Batumelebi | პროფსასწავლებლებს უფლება აქვთ წარმოებული პროდუქცია და მომსახურება გაყიდონ – მთავრობა პროფსასწავლებლებს უფლება აქვთ წარმოებული პროდუქცია და მომსახურება გაყიდონ – მთავრობა – Batumelebi
ნეტგაზეთი • RU

პროფსასწავლებლებს უფლება აქვთ წარმოებული პროდუქცია და მომსახურება გაყიდონ – მთავრობა

სახელმწიფო სასწავლებლებისთვის, რომლებიც პროფესიულ საგანმანათლებლო პროგრამებს ახორციელებენ, მთავრობამ, შექმნილი პროდუქციისა და ანაზღაურებადი მომსახურების ღირებულების განსაზღვრის, ასევე, აღნიშნული საქმიანობიდან მიღებული შემოსავლის განკარგვის წესი და პირობები დაამტკიცა.

ახალი წესის მიხედვით, სასწავლებლებს უფლება აქვთ განახორციელონ ეკონომიკური საქმიანობა და მიიღონ შემოსავალი.

ეკონომიკური საქმიანობა კი, ამ შემთხვევაში შემოიფარგლება მხოლოდ პროფესიული საგანმანათლებლო პროგრამების საფუძველზე სასწავლო პროცესში, ან საგანმანათლებლო დაწესებულების ზოგადი საქმიანობის პროფილის ფარგლებში შექმნილი შესაბამისი პროდუქციის რეალიზაციით ან/და ანაზღაურებადი მომსახურების გაწევით.

ამასთან, საგანმანათლებლო დაწესებულებას

  •  უფლება აქვს განახორციელოს ეკონომიკური საქმიანობა და მიიღოს შემოსავალი მხოლოდ ისეთი აქტივობებიდან, რომლებიც ადამიანის ჯანმრთელობისთვის სახიფათო არ არის და უარყოფითად არ მოქმედებს სწავლების ხარისხზე.
  • ეკონომიკური საქმიანობის ფარგლებში დაცული უნდა იყოს ის თავისუფალი და სამართლიანი კონკურენციის პრინციპები და მოთხოვნები, რომლებიც განსაზღვრულია „კონკურენციის შესახებ“ საქართველოს კანონით.

ახალი წესის მიხედვით:

  • სასწავლო პროცესში შექმნილი პროდუქციის ან/და გაწეული მომსახურების რეალიზაციიდან და დამხმარე ხასიათის ეკონომიკური საქმიანობიდან მოზიდული სახსრები, უნდა მოხმარდეს მხოლოდ საგანმანათლებლო დაწესებულების მიზნების მიღწევასა და მისი ფუნქციების შესრულებას.
რას უნდა მოხმარდეს მიღებული შემოსავალი, ვრცლად ნახეთ აქ

ეკონომიკური საქმიანობიდან მიღებული შემოსავალი ხელს უნდა უწყობდეს საგანმანათლებლო დაწესებულების მიზნების შესრულებას სხვადასხვა მიმართულებით, როგორიც შეიძლება, იყოს:
– საგანმანათლებლო დაწესებულების ფუნქციონირების, მისი  საგანმანათლებლო საქმიანობის განვითარება, ინფრასტრუქტურისა და მატერიალურ-ტექნიკური ბაზის გაუმჯობესება;
– ეკონომიკური საქმიანობის ფარგლებში სამეწარმეო უნარებისა და კულტურის განვითარების ხელშეწყობა;
– სასწავლო პროცესში ეკონომიკური საქმიანობის ინტეგრირებით პროფესიულ სტუდენტთა მომზადების  ხელშეწყობა;
– ეკონომიკურ საქმიანობაში ჩართული სამუშაო ძალის [პროფესიული სტუდენტების სახით] სამუშაო ბაზარზე ირიბად შესვლის ხელშეწყობა, საგანმანათლებლო პროგრამის დამთავრებამდე;
– საგანმანათლებლო დაწესებულებებს შორის თანამშრომლობითი ურთიერთობების ჩამოყალიბება და განვითარება;
– პროფესიული და სამეწარმეო  უნარების  განვითარებით კურსდამთავრებულთა დასაქმებისა და თვითდასაქმების  ზრდის ხელშეწყობა;
– საგანმანათლებლო დაწესებულებებისა და პროფესიული სტუდენტების მონაწილეობის უზრუნველყოფა ქვეყანაში მეწარმეობის განვითარებაში;
– შრომის ბაზარზე პროფესიული  განათლების კურსდამთავრებულთა კონკურენტუნარიანობა და მათ მიმართ  სანდოობის გაზრდა;
– საგანმანათლებლო დაწესებულებისა და პროფესიული სტუდენტების/კურსდამთავრებულების ურთიერთობების გამყარება პარტნიორ-ორგანიზაციებსა და დამსაქმებლებთან, მათ შორის, კლიენტებთან;
– საგანმანათლებლო დაწესებულების ცნობადობის, ინტერესისა და იმიჯის ამაღლება.

  • საგანმანათლებლო დაწესებულებამ არ უნდა დაუშვას, რომ ეკონომიკური საქმიანობის ფარგლებში განხორციელებული აქტივობები უარყოფითად აისახოს საგანმანათლებლო საქმიანობისათვის გადაცემულ უძრავ-მოძრავ ქონებასა და სახელმწიფოსგან მიღებულ დაფინანსებაზე, სამართლებრივი, ფინანსური, მატერიალური, ფიზიკური ან/და სხვა ნებისმიერი ფორმით.
  • საგანმანათლებლო დაწესებულების მიერ ეკონომიკური და საგანმანათლებლო საქმიანობის სააღრიცხვო ნაწილი უნდა იყოს გამიჯნული.

საგანმანათლებლო დაწესებულების მიერ ეკონომიკური საქმიანობისთვის შეძენილი მატერიალური მარაგების გამოყენება სასწავლო ან/და სხვა საქმიანობისათვის არ არის ნებადართული ისევე, როგორც ეკონომიკური საქმიანობისთვის არ უნდა იქნეს გამოყენებული ის მატერიალური მარაგები, რომელიც განკუთვნილია მხოლოდ საგანმანათლებლო მიზნებისათვის და არ ხდება სწავლების პროცესში შექმნილი დასრულებული პროდუქტის სახით მათი რეალიზაცია ან/და ანაზღაურებადი მომსახურების გაწევა.

ეკონომიკური საქმიანობის ფარგლებში შესაძლოა, პროფესიული განათლების მასწავლებლისა და პროფესიული სტუდენტის შრომითი რესურსის გამოყენება იმ დაშვებით, რომ ეს უარყოფითად არ იმოქმედებს სწავლების ხარისხზე.

მასწავლებლის ან/და სტუდენტის მიერ გაწეული შრომა კი, რომელსაც საგანმანათლებლო დაწესებულება ეკონომიკური საქმიანობის ფარგლებში მიიღებს უსასყიდლოდ, მმართველობითი აღრიცხვისა და სარეალიზაციო ღირებულების განსაზღვრის მიზნებისთვის დაანგარიშებული უნდა იყოს ეკონომიკური საქმიანობის შესაბამის სექტორში არსებული საშუალო სახელფასო განაკვეთის (საათობრივი/დღიური/თვიური) ოდენობით. პროფესიული სტუდენტის შემთხვევაში, შესაძლებელია, დაანგარიშება მოხდეს ეკონომიკური საქმიანობის შესაბამის სექტორში არსებული მინიმალური სახელფასო განაკვეთის (საათობრივი/დღიური/თვიური) ოდენობით.

„სახელმწიფოს მიერ ან მისი მონაწილეობით დაფუძნებული საგანმანათლებლო დაწესებულების მიერ საგანმანათლებლო პროცესში შექმნილი პროდუქციის/გაწეული ანაზღაურებადი მომსახურების ღირებულების განსაზღვრის, აღნიშნული საქმიანობიდან მიღებული შემოსავლის განკარგვის წესი და პირობები“ საქართველოს მთავრობამ 2022 წლის 12 იანვრის დადგენილებით დაამტკიცა. დადგენილება ამავე წლის 13 იანვარს ამოქმედდა.

 

მთავარი ფოტო „ბათუმელების“ არქივიდან / პროფესიული განათლება /ფოტო: მანანა ქველიაშვილი
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com