დიდი ბრიტანეთის დაზვერვის დღევანდელი რელიზის თემა უკრაინასთან ბრძოლაში დაკარგული რუსული სამხედრო ტექნიკაა.
უწყების ცნობით, სრულმასშტაბიანი ომის დაწყებიდან დღემდე უკრაინელებმა, სავარაუდოდ, სულ მცირე 440 რუსული საბრძოლო ტანკი და დაახლოებით 650 სხვა ჯავშანმანქანა მოიპოვეს და ახლა უკრაინის სატანკო პარკის ნახევარზე მეტს სწორედ ნადავლი ტექნიკა წარმოადგენს.
„რუსული ეკიპაჟების უუნარობა, უკან დახევამდე ან ტყვედ ჩაბარებამდე გაენადგურებინათ დაუზიანებელი ტექნიკა მათ ცუდ მომზადებასა და სამხედრო დისციპლინის დაბალ დონეზე მიუთითებს,“ – აღნიშნავს დაზვერვა.
უწყების შეფასებით, რუსეთი მომავალშიც დაკარგავს მძიმე საბრძოლო ტექნიკას უკრაინაში, რადგან მისი ფორმირებები ბევრ მონაკვეთზე მუდმივ დაძაბულობაში იმყოფებიან.
ბრძოლაში მოპოვებული რუსული სამხედრო ტექნიკის შესახებ ინფორმაცია ერთი კვირის წინ გამოაქვეყნა Forbes-მა. გამოცემის ინფორმაციით, სრულმასშტაბიანი ომის დაწყებიდან სექტემბრის ბოლომდე, უკრაინამ, მხოლოდ დოკუმენტურად დადასტურებული მონაცემებით, ნადავლის სახით, რუსეთისგან „მიიღო“ დაახლოებით 400 ტანკი, 700 ერთეული ჯავშანტექნიკა და 170 საარტილერიო სისტემა. ეს გაცილებით მეტია, ვიდრე პარტნიორი ქვეყნებისგან მიწოდებული დახმარება.
ამავე გამოცემის გათვლებით, ხარკოვის ოლქში უკრაინელთა კონტრშეტევის პირველ კვირაში, 6-11 სექტემბრის პერიოდში, რუსეთმა 670 მილიონი დოლარის ტექნიკა დაკარგა.
