390-მდე თანამშრომელმა გაფიცვის შესახებ გამოაცხადა. ამის შესახებ გაფიცულებმა საქართველოს ჯანდაცვის სამინისტროს უკვე შეატყობინეს. გაფიცვას უერთდება აჭარის რეგიონის ყველა მუნიციპალიტეტი, გარდა ქობულეთისა და ქედისა – დაახლოებით 35 ადამიანი.

სოცაგენტების გარდა გაფიცვას ასევე უერთდებიან სპეციალისტები, იურისტები და სხვა თანამშრომლები. ეს გადაწყვეტილება კი ნიშნავს, რომ ორშაბათიდან ქვეყნის მასშტაბით სოციალური მომსახურების ცენტრები ბენეფიციარებს ვეღარ მოემსახურებიან.

რამ მიიყვანა სოციალური სააგენტო და მისი თანამშრომლები ამ მდგომარეობამდე? „ბათუმელების“ კითხვებს ნინო ბარამიძე პასუხობს – ბათუმის ცენტრის მთავარი სპეციალისტი.

• ქალბატონო ნინო, თქვენი ძირითადი მოთხოვნა უკავშირდება ხელფასებს. რატომ დადგა ეს საკითხი მაინც და მაინც ახლა დღის წესრიგში, რას ითხოვთ გაფიცულები? 

წლებია გვაქვს მიზერული ხელფასი. ჩვენი სააგენტოს თანამშრომლებს – სპეციალისტებიდან დავიწყოთ, დღეს ხელზე იღებენ 360 ლარს და  50 ლარიანი სხვაობით მიყვება: მაქსიმუმი – მთავარი სპეციალისტის ხელფასი დღეს არის 520 ლარი. მგონი ყველა ხვდება, რომ ამ ხელფასებით ვერ შევძლებთ ოჯახების რჩენას. საკუთარ თავსაც კი ვერ ვირჩენთ. რეალურად ეს თანხა იმაში გვეხარჯება, რომ სამსახურამდე მივიდეთ და უკან დავბრუნდეთ. წლებია ამ რეჟიმში ვართ, მაგრამ პანდემიის და ინფლაციის ფონზე უკვე შეუძლებელია ამ ხელფასებით არსებობა. არამარტო მე, არამედ მთლიანად სამსახური, მთელი თანამშრომლები ამ აზრზე ვართ – ყველანი ვიფიცებით.

მოლოდინი გვქონდა უკეთესი, იყო დანაპირები, რომ ჩვენი ხელფასები 30%-ით მაინც მოიმატებდა, მაგრამ როდესაც „ჩამოვარდა“ ჩვენი საშტატო განრიგი და იქ ნამატი მხოლოდ 10%-ია [სხვა გამოხმაურება ჯერჯერობით არ ყოფილა], ამან მთლიანად საქართველოს მასშტაბით გამოიწვია აღშფოთება და მივედით იქამდე, სადამდეც მივედით. ფაქტობრივად, არ გვიღირს ასეთი სამსახური.

ჩვენ წლებია ვემსახურებით სოციალურად დაუცველ ფენას ღირსეულად, თავდაუზოგავად და ჩვენ ახლა ვითხოვთ იმდენ ანაზღაურებას, რომ ჩვენ თავად გადავრჩეთ. არა მგონია ეს არარეალური მოთხოვნა იყოს.

მოკლედ, ჩვენი ძირითადი მოთხოვნაა ხელფასების მატება.

• 10%-იანი მატება კანონით არის განსაზღვრული და ეს ცხადია თქვენზეც გავრცელდებოდა. თქვენ რატომ გქონდათ უფრო მეტი მატების მოლოდინი – ვინმე ამის შესახებ დაგპირდათ, თუნდაც სიტყვიერად?

მე ვარ ბათუმის ცენტრის მთავარი სპეციალისტი, რომელიც მუშაობს ოფისში. ჩვენ ხელფასები გაწერილია და შტატიანი თანამშრომლები ვართ, მაგრამ სოციალური აგენტები არიან ხელშეკრულებით. მათ მინიმუმ აქვთ ერთთვიანი და მაქსიმუმ სამთვიანი ხელშეკრულებები და ისინი არიან გამომუშავებაზე. მათ ერთ დეკლარაციაში უხდიან 4.95 ლარს. რა თქმა უნდა, ისინი ახლა ითხოვენ, რომ გაიზარდოს თითო დეკლარაციის ტარიფი. რა თქმა უნდა, ითხოვენ ტრანსპორტის ხარჯსაც – აგენტი ხომ უნდა მივიდეს ბენეფიციარამდე.

ერთი ოჯახის დეკლარაციის შესავსებად ჩვენს აგენტს შეიძლება დასჭირდეს 3 ვიზიტი, რადგან არ ხდებიან ყოველთვის ბენეფიციარები. მაშინ, როცა 70 თეთრი გახდა მგზავრობის ტარიფი ბათუმში, ეს თანხა მგზავრობასაც კი არ ეყოფა. მაშინ, როცა სოციალურად დაუცველმა ოჯახმა შეიძლება სოციალური დახმარების სახით უფრო მეტი შემოსავალი მიიღოს, ვიდრე აგენტმა, რომელმაც იმუშავა მის დასახმარებლად.

ეს რეალობაა. ჩვენ, არც ერთი, არ ვართ იმისათვის მოწოდებული, რომ რაიმე პრობლემა შევუქმნათ სააგენტოს, მით უმეტეს ბენეფიციარებს არ გვინდა, რომ რაიმე პრობლემა შეექმნათ, მაგრამ ჩვენც ვართ ყველანი ოჯახებიდან გამოსულები და ვითხოვთ ღირსეულ ანაზღაურებას.

• თქვენ თუ იცით, ერთი სოცაგენტის ვალდებულება რა არის, რამდენი დეკლარაცია უნდა შეავსოს ერთი თვის განმავლობაში?

აქამდე იყო გეგმა – მინიმუმ 60 ერთეული დეკლარაცია იყო შესავსები. ოფიციალური ხელფასის შემდეგ მათ თითო დეკლარაციაზე ერიცხებათ 4.95 ლარი, მაგრამ პანდემიის გამო ეს რეალურად განსაზღვრული არ არის. ადრე იყო, როცა 150 ოჯახსაც ავსებდნენ, 80 ოჯახს და ხელფასიც გამოსდიოდათ. მაგრამ, დღეს, სოციალური აგენტები ოჯახებში ვერ შედიან ვირუსიდან გამომდინარე – სააგენტოს თვითნებურად გადამოწმებას ვერ შეძლებს, მთლიანად დამოკიდებულია ბენეფიციარების განაცხადებზე. შესაბამისად, დრეს არ არის ის რაოდენობა დეკლარაციების, რომ სოციალური აგენტის ხელფასი ავიდეს 500 ლარზე.

ფიზიკურად არ არის სამუშაო, თითოეული აგენტი 60 დეკლარაციასაც ვერ ავსებს, ამდენი რაოდენობა ფიზიკურად არ არსებობს.

• გაფიცულია ბათუმი, ხულო, ხელვაჩაური და შუახევი, სულ რამდენი ადამიანი ხართ აჭარაში გაფიცული?

ზუსტად არ ვიცი. დაახლოებით 35 ადამიანი. 5-5 აგენტი უნდა იყოს შუახევსა და ხულოში. ბათუმის ცენტრი მთლიანად არის გაფიცული და სულ 16 ადამიანი ვართ, ხელვაჩაურში – 8 თანამშრომელია. ზუსტი მონაცემები არ მაქვს.

• გგონიათ, რომ მოგისმენენ, გაიგონებენ თქვენ ხმას?

აუცილებლად მოგვისმენენ და გაიგონებენ. ამის იმედი გვაქვს. გადახედონ ჩვენს ხელფასებს.

• სააგენტოს პარალიზების საფრთხე რამდენად არსებობს?

ჩვენი მიზანი პარალიზება და ლოკდაუნი არ არის. არ ვიცი, როგორ შეძლებენ, მაგრამ ოფისი ალბათ სამუშაოს გააგრძელებს. ამის შესახებ მე არ ვიცი. ვიცი ის, რომ ყველა თანამშრომელი ბათუმის ცენტრში იფიცება.

არის ცენტრები, განყოფილებები, სადაც თითო-ორი ადამიანი დარჩება, მაგრამ ეს აჭარაში არ იქნება. ჩვენ გვინდა ნორმალური ანაზღაურება და იმედია ჩვენი ხელისუფლება ამას გაიგონებს.

ჩვენ ორშაბათს მივალთ სამსახურებში, მაგრამ არ შევალთ სამუშაო სივრცეში.

დღეს, 14 იანვარს, ბათუმში, კლინიკა „ბაუს“ კოვიდგანყოფილებაში ილია წულუკიძე გარდაიცვალა.

ილია წულუკიძე ბოლო ერთი თვის განმავლობაში გართულებული მდგომარეობით მოთავსებული იყო კლინიკის რეანიმაციულ განყოფილებაში.

ილია წულუკიძე წლების განმავლობაში სხვადასხვა საპასუხისმგებლო თანამდებობაზე მუშაობდა აჭარაში, მათ შორის ბათუმის მერად და იყო აჭარის შინაგან საქმეთა მინისტრიც [პოლიციის გენერალ-მაიორი].

ილია წულუკიძეს მალე 72 წელი შეუსრულდებოდა.

14 იანვარი საქართველოს სახელმწიფო დროშის დღეა.

არსებული სახელმწიფო დროშა [გერბთან და ჰიმნთან ერთად] შემოღებულ იქნა საქართველოს ორგანული კანონის საფუძველზე, რომელიც ძალაში შევიდა 2004 წლის 14 იანვრიდან.

[red_box]ამ თემაზე: სამფეროვნიდან ხუთჯვრიანამდე – საქართველოს დროშების ამბავი[/red_box]

საქართველოს სახელმწიფო დროშის, საქართველოს სახელმწიფო გერბისა და საქართველოს სახელმწიფო ჰიმნის, როგორც საქართველოს სახელმწიფო სიმბოლოების გამოყენების წესს, აწესრიგებს კანონი „საქართველოს სახელმწიფო სიმბოლოების გამოყენების წესის შესახებ“.

ეს კანონი განსაზღვრავს მათი გამოყენების სფეროებს და დაცვის წესს, აგრეთვე საქართველოს სახელმწიფო გერბისა და საქართველოს სახელმწიფო დროშის ორიგინალების შენახვის ადგილებს.

ამ კანონით:

• საქართველოს სახელმწიფო დროშის ორიგინალის შენახვის ადგილია საქართველოს პრეზიდენტის თბილისის რეზიდენცია.
• საქართველოს ტერიტორიაზე საქართველოს სახელმწიფო დროშასთან ერთად აფხაზეთის ან აჭარის ავტონომიური რესპუბლიკის დროშის აღმართვის შემთხვევაში საქართველოს სახელმწიფო დროშა უნდა იყოს აღნიშნულ დროშაზე დიდი ზომის და აღმართული უფრო მაღლა.
• საქართველოს ტერიტორიაზე საქართველოს სახელმწიფო დროშასთან ერთად სხვა ქვეყნის დროშის აღმართვის შემთხვევაში საქართველოს სახელმწიფო დროშა არ უნდა იყოს აღნიშნულ დროშაზე მცირე ზომის.

• დაზიანებული, გაუფერულებული ან სხვაგვარად შელახული საქართველოს სახელმწიფო დროშის გამოყენება აკრძალულია.
• საქართველოს სახელმწიფო დროშის გამოყენების დადგენილი წესის დარღვევა იწვევს პასუხისმგებლობას საქართველოს კანონმდებლობის შესაბამისად.

—

2022 წლის 21 იანვრიდან ძალაში შევა ასევე საქართველოს კანონი, რომელიც სასჯელს, საჯარო დაწესებულების მიერ აღმართული/გამოფენილი ევროკავშირის, ნატოს ან სხვა საერთაშორისო ორგანიზაციის ოფიციალური სიმბოლოს შებღალვისთვისაც ითვალისწინებს.

ამავე კანონით, ფიზიკური პირი დაისჯება საჯარო დაწესებულების მიერ აღმართული/გამოფენილი იმ სახელმწიფოს დროშის ან გერბის შებღალვისთვისაც, რომელ სახელმწიფოსთანაც საქართველოს დიპლომატიური ურთიერთობა აქვს:

14 იანვრის დილის მონაცემებით, საქართველოში ბოლო 24 საათში კორონავირუსისგან 36 პაციენტი გარდაიცვალა; ამავე პერიოდში დადასტურდა ვირუსის 5 567 ახალი შემთხვევა.

Stopcov.ge-ზე გამოქვეყნებული ინფორმაციის თანახმად საქართველოში ამ დროისთვის:

• კორონავირუსის დადასტურებული შემთხვევა – 984 802 , ბოლო 24 საათში – 5 567
• მათ შორის გამოჯანმრთელებული – 924 072 , ბოლო 24 საათში – 1 661
• მათ შორის გარდაცვლილი – 14 395 , ბოლო 24 საათში – 36

ბოლო 24 საათში ჩატარებული კვლევა ტესტით – 60 753, მათ შორის ანტიგენის სწრაფი ტესტით – 34 092, PCR ტესტით – 26 661

დადებითობის მაჩვენებელი: დღიური – 9,16%, ბოლო 14 დღის – 9,14%, ბოლო 7 დღის – 9,84%

სულ აცრილია – 2 596 549, დღიურად აცრილია – 6 864

დღეს ქვეყანაში გამოვლენილი ინფიცირების 5 567 ახალი შემთხვევიდან:

თბილისში გამოვლენილია 3 479 შემთხვევა, აჭარა – 587, იმერეთი – 434, ქვემო ქართლი – 159, შიდა ქართლი – 254, გურია – 130, სამეგრელო – ზემო სვანეთი – 199, კახეთი -130, მცხეთა-მთიანეთი -84, სამცხე-ჯავახეთი – 85, რაჭა-ლეჩხუმი და ქვემო სვანეთი -26.

ამ ეტაპზე ინფიცირების მიმდინარე აქტიური შემთხვევა 46 309 საიდანაც:

• 4 379 ადამიანი მკურნალობს საავადმყოფოში, მათ შორის, თბილისის საავადმყოფოებში – 1 852, აჭარაში – 596, იმერეთში – 797.
• ამ ეტაპზე მძიმე პაციენტია 1 003 პირი, მათ შორის, თბილისში – 445, აჭარაში – 128, იმერეთში – 255.
• ხელოვნური სუნთქვის აპარატზე იმყოფება 289 პირი,  მათგან თბილისში – 163, აჭარაში – 45, იმერეთში – 25.
• 2 077 ადამიანი მოთავსებულია კლინიკურ-სასტუმროებში, მათ შორის 1 300 – თბილისში, 539- აჭარაში.

39 853 პირი ვირუსის მკურნალობის კურსს გადის საცხოვრებელ ბინაზე.

საკარანტინე სივრცეებში მოთავსებულია 68 ადამიანი, მათ შორის, თბილისში – 65, ხოლო აჭარაში – 3.

სულ 2020 წლის 6 ოქტომბრიდან – მ/წ 13 იანვრის პერიოდში, სახელმწიფო საზღვრიდან საკარანტინე სივრცეებში გადაყვანილია – 25 299  პირი.

14 იანვრის მდგომარეობით, საქართველოში ლაბორატორიულად დადასტურებულია ომიკრონის 1 096 შემთხვევა.

ჩინეთის ერთ-ერთ ქალაქში COVID-19 ის გამო მოულოდნელად გამოცხადებული ლოკდაუნის შედეგად ახალგაზრდა ქალი ბრმა პაემანზე გაცნობილი კაცის სახლში ჩარჩა. ქალი მშობლების გარიგებულ კაცთან პაემანზე 5 იანვარს მივიდა და 9 იანვარსაც მასთან ერთად იყო.

ამის შესახებ, თავად ქალმა, ვანგმა გამოაქვეყნა ჩინურ სოციალურ ქსელში. ქალის თქმით, იგი მთვარის კალენდრით ახალი წლის აღსანიშნავად დაბრუნდა მშობლიურ ქალაქ ჟენჯოუში.

“საკმაოდ დავბერდი, ამიტომ მშობლებმა 10 ბრმა პაემანი დამინიშნეს. მეხუთე პრეტენდენტმა თქვა, რომ კარგი მზარეულია და სახლში დამპატიჟა, რათა ჩემთვის კერძები მოემზადებინა”, – წერს ვანგი. სწორედ ვახშმის დროს ვანგმა აღმოაჩინა, რომ მასპინძლის უბანი მკაცრ ლოკდაუნში მოექცა და ბინის დატოვების უფლება არავის ჰქონდა. ამის გამო რამდენიმესაათიანი პაემანი რამდენიმედღიან თანაცხოვრებად იქცა.

კვირას ჩინურ მედიასთან საუბარში ვანგმა აღნიშნა, რომ უკვე 4 დღეა გაჭედილია და მსგავსი მდგომარეობა “იდეალური არაა”.

მისივე თქმით, მასპინძელი ყოველდღე ამზადებს კერძებს და არც ლაპარაკით აწუხებს.

დღეისთვის უცნობია ქალმა შეძლო თუ არა საკუთარ სახლში დაბრუნება. თუმცა, კოვიდ 19-ით ინფიცირების შემთხვევები ჟენჯოუში ბოლო დღეებში შენარჩუნდა: გასული კვირის განმავლობაში ჟენჯოუში Covid 19-ის 100-ზე მეტი შემთხვევა დაფიქსირდა.

სამშაბათს, 11 იანვარს, ქალაქში პირველადი აუცილებლობის დაწესებულებების გარდა, ყველა ბიზნესის დახურვის ბრძანება გაიცა. 12.6 მილიონ ქალაქში ფართომასშტაბიანი Covid-19 ტესტირება დაიწყო, აქ მცხოვრებლებში ნებისმიერი ასიმპტომური Covid 19-ის აღმოსაჩენად.

ჩინეთს ე.წ. ნულოვანი Covid 19-ის  პოლიტიკა აქვს. ეს იმას ნიშნავს, რომ როგორც კი გამოვლინდება ინფიცირების შემთხვევა, კონტაქტები და არეალი ლოკდაუნში ექცევა, ტესტირების სერიები წყება და სხვა რეგულაციებიც ირთვება.

ვანგი არ არის ერთადერთი ადამიანი, ვინც ბოლო კვირების განმავლობაში მოულოდნელი ლოკდაუნის გამო გაუთვალისწინებელ მდგომარეობაში ჩავარდა.

__

წყარო: BBC News

დღეს, 13 იანვარს, ბათუმში, თავდადებულისა და ბრწყინვალეს ქუჩების კვეთაში ავტოსაგზაო შემთხვევა მოხდა. ერთმანეთს მიკროავტობუსი და მსუბუქი მანქანა შეეჯახა.

„ბათუმელების“ ინფორმაციით, ავარიის შედეგად ერთი პირი მსუბუქად დაშავდა.

ადგილზე მობილიზებული იყო სასწრაფო და საპატრულო პოლიციის ეკიპაჟი.

ამერიკული ტელეკომპანია CNN ავრცელებს ინფორმაციას, რომ  მომდევნო კვირას დედამიწას 1 კილომეტრის სიგანის ასტეროიდი მოუახლოვდება.

იგი 1994 წელს აღმოაჩინეს და ცნობილია, როგორც „7482“ .

ნასას სამეცნიერო ცენტრის მონაცემების მიხედვით, რომელიც პოტენციურად სახიფათო კომეტებსა და ასტეროიდებს იკვლევს, კოსმოსური სხეული 76 192 კმ/სთ სიჩქარით იმოძრავებს და დედამიწას 18 იანვარს 1,9 მილიონი კილომეტრის დაშორებით ჩაუფრენს. 

ნასას პროგნოზით, „7482“ დედამიწას არ დაეჯახება, თუმცა იგი ბოლო ორასი წლის განმავლობაში დედამიწასთან ყველაზე მეტად მოახლოებული ასტეროიდი იქნება.

___

მთავარი ფოტო: ნასა. ასტეროიდ ბენნუს 2019 წლის ხედი – შეიქმნა ნასას კოსმოსურ ხომალდ OSIRIS-REx-ზე მიმაგრებული NavCam 1 -ის კამერის მიერ გადაღებული ორი სურათის კომბინაციით.

ბათუმში, ჭაობის დასახლებაში, ვაჟა-ფშაველასა და ბესიკის ქუჩების გზაჯვარედინზე ხანძარია.

ადგილზე უკვე იმყოფება სახანძრო სამსახური.

„ბათუმელების“ ინფორმაციით, ცეცხლი გაუჩნდა კერძო სახლის დამხმარე ნაგებობას.

___

განახლება: ხანძარი უკვე ლიკვიდირებულია.

69 წლის ვერა ჯიჯავაძე და 75 წლის არმენ აკოპიანი უკვე რამდენიმე ათეული წელია ბათუმში, ჯავახიშვილის ქუჩაზე მდებარე  #61 კორპუსში, მე-2 სართულზე ცხოვრობენ.

დაახლოებით ერთი წელია სმენისარმქონე ცოლ-ქმრის ბინაში ბზარები ჩნდება და იმატებს. მათ ჰგონიათ, რომ ეს კორპუსის პირველ სართულზე მდებარე აფთიაქში საყრდენი კედლების მოშლამ გამოიწვია.

„გამოტეხვა რომ დაიწყეს, ისეთი ხმა იყო, არმენი ჩავიდა და ანიშნებდა, რომ საყრდენი კედლის გამოტეხვა არ შეიძლებოდა. იმათმა უთხრეს, შენ ვინ გეკითხებაო და მოიშორეს თავიდან”, – გვიხსნის ვერა სურდოთარჯიმნის დახმარებით. ვერას „ბათუმელებთან“ კომუნიკაციაში შორენა ლომაძე დაეხმარა

კორპუსის მამასახლილის დახმარებით, დაახლოებით 2 თვის წინ ოჯახმა განცხადებით მერიასაც მიმართა ბზარების წარმოქმნის რეალური მიზეზის გასაგებად, თუმცა საჯარო უწყებიდან პასუხი ჯერაც არ მიუღიათ:

„როგორც კი გამოტეხვა დაიწყეს ქვემოთ, მისაღებში ეგრევე გაიხსნა კედელი.

სულ სილა იყრება კედლებიდან, სულ ამას ვგვი, სახლი იწევა ქვემოთ და ამას ჩვენც ვგრძნობთ.

ტკბილად რამდენი თვეა აღარ მიძინია, ღამით შიშით ვიღვიძებ, ლოდის ქვეშ ხომ არ მოვყოლილვარ-მეთქი. მოხუცები არიანო, ფიქრობენ ჩვენზე და ჩაიქნიეს ხელი, თვითონაც ხომ დაბერდებიან?!” – თავის წუხილსა და შიშებს გვიზაირებს ვერა.

ვერასა და არმენის ერთადერთი შემოსავალი ასაკობრივი პენსიაა, რომელსაც ისინი საყოფაცხოვრებო და სამკურნალოდ აუცილებელი ხარჯებისთვის ანაწილებენ:

„პოდაგრა აქვს არმენს, წლებია აწუხებს, ხელ-ფეხი უსივდება ხოლმე, ოპერაციაც ვერ შველის, არაფერი უფინანსდება, მშენებელი იყო და, ალბათ, ამანაც გამოიწვია.

ყოველდღე ტკივილები აქვს, დღეში რამდენჯერმეც სვამს წამალს.

ახლა ნაწლავების ტკივილსაც უჩივის. სულ 1 ან 2 წელია, რაც აღარ მუშაობს, 19 წლიდან სამშენებლო საქმიანობას ეწეოდა“, – ყვება ვერა ჯიჯავაძე

„ბათუმელები“ დაუკავშირდა მერიის კეთილმოწყობის სამსახურსაც.

მათი განმარტებით, “ამ ეტაპისთვის განაცხადი მოკვლევაზეა გაგზავნილი და სხვა მისამართებთან ერთად გადაიგზავნება ექსპერტიზის ბიუროში“.

ოთარ დიასამიძე აჭარის ფინანსთა და ეკონომიკის მინისტრის პირველ მოადგილედ დაინიშნა. ოთარ დიასამიძე პროფესიით იურისტია და აქამდე აჭარის მთავრობის აპარატის იურიდიული და ადამიანური რესურსების მართვის დეპარტამენტის უფროსის პოზიციაზე მუშაობდა.

ოთარ დიასამიძის თქმით, ახალი წლიდან შეუდგა ახალ სამსახურში საქმიანობას. ახალ წლამდე ამ პოზიციაზე თორნიკე კუჭავა მუშაობდა.

ოთარ დიასამიძე აცხადებს, რომ მას ახალ თანამდებობაზე მუშაობა თორნიკე რიჟვაძემ [აჭარის მთავრობის თავმჯდომარე] და ჯაბა ფუტკარაძემ [აჭარის ფინანსთა და ეკონომიკის მინისტრი] შესთავაზეს.

„რა მიზნებიც აქვს დასახული ფინანსთა და ეკონომიკის სამინისტროს – 2022 წლის ბიუჯეტი დამტკიცებულია და, შესაბამისად, პრიორიტეტები განსაზღვრულია. წინა წლებიდან გამომდინარე, ვიცით პანდემიამ რა კვალი დააჩნია საქართველოსაც და მსოფლიოსაც და გვინდა, რომ პროგრამები იქნება თუ ჩვენი მიზნები და პრიორიტეტები ბოლომდე მივიყვანოთ, წელს რაც დაგეგმილია. დანარჩენიც გზადაგზა მუშა პროცესში გამოჩნდება“, – გვითხრა ოთარ დიასამიძემ კითხვის პასუხად, თუ რა იქნება მისთვის პრიორიტეტული ახალ თანამდებობაზე.

2021 წლის ადგილობრივი თვითმმართველობის არჩევნებზე ოთარ დიასამიძე კენჭს იყრიდა – „ქართული ოცნების“ მაჟორიტარი დეპუტატობის კანდიდატი იყო ბათუმში. თუმცა, ამ არჩევნებში მისმა ოპოზიციონერმა ოპონენტმა, ნოდარ დუმბაძემ გაიმარჯვა.

აჭარის ფინანსთა და ეკონომიკის მინისტრს 2 მოადგილე ჰყავს.

საქართველოს კონკურენციის ეროვნული სააგენტოს ფარმაცევტული ბაზრის მონიტორინგის ანგარიშის მიხედვით, მედიკამენტების თვითღირებულება ლარში წინა წლებთან შედარებით გაზრდილია 41%-ით, ხოლო ამერიკულ დოლარში 7%-ით. სააგენტოს რეკომენდაციების მიხედვით, წამლებზე ფასის შემცირებას რამდენიმე ფაქტორი შეუწყობს ხელს – ეს არის გენერიკული რეცეპტების გამოწერა, ასევე ფარმაცევტს დაევალოს, შესთავაზოს მოხმარებელს სულ მცირე 3 ყველაზე დაბალი ფასის მქონე მედიკამენტი და ევროპის ქვეყნების ტიპის მსგავსი რეგულაციების შემოღება.

„შესაბამისად, თვითღირებულების ზრდა 34%-ით პირდაპირ კავშირშია ლარის გაცვლითი კურსის ცვლილებასთან ან/და შესასყიდი მედიკამენტების თვითღირებულების ზრდასთან უცხოურ ვალუტაში“, – აღნიშნულია ანგარიშში.

ამავე ანგარიშის მიხედვით, საქართველოში 180-მდე წამლის იმპორტიორი კომპანიაა, თუმცა „მიუხედავად კონცენტრაციის არსებული მაჩვენებლის და იმპორტიორი ეკონომიკური აგენტების რაოდნეობისა, 3 ყველაზე მხვილი იმპორტიორი კომპანიის [„გეფა“, „პსპ ფარმა“, „ავერსი-ფარმა“] წილი, ბაზრის იმპორტის დონეზე, სტაბილურად მაღალია [57%-დან 68%-მდე]“.

„საქართველოს კონკურენციის ეროვნული სააგენტო ფარმაცევტული ბაზრის მონიტორინგის საბოლოო დასკვნის შედეგების მიხედვით, ფარმაცევტული ბაზარი საქართველოში, ევროპის ქვეყნებთან შედარებით, რეგულაციების სიმცირით და მაღალკონცენტრირებულობით გამოირჩევა. ბაზარზე წარმოდგენილი მსხვილი კომპანიები ერთდროულად ფლობენ იმპორტის, დისტრიბუციის, საცალო რეალიზაციის, კლინიკების დაზღვევის კომპანიებს.

ჰოლდინგურ ჯგუფებს აქვთ საბაზრო ძალა, იქონიონ მნიშვნელოვანი გავლენა მედიკამენტების გამომწერ პასუხისმგებელ პირებზე, რაც სააგენტოს შეფასებით შესაძლოა, არ გამომდინარეობდეს პაციენტის საუკეთესო ინტერესებიდან. ანალიზის შედეგად დგინდება, რომ ჰოლდინგური ჯგუფების მიერ მეტწილად, ხორციელდება ჯგუფში შემავალი კომპანიების მიერ იმპორტირებული/წარმოებული მედიკამენტების რეალიზაცია, რაც წარმოადგენს საერთო რეალიზაციის 50%-ს და მეტს.“ – აცხადებს სააგენტო.

სააგენტოს შეფასებით, მნიშვნელოვანია GMP [კარგი საწარმოო პრაქტიკის] სტანდარტის შემოღება როგორც იმპორტის, ასევე ადილობრივი წარმოების დონეზე.

სააგენტოს მოსაზრებით, ის ფაქტი, რომ კერძო სადაზღვევო პაკეტის შეძენის შემთხვევაში პირი ვერ ისარგებლებს საყოველთაო ჯანდაცვის პროგრამით, წარმოადგენს ჯიბიდან გადახდების მაღალი მაჩვენებლის ერთ-ერთ განმაპირობებელ ფაქტორს. შესაბამისად, მნიშვნელოვანია საყოველთაო და კერძო სადაზღვევო პაკეტების თანაარსებობის უზრუნველყოფა.

ქვეყანაში, 2021 წლის მდგომარეობით, რეგისტრირებულია 10 450 დასახელების მედიკამენტი; 3 213 აფთიაქის ოპერირებას ახორციელებს 1712 ეკონომიკური აგენტი. 10 და მეტი აფთიაქი გააჩნია 12 კომპანიას [სულ 1238 აფთიაქი], ხოლო მათგან 3 ყველაზე მსხვილი კომპანია ჯამურად 927 აფთიაქს ფლობს.

„ფარმაცევტულ ბაზარზე კონკურენტული გარემოს გაუმჯობესების, ახალი თამაშის წესების განსაზღვრის მიზნით“, კონკურენციის ეროვნულმა სააგენტომ 13 რეკომენდაცია გასცა.

[toggle title=”რეკომენდაციები სრულად ნახეთ აქ:“]

„რეკომენდაციები ფარმაცევტული ბაზრის არსებული სტრუქტურის, საკანონმდებლო რეგულირების, კანონმდებლობის ეფექტიანი აღსრულების უზრუნველყოფისა და სააგენტოს ანალიზით გამორკვეული ფაქტობრივი გარემოებების საფუძველზე, ჩამანაცვლებელ პროდუქტებს შორის მაქსიმალური კონკურენციისა და შედეგად, გენერიკების წილის ზრდის უზრუნველსაყოფად, მედიკამენტებზე ხარისხობრივი და ფინანსური ხელმისაწვდომობის გასაზრდელად, მედიკამენტებზე გაწეული დანახარჯების შესამცირებლად, სააგენტო მიზანშეწონილად მიიჩნევს კონკრეტული რეკომენდაციების გაცემას – პირველი რიგის რეკომენდაციები: 1-11 და მეორე რიგის რეკომენდაციები: 12-13:

1. მხოლოდ გენერიკული რეცეპტი/დანიშნულება – წარმოადგენს ჩამანაცვლებელ პროდუქტებს შორის კონკურენციის უზრუნველყოფისა და გენერიკების საბაზრო წილის ზრდის ყველაზე მნიშვნელოვან და ფუნდამენტურ საშუალებას. რეცეპტისა და დანიშნულების დონეზე უნდა მიეთითოს მხოლოდ მედიკამენტის საერთაშორისო არაპატენტირებული დასახელება (გენერიკი) და შეიზღუდოს სავაჭრო დასახელების მითითება. სხვადასხვა კვლევებით და არაერთი ქვეყნის გამოცდილებით დადასტურებულია ის ფინანსური სარგებელი, რასაც მომხმარებელი იღებს გენერიკული მედიკამენტების შეძენით, რაც თავის მხრივ პირდაპირ კავშირშია მედიკამენტებზე გაწეული დანახარჯების შემცირებასთან;
2. გენერიკული ჩამანაცვლებლის მითითება – სასურველია რეცეპტის/დანიშნულების დონეზე, ძირითად გენერიკთან ერთად, მიეთითოს სულ მცირე ერთი დამატებითი ჩამანაცვლებელი გენერიკი;
3. მხოლოდ ელექტრონული რეცეპტის/დანიშნულების ერთიანი სისტემის დანერგვა – წარმოადგენს დარგის მარეგულირებლის მიერ კონტროლის ეფექტიან საშუალებას. აუცილებელია გავრცელდეს როგორც რეცეპტით გასაცემ, ასევე იმ მედიკამენტებზე, რომლებიც არ საჭიროებენ ექიმის რეცეპტს;
4. რეცეპტის/დანიშნულების განგრძობადი კონტროლი – განხორციელება შესაძლებელი და აუცილებელია მხოლოდ ელექტრონული რეცეპტის/დანიშნულების არსებობის შემთხვევაში; განგრძობადი კონტროლი უნდა მოიცავდეს დარგის მარეგულირებლის მიერ ბაზრის განგრძობად მონიტორინგს რეცეპტის/დანიშნულების კანონმდებლობით განსაზღვრული პრინციპების დაცვის ეფექტიანი კონტროლისა და ინტერესთა შეუთავსებლობის შესაძლო შემთხვევების გამოვლენის მიზნით;
5. მედიკამენტების ხარისხი – სააგენტოს პოზიციით, GMP სტანდარტი აუცილებელია მოქმედებდეს ბაზარზე მედიკამენტების დაშვების ორივე დონეზე – წარმოება და იმპორტი. დარგის მარეგულირებელმა უნდა უზრუნველყოს გენერიკული მედიკამენტების ბიოეკვივალენტობის შემოწმება და შედეგად უნდა იყოს იმის გარანტი, რომ ბაზარზე დაშვებული ყველა მედიკამენტი აკმაყოფილებს ხარისხის კანონმდებლობით გათვალისწინებულ ნორმებს;
6. სამკურნალო გაიდლაინების სრულყოფა – წამოადგენს პოლიპრაგმაზიის (მედიკამენტების ჭარბი მოხმარება) წინააღმდეგ მიმართულ ეფექტიან საშუალებას. ამ მიმართულებით, დარგის მარეგულირებელთან ერთად, მნიშვნელოვანია დარგობრივი ასოციაციების მაქსიმალური ჩართულობა. სამკურნალო გაიდლაინების შემუშავების შემდეგ, სასურველია, დაწესდეს სამკურნალო ბიუჯეტების ზედა ზღვარი, რაც გულისხმობს ექიმის მიერ რეცეპტის/დანიშნულების გამოწერის შედეგად შესაძენი მედიკამენტების ზედა ჭერის დაწესებას თანხობრივ ნაწილში, კონკრეტული ავადმყოფობების გათვალისწინებით. აღნიშნულს დადებითი ეფექტი ექნება, როგორც პოლიპრაგმაზიის შემცირებაზე, ასევე „ბად“- ების (ბიოლოგიურად აქტიური დანამატები) კონტროლზე;
7. ფარმაცევტის საქმიანობის ეფექტიანი რეგულირება და განგრძობადი მონიტორინგი – მნიშვნელოვანია დეტალურად გაიწეროს ფარმაცევტის მიერ მედიკამენტის საბოლოო მომხმარებლამდე მიტანის ვალდებულებები, რათა უზრუნველყოფილი იყოს ჯანსაღი კონკურენტული გარემო. კერძოდ, გენერიკული რეცეპტის/დანიშნულების დანერგვის პარალელურად, აუცილებელია დარეგულირდეს მედიკამენტის შეძენის დროს ფარმაცევტის ვალდებულება – შესთავაზოს მოხმარებელს სულ მცირე 3 ყველაზე დაბალი ფასის მქონე მედიკამენტი. ამასთან ერთად, აუცილებელია დარგის მარეგულირებლის მიერ განხორციელდეს აღნიშნულის განგრძობადი მონიტორინგი, ელექტრონული რეცეპტის/დანიშნულების მეშვეობით;
8. სანქცირების მექანიზმის გამკაცრება და ეფექტიანი კონტროლი – მნიშვნელოვანია, რომ „ჯანმრთელობის დაცვის შესახებ“ საქართველოს კანონის 30-ე მუხლით გაწერილ ინტერესთა შეუთავსებლობის ფაქტებს ჰქონდეს შესაბამისი სანქცირების მექანიზმი, რაც საერთაშორისო გამოცდილების გათვალისწინებით, ადმინისტრაციულთან ერთად შესაძლოა იყოს სისხლისსამართლებრივი პასუხისმგებლობაც. რაც შეეხება ადმინისტრაციული პასუხისმგებლობის საკითხს, მიზანშეწონილია ჯარიმის თანხა იყოს ადეკვატური, რათა მას ჰქონდეს საკმარისი შემაკავებელი/პრევენციული ეფექტი;
9. რეცეპტის/დანიშნულების გამომწერ პირსა და ფარმაცევტულ კომპანიებს შორის ურთიერთობის მაქსიმალური გამჭვირვალობისა და საჯაროობის უზრუნველყოფა – საერთაშორისო გამოცდილების გათვალისწინებით, ექიმებსა და ფარმაცევტულ კომპანიებს შორის არსებული ნებისმიერი ურთიერთობა, რომლის შედეგადაც რეცეპტის/დანიშნულების გამოწერაზე პასუხისმგებელი პირი იღებს მატერიალურ თუ არამატერიალურ სარგებელს, უნდა იყოს მაქსიმალურად გამჭვირვალე და საჯაროდ ხელმისაწვდომი დარგის მარეგულირებლის ვებგვერდზე. ამისათვის კი უნდა შეიქმნას შესაბამისი ანგარიშგების სისტემა და ინფორმაციის დარგის მარეგულირებლისთვის წარდგენის სავალდებულო საკანონმდებლო მექანიზმი;
10. დარგის მარეგულირებელის მიერ გენერიკულ მედიკამენტებთან დაკავშირებით საინფორმაციო კამპანიის წარმოება – მნიშვნელოვანია, რომ დარგის მარეგულირებლის მიერ გადაიდგას კონკრეტული ნაბიჯები ბაზარზე არსებული ინფორმაციული ასიმეტრიულობის შესამცირებლად. აღნიშნული პირველ რიგში გამოიხატება გენერიკულ მედიკამენტებზე ინფორმაციის მაქსიმალურ ხელმისაწვდომობაში, რაც უნდა განხორციელდეს განგრძობად რეჟიმში. მომხმარებელს უნდა მიეწოდოს სრული ინფორმაცია გენერიკული მედიკამენტების უპირატესობების შესახებ;
11. საყოველთაო და კერძო სადაზღვევო „შემავსებელი“ პაკეტების თანაარსებობის უზრუნველყოფა – მედიკამენტებზე და ზოგადად, სამედიცინო მომსახურებაში „ჯიბიდან“ გადახდების შესამცირებლად, სასურველია, მომხმარებელს შეეძლოს საყოველთაო დაზღვევის პროგრამის შემავსებელი კერძო სადაზღვევო პროდუქტის შეძენა – სულ მცირე, მედიკამენტების კომპონენტის ნაწილში;
12. ბაზრის ჰოლდინგური სტრუქტურის შეზღუდვა – სააგენტოს პოზიციით, მნიშვნელოვანია კონკრეტული რეგულირების ქვეშ მოექცეს მედიკამენტების იმპორტიორი/საბითუმო და საცალო მიმწოდებელი ეკონომიკური აგენტების მიერ არაპროფილური საქმიანობების განხორციელება, რაც გამორიცხავს ბაზრის ამგვარი სტრუქტურის შესაძლო უარყოფით შედეგებს მომხმარებელზე და ბაზრის ზოგად კონკურენტუნარიანობაზე;
13. „თავისუფალი ფასწარმოქმნის“ პოლიტიკის გადახედვა – ევროპის 15 ქვეყნიდან, ე.წ. „თავისუფალი ფასწარმოქმნის პოლიტიკა“ მოქმედებს მხოლოდ 3 ქვეყანაში – გერმანია (მხოლოდ ახალი აქტიური ნივთიერების ავტორიზაციის პირველ წელს), დანია და გაერთიანებული სამეფო. ქვეყნების უმრავლესობა იყენებს ფასის რეგულირების სხვადასხვა კომბინირებულ მეთოდებს, როგორიცაა External reference pricing, Internal reference pricing, Volume based pricing და ა.შ;

მონიტორინგის ფარგლებში შესწავლილი ფაქტობრივი გარემოებებით ირკვევა, რომ ფასწარმოქმნა გენერიკულ მედიკამენტებზე და ასევე იმ მედიკამენტებზე, რომელთა იმპორტიც ქვეყანაში ხდება გენერიკული დასახელებით და საცალო ბაზარზე ხელმისაწვდომია კონკრეტული სავაჭრო დასახელებით, შესაძლოა იყოს პრობლემური. საკითხის აქტუალურობა კიდევ უფრო მეტად გაიზრდება გენერიკულ მედიკამენტებზე მოთხოვნის ზრდასთან ერთად. ამ მიმართულებით სასურველია, ფასის რეგულირების ევროპული პრაქტიკის გაზიარება.“

წყარო: საქართველოს კონკურენციის ეროვნული სააგენტო / ფარმაცევტული ბაზრის მონიტორინგის ანგარიში /2021

[/toggle]

„მედიკამენტების ფასებთან დაკავშირებით, ჩვენ ამ კვირაში მივიღებთ გადაწყვეტილებებს, რაც ჩვენი პროგნოზით მნიშვნელოვნად შეამცირებს მედიკამენტების ფასებს“ – განაცხადა მთავრობის სხდომაზე პრემიერმა ღარიბაშვილმა დღეს, 10 იანვარს.

„ამ კვირაში მივიღებთ გადაწყვეტილებებს, რაც შეამცირებს მედიკამენტების ფასებს“ – ღარიბაშვილი

ფარმაცევტული ბაზრის გრძელვადიანი მონიტორინგი, 2018 წელს პარლამენტის დავალებით დაიწყო კონკურენციის სააგენტომ. მონიტორინგის პირველადი შედეგები 2021 წლის 9 ნოემბერს გამოქვეყნდა.

ამავე თემაზე:

დღეს, 12 იანვარს, ბათუმის საქალაქო სასამართლოსთან აქცია გამართეს იმ მუშების ახლობლებმა, რომლებიც 8 ოქტომბერს ბათუმში სადარბაზოს ჩამონგრევის ფაქტზე დააკავეს. დაკავებულები არიან მამა-შვილი ხუსეინ და გიორგი სურმანიძეები. დაკავებულების ოჯახის წევრების თქმით, დაღუპულების ახლობლებს, რომლებიც ასევე სასამართლოსთან არიან, სამძიმარი გამოუცხადეს.

დღეს ამ საქმეზე პირველი სასამართლო სხდომა გაიმართება – სურმანიძეების ადვოკატის, მზია დიასამიძის თქმით, ისინი სასამართლოს შუამდგომლობით მიმართავენ დაკავებულები გირაოს სანაცვლოდ გაათავისუფლონ წინასწარი პატიმრობიდან. დაკავებულების ოჯახი გირაოს სახით 5-5 ათასი ლარის გადახდას სთავაზობს სახელმწიფოს.

დაღუპულების ოჯახის წევრებმა კი დღეს ჟურნალისტებს უთხრეს, რომ ყველა დამნაშავე უნდა დაისაჯოს.

ბრალდებული სურმანიძეების ახლობლები ამბობენ, რომ ექსპერტიზა ფაქტობრივად გამორიცხავს მათ დანაშაულს.

სამხარაულის ექსპერტიზის ეროვნული ბიუროს დასკვნის მიხედვით, ნგრევა გამოიწვია პირველი სართულის მზიდი კედლების მოშლამ.

ამონარიდები სამხარაულის სახელობის სასამართლო ექსპერტიზის ეროვნული ბიუროს დასკვნიდან:

• „ბათუმში, 26 მაისის ქუჩის #13-ში მდებარე შენობის პირველი სადარბაზოს ნაწილის ჩამონგრევა გამოწვეულია არასათანადოდ და უსაფრთხოების წესების დარღვევით წარმოებული სარეკონსტრუქციო სამუშაოებით. კერძოდ მზიდი კედლის დემონტაჟით პირველ სართულზე. რაც შეეხება აღნიშნულზე პასუხისმგებელ პირს, აღნიშნულ კითხვაზე პასუხი გაცემულია „თ“ პუნქტში“.
• „თ“ პუნქტი: „მშენებლობის უსაფრთხოების შესახებ საქართველოს ორგანული კანონის თანახმად… დამსაქმებელი ვალდებულია იზრუნოს, რომ დასაქმებულისა და სამუშაო სივრცეში მყოფი სხვა პირის უსაფრთხოებასა და ჯანმრთელობას ზიანი არ მიადგეს“.
•  „ბათუმში, 26 მაისის ქუჩის #13-ში მდებარე საცხოვრებელი კორპუსის სადარბაზოზე, ეზოს მხრიდან დამონტაჟებული ლიფტი და მისი ფუნქციონირება არ არის კავშირში შენობის სადარბაზოს ნგრევასთან“.
• „დაშენება სადარბაზოს ნგრევაზე გავლენას არ მოახდენდა და სადარბაზო ჩამონგრევის მიზეზს არ წარმოადგენს“.

სადარბაზოების ნგრევის საქმეზე სულ სამი პირია დაკავებული – მამა-შვილი სურმანიძეები და ბინის მფლობელი ზაურ ბუდაგოვი. ბრალის დადასტურების შემთხვევაში მამა-შვილ სურმანიძეებს 3-დან 5 წლამდე პატიმრობა ელით. ზაურ ბუდაგოვს კი 5 წლამდე პატიმრობა.

___

ბათუმში 8 ოქტომბერს კორპუსის ჩამონგრევის შედეგად ნანგრევებში 10 ადამიანი მოჰყვა, მათგან 9 დაიღუპა. ნგრევის საქმეზე სამი პირი 9 ოქტომბერს დააკავეს. შსს თანახმად, გამოძიებით დადგინდა, რომ 26 მაისის ქუჩაზე საცხოვრებელი კორპუსის პირველ სართულზე ბინის მფლობელმა სარემონტო სამუშაოებისთვის ორი ადამიანი დაიქირავა.

„ბინის მესაკუთრის მითითებით და უსაფრთხოების წესების უხეში დარღვევით საცხოვრებელ ბინაში სამშენებლო-სარემონტო სამუშაოები განხორციელდა, რამაც მიმდინარე წლის 8 ოქტომბერს საცხოვრებელი კორპუსის ერთი სადარბაზოს ჩამონგრევა გამოიწვია,“ – თქვეს შს სამინისტროში.

ბათუმში, 26 მაისის ქუჩაზე, 6-სართულიანი სახლის სადარბაზო 8 ოქტომბერს, მოულოდნელად ჩამოინგრა.

12 იანვრის დილის მონაცემებით, საქართველოში ბოლო 24 საათში კორონავირუსისგან 47 პაციენტი გარდაიცვალა; ამავე პერიოდში დადასტურდა ვირუსის 5 596 ახალი შემთხვევა.

Stopcov.ge-ზე გამოქვეყნებული ინფორმაციის თანახმად საქართველოში ამ დროისთვის:

• კორონავირუსის დადასტურებული შემთხვევა – 973 909 , ბოლო 24 საათში – 5 596
• მათ შორის გამოჯანმრთელებული – 919 367 , ბოლო 24 საათში – 2 946
• მათ შორის გარდაცვლილი – 14 311 , ბოლო 24 საათში – 47
• დადებითობის მაჩვენებელი: დღიური – 9,63%, ბოლო 14 დღის – 8,51%, ბოლო 7 დღის – 9,79%
• სულ აცრილია – 2 577 637, დღიურად აცრილია – 10 688
• კარანტინის რეჟიმში – 83
• სტაციონარში მეთვალყურეობის ქვეშ – 4 418
• კლინიკურ სასტუმროში მყოფი პირები – 1 958

დღეს ქვეყანაში გამოვლენილი ინფიცირების 5 596 ახალი შემთხვევიდან: თბილისში გამოვლენილია 3 180 შემთხვევა, აჭარა – 638, იმერეთი – 563, ქვემო ქართლი – 173, შიდა ქართლი – 270, გურია – 135, სამეგრელო – ზემო სვანეთი – 219, კახეთი -184, მცხეთა-მთიანეთი -102, სამცხე-ჯავახეთი – 99, რაჭა-ლეჩხუმი და ქვემო სვანეთი -33.

ამ ეტაპზე ინფიცირების მიმდინარე აქტიური შემთხვევა 40 205 საიდანაც:

• 4 418 ადამიანი მკურნალობს საავადმყოფოში, მათ შორის, თბილისის საავადმყოფოებში – 1 853, აჭარაში – 609, იმერეთში – 803.
• ამ ეტაპზე მძიმე პაციენტია 1 045 პირი, მათ შორის, თბილისში – 487, აჭარაში – 123, იმერეთში – 256.
• ხელოვნური სუნთქვის აპარატზე იმყოფება 293 პირი,  მათგან თბილისში – 169, აჭარაში – 42, იმერეთში – 22.
• 1 958 ადამიანი მოთავსებულია კლინიკურ-სასტუმროებში, მათ შორის 1 261 – თბილისში, 466- აჭარაში.
• 33 829 პირი ვირუსის მკურნალობის კურსს გადის საცხოვრებელ ბინაზე.

საკარანტინე სივრცეებში მოთავსებულია 83 ადამიანი, მათ შორის, თბილისში – 80, ხოლო აჭარაში – 3.

ამ ეტაპისთვის თვითიზოლაციაში იმყოფება 33 234  ადამიანი.

12 იანვრის მდგომარეობით საქართველოში ლაბორატორიულად დადასტურებულია ომიკრონის 951 შემთხვევა. ჯანდაცვის მსოფლიო ორგანიზაცია [ჯანმო] ამბობს, რომ კორონავირუსის ახალი შტამი „ომიკრონი“ მომავალ კვირებში ევროპის მოსახლეობის ნახევარზე მეტს დააავადებს.

12 იანვრის დილის მონაცემებით, ბოლო 24 საათში ჩატარებულია 58 109 კვლევა ტესტით; მათ შორის ანტიგენის სწრაფი ტესტით – 34 115, PCR ტესტით – 23 994

ამავე თემაზე:

თინა დიასამიძე საკუთარ თავს ცხოველების უფლებადამცველს უწოდებს. სწორედ მან იპოვა ბათუმის ერთ-ერთ ხალხმრავალ ქუჩაზე, მაიაკოვსკიზე ფეხებშეკრული, ახალშობილი ხბო, რომელიც ტომარაში ჰყავდათ მოთავსებული.

თინას თქმით, ხბო ამ მდგომარეობაში ორ საათზე მეტ ხანს იყო. ბოლოს თინა დიასამიძემ საპატრულო პოლიცია გამოიძახა და ხბო სახლში წაიყვანა.

„ბათუმში ვცხოვრობ, კერძო სახლი მაქვს. ახლა ხბო ეზოში მყავს. სახლს ვუშენებ. ვუმკურნალებ. მერე კი თავშესაფარში გადავიყვან“, – უთხრა თინამ „ბათუმელებს“.

თინას თქმით, ის გუშინვე შეხვდა ხბოს მესაკუთრეს და თანხაც გადაუხადა. „80 ლარად ყიდდა, მე 150 გადავუხადე. მოხუცი კაცი იყო. კარგად ვერ გავიგე ასეთ მდგომარეობაში რატომ დააგდო ხბო ქუჩაში. ჩემთვის ეს არის პირუტყვის წამება, თუმცა ზუსტად არ ვიცი კანონი ამას როგორ არეგულირებს“, – უთხრა „ბათუმელებს“ თინამ.

თინა ამბობს, რომ ის და მისი მეუღლე ცხოველების, უფრო კონკრეტულად კი ძაღლების უფლებებისთვის ერთად იბრძვიან. „სახლში 11 ძაღლი და 4 კატა გვყავს. მე და ჩემი მეუღლე ვუვლით. ყველას თავისი ისტორია აქვს. ზოგს თათები აქვს დაზიანებული, ზოგს სხეული სხვა ნაწილი. თავშესაფარიც გვაქვს, სადაც 70-მდე ძაღლს ვუვლით. ყველა ტრავმირებულია“, – გვიყვება თინა.

ახალგაზრდა ქალის თქმით, აქტივიზმი, ანუ ცხოველების უფლებებისთვის ბრძოლა მას შემდეგ დაიწყო, რაც ჯარიდან წამოვიდა. „2008 წლის აგვისტოს ომის მონაწილე ვარ. 8 წელი ვიყავი ჯარისკაცი თუ ჯარისქალი. ჯარიდან მას შემდეგ წამოვედი, რაც კონტრაქტი ამომეწურა. ახლა უპატრონო ძაღლებზე ვზრუნავ – ახალ თავშესაფარს ვაშენებ. მერიასთან მიწის ნაკვეთის იჯარაზე მაქვს მოლაპარაკება. აღმოჩნდა, რომ არამარტომ ძაღლებს ექცევიან არაადამიანურად – ეს ბოჩოლა იქნება ამ თავშესაფრის სავიზიტო ბარათი“.

თინა ამბობს, რომ უკვე ათი წელია თავშესაფარს ძირითადად საკუთარი სახსრებით ინახავს. პატარა ბიზნესი მაქვს, მაღაზიას ვამუშავებ და ასე გაგვაქვს თავიო – გვიხსნის:

„10 წელია ვუვლი, ვკვებავ ქუჩის ძაღლებს. არის მცირედი შემოწირულებები, მაგრამ მინიმალურია – შემიძლია ანგარიშის ამონაწერი გაჩვენოთ. 70 ძაღლს ბევრი უნდა დღეში. იმის წყალობით, რომ ექთანი ვარ, ძაღლების მკურნალობასაც ვახერხებ, ოპერაციებსაც კი ვუკეთებ ცუგებსო“.

__