Batumelebi | ოქროსა და ვერცხლის მედლები მოსწავლეებმა შესაძლოა ვერც წელს მიიღონ ოქროსა და ვერცხლის მედლები მოსწავლეებმა შესაძლოა ვერც წელს მიიღონ – Batumelebi

ოქროსა და ვერცხლის მედლები მოსწავლეებმა შესაძლოა ვერც წელს მიიღონ

ოქროსა და ვერცხლის მედალოსან მოსწავლეებს კუთვნილი მედლები შესაძლოა ვერც 2020 სასწავლო წლის ბოლოს გადასცენ, რადგან როგორც „საგანმანათლებლო და სამეცნიერო ინფრასტრუქტურის განვითარების სააგენტოში“ ამბობენ, ოქროსა და ვერცხლის მედლების შესყიდვაზე შარშანდელი ტენდერი ჩაიშალა, ახალი კი ჯერ არ გამოცხადებულა. ოქროსა და ვერცხლის მედლები მოსწავლეებს არც 2019 წელს მიუღიათ.

ოფიციალური ინფორმაციით, 2018-2019 სასწავლო  წლების ოქროსა და ვერცხლის მედლების შესყიდვისთვის განათლების სამინისტროს ბიუჯეტში 126 860 ლარი იყო გათვალისწინებული, ხელშეკრულება კი 97 294 ლარზე, შპს „ედვერთაიზინგ ნიუ იორკ სითისთან“ გაფორმდა. თუმცა, როგორც  „საგანმანათლებლო და სამეცნიერო ინფრასტრუქტურის განვითარების სააგენტოში“ „ბათუმელებს“ უთხრეს,,  ტენდერში მონაწილე პირმა ხელშეკრულების პირობები დაარღვია.

ახალი ტენდერი კი ჯერ გამოცხადებული არ არის. „საგანმანათლებლო და სამეცნიერო ინფრასტრუქტურის განვითარების სააგენტოში“ კორონავირუსის პანდემია მოჰყავთ მიზეზად. დაზუსტებული ინფორმაცია ვერც იმის შესახებ მივიღეთ, თუ როდის შეიძლება გამოცხადდეს ტენდერი.

აჭარის განათლების სამინისტროს რესურსცენტრების ინფორმაციით, 2020 სასწავლო წლის ბოლოს აჭარაში კერძო და საჯარო სკოლის 300-მდე მოსწავლე ელოდება ოქროსა და ვერცხლის მედალს. ამ ეტაპზე უცნობია, რამდენია ეს ციფრი ქვეყნის მასშტაბით.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com