ხულოს სოფელ ღორჯომში მცხოვრები მზევინარ ირემაძე კვირას, 9 ოქტომბერს, სამკერვალოს გახსნის დაბა ხულოში, რომელსაც „მზევინარის ატელიე“ ერქმევა. სწორედ ასე ჰქვია მზევინარის პირველ სამკერვალოსაც, რომელიც სამი წლის წინ სოფელში გახნა.
ხულოს სამკერვალოში მზევინარმა აჭარული ორნამენტებით ნაქსოვი და ნაქარგი ნივთების მცირე გამოსაფენი კუთხეც მოაწყო, რომლის ნახვაც, მისი თქმით, ყველა მსურველს შეეძლება. მზევინარი ამ ფორმით შეეცდება მეტ ადამიანს გააცნოს აჭარული ხელნაკეთი ნივთები. მისი თქმით, დაბა ხულოში ასული ბევრი ტურისტი არ მიდის სოფლებში, შესაბამისად ვერსად ხედავენ ნაქსოვ და ნაქარგ ნივთებს, რის შექმნასაც ადგილობრივი ქალები დიდ დროსა და ენერგიას ანდომებენ.
მზევინარი აჭარული რეწვის ოსტატია. ძალიან პატარა იყო, როცა ქარგვა და კერვა ბებიისგან ისწავლა. გვიყვება, რომ სამკერვალოს გახსნა მუნიციპალიტეტის ცენტრში მომხმარებლის რჩევით გადაწყვიტა და აქამდე საკერავი მანქანების, ქსოვილისა და სამკერვალოსთვის საჭირო სხვა ინვენტარის შესაძენად ფულს აგროვებდა.
„ბევრი ადამიანი იყო, ვინც ჩემთან, ღორჯომში, ამა თუ იმ ტანისამოსის შესაკერად ხულოდან ამოდიოდა. საბოლოოდ, ამიტომ გადავწყვიტე ატელიეს გახსნა ხულოში, რათა მომხმარებელს ადგილზე მოვემსახუროთ“.
მზევინარის თქმით, ხულოს ატელიეში ის დიდი დროის გატარებას ვერ შეძლებს, რადგან 10 წელია ეტლით მოსარგებლეა, რის გამოც ხულოში ყოველდღე ჩასვლას ვერ შეძლებს – გადაადგილებაში ერთი ადამიანის დახმარება მაინც სჭირდება. ზამთარში კი, დიდი თოვლი ხულოს ეტლით მოსარგებლეებს დამატებით სირთულეებს უჩენს.
ამ ეტაპზე მზევინარი ხულოს სამკერვალოში 3 ადამიანს დაასაქმებს. ამდენივე მუშაობს მზევინარის სოფლის სამკერვალოშიც.
„პირველ რიგში, დიდი მოლოდინი მაქვს, რომ ხალხი ხულოში ჩემი სამკერვალოთი კმაყოფილი იქნება. მოთხოვნის შესაბამისად გავზრდით თანამშრომლების რაოდენობას. რაც მეტი ადამიანის დასაქმებას შევძლებ, მით უფრო გახარებული ვიქნები“, – გვითხრა მზევინარმა.
მზევინარი გვიყვება, რომ სოფელში ატელიეს გახსნაზე დიდხანს ოცნებობდა და არასდროს დაუკარგავს იმედი, რომ ამის გაკეთება ნამდვილად შეეძლო: კიდევ ბევრი ოცნება მაქვს და მჯერა, ავიხდენ. ხელსაქმე ყველა სირთულის გადალახვასა და ოცნებების ასრულებაში მეხმარებაო.
როგორც მზევინარი ამბობს, ხულოს სამკერვალოში ძირითადად თანამედროვე ტანსაცმლის შეკერვაზე აიღებენ შეკვეთებს.
მზევინარის სამომავლო გეგმაა საკუთარი მაღაზია გახსნას ბათუმში, სადაც აჭარული ნაქსოვ-ნაქარგ ნივთებს გაყიდის.
მზევინარის სამკერვალო ხულოში
მზევინარის სამკერვალო ხულოში
ფოტო მოგვაწოდა მზევინარ ირემაძემ
