Batumelebi

ნათია გუმბერიძე აგვისტოს ომის ვეტერანია. უფროსი ლეიტენანტი, ახლა სახლში უმუშევრად ზის და იმ ტკივილზე გვიყვება, რაც ჩვენმა ქვეყანამ 2008 წლის აგვისტოში, რუსული აგრესიის გამო გადაიტანა. „ჩემთვის დიდი ტრავმა იყო, როცა ფორმის გახდა მომიწია,“ – ამბობს ნათია „ბათუმელებთან“. ის აკრიტიკებს ხელისუფლებას რუსეთთან წარმოებული პოლიტიკის გამო, რადგან მიიჩნევს, რომ ასეთი დამოკიდებულებით ხელისუფლება ომში დაღუპული გმირების მსხვერპლს ფასს უკარგავს.

2008 წლის აგვისტოს ომიდან, ანუ რუსეთის არმიის საქართველოში ბოლო შემოჭრის შემდეგ, უკვე 14 წელი გავიდა. ამ ომმა ასობით სამხედრო და სამოქალაქო პირი იმსხვერპლა, ათასობით ადამიანი კი დევნილად იქცა.

• ქალბატონო ნათია, რატომ აღარ ხართ დღეს ქართულ შეიარაღებულ ძალებში და რას საქმიანობთ?

ვარ უმუშევარი, დაუცველი, მიუხედავად იმისა, რომ ომის ვეტერანი ვარ – ათი წელი საქართველოს შეიარაღებულ ძალებში ვიმუშავე. ჩემთვის ტრავმა იყო სამხედრო ფორმის გახდა, რადგან ძალიან მიყვარს ჩემი ქვეყანა და მიყვარს ის საქმე, რასაც ვემსახურებოდი. ვიბრძოლე 2008 წლის აგვისტოს ომშიც.

• შეგიძლიათ გაიხსენოთ აგვისტოს ომის დღეები, სად იყავით ბოლოს, სად იბრძოდით?

ბოლოს ცხინვალის შესასვლელთან ვიბრძოდი. დაბომბვის დროს კონტუზია მივიღე და საარტილერიო მეთაურმა კაჭარავამ და მისმა მძღოლმა გამომიყვანეს. რამდენიმე წუთში კი ჩვენს ბატალიონს თავს დაესხნენ რუსები და თითქმის მთელი ბატალიონი დაიღუპა, მათ  შორის, ჩვენი მეთაური შალვა დოლიძეც.

საშინელი მდგომარეობა იყო იმ 5-6 დღის განმავლობაში, როცა ომი მიდიოდა… მე ამაყი ვარ იმით, რომ იმ ადამიანების გვერდით ვიყავი და მათთან ერთად მომიწია ბრძოლა ჩემი ქვეყნის დასაცავად.

ენით ვერ აღვწერ რამდენად ძლიერი, პატრიოტული სულისკვეთებით იყვნენ სამხედროები, ჯარისკაცები და ეს ყველაფერი რომ დავივიწყოთ, შეურაცხყოფა იქნება მათი მსხვერპლის. ეს ალბათ ჩვენი დასასრული იქნება, ყველაფერს ჩალის ფასი ექნება, რაც დღემდე მოვიტანეთ, ხაზის გადასმა იმ ყველაფერზე, რაც აქამდე მოვიტანეთ. სირცხვილია, რომ ამ ყველაფერს ჩვენ პატივი არ ვცეთ და არ დავიცვათ.

• არსებობს ამის საფრთხე, რომ ომის გმირების მსხვერპლი დავივიწყოთ?

თავიდანვე მივხვდი, რომ ჯარს დიდი პრობლემები შეექმნებოდა და ვხედავთ კიდეც ხომ რა მდგომარეობაშია ჯარი. ფაქტობრივად, აღარც გვყავს ჯარი, ხალხი გამოქცევაზეა, ვერ უძლებენ რეპრესიებს, რადგან ხმას ვინც იღებს, ვინც მართლა სამხედროა, იმათ პრობლემებს უქმნიან. ჰყავთ მხოლოდ ისინი, ვინც ჩუმადაა და ვინც აწყობთ. ანაზღაურებაც დაბალია, მარტო გზაში არ გეყოფა  ხელფასი.

90-იანებში რომ ჯარი გვყავდა, ის მახსენდება, ცოცხების ჯარს ვეძახდით, რადგან ეზოების დაგვისა და ბალახების თიბვის მეტს არაფერს აკეთებდნენ. იგივე ხდება ახლაც. რუსულ „პაიოკზე“ არიან ჩვენი ჯარისკაცები, რომლებიც ვეღარ უძლებენ ამ ყველაფერს.

ეს იცის ხელისუფლებამაც, ამიტომაც ამბობენ, რუსები ორ საათში აგვიღებენო. იციან, რა მდგომარეობაშიც ჰყავთ. ძლიერი, მომზადებული ჯარი გვყავდა მებრძოლი სულისკვეთებით, ისეთი, ვისაც მართლა შესტკიოდა ქვეყანაზე გული, ყველა გაუშვეს ან გააქციეს ჯარიდან, ახლა კი ასეთი განცხადებებით უკეთებენ დემორალიზებას.

• თქვენს თანამებრძოლებს თუ ხვდებით, მათ, ვინც გადარჩა, ან იმ ადამიანებს, ვინც ოჯახის წევრები დაკარგა ომში?

ძალიან მიმძიმს მათთან საუბარი. იმდენად მიმძიმს, რომ თვალებში შეხედვაც მერიდება. ჩემთვის ძალიან ტრაგიკული მომენტი იყო, როცა მათთან იმის თქმა მიწევდა, რომ მათი ძმა, მამა ან ოჯახის რომელიმე წევრი დაიღუპა.

ძალიან უჭირთ ამ ოჯახებსაც, თუმცა მათი შვილები პატრიოტებად იზრდებიან და იციან, ვინ არის მტერი და ვინ მოყვარე. ვფიქრობ, ისინი გააგრძელებენ ჩვენი გმირების საქმეს.

• როგორია ომგამოვლილი ადამიანების თვალით დანახული დღევანდელი საქართველო, პოლიტიკა რუსეთთან მიმართებაში?

როცა „ქართული ოცნების“ წევრები ჩვენი გმირების საფლავებზე მიდიან, მრცხვენია, რომ ისინი იქ დგანან. ისინი არ არიან ჩვენი გმირების ღირსების დამცველი მთავრობა – მაშინაც კი, რუსეთს უსვამენ თავზე ხელს, არ აღიარებენ, რომ რუსეთი მტერია და დღემდე გვიქმნის პრობლემას, დღემდე გვებრძვის.

არც ერთხელ არ ჩასულან საოკუპაციო ხაზთან, დღემდე გატაცებული არიან სამხედრო მოსამსახურეები, რუსების ტყვეობაში არიან და იმათი დახსნის საკითხს ვერ აგვარებენ, არ აგვარებენ, ამიტომ ამათი იქ დგომაც სამარცხვინოა. სამარცხვინოა ისიც, რომ უკრაინიდან ჩამოსვენებულ ჩვენს გმირებს არ ხვდებოდნენ.

დღევანდელი გადმოსახედიდან, დღევანდელი მთავრობის, ხელისუფლების მოქმედება უპატიებელია, ის რიტორიკა, – „აბა, ომი გინდათ?“, შერბილებული ტონი რუსეთთან მიმართებაში არის რუსული პოლიტიკა, რომ თითქოს ქვეყანას იცავენ და ამ დროს, თვითონ არიან ამ ომის, პროვოკაციებისა და პრობლემების ხელშემწყობი. თვითონვე ატარებენ რუსულ პოლიტიკას ჩვენი ქვეყნის წინააღმდეგ.

ვფიქრობ, ეს ერთ-ერთი დავალებაა – შერბილებულად, ადვილად, ომის გარეშე ქვეყნის დაპყრობა. ნელ-ნელა ძირის გამოთხრით, ხალხის გაჩუმებით, რომ ადვილად გადასცენ ქვეყანა მტერს. აი, ასეთი პოლიტიკა აქვთ ამათ.

ეს ჩემთვის ძალიან მიუღებელი სიტუაციაა. ძალიან გაბრაზებული ვარ და ვერ ვმალავ უკვე ამ სიბრაზეს იმის გამო, რაც ხდება ჩვენს თავს. ფაქტობრივად, ქვეყანას ვკარგავთ. მაშინ, როცა აგვისტოს ომი გადავიტანეთ, როცა ვნახეთ, როგორ ხოცავდა და აწამებდა რუსეთი ჩვენს ბიჭებს, დღეს კიდევ აქეთ შემოჰყავთ რუსები და კიდევ ჩვენ გველაპარაკებიან აგრესიულად. რაღაც ძალიან ცუდად ემთხვევა ეს „დიდი რუსობა“ აგვისტოს ომის დღეებს.

პროვოკაციულიც არის და ძალიან საშიშიც ეს ყველაფერი, ფაქტობრივად, ტყვიის გარეშე დაწყებული ომია ჩვენთან. არც კი ვიცით, ვინ არიან შემოსული ქვეყანაში. მსგავსი პროვოკაციები დაიწყო 6 თვით ადრე უკრაინაშიც და გვაფრთხილებდა ეს ხალხი.

• თქვენ ფიქრობთ, რომ რუსეთს გაურიგდა ჩვენი ხელისუფლება. თუ ეს მართლა ასეა, მაშინ რატომ დაიწყებს რუსეთი ომს?

რუსებმა იციან ქართველი ხალხის ხასიათი, იციან, რომ ჩვენ გვაქვს წინააღმდეგობის უნარი და ამ ყველაფრისთვის სჭირდებათ პროვოკაციები. რუსებს ქართველების გარეშე უნდათ საქართველო, ეს ასე იყო ყოველთვის. ამაზე მეტყველებს გუშინდელი ამბები, აგვისტოს ომს მოგანატრებთო რომ გვწერდნენ, რომ უკრაინის შემდეგ ჩვენ ვართ, მედვედევის პოსტი გავიხსენოთ, რომ საქართველო რუსეთის ნაწილია თურმე.

რაც ჩვენ აქამდე გავაკეთეთ, რასაც ჩვენი ბიჭები შეეწირნენ, რასაც ჩვენი წინაპრები შეეწირნენ, იმ ყველაფრის შემდეგ, ისევ ვართ იმ საფრთხის წინაშე, რომ შეიძლება ჩვენი სახელმწიფოებრიობა ისევ დავკარგოთ ერთი ხელის მოსმით.

ამიტომ ნამდვილად არ უნდა ვიყოთ მშვიდად და წყნარად, ამას უნდა მოჰყვეს რეაქციებიც და პროტესტიც. საჭიროა ხალხის ძალა და ერთობა. სხვა შემთხვევაში, ქვეყანას დავკარგავთ. რუსები არასდროს დაგვინდობენ და არც უნდა ველოდეთ კარგს არაფერს მათგან.

• ამ კითხვების გამო ხელისუფლება ხალხს ქსენოფობიაში ადანაშაულებს, აცხადებს, რომ კანონს გაამკაცრებს.

ხელისუფლება ცდილობს ხალხისკენ მიმართოს ისრები და ხალხს დააბრალოს ის, რაც თვითონაა.

ქსენოფობია არ არის იმაზე კითხვების დასმა, რა საფრთხეების წინაც ვდგავართ რუსეთის ამდენი მოქალაქის ქვეყანაში შემოსვლით. აბა, თვითონ ხომ არ იტყვის, რომ ქვეყანას რუსეთს ვაბარებთო. ამათი სტრატეგია არის მტრის ენით ბრძოლა და რასაც თვითონ აფუჭებს, იმას ჩვენ გვაბრალებს.

„ომი გინდათ“ ნიშნავს, რომ თვითონ არიან რუსული პოლიტიკის ხელშემწყობები და აქეთ გვემუქრებიან, თუ ამის წინააღმდეგ ხმას ამოვიღებთ. „ქართული ოცნება“ თვითონ გამოგვიცხადებს ომს. ჩვენ თუ წავალთ, ომი გექნებათ, რუსს შემოგიყვანთო და შემოგვიყვანეს კიდეც. იმიტომ, რომ გაგვაჩუმონ, შეგვზღუდონ. ქართველებს აიძულებენ ქვეყნიდან წავიდნენ, არ ჰქონდეთ საარსებო წყარო და რაც უფრო ნაკლები ქართველი იქნება სამართავი, მათთვის უკეთესია.

ივანიშვილმა თქვა, რომ „თუ არ მოგწონთ, წადითო“. ივანიშვილი რუსი ოლიგარქია. ჩემი აზრით, თავიდანვე ასეც ჰქონდათ ჩაფიქრებული. ივანიშვილი თავიდანვე იყო ჩანერგილი რუსეთის მიერ, რადგან რაც მან ვერ შეძლო თუნდაც წინა ხელისუფლების პირობებში, ახლა აკეთებს, დასვა თავისი მთავრობა, თავისი მარიონეტული ხალხით და აკეთებს იმას, რაც უნდა.

ამას არ აქვს სხვა ლოგიკა და ახსნა, რადგან მართლა დამამცირებელია, როცა საკუთარი ქვეყნის ხელისუფლება რუსული რიტორიკით გელაპარაკება. მაშინ, როცა ქართველი ხალხის და ქვეყნის ღირსება უნდა დაიცვან, აკეთებენ პირიქით.

სამწუხაროდ, ისტორიულად ყოველთვის ასეთ მდგომარეობაში ვიყავით, როცა შიდა მტრების ხელით სულ რაღაც ფუჭდებოდა ამ ქვეყანაში. ეს ქვეყანა ამ საფრთხესაც გადაურჩება, რადგან ჯერ კიდევ გვყავს პატრიოტები, გმირები, არსებობენ მებრძოლები, რომლებსაც დღემდე შესტკივათ ქვეყნისთვის გული და ისევ დაიცავენ საქართველოს კბილებით, ამის იმედი მაქვს.

• ხომ არ ფიქრობთ, რომ ხელისუფლება ერთგვარი დუმილის შენარჩუნებით ცდილობს აარიდოს ქვეყანას რუსეთის აგრესია?

გაჩუმება-გაჩუმებაში ვკარგავთ სწორედ ქვეყანას. გაჩუმება არ არის დაცვა, საჭიროა ხმის ამაღლება, საჭიროა ძალა, რაც ამ ყველაფრის წინააღმდეგ წავა. არ ვფიქრობ, რომ გაჩუმებით მტერს შევაჩერებთ. საჭიროა ყველაფრისთვის ბრძოლა.

არავის გვინდა ომი, არავის უნდა სისხლი, ტყვიებისა და ბომბების ჩამოყრა, რადგან ვიცით, რომ ეს საშინელებაა, მაგრამ თუ საჭირო გახდება, არ უნდა დავთმოთ ჩვენი ქვეყანა.

როცა რუსები აქ დამკვიდრდებიან, ააწყობენ ბიზნესებს, ექნებათ მეტი პრივილეგია, მეტი მოთხოვნები, აი, ეს შეგვიქმნის საფრთხეს. მათი ერთ-ერთი სტრატეგიაც ისაა, რომ ეს ყველაფერი უკან შემოგვიბრუნდეს. ამიტომ უნდა გაკონტროლდეს რუსეთის ყველა მოქალაქის შემოსვლა, ვინ არიან და რას წარმოადგენენ.

• თქვენ ამბობთ, რომ ხალხშია ძალა, დღეს ამ ყველაფერზე კითხვებს სვამს კიდეც ხალხი, ქუჩაშიც გამოვიდა, როცა ქვეყნის ევროპული არჩევანი გახდა დასაცავი. კიდევ საითკენ უნდა მიმართოს ეს ძალა საზოგადოებამ?

აუცილებელია უწყვეტი აქციები, საჭიროა უფრო მკაცრი ტონი ხელისუფლების ქმედებებზე, არ უნდა გავჩერდეთ, სანამ არ მივაღწევთ შედეგს. რაღაც სიტუაცია შეიძლება შევაჩეროთ, მაგრამ მიზნის მიღწევაა საჭირო. ეს მთავრობა კი აუცილებლად უნდა შეიცვალოს, ეს ყველაფერი უნდა შეძლოს ხალხმა. მართალია, ამ გზაზეც კონკრეტული ლიდერი არ გვყავს, მაგრამ არც ესაა პრობლემა, ჩვენი ქვეყნისთვის ყველა უნდა ვიყოთ ლიდერი.

ბათუმის საჯარო ბიბლიოთეკის შენობის გამაგრება-რეაბილიტაციისთვის საქალაქო ინფრასტრუქტურისა და კეთილმოწყობის სამმართველომ ტენდერი გამოაცხადა. სატენდერო თანხა 1 499 762 ლარია.

ორი კვირის წინ მერიაში  „ბათუმელებს“  უთხრეს, რომ 2022 წელს 200 ათასი ლარი ბიბლიოთეკის შენობის რეაბილიტაციისთვის საჭირო საპროექტო დოკუმენტაციისა და ხარჯთაღრიცხვისათვის დაიხარჯებოდა.

მერიის სამმართველოში კი, ამჯერად გვითხრეს, რომ პროექტიც და ხარჯთაღრიცხვაც ახლა გამოცხადებული ტენდერის ფარგლებში მომზადდება გამარჯვებული კომპანიის მიერ. იგივე კომპანია კი, ამ პროექტის საფუძველზე ჩაატარებს სარეაბილიტაციო სამუშაოებსაც.

ტენდერის პირობაში აღნიშნულია, რომ „2022 წელს, მიმწოდებლის მიერ შესრულებული სამუშაოების ღირებულების გათვალისწინებით, ანაზღაურდება არაუმეტეს 200 000 ლარი, ამასთან, შემსყიდველი [მერიის სამმართველო] უფლებამოსილია მიიღოს გადაწყვეტილება 2022 წელს დამატებითი დაფინანსების შესახებ“.

ტენდერში წინადადებების მიღება 21 აგვისტოს დაიწყება და 26 აგვისტოს დასრულდება.

შენობის რეაბილიტაცია კი, გამარჯვებულთან ხელშეკრულების გაფორმების დღიდან 2023 წლის 30 აგვისტოს ჩათვლით პერიოდში უნდა დამთავრდეს.

ინფორმაცია იმის შესახებ, რომ საჯარო ბიბლიოთეკის შენობა ავარიული იყო მიმდინარე წლის მაისში გახდა ცნობილი.

შენობა ავარიულობის მიზეზით დაკეტეს, თუმცა 2 თვის განმავლობაში, ვერც მერიამ და ვერც ბიბლიოთეკის ხელმძღვანელობამ, წიგნების განსათავსებლად ალტერნატიული შენობა ვერ გამოძებნეს.

ვინაიდან შენობის რეაბილიტაციაზე ტენდერი უკვე გამოცხადებულია, „ბათუმელები“ ბიბლიოთეკის დირექტორს ხელახლა დაუკავშირდა.

გამოინახა თუ არა ალტერნატიული ფართობი წიგნებისთვის და მთელი რეაბილიტაციის პერიოდში რაიმე ფორმით იმუშავებს თუ არა ბიბლიოთეკა? – ამ კითხვებზე პასუხი რომ მიგვეღო, ბიბლიოთეკის დირექტორმა ჯონი საბაშვილმა სატელეფონო საუბარში გვითხრა, რომ ოფიციალურად, წერილობით უნდა მივმართოთ: „მოიწერეთ რა კითხვებიც გაქვთ და მიიღებთ პასუხებს“.

ამავე თემაზე:

გონიო-კვარიათის სანაპიროზე კომერციული საქმიანობისთვის საიჯარო გადასახადს 99-დან მხოლოდ 17 პირი გადაიხდის. უმრავლესობას კი, რომლებიც კომერციულ საქმიანობას, ზოგ შემთხვევაში უფრო დიდ ტერიტორიაზე აწარმოებენ, ამის ვალდებულება არც აქვთ. პლაჟი სრულად ათვისებულია, თუმცა მეწარმეების უმრავლესობას წელს მერიასთან საიჯარო ხელშეკრულება არ გაუფორმებია, მათ არც აუქციონებში მიიღეს მონაწილეობა.

იმ ინფორმაციის მიხედვით, რაც eauction.ge-ზე იძებნება, მართალია დაგვიანებით, თუმცა, წელს მერიამ ელექტრონულ აუქციონზე გონიო-კვარიათის სანაპიროზე 99 სხვადასხვა ზომის ნაკვეთი გაიტანა. შესაბამისად, „ბათუმელები“ გასული კვირის განმავლობაში არკვევდა, ვის აძლევს ბათუმის მერია უფლებას ყველაზე კომერციული ადგილებით ისარგებლოს, ვინ გადაიხდის გადასახადს და ვინ არ გადაიხდის? რატომ არ მიიღეს აუქციონში მონაწილეობა იმ კომპანიებმა, რომლებიც სანაპიროზე უკვე ფლობენ კაფე-ბარებს ან კიდევ სხვა საქმიანობას ეწევიან?

აღსანიშნავია, რომ პლაჟებზე განთავსებული ინფრასტრუქტურა ესკიზის დონეზეც არ არის მერიასთან შეთანხმებული. საკუთარ კომერციულ ფართობს ყველა მეწარმე აქ ისე აწყობს, როგორც მას მოსწონს, ან შეუძლია. შესაბამისად, არ არსებობს ერთიანი სტანდარტი, რომლის მიხედვითაც ბათუმის სანაპიროს ყველაზე მომხიბვლელ ნაწილში საპლაჟო ინფრასტრუქტურას მოაწყობენ.

• რა ხდება გონიოს პლაჟზე

მერიაში გვითხრეს, რომ პირველი აუქციონის შემდეგ 15 ხელშეკრულება გააფორმეს. განმეორებით აუქციონზე კი, რომელიც – 28 ივლისს დასრულდა, მერიას აუქციონზე ჯამში 7 500 კვ.მეტრამდე ფართობი ჰქონდა გატანილი, მხოლოდ ორი აუქციონი შედგა – გასხვისდა 102 კვ.მეტრი.

გონიო-კვარიათის სანაპირო ზოლში დასაქმებულების უმრავლესობა აუქციონთან დაკავშირებულ პრობლემებზე მედიასთან საუბრობს, თუმცა თითქმის ყველა მათგან ითხოვს, რომ ვინაობა არ დავასახელოთ.

სოფო ნამგალაძე კი იმათ შორისაა, ვინც აუქციონთან დაკავშირებით „ბათუმელებს“ თავისი შეხედულება ღიად გაუზიარა. „ვერ გავწვდებოდით, მთელი ივნისი წვიმდა და აუქციონში მონაწილეობა ვეღარ გავრისკეთ. ძალიან ცუდი სეზონია, ნორმალური შეზლონგი 150 ლარამდე ღირს, ხალხმა მათი ფასიც ვერ დაფარა. ბევრს სესხით გვაქვს ნაყიდი“, – ამბობს სოფიო ნამგალაძე.

სანაპიროზე დასაქმებულები ამბობენ, რომ აუქციონებში ძირითადად იმ პირებმა მიიღეს მონაწილეობა, რომლებსაც აქ კაფეები და მასთან დაკავშირებული ინფრასტრუქტურა აქვთ, მართავენ კონცერტებს, ჰყავთ ბევრი მომხმარებელი და გადახდა არ უჭირთ. შეზლონგებისა და ქოლგების გამქირავებლებისთვის საქმე გაცილებით რთულადაა.

კაფეების მეპატრონეები კი მიიჩნევენ, რომ მერიამ გარკვეული ნაკვეთები გრძელვადიანი იჯარებითაც უნდა გაასხვისოს. ამ შემთხვევაში ისინი მზად არიან აიღონ ვალდებულებები და პლაჟი მოაწესრიგონ მერიის მიერ მითითებული სტანდარტის შესაბამისად. თუმცა მერიამ გონიო-კვარიათის პლაჟის მოსაწესრიგებლად ერთიანი სტანდარტის შემუშავება ამ დრომდე ვერ მოახერხა.

„ხომ ხედავთ ამ კონსტრუქციას – მასალის შეძენა, შემდეგ მისი გამართვა, გადახურვა, საკმაოდ ძვირი მიჯდება, სეზონის ბოლოს ეს უნდა დაშალოთო. მე უნდა დავშალო, სხვამ არა. რატომ? – თუ მომცემენ უფლებას, რომ შევინარჩუნო, დავაკმაყოფილებ მოთხოვნებს, რაც მერიას ექნება, შესაბამისად მოვაწყობ და მოვუვლი. ისიც ხომ უნდა გაითვალისწინოთ, რომ აქ ადამიანები უნდა დავასაქმო, სამი მიმტანი დამჭირდება, მზარეული, მისი დამხმარე. მუსიკოსებისთვის კუთხეს ვაწყობ. ეს თუ დავშალე, მომავალ წელს იგივე თანხა უნდა დავხარჯო, ასე გამოდის“, – ამბობს ერთ-ერთი კაფეს მესაკუთრე.

პლაჟის კონკრეტული მონაკვეთების მესაკუთრეები ბოლო წლებში ძირითადად არ იცვლებიან. შესაბამისად, მათ აქვთ განცდა, რომ მომავალ სეზონზეც იგივე ადგილზე იმუშავებენ. ამიტომაც ისინი, ვისაც დააშლევინეს, მიიჩნევენ, რომ კონსტრუქციის დაშლის მოთხოვნა მერიის მხრიდან, თანაც ისე, რომ ზოგი მათ შენარჩუნებას მაინც ახერხებს, უსამართლოა.

• რატომ ვერ ახერხებს მერია ერთიანი სტანდარტის შეთავაზებას და საერთოდ, პრობლემის მოგვარების რა ხედვა აქვს?
• რატომ მოხდა, რომ რამდენიმე მესაკუთრეს კონსტრუქცია დააშლევინეს, რამდენიმე მესაკუთრემ კი, შეინარჩუნა? – ამ კითხვებზე მერიისგან პასუხები ვერ მივიღეთ: „მოგვწერთ და გიპასუხებთო“.

სოფიო ნამგალაძე „ბათუმელებთან “ იმ პერიოდს იხსენებს, როცა მერიამ ერთ შეზლონგზე 5 ლარი გადაახდევინა სეზონურად: „2 წლის წინ იყო თუ სწორად მახსოვს, ჩამოიარეს მერიის წარმომადგენლებმა და  გადავიხადეთ. ქვითარი რომ ამოგვიწერეს, ახლაც მაქვს. თუ დაგვიწესებენ ამ გადასახადს, გადავიხდით. მთავრობას ვერავინ გაექცევა, მე მივესალმები ერთიანი წესის შემოღებას და კანონიერებას, უკანონო საქმე არ მიყვარს. უნდა დარეგულირდეს.“

•  „მერია კვარიათში ყველგან ვერც კი შედის“ 

„ზოგისთვის ეს მუქთა ფულია“, – გვიყვება პირი, რომელსაც გონიო-კვარიათის სანაპიროს ერთ კონკრეტულ მონაკვეთზე კომერციული აქტივობა თავადაც აქვს წამოწყებული. გონიო-კვარიათის პლაჟის ათვისების ამბებს გვიყვება იმ პირობით, რომ მის სახელსა და გვარს არ დავწერთ „მერიასთან პრობლემები რომ არ შეექმნას“.

რამაზი [სახელი შეცვლილია] ამბობს, რომ პრობლემები აქ, განსაკუთრებით კი კვარიათის სანაპირო ზოლზე მერიასაც აქვს. ის ირწმუნება, რომ „მერია ყველგან ვერც კი შედის“.

რას ნიშნავს „მერია ყველგან ვერ შედის?“ – ამ კითხვაზე გვპასუხობს, რომ „ზოგი ისეთი კაცისაა, ზოგს ასეთი პატრონი ჰყავს“.

რამაზი ირწმუნება, რომ კვარიათში „გარედან ვერავინ შევა“: „გონიოში ალბათ არის რაღაც ადგილები, რასაც მერია აკონტროლებს, კვარიათში – არა, აქ ადგილები თავად ხალხს აქვს განაწილებულიო“. ამის დასადასტურებლად მაგალითებიც მოჰყავს: „ორი თვის წინ იყო აქ მერიის ხალხი გამოსული, პოლიციაც ახლდათ. მხოლოდ ერთ-ორს დაანგრევინეს… გაყევით ამ სანაპიროს, მასეთი რამდენია“.

როგორ ხდება, რომ ერთ მონაკვეთში მუნიციპალური ინსპექცია დაჟინებით ითხოვს დემონტაჟს და ამას აღწევს კიდეც, სხვაგან კი მესაკუთრე შენობას ინარჩუნებს? „ეს თქვენ გეცოდინებათ და მე ნუ მეკითხებითო“, – გვპასუხობს რამაზი.

გონიო-კვარიათის ზოლში გაფრთხილებასა და დემონტაჟზე ბათუმის მუნიციპალური ინსპექცია ჯერ მარტში, შემდეგ კი მაისში წერდა ფეისბუქის საკუთარ გვერდზე. მარტში, მაისშიც და შემდეგაც, რამდენიმე შენობის დემონტაჟი მართლაც დაიწყეს, რამდენიმე კი გადარჩა.

„გონიო-კვარიათის სანაპირო ზოლზე ბათუმის მუნიციპალური ინსპექცია უნებართვო კონსტრუქციების განთავსებასთან დაკავშირებით ეტაპობრივად ახორციელებს მონიტორინგს. ყველა სამართალდარღვევაზე ადმინისტრაციული ზედამხედველობის სამსახურის მიერ განხორციელებულია კანონით გათვალისწინებული შესაბამისი რეაგირება“, – ეს არის ზოგადი პასუხი, რაც მუნიციპალური ინსპექციიდან წერილობით მოგვაწოდეს.

კონკრეტულ პასუხისმგებელ პირზე კითხვების დასმის საშუალება არ მოგვეცა.

• აუქციონის ფასები

გონიო-კვარიათის პლაჟზე დასაქმებულები, ვინც მედიასთან აცხადებს, რომ ლეგალურად სურს მუშაობა, მიაჩნიათ, რომ წელს განსაკუთრებით ძვირი ფასი დაადო მერიამ სანაპიროს.

თუმცა, ყველაზე მცირე ზომის – 14 კვ.მეტრი ნაკვეთი ბათუმის მერიას 175 ლარად ჰქონდა აუქციონზე გატანილი, ვაჭრობის ბიჯი 10 ლარი იყო. თუ ამ ნაკვეთის შეძენას დაინტერესებული პირი ერთი ბიჯით მოახერხებდა, მას 185 ლარის გადახდა მოუწევდა – კვადრატულ მეტრზე 13 ლარი. ამ თანხის გადახდა მოუწევდა აუქციონში გამარჯვებულს ერთჯერადად, პირველი აგვისტოდან 15 ოქტომბრის ჩათვლით.

აქვე უნდა ითქვას ისიც, რომ გონიო-კვარიათში ზღვაზე აქტიური სეზონი აგვისტოს ბოლომდეა, შედარებით პასიური სეზონი კი, კარგი ამინდის შემთხვევაში, შეიძლება 15 სექტემბრამდე გაგრძელდეს.

თითქმის იგივე პირობებით ჰქონდა მერიას აუქციონზე გატანილი შედარებით დიდი ზომის ნაკვეთებიც – 1 კვ.მეტრი 12.80 ლარად.

ბათუმის პლაჟზე განთავსებულ გასახდელებს ხალხი ტუალეტის დანიშნულებითაც იყენებს, რის გამოც გასახდელების დიდ ნაწილში შარდის სუნია, ზოგან დაფრინავენ ბუზებიც. ბათუმის ბულვარის ინფორმაციით, გასახდელები სისტემატურად ირეცხება წყლითა და ქლორით, თუმცა მაინც არის პრობლემები.

ბათუმის ბულვარის მოვლა-პატრონობაში ბულვარის გასწვრივ, სანაპირო ზოლზე, განთავსებული 33  გასახდელია. რამდენიმე გასახდელს აქვს კონკრეტული მოიჯარის ლოგო, მათი მოვლა-პატრონობა ამ მოიჯარეს ევალება.

„მიუხედავად იმისა, რომ გასახდელებს ჩვენ ყოველ დილით ვრეცხავთ, მათ შორის, ქლორის გამოყენებით, მაინც არის პრობლემები, რადგან დიდია ხალხის ნაკადი ზღვაზე. ძალიან სამწუხაროა, რომ ასე იქცევიან და ამ დანიშნულებით იყენებენ გასახდელებს,“ – გვითხრეს ბულვარის ადმინისტრაციაში.

მათივე ცნობით, ტურისტულ სეზონზე ხალხის ყველაზე დიდი ნაკადი ბათუმის სანაპიროზე მოდის, რის გამოც საგანგებო რეჟიმში მუშაობს სანდასუფთავებაც.

ბათუმის ბულვარში სულ 6 ტუალეტია (ახალ ბულვარში, დელფინარიუმთან, მელიქიშვილის ქუჩის გასწვრივ, ვეტერანთა კლუბთან, კაფე „ტყუპებთან“ და „ეშმაკის ბორბალთან“). ყველა მათგანი ფასიანია. ტუალეტით სარგებლობის ფასი 1 ლარია.

ბათუმის ბულვარში ამბობენ, რომ მომავალი წლისთვის ბათუმის ბულვარს სულ ცოტა ერთი ტუალეტი მაინც დაემატება. იგი სავარაუდოდ ახალი ბულვარის ტერიტორიაზე განთავსდება – “ამჟამად ვარჩევთ ადგილს“.

ამავე თემაზე:

„მადლობელი ვარ უზენაესი სასამართლოსი, მაგრამ მე სტრასბურგის სასამართლოში მივდივარ,“ – ამბობს 81 წლის ციალა პერტია. ის 29 წელი არარეგისტრირებულ ქორწინებაში იყო და მეუღლის გარდაცვალების შემდეგ საცხოვრებელი ბინის მემკვიდრეობით გადაცემას ითხოვს.

ცოლ-ქმარს შვილი არ ჰყოლია.

ციალას მოდავე გარდაცვლილი ქმრის დისშვილია, რომელმაც მემკვიდრეობით მიიღო ბინა ბათუმში, ტაბიძის ქუჩაზე, სადაც ამ დრომდე ციალა პერტია ცხოვრობს.

იმის გამო, რომ ქორწინება რეგისტრირებული არ იყო, ციალა პერტიას სარჩელი არ დააკმაყოფილა ბათუმის და ქუთაისის სააპელაციო სასამართლოებმა. უზენაესმა სასამართლომ კი, ნაწილობრივ დააკმაყოფილა სარჩელი და გადაწყვიტა, რომ ბინის ზუსტად ნახევარი ციალა პერტაიას საკუთრება უნდა იყოს.

„აი, საჯარო რეესტრის ამონაწერიც, ბინის ნახევარი უკვე ჩემს სახელზეა,“ – რეესტრის ამონაწერიც გვაჩვენა ციალა პერტიამ.

„ეს არის უპრეცედენტო და პროგრესული გადაწყვეტილება, ჩვენ ცნობილი იურისტები და პროფესორებიც გვეუბნებოდნენ, რაღას დაობთ, სამართლებრივ შედეგს მხოლოდ რეგისტრირებული ქორწინება წარმოშობსო, მაგრამ უზენაესმა სასამართლომ გაითვალისწინა ევროპის ქვეყნების პრაქტიკა და მიიჩნია, რომ ფაქტობრივი ქორწინებაც წარმოშობს სამართლებრივ შედეგს,“ – განმარტავს ადვოკატი დავით დიდმანიძე, ის ციალა პერტიას ინტერესებს იცავს სასამართლოში.

მხარეს ჯერ სრულად არ ჩაჰბარებია უზენაესი სასამართლოს მიერ მიღებული გადაწყვეტილება. შესაბამისად, უცნობია, რა დასაბუთებით მიიღო ეს გადაწყვეტილება ბოლო ინსტანციის სასამართლომ.

ციალა პერტიამ ამ საქმეზე მიმართა საკონსტიტუციო სასამართლოსაც და მოითხოვა იმ სამართლებრივი ნორმის ანტიკონსტიტუციურად ცნობა, რომელიც ითვალისწინებს სამართლებრივი შედეგის დადგომას მხოლოდ რეგისტრირებული სამოქალაქო ქორწინების შემთხვევაში.

„2020 წელს დაასრულეს ჩემი საქმის განხილვა, მაგრამ ამ დრომდე არ იღებენ გადაწყვეტილებას,“ – დასძინა ციალა პერტიამ „ბათუმელებთან“.

81 წლის ქალი ახლა აპირებს მიმართოს ევროსასამართლოს ევროკონვენციის მე-8 მუხლის დარღვევაზე, რაც გულისხმობს „პირადი და ოჯახური ცხოვრების დაცულობის უფლებას“. ცილა პერტია ითხოვს, რომ საცხოვრებელი ბინა, სადაც ის ქმართან ერთად 29 წელი ცხოვრობდა, მთლიანად მისი საკუთრება გახდეს.

„იმედი გვაქვს, რომ ევროსასამართლო მთლიანად შეცვლის არსებულ პრაქტიკას საქართველოში“, – აღნიშნავს იურისტი დავით დიდმანიძე.

ციალა პერტია კი ამბობს, რომ ამჯერად მისი ბინიდან გამოსახლებას გარდაცვლილი ქმრის ახლობლები აღარ ითხოვენ და საუბარია გამოსყიდვაზე, თუმცა მხარეები ვერ შეჯერდნენ, რომელმა მხარემ გამოისყიდოს ბინა.

ბინა, სადაც ხანდაზმული ქალი ცხოვრობს, სულ 34 კვადრატული მეტრია.

„მითხრეს, რომ გადაგიხდით ფულს და გამოვისყიდითo, მაგრამ მე არ ვარ თანახმა, როგორც სასამართლო გადაწყვეტს, ისე იყოს,“ – ამბობს ციალა პერტია.

___

მთავარი ფოტო: ციალა პერტაია

საქართველოს ხელისუფლების მაღალი თანამდებობის პირები ბოლო დღეებია აკრიტიკებენ იმ ადამიანებსა და ჯგუფებს, ვისაც აშინებთ რუსეთის მოქალაქეების საქართველოში „უკონტროლო შემოსვლა“. ხელისუფლება ამ შიშს აფასებს როგორც ქსენოფობიას და შესაბამისი კანონმდებლობის გამკაცრებასაც გეგმავს. ბოლო წლებში ეთნიკური ნიშნით ქსენოფობიის წყარო, განსაკუთრებით აზიური ქვეყნების მოქალაქეების მიმართ, არაერთხელ გამხდარა თავად ხელისუფლება.

რა შეიცვალა ახლა?

საქართველოს პარლამენტის თავმჯდომარემ, შალვა პაპუაშვილმა, რუსეთის მოქალაქეების სიძულვილში, საქართველოს პოლიტიკურ პარტიებთან ერთად, არასამთავრობოებიც დაადანაშაულა. მისი აზრით, „ზოგიერთი NGO ქსენოფობიას ახალისებს“.

პაპუაშვილის თქმით, საქართველოში რუსეთის მოქალაქეების მატება არ უკავშირდება ოკუპაციის საფრთხეს და აქ რუსეთის მოქალაქეები „სტაბილურობისა და დემოკრატიის გამო მოდიან“.

4 აგვისტოს „ქართული ოცნების“ თავმჯდომარემ, ირაკლი კობახიძემაც გააკეთა ამ თემაზე განცხადება და თქვა, რომ დაგეგმილია საკანონმდებლო ცვლილება, რაც „ეთნიკური ნიშნით დისკრიმინაციისა და ეთნიკური შუღლის გაღვივების წინააღმდეგ იქნება მიმართული“.

დღეს, 5 აგვისტოს, ის კიდევ გამოეხმაურა რუსეთის მოქალაქეების თემას და თქვა, რომ „საზღვრის კვეთის მონაცემების მიხედვით, რუსეთის მოქალაქეების რაოდენობა საქართველოს მოსახლეობის 3%-საც კი არ შეადგენს. ამასთან, მათი დიდი ნაწილი ეროვნებით ქართველია“. მან საქართველოს მოქალაქეების შიშს უსაფრთხოებაზე ისევ შოვინისტური კამპანია უწოდა.

„ბათუმელებმა“ გადახედა რა წერია საერთაშორისო და ადგილობრივი ორგანიზაციების ანგარიშებში საქართველოში „ქსენოფობიისა და რასიზმის შესახებ“. აღმოჩნდა, რომ წინა წლებში ანგარიშებში ხშირად ახსენებენ ხელისუფლების წარმომადგენლებს, როგორც ქსენოფობიის წყაროს.

მაგალითად, ევროპული კომისია რასიზმისა და შეუწყნარებლობის წინააღმდეგ საქართველოს შესახებ 2016 წლის ანგარიშში მოხვდა ახლანდელი კულტურის და მაშინდელი იუსტიციის მინისტრის, თეა წულუკიანის განცხადებები უცხო ქვეყნის მოქალაქეების მიმართ, რომელიც ქსენოფობიად შეფასდა.

წულუკიანმა ქსენოფობიური კონოტაციით ისაუბრა ირანის, ერაყის, ეგვიპტის და სხვა ქვეყნის მოქალაქეებზე. მაშინ წულუკიანი ამბობდა, რომ „ტურიზმის სააგენტო ვერ იქნება ბედნიერი ამ მასშტაბის (საიმიგრაციო) რეფორმის გამო“, რადგან ჩვენ 2014 წელს 42 000-ით შევამცირეთ ტურისტების ნაკადი. საუბარი იყო ჩინელების, ერაყელების, ირანელებისა და ეგვიპტელების საქართველოში შემოსვლაზე.

ირანის ისლამური რესპუბლიკა მაშინ გამოეხმაურა კიდეც წულუკიანის ამ განცხადებას და დისკრიმინაციული უწოდა, რადგან წულუკიანმა თქვა: „ჩვენ შეგვიძლია დადგენილ ჩარჩოში ვაკონტროლოთ და შემოვუშვათ ის, ვინც ჩვენი ქვეყნის კეთილმოსურნეა, ტურისტია ან, რაც მთავარია, ინვესტორია”.

უფრო ადრე, 2014 წელს, „ქართული ოცნების“ პოლიტსაბჭოს წევრმა, თამაზ ავდალიანმა, რომელიც პარლამენტის იურიდიული კომიტეტის თავმჯდომარის მოადგილეც იყო, თქვა: „ამ კანონპროექტის [მოქალაქეობის შესახებ კანონში შესატანი ცვლილებები] არსი და მიზანია, რომ საქართველოში დაბადებულმა ადამიანებმა, მათმა შთამომავლებმა მიიღონ მოქალაქეობა გართულებებისა და პრობლემების გარეშე. ხოლო დანარჩენები, რომელთაც საერთოდ არ ჰქონიათ შეხება საქართველოსთან, მაგალითად, ვინც აფრიკიდან ჩამოვიდა, მათ უკვე სულ სხვა კრიტერიუმები ექნებათ… იმის ფონზე, რომ ჩვენ ვვითარდებით, ზედმეტი მუქთახორები ნამდვილად არ გვჭირდება“.

2012 წლის ოქტომბერში ასევე საჯაროდ გავრცელდა ვიდეო, სადაც „ქართული ოცნების“ წევრმა დავით დარახველიძემ, რომელიც ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრად დანიშნეს თქვა, რომ „ყველა ზანგი, რომელსაც თბილისში შეხვდებით, მოქალაქეა. ასე არიან ინდოელები და ჩინელებიც“.

საზოგადოების მხრიდან პროტესტის მიუხედავად, ეს ადამიანი მაინც დანიშნა „ოცნებამ“ მინისტრად.

მაგალითად, 2018 წელს ქვეყანაში შემოშვებაზე უარი უთხრეს რეპატრირებული მესხების შვილს, 28 წლის ხალილ სარვაროვს, რომელსაც საქართველოში სტუდენტის სტატუსი აქვს.

ხალილი სახლში, ბაქოში, აზერბაიჯანში დაბრუნდა. შემოდგომაზე, 7 ოქტომბერს, სწავლის დასრულების მიზნით თბილისში ბრუნდებოდა, როდესაც ქართულმა მხარემ უარი უთხრა საზღვრის კვეთაზე. ამბობს, რომ ადგილზე მიზეზი არ დაუსახელებიათ – უბრალოდ უთხრეს, რომ მის „შეშვებაზე უარი იყო“. ხალილს ორჯერ, დაუსაბუთებელი მიზეზით, უთხრეს უარი ქვეყანაში შემოსვლაზე.

2017 წლის (MDF/USAID/UNAG) ანგარიშის მიხედვით, რომელიც საქართველოში სიძულვილის ენასა და ქსენოფობიასაც შეეხებოდა,  დისკრიმინაციული შინაარსის 1926 კომენტარი გამოვლინდა, რომელთაგან ყველაზე დიდი წილი – 49,1% ქსენოფობიაზე მოდის.

პარტიების ათეულში, რომლებიც ყველაზე ხშირად აღვივებდნენ სიძულვილის ენას, იყო „ქართული ოცნებაც“. ანგარიშის თანახმად, მმართველი პოლიტიკური პარტიის მხრიდან ქსენოფობიის 45 შემთხვევა გამოვლინდა.

2018 წელს საქართველოს პრეზიდენტმა სალომე ზურაბიშვილმა ჯავახელ სომხებს უთხრა, რომ „ერთმა პრეზიდენტმა, რომლის წარმომადგენელიც არის ჩემი ოპონენტი, ძალიან ბევრი მოქალაქეობა დაურიგა თურქებს, მაგრამ თქვენ არ მოგცათ მოქალაქეობა”. რაც ასევე დისკრიმინაციად შეფასდა.

2019 წლიდან „ქართულმა ოცნებამ“ ყველაზე მეტჯერ უთხრა უარი ქვეყანაში შემოსვლაზე აზიური ქვეყნების მოქალაქეებს. მაგალითად:

• ირანის (576)
• ინდოეთის (366)
• აზერბაიჯანის (124) მოქალაქეს.

2019 წლის თებერვალში:

• ირანის (564),
• ინდოეთის (428),
• აზერბაიჯანის (141) მოქალაქეს.

2019 წლის მარტში:

• ირანის (1815),
• ინდოეთის (404),
• აზერბაიჯანის (228) მოქალაქეს.

2019 წელს იუსტიციის სამინისტრო დაუსაბუთებელი მოტივით უარს ეუბნებოდა ერაყის მოქალაქეს ბინადრობის უფლების გაგრძელებაზე, მიუხედავად იმისა, რომ მას საქართველოში ერთ-ერთ მსხვილ საინვესტიციო კომპანიაში შრომითი ხელშეკრულება ჰქონდა.

რატომ შიშობენ საქართველოში რუსეთის მოქალაქეების „უკონტროლო შემოსვლით“? – რუსეთის ფედერაციას საქართველოს საერთაშორისოდ აღიარებული საზღვრები დარღვეული აქვს, ქვეყნის 20 პროცენტი კი – ოკუპირებული. საოკუპაციო ზოლიდან პერმანენტულად იტაცებენ საქართველოს მოქალაქეებს. რუსეთი ყოველგვარი „პროვოკაციის“ გარეშე შეიჭრა უკრაინაში და უკვე დახოცა ათასობით მშვიდობიანი მოსახლეობა. რუსეთის ყოფილმა პრეზიდენტმა, დიმიტრი მედვედევმა კი, ცოტა ხნის წინ დაწერა, რომ საქართველო რუსეთის შემადგენლობაში უნდა შევიდეს.

სწორედ ამ საფრთხეების გათვალისწინებით, საქართველოს მოქალაქეებმა პეტიციაც შეადგინეს, სადაც ხელისუფლებას სთხოვენ, რუსეთთან სავიზო რეჟიმის შემოღებას.

დღეს, 5 აგვისტოს, 16:00 საათზე, პეტიციას 18 505 ადამიანი აწერდა ხელს.

მოქალაქეები ითხოვენ, რომ სავიზო რეჟიმის შემოღების პარალელურად, რუსეთის მოქალაქეებს არ მიეცეთ საქართველოში 3 თვეზე მეტი დროით ყოფნის უფლება და ისიც მხოლოდ ტურისტული მიზნებისთვის.

მას შემდეგ, რაც რუსეთმა უკრაინაში ომი დაიწყო და რუსეთს საერთაშორისო სანქციები დაუწესდა, რუსეთის მოქალაქეები მიდიან სხვადასხვა ქვეყანაში, მათ შორის, საქართველოში. ბოლო ოფიციალური მონაცემებით, ამ დროისთვის საქართველოში 247 000 ვიზიტორია შემოსული. ირაკლი კობახიძის თქმით კი, „რუსეთის მოქალაქეების რაოდენობა, რომლებიც ომის დაწყების შემდეგ შემოვიდნენ საქართველოში და 31 ივლისის მდგომარეობით საქართველოში იმყოფებიან, 110 000-ზე ნაკლებია, რაც საქართველოს მოსახლეობის 3%-საც კი არ შეადგენს“.

რუსეთის მოქალაქეები საქართველოში არეგისტრირებენ კერძო კომპანიებს, ყიდულობენ უძრავ ქონებას, ხსნიან გასართობ და კვების ობიექტებსაც, სადაც მომხმარებლებთან ურთიერთობისას არ იყენებენ საქართველოს სახელმწიფო ენას.

„ქსენოფობია არის დაუშვებელი, რომელი ქვეყნის წარმომადგენლის მისამართითაც არ უნდა იყოს. თუმცა საქართველოს მოქალაქეებში არსებული შიშები საფუძვლიანია, რადგან გვაქვს მიმდინარე ოკუპაცია, მიმდინარე ომი უკრაინაში, რომელიც საქართველოს მოსახლეობის უმრავლესობამ შეაფასა როგორც ჩვენი ომი, ასევე, ის საფრთხეები, რომლებიც რუსეთისთვის დაწესებულ სანქციებს შეეხება. ამიტომ კითხვები და შიშები არის ლეგიტიმური“, – ამბობს „ბათუმელებთან“ მაკო ღავთაძე „ტოლერანტობისა და მრავალფეროვნების ინსტიტუტის“ წარმომადგენელი.

მისი თქმით, დღეს, ფაქტობრივად, ბეწვის ხიდზე უწევთ ადამიანებს გავლა, რომ ემოციები არასწორად არ მიმართონ: „ხელისუფლებამ ქსენოფობიით სპეკულირება დაიწყო, რადგან მე არ მახსენდება შემთხვევა, ოდესმე სწორი შეფასებები გაეკეთებინა მაშინ, როცა მართლა არსებობდა ქსენოფობიის არაერთი შემთხვევა ქვეყანაში. ეს განცხადება ხელისუფლებამ გააკეთა რუსებისთვის სავიზო რეჟიმის მოთხოვნის საპასუხოდ, ხომ?

ეს მოთხოვნა ვერ შეფასდება ქსენოფობიად ამ კონკრეტულ სიტუაციაში. სხვა დროს, ვთქვათ, მოწმენდილ ცაზე, მშვიდობიან სიტუაციაში რომ ამოერჩია რომელიმე ქვეყანა რაიმე ნიშნით და დაეწესებინა სავიზო რეჟიმი, მაშინ შესაძლოა ასე გვემსჯელა. მაგრამ ახლა უკრაინასთან ერთად ვართ ჩვენც ომში, რადგან ვართ ოკუპაციაში და ახლაა ლაპარაკი იმაზე, რომ სანქციების არიდების ერთ-ერთი გზა რუსების მხრიდან შეიძლება იყოს საქართველო.

სასაზღვრო და საემიგრაციო კონტროლი ქსენოფობიად ვერ შეფასდება, რადგან ეს არის სახელმწიფო უსაფრთხოების საკითხები, რასაც მოქალაქეები კი არა, სახელმწიფო უსაფრთხოების სამსახური უნდა აკონტროლებდეს.

მე უფრო დიდ საფრთხეებსაც ვხედავ, რადგან ხელისუფლება ღიად უპირისპირდება დასავლეთს, სტრატეგიულ პარტნიორებს – აშშ-ს და ევროკავშირს. მთელი პოლიტიკა ამაზეა აგებული, ამიტომ არ ვიცი, რამდენად საკმარისი იქნება რუსეთის მოქალაქეებისთვის სასაზღვრო კონტროლის დაწესება“, – ამბობს მაკო ღავთაძე.

მისი თქმით, მოქალაქეების კითხვებიც და შიშიც ლეგიტიმურია, რადგან ჩვენი სახელმწიფო წლებია ოკუპაციის ქვეშ ცხოვრობს: „შესაძლოა, ხელისუფლებას უფრო აწყობდეს, რომ ჩვენი, მოქალაქეების ემოციები ამაზე იხარჯებოდეს და ნაკლებად იმაზე, ვთქვათ, 12-პუნქტიანი გეგმა, რომელიც გვაქვს ევროკომისიისგან დაწესებული, როგორ სრულდება. ფაქტობრივად, დღეები გვაქვს დაწესებული ამ პუნქტების შესრულებისთვის და ჩვენ ყურადღება და ემოცია კი სავიზო რეჟიმზე გადაგვატანინეს. რეალურად, ჩვენი მოთხოვნების ადრესატი არის ხელისუფლება. რუსს კი არ უნდა ვუთხრათ – რატომ შემოხვედი აქ? ხელისუფლებას უნდა დავუსვათ კითხვა, მაგალითად, შეამოწმა თუ არა, ხომ არ აქვთ ოკუპირებული ტერიტორიების შესახებ კანონი დარღვეული რუსეთის მოქალაქეებს?

შესაძლოა ხელისუფლებას აწყობდეს კიდეც, რომ ჩვენ ამ ყოფითი საკითხების ირგვლივ ვტრიალებდეთ“.

მაკო ღავთაძის თქმით, „ოცნების“ ხელისუფლების წინასაარჩევნო კამპანიები ყოველთვის ქსენოფობიაზე, თურქოფობიაზე იყო აგებული და წესით, კარგად უნდა იცოდეს, რას ნიშნავს ქსენოფობია.

„აბსურდია, საქართველოს მოქალაქეების რეაქციები ქსენოფობიად შეაფასო, ეს არის სახელმწიფო უსაფრთხოების და სასაზღვრო რეგულაციების მოთხოვნები, რასაც სახელმწიფო უნდა უზრუნველყოფდეს. საქართველოს მოქალაქეებს არ აქვთ დაცულობის განცდა, ამიტომ სვამენ ამ კითხვებს და ხელისუფლების რეაგირებას ითხოვენ“, – ამბობს მაკო ღავთაძე.

უკრაინის არმიის მთავარსარდალმა, გენერალმა ვალერი ზალუჟნიმ მადლობა გადაუხადა ქალებს, რომლებიც უკრაინის შეიარაღებულ ძალებში მსახურობენ. ზალუჟნიმ ასევე გაავრცელა ვიდეო, თუ რა სახის დავალებების შესრულება უწევთ ქალებს გამარჯვებისთვის.

ვიდეოში, რომელიც ზალუჟნიმ გაავრცელა, ომში მყოფი ჯარისქალები რუს ოკუპანტებს აფრთხილებენ, რომ ისინი აუცილებლად დაიღუპებიან უკრაინის მიწაზე.

ზალუჟნის მიერ გამოქვეყნებულ ვიდეოში ქალები ასევე საუბრობენ ომში გადატანილ სახიფათო და მძიმე წუთებზე, გადარჩენაზე.

მთავარსარდალ ვალერი ზალუჟნის მიაჩნია, რომ ამ ომში ქალების წვლილი ფასდაუდებელია.

უკრაინის შეიარაღებულ ძალებში ათასობით ქალი მსახურობს.

„ათასობით ქალს, რომლებიც დღეს მსახურობენ და მუშაობენ უკრაინის შეიარაღებულ ძალებში, შეაქვს ფასდაუდებელი წვლილი ჩვენი სახელმწიფოს დაცვაში. პატივისცემა და მადლიერება თითოეულ მათგანს“, – წერს ზალუჟნი.

„ჩვენი ქალი მეომრები ნამდვილ ამორძალებს ჰგვანან. მათმა გამბედაობამ შეიძლება მხოლოდ აღგაფრთოვანოთ ან მათი შეგშურდეთ“, – ასე აფასებს უკრაინული მედია ომში მყოფი ჯარისქალების ბრძოლას.

2022 წლის 1-ელი ოქტომბრიდან გარკვეული სპეციალობების, პროფესიის ქალების სავალდებულო სამხედრო აღიცხვა დაიწყება უკრაინაში. ამან საზოგადოებაში შეშფოთება გამოიწვია. გენერალურ შტაბში დააზუსტეს, რომ ქალები სამხედრო სამსახურში მხოლოდ ნებაყოფლობით დარეგისტრირდებიან.

ამასთან, უცნობია, სამხედრო აღრიცხვაზე მყოფ ქალებს შორის პირველ რიგში ვის შეეხება მობილიზაცია. ეს დამოკიდებული იქნება სხვადასხვა ფაქტორზე: კერძოდ, თითოეულ რეგიონში გენერალური შტაბის სამობილიზაციო დავალებასა და იმაზე, თუ რა სახის სპეციალისტები სჭირდება ჯარს.

ქალებს შეუძლიათ მობილიზაციის გადავადება იმავე მიზეზით, როგორც კაცებს, ვისაც  ეხება სამხედრო სავალდებულო სამსახური.

სამხედრო აღრიცხვაზე მყოფ ქალებს შესაძლოა შეეზღუდოთ უკრაინის დატოვება. სავარაუდოდ, ქვეყნიდან გასვლას შეძლებენ მხოლოდ ის ქალები, რომლებიც არ ექვემდებარებიან მობილიზაციის დროს ჯარში გაწვევას.

აჭარის მთავრობის თავმჯდომარე ამბობს, რომ სურს მიუსამძიმროს მტრებს, რომლებსაც ტურისტული სეზონის ჩაშლა სურთ. თორნიკე რიჟვაძის კომენტარი აჭარის მთავრობის პრესსამსახურმა გაავრცელა.

„მსურს მივუსამძიმრო ჩვენ მტრებს, რომ ჩვენი ეკონომიკა და ტურიზმი ძალიან სწრაფად დაუბრუნდა პანდემიამდე არსებულ მდგომარეობას. ის მიზანმიმართული კამპანია, პროპაგანდა, რაც მიმდინარეობს, მიზნად ისახავს მხოლოდ ერთადერთს, რომ როგორმე მოახდინონ ჩვენი ხალხის და ჩვენი ქვეყნის მტრებმა სეზონის ჩაშლა და რა თქმა უნდა ჩვენ ყველაფერს გავაკეთებთ, რომ ეს პროვოკაციები იყოს თავიდან აცილებული და წლევანდელი ტურისტული სეზონი იქნება ყველაზე წარმატებული,“ – თქვა თორნიკე რიჟვაძემ.

მთავრობის მიერ გავრცელებულ განცხადებაში არაფერია ნათქვამი, რა „მიზანმიმართულ კამპანიას“ გულისხმობს თორნიკე რიჟვაძე.

სავარაუდოდ მისი განცხადებაც, ისე როგორც „ქართული ოცნების“ თავმჯდომარის ირაკლი კობახიძისა და პარლამენტის თავმჯდომარის, შალვა პაპუაშვილის განცხადებები, უკავშირდება რუსეთის მოქალაქეების შემოსვლას საქართველოში.

ოკუპანტი ქვეყნის მოქალაქეების „უკონტროლო შემოსვლას“ საზოგადოება, პოლიტიკური პარტიები და არასამთავრობო ორგანიზაციები აკრიტიკებენ.

გარდა ამისა, ბათუმში, ქვეყნის ყველაზე დიდ ტურისტულ ქალაქში, რამდენიმე ბარია, სადაც მომსახურებას მხოლოდ რუსულ ენაზე ან ინგლისურად გთავაზობენ, შესაბამისად, აქ ქართულ ენაზე მომსახურებას ვერ მიიღებთ. კაფე-ბარებს არ ჰყავთ ქართულენოვანი პერსონალი.

„სახელმწიფო ენის შესახებ“ კანონის თანახმად, „სახელმწიფო ორგანოები და მუნიციპალიტეტები სახელმწიფოებრივი და საზოგადოებრივი ცხოვრების ყველა სფეროში უზრუნველყოფენ სახელმწიფო ენის ფუნქციონირებისა და მისი სიწმინდის დაცვისთვის აუცილებელი ორგანიზაციული და მატერიალურ-ტექნიკური პირობების შექმნას.“

დაახლოებით 2 საათია „ბილაინის“ ქსელი არ მუშაობს. დასავლეთ საქართველოში მცხოვრებ აბონენტებს სატელეფონო ზარების განხორციელება შეზღუდული აქვთ, ხოლო ინტერნეტკავშირი მთელი ქვეყნის მასშტაბითაა შეწყვეტილი. ხარვეზი ქსელში დღეს, 5 აგვისტოს, დილას დაფიქსირდა.

ქსელში არსებული ხარვეზის შესახებ ინფორმაცია გაავრცელა თავად კომპანიამ.

„ძვირფასო მომხმარებლებო, დაზიანდა სერვისის მომწოდებლის ორი დამოუკიდებელი კაბელი, რის შედეგადაც ჩვენს მომხმარებლებს არ აქვთ წვდომა ინტერნეტზე, ხოლო დასავლეთ საქართველოში ზარებზეც. გვატყობინებენ, რომ პრობლემის მოგვარების დრო 30 წუთს შეადგენს. გიხდით დიდ ბოდიშს და მადლობა მოთმინებისთვის,“ – ნათქვამია ბილაინის განცხადებაში.

განცხადების გავრცელებიდან 1 საათის შემდეგ კომპანიამ ინფორმაცია განაახლა და დაწერა, რომ ამ ეტაპზე უცნობია, როდის აღდგება ინტერნეტ და სატელეფონო კავშირი.

„დამატებით მოგაწოდებთ განახლებულ ინფორმაციას სერვისის აღდგენის დროსთან დაკავშირებით, როგორც კი ის შემოგვივა. მოგეხსენებათ, დაზიანება ჩვენგან დამოუკიდებელი მიზეზით მოხდა, მიმწოდებლის კაბელზე. აღდგენითი სამუშაოები ინტენსიურად მიმდინარეობს,“ – ნათქვამია კომპანიის ოფიციალურ ფეისბუქგვერდზე გამოქვეყნებულ ინფორმაციაში.

ზარებს არ პასუხობენ არც „ბილაინის“ ცხელ ხაზზე.  უცნობია, როდის ჩაირთვება ქსელი.

ჩინური სახელმწიფო მედია CGTN-ი იუწყება, რომ ამერიკის შეერთებული შტატების სპიკერს, ნენსი პელოსის და მისი ოჯახის წევრებს ჩინეთი სანქციებს უწესებს. CGTN-ის ცნობით, ამის შესახებ 5 აგვისტოს ჩინეთის საგარეო საქმეთა სამინისტროს პრესსპიკერმა განაცხადა.

ნენსი პელოსი 2 აგვისტოს ეწვია ტაივანის თვითმმართველ კუნძულს, რომელიც თავს დამოუკიდებელ ქვეყნად აცხადებს. პელოსის ვიზიტს ჩინეთის მხრიდან დიდი წინააღმდეგობა უძღოდა წინ, მათ შორის, მუქარის შემცველი, რომ „დაისჯება ყველა, ვინც ჩინეთს შეურაცხყოფს“.

ჩინეთი მიიჩნევს, რომ აშშ-ის წარმომადგენელთა პალატის სპიკერის, როგორც ქვეყნის მესამე პირის სამხედრო თვითმფრინავით ვიზიტი ტაივანში, ჩინეთის სუვერენიტეტის ხელყოფაა.

5 აგვისტოს თავად სპიკერი პელოსი გამოეხმაურა ჩინეთის რეაქციას და განაცხადა, რომ ჩინეთი ამერიკას და ტაივანის მეგობრებს „ვერ დაუგეგმავს შეხვედრების განრიგს“ და ამ გზით „ვერ მოაქცევს ტაივანს იზოლაციაში”.

პელოსიმ ასევე განაცხადა, რომ მათი ვიზიტი მიზნად არ ისახავდა სტატუსკვოს შეცვლას და ასევე ის, რომ ჩინეთმა „თავისი თავდასხმების საბაბად, ალბათ, ჩვენი ვიზიტი გამოიყენა“.

თავად აშშ-მ, ევროკავშირმა, დიდი შვიდიანის წევრმა ქვეყნებმა და ავსტრალიამ ჩინეთის რეაქციას – სამხედრო წვრთნებს ტაივანის გარშემო, „არასაჭირო“ უწოდეს და აღნიშნეს, რომ პელოსის ვიზიტი არ ცვლიდა ჩინეთის პოლიტიკას, არამედ მეგობრული ვიზიტი იყო საკანონმდებლო ორგანოს წარმომადგენლობისთვის.

_________

ამავე თემაზე: 

სარეკლამო აბრა რუსულ ენაზე ბათუმის ცენტრალური პარკის შესასვლელში კომპანია „სინევოს“ აქვს განთავსებული, გამოსასვლელთან კი – მხოლოდ ინგლისურად. იმის მიუხედავად, რომ კანონი ითხოვს სარეკლამო ბანერზე ინფორმაცია აუცილებლად იყოს განთავსებული სახელმწიფო ენაზე, ანუ ქართულ ენაზეც, ბათუმის ცენტრში, ცენტრალური პარკის შესასვლელთან, ამ სამართალდარღვევაზე ბათუმის მერიამ რეაგირება დღეს, 4 აგვისტოს, მას შემდეგ მოახდინა, როცა ჩვენ მივმართეთ მუნიციპალურ ინსპექციას.

თუმცა რუსულენოვნი სარეკლამო აბრისთვის დღესაც ხელი არავის უხლია. ბათუმის მუნიციპალური ინსპექციის პრესცენტრში გვითხრეს, რომ აბრა ნებართვის გარეშეა განთავსებული და კომპანიას აბრის დემონტაჟი მოსთხოვეს. მუნიციპალურ ინსპექციაში განმარტეს, რომ „გონივრული ვადის“ გასვლის შემდეგ თავად მოხსნიან აბრას, თუკი კომპანია ამას არ გააკეთებს და დააჯარიმებენ.

ბათუმის ცენტრალური პარკი ბათუმის მუნიციპალიტეტის საკუთრებაა. გამოდის, რომ მერია არ  იმჩნევდა უნებართვო, რუსულენოვანი აბრის განთავსებას ბათუმის ცენტრალური პარკის შესასვლელში, სადაც ქართულ ენაზე საერთოდ არაფერი წერია.

სარეკლამო აბრებზე, რომლებიც „ბათუმელებმა“ ცენტრალური პარკის შესასვლელთან და გამოსასვლელთან ნახა, ქართულად მხოლოდ კომპანიის სახელწოდებას წაიკითხავთ, რაც ლოგოს ნაწილია. კომპანიას სარეკლამო შეთავაზება მხოლოდ ორ ენაზე – რუსულად და ინგლისურად აქვს ორ სხვადასხვა ბანერზე.

„ბევრი ტურისტია ბათუმში… ეს არის ტურისტებისთვის დადებული, ხოლო საიტზე ქართულ ენაზეც გვაქვს ინფორმაცია, რუსულად და ინგლისურადაც,“ – გვითხრა კომპანია „სინევოს“ ბათუმის ორგანიზაციის ხელმძღვანელმა, ნინო ნოზაძემ. მას შევახსენეთ, რომ კანონმდებლობით სარეკლამო აბრებზე ქართულ ენაზე ინფორმაციის მიწოდება სავალდებულოა.

„ეს გამოგვიგზავნეს ცენტრალურიდან და ჩვენ მხოლოდ განვათავსეთ. მე ამ შენიშვნის შესახებ გადავცემ მათ და იქნებ გამოასწორონ,“ – აღნიშნა ნინო ნოზაძემ „ბათუმელებთან“.

ნინო ნოზაძე ამბობს, რომ მერიას ის დღეს არ გაუფრთხილებია და მუნიციპალური ინსპექციიდან მის ორგანიზაციაში შეტყობინება არ შესულა. კომპანიის ხელმძღვანელის განმარტებით, მას მერიის მისაღებში უთხრეს, რომ აბრის განთავსებას ნებართვა არ სჭირდებოდა.

„მე ვიყავი მერიაში ლუკა ასათიანზე და ორბელიანის ქუჩაზეც. მისაღებში მითხრეს, რომ ჩვენი ოფისის წინ არ გვჭირდებოდა ნებართვა, პარკის შესასვლელთანაც მითხრეს, რომ ძირს არ შემეძლო დამედგა, მაგრამ თუ იქვე მივამაგრებდი, არ იქნებოდა პრობლემა… არ ვიცი, ვის ვესაუბრე მერიაში,“ – აღნიშნა „ბათუმელებთან“ ნინო ნოზაძემ.

საია-ს იურისტის, თამარ წულუკიძის განმარტებით, სარეკლამო აბრა მხოლოდ უცხო ენაზე სამართალდარღვევაა და ამაზე რეაგირებას ბათუმის მუნიციპალური ინსპექცია უნდა ახდენდეს.

„თუ დადასტურდება სამართალდარღვევა,  კომპანია უნდა დაჯარიმდეს სანებართვო პირობების დარღვევის გამო 300 ლარით,“ – ამბობს იურისტი თამარ წულუკიძე.

შენიშვნა: ბათუმის მუნიციპალური ინსპექციის მონაცემებით, უცხოენოვანი აბრები ბათუმის პარკის შესასვლელთან დღეს, 5 აგვისტოს ჩამოხსნეს.

დღეს, 12 აგვისტოს კი, „ბათუმელებს“ კომპანია „სინევოდან“ დაგვიკავშირდნენ და გვითხრეს, რომ ყველა უცხოენოვანი ბანერი გამოცვალეს და სარეკლამო ინფორმაცია ქართულ ენაზეც ექნებათ.

ჩინეთის არმია ტაივანის სრუტეში ექვს ლოკაციაზე ატარებს უპრეცედენტო საზღვაო და საჰაერო სამხედრო წვრთნებს საცეცხლე სისტემებიდან სროლით. ჩინეთმა ტაივანის მიმართულებით არაერთი რაკეტა გაუშვა.

ტაივანის თვითმმართველი კუნძულის თავდაცვის მინისტრმა, 4 აგვისტოს განაცხადა, რომ ტაივანმა გააქტიურა საფრენი აპარატები, რათა მისი თავდაცვის ზონაში, ტაივანის სრუტის მედიანურ ხაზს [ტაივანისა და ჩინეთის თავდაცვის ზონებს შორის არეალი] მიღმა გადმოსული 22 ჩინური საბრძოლო ვერტმფრენი გაეფრთხილებინა, რომ უკან დაეხიათ.

ასევე, ტაივანის თავდაცვის მინისტრის თქმით, მათმა სამხედროებმა ცეცხლი გახსნეს ოთხი მფრინავი აპარატის, სავარაუდოდ, დრონებს მოსაგერიებლად, რომლებიც ტაივანის კუნძულების თავზე დაფრინავდა.

თვითმმართველმა კუნძულმა განაცხადა, რომ „ემზადება ომისთვის, თუმცა არ სურს ის“. ტაივანის პრეზიდენტმა ცაი ინ-ვენმა მოქალაქეებს მიმართა და განაცხადა, რომ ტაივანი არ მოახდენს კონფლიქტების პროვოცირებას, მაგრამ მტკიცედ დაიცავს თავის სუვერენიტეტსა და ეროვნულ უსაფრთხოებას.

„ჩვენ ვართ მშვიდი და არა იმპულსური, ჩვენ ვართ რაციონალური და არა პროვოკაციული, მაგრამ ჩვენ ასევე ვიქნებით მტკიცე და თავს არ ავარიდებთ“, – განაცხადა ცაი ინ-ვენმა.

იაპონიამ განაცხადა, რომ წვრთნების შედეგად მისი ექსკლუზიური სავაჭრო ზონის წყლებში 5 რაკეტა დააფიქსირა, რის გამოც შეშფოთება გამოხატა.

ჩინეთის არმიამ ტაივანის წყლებში საბრძოლო რაკეტების გასროლა დაადასტურა, როგორც დაგეგმილი საბრძოლო წვრთნების ნაწილი. როგორც ჩინეთის სახელმწიფო მედია CCTV იუწყება, ჩინეთმა გააქტიურა ასზე მეტი თვითმფრინავი, მათ შორის საბრძოლო ვერტმფრენები, ბომბდამშენები და ათი საბრძოლო ხომალდი.

ჩინეთის საბრძოლო წვრთნები, რომელიც ტაივანმა უკვე გამოაცხადა ბლოკადის ტოლფასად, ამერიკის შეერთებული შტატების წარმომადგენელთა პალატის სპიკერის, ნენსი პელოსის ვიზიტს მოჰყვა. ამ ვიზიტს ჩინეთი თავიდანვე ეწინააღმდეგებოდა და მისი სუვერენიტეტის ხელყოფად აფასებდა. პელოსი ტაივანს 2 აგვისტოს ღამით ეწვია და 3 აგვისტოს დატოვა.

4 აგვისტოს, „დიდი შვიდიანის“ წევრმა სახელმწიფოებმა და ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში განცხადება გაავრცელეს. მათ შეშფოთება გამოხატეს „ჩინეთის მუქარის შემცველ ქმედებებზე“ და წვრთნებს რეგიონში უსაფრთხოებისთვის „არასაჭირო რისკის შემცველი“ უწოდეს.

განცხადებაში აღნიშნულია, რომ აშშ-ის საკანონმდებლო ორგანოს წარმომადგენელთა ვიზიტი ჩვეულებრივი მოვლენაა, რომელსაც საგარეო პოლიტიკაზე გავლენა არ აქვს და „ერთი ჩინეთის პოლიტიკა“ კვლავაც უცვლელი რჩება.

ამ განცხადებას ჩინეთმა „სამარცხვინო“ და „თეთრისთვის შავის დარქმევა“ უწოდა.

„ტაივანის სრუტის გარშემო არსებული დაძაბულობის ფუნდამენტური მიზეზი არის აშშ-ი, რომელმაც ყურადღება არ მიაქცია ჩინეთის მკაცრ წინააღმდეგობასა და ოფიციალურ წარმომადგენლობას, ხელი შეუწყო შეერთებული შტატების მთავრობის ნომერ მესამე ოფიციალურ პირს ჩინეთის ტაივანის რეგიონში ჩასულიყო აშშ-ის სამხედრო თვითმფრინავით.

ეს არის ყველაზე მნიშვნელოვანი მოვლენა აშშ-ისა და ტაივანს შორის დამოუკიდებელი ურთიერთობების აღმასვლაში, რაც ერთი ჩინეთის პრინციპის, ისევე როგორც ჩინეთის სუვერენიტეტისა და ტერიტორიული მთლიანობის სერიოზული უგულებელყოფაა“, – განაცხადა ჩინეთის საგარეო საქმეთა სამინისტროს პრესსპიკერმა, 4 აგვისტოს.

შეერთებული შტატების ეროვნული უშიშროების საბჭოს სტრატეგიული კომუნიკაციების კოორდინატორმა, ჯონ კირბიმ 4 აგვისტოს, NBC-სთან ინტერვიუში განაცხადა, რომ აშშ „ძალიან, ძალიან ახლოს აკვირდება“ ჩინეთის სამხედრო წვრთნებს იაპონიის სიახლოვეს.

„ჩვენ ამას ძალიან ყურადღებით ვადევნებთ თვალს… ეს შემაშფოთებელია. ეს შემაშფოთებელია არა მხოლოდ ჩვენთვის, არამედ, რა თქმა უნდა, ტაივანის ხალხისთვის. ეს შემაშფოთებელია ჩვენი მოკავშირეებისთვის რეგიონში, განსაკუთრებით იაპონიისთვის“, განაცხადა კირბიმ შეკითხვის პასუხად – იყო თუ არა პროვოკაცია პელოსის ვიზიტი ტაივანში. კირბის თქმით, „პროვოკაციულად თავად ჩინეთი იქცევა“.

„აქ პროვოკატორი პეკინია. მათ არ უნდა ჰქონოდათ ასეთი რეაქცია იმაზე, რაც კონგრესის წევრების ტაივანში სრულიად ნორმალური მგზავრობაა… ჩინელები არიან ისინი, ვინც ამას ამწვავებენ“.

კირბიმ ასევე ხაზი გაუსვა წვრთნების გაანგარიშების რისკს და თქვა: „ერთ-ერთი პრობლემა, რაც მსგავს წვრთნებს ან რაკეტების გაშვებას ახლავს, არის გაანგარიშების რისკი, შეცდომის რისკი, რომელმაც რეალურად შეიძლება გამოიწვიოს რაიმე სახის კონფლიქტი“.

ჩინეთის ოფიციალური განცხადების მიხედვით, სამხედრო წვრთნები 7 აგვისტოს შუადღემდე გაგრძელდება.

_____________

ტაივანის თვითმმართველ კუნძულს ჩინეთი საკუთარ ტერიტორიად მიიჩნევს და მშვიდობიანი გზით მის „სამშობლოსთან დაბრუნებას ისტორიულ მიზნად“ ასახელებს, თუმცა არც ძალისმიერ მეთოდებს გამორიცხავს, აუცილებლობის შემთხვევაში.

თავის მხრივ, ტაივანი თავს ჩინეთის რესპუბლიკად, დამოუკიდებელ სახელმწიფოდ აცხადებს. გაერო ჩინეთის რესპუბლიკას არ აღიარებს სუვერენულ სახელმწიფოდ. ტაივანის დამოუკიდებლობას მხოლოდ რამდენიმე ქვეყანა აღიარებს, მათ შორის არ არის აშშ, დანარჩენი მსოფლიო კი „ერთი ჩინეთის პოლიტიკის“ ხელმომწერია.

მას შემდეგ რაც 1949 წელს კომუნისტურმა პარტიამ გაიმარჯვა, ჩინეთის მთავრობა და ნაციონალისტური პარტია, მომხრეებთან ერთად, ტაივანში გაიქცა, სადაც ჩინეთის რესპუბლიკა გამოაცხადა. ტაივანს [ჩინეთის რესპუბლიკას] ჰყავს დემოკრატიულად არჩეული მთავრობა, აქვს  კონსტიტუცია და წარმატებული სავაჭრო ურთიერთობები. იგი არასდროს ყოფილა ჩინეთის კომუნისტური პარტიის მმართველობის ქვეშ.

თავის მხრივ ჩინეთის სახალხო რესპუბლიკა კომუნისტური პარტიის მეთაურობით, თავის ისტორიულ მიზნად მიიჩნევს, ტაივანის დაბრუნებას, მათ შორის აუცილებლობის შემთხვევაში ძალისმიერი მეთოდებით.

_____________

ამავე თემაზე: