Batumelebi

ზესტაფონის ფეროშენადნობი ქარხანა და ჭიათურის მაღარო ხვალიდან, პირველი ნოემბრიდან მუშაობას წყვეტენ. ათასობით დასაქმებული დროებით უმუშევარი რჩება.

„ჯორჯიან მანგანეზი“, რომელიც ორივე საწარმოში 100 %-იანი წილის მფლობელია, კომენტარს არ აკეთებს.

როგორც „ბათუმელებმა“ გაარკვია, გუშინ, 30 ოქტომბერს, შპს „მაღაროელის“ თანამშრომლებს შეხვდა კომპანიის წარმომადგენელი და განუცხადა, რომ კომპანია 5 თვით, 2025 წლის აპრილამდე აჩერებს მუშაობას. დასაქმებულებს საშუალება ექნებათ ხელფასის 60% მიიღონ.

„ერთი კვირაა ჭორებია, მაგრამ მხოლოდ გუშინ დადასტურდა, რომ აპრილამდე მაღარო მუშაობას წყვეტს.

გუშინ, 30 ოქტომბერს, გამოგვიცხადეს ოფიციალურად. თემურ ხონელია შეგვხვდა დასაქმებულებს, გარკვეული მიზეზები დაასახელა, კრიზისშია კომპანია, რესტრუქტურიზაცია უნდა გავაკეთოთ და აპრილამდე უნდა გავჩერდეთო.

გვთავაზობენ ხელფასის 60%-ს გაჩერების პირობებში. მსგავსი გაჩერება იყო 2023 წლის თებერვალშიც, მაშინაც ხელფასის 60%-იანი გადახდით, მაგრამ მაშინ ბანკის სესხი ვისაც ჰქონდა, ყველას  გაუჩერეს სესხები. ახლა ბანკებთან დაკავშირებით აღარაფერს ამბობენ,“ – უთხრა „ბათუმელებს“ შპს „მაღაროელის“ თანამშრომელმა ტარიელ მიქაცაძემ.

შპს „მაღაროელის“ საწარმოში 100 %-იანი წილის მფლობელი „ჯორჯიან მანგანეზია“. კომპანია ამ დრომდე ოფიციალურ განმარტებას არ აკეთებს, რის გამო გააჩერა მუშაობა.

რაც შეეხება დასაქმებულებს, ტარიელ მიქაცაძე ამბობს,  რომ მათ კომპანიის მიმართ მთელი რიგი მოთხოვნები აქვთ.

„როგორც ვიცით, საწარმოების გაჩერება სახელმწიფოსთან შეთანხმებით მოხდა. ამიტომ უნდა ვთხოვოთ კომპანიას სახელმწიფოსთან ერთად, ან 100%-იანი ანაზღაურება შეგვინარჩუნოს, ან ალტერნატიული სამუშაოები მოგვცენ რამე, ან ბანკების სესხები გაგვიყინონ ამ ხელფასის 60%-თან ერთად,“ – ამბობს ტარიელ მიქაცაძე.

„ბათუმელების“ ინფორმაციით, პირველი ნოემბრიდან სრულად ჩერდება ზესტაფონის ფეროშენადნობი ქარხნის ყველა ღუმელი.

„ასეთი შემთხვევა არ გვახსოვს აქამდე, ყველა ღუმელი ერთიანად გაჩერებულიყოს. გვითხრეს, ელექტროენერგია არ ჰყოფნის საწარმოს და იმიტომ ვაჩერებთ მუშაობასო,“ – უთხრა „ბათუმელებს“ ფეროში დასაქმებულმა ერთ-ერთმა მუშამ.

კომპანიის ოფიციალურ ვებგვერდზე გამოქვეყნებული ინფორმაციის თანახმად,  „ჯორჯიან მანგანეზი“ საქართველოში უმსხვილესი სამთო-მომპოვებელი და ფეროშენადნობების მწარმოებელი კომპანიაა, რომელიც 2006 წლიდან ოპერირებს და მას შემდეგ ქვეყნის ერთ-ერთი უმსხვილესი დამსაქმებელია.

„ჯორჯიან მანგანეზი“ 6 ათასამდე თანამშრომელს და რამდენიმე ძირითად ობიექტს აერთიანებს.  უცნობია ზუსტად რამდენ ადამიანს ეხება რეორგანიზაცია, რადგან კომპანია განმარტებას არ აკეთებს.

კომპანიის შემადგენლობაში შედის ჭიათურის სამთო-გამამდიდრებელი კომპლექსი, სადაც მანგანუმის მადნის მოპოვება ხდება; ზესტაფონის ფეროშენადნობივვ ქარხანა, რომელიც კომპანიის საბოლოო პროდუქტს – სილიკომანგანუმს აწარმოებს და „ვარციხეჰესი“, სრულად განახლებად ენერგიაზე მომუშავე ჰიდროელექტროსადგური, რომლის მიერ გამომუშავებული ენერგიაც უზრუნველყოფს მოპოვება-წარმოების პროცესს.

არაერთგზის მცდელობის მიუხედავად  „ბათუმელებმა“„ჯორჯიან მანგანეზთან“ დაკავშირება ვერ მოახერხა. კომპანიიდან პასუხის მიღების შემთხვევაში მასალა განახლდება.

• განახლებული ინფორმაცია: 

„ბათუმელების“ სტატიის გამოქვეყნების შემდეგ ფეისბუქზე განცხადება გაავრცელა Chiatura Management Company-მ. კომპანია წერს, რომ ჭიათურაში საწარმოო პროცესი სრულად გაჩერდა „სოფელ შუქრუთის მოსახლეობის რადიკალური პროტესტის შედეგად წარმოშობილი ფინანსური კრიზისის გამო“.

„აღნიშნულ პირობებში, თანამშრომლებს ხელფასის 60 %-ის ანაზღაურებასა და მოქმედი სადაზღვევო საოჯახო პაკეტის შენარჩუნებას ვთავაზობთ.

ჩვენმა მენეჯმენტმა, საწარმოების ხელმძღვანელებთან ერთად, რვა თვიანი კრიზისის შედეგები შეაფასა. შეხვედრაზე აღინიშნა, რომ მიმდინარე წლის მარტის თვიდან კომპანიას შუქრუთის მოსახლეობის პროტესტის გამო იძულებით მოუწია წარმოების 70%-ის შეჩერება, რასაც დაემატა მსოფლიო ბაზარზე მადანზე ფასის კლების ტენდენცია და ამასთან დამატებით მოძიებული დაფინანსების საშუალებების ამოწურვა.

აღსანიშნავია, რომ ამ მძიმე პირობებში, როდესაც საწარმოების დიდი ნაწილი გაჩერებული იყო კომპანია თანამშრომლებს სრულად უხდიდა ხელფასის 100%-ს.

შიდა და გარე ფაქტორებმა, ჭიათურის საწარმოებში მძიმე ფინანსური კრიზისი შექმნა, რის გამოც კომპანიას იძულებით მოუწია სპეციალური რეჟიმის ამოქმედება.

მომდევნო ოთხი თვის განმავლობაში, კომპანია ეცდება შეიმუშაოს და კანონით გათვალისწინებულ ყველა მხარესთან შეათანხმოს კრიზისის დაძლევის გეგმა. გეგმის შემუშავება და შემდეგ მისი აღსრულება საჭიროა იმისათვის, რომ საწარმოების ფინანსური მდგომარეობა გაუმჯობესდეს, მადნის მოპოვება რენტაბელური გახდეს და ადგილი აღარ ჰქონდეს სამუშაო პროცესის პერმანენტულ, უკანონო შეჩერებებს“ – ნათქვამია კომპანიის განცხადებაში.

ცენტრალური საარჩევნო კომისიის [ცესკო] ვებგვერდზე ატვირთული საჩივრები მძაფრსიუჟეტიანი ტრილერებივით იკითხება, ხან კომედიაც გვხვდება, უფრო ტრაგიკომედია. დამკვირვებლებმა საჩივრებში დეტალურად აღწერეს, რა ხდებოდა 26 ოქტომბერს საარჩევნო უბნებზე, ეს ყველაფერი ფოტო/ვიდეომასალით დაასურათეს კიდეც.

დარღვევები, რომლებზეც ამ სტატიაშია საუბარი, ქუთაისში დაფიქსირდა. 

• უბანი #10 – კაბინაში ორი თანმხლები პირით

დამკვირვებელი წერს: „ქუთაისში, #10 საარჩევნო უბანზე გამოცხადებულ ერთ ამომრჩეველს, რომელსაც აღენიშნებოდა დაზიანებები სახის არეში, თან მოჰყვა ორი მოქალაქე, რომლებსაც არ ჩაუტარდათ მარკირების შემოწმება, გარდა ამისა, კომისიამ არ შეამოწმა, ჰქონდათ თუ არა უფლება თანმხლებ პირებს საარჩევნო უბანზე ყოფნის, წარმოადგენდნენ თუ არა იმავე უბნის ამომრჩევლებს. დამკვირვებლის ინფორმაციით, ისინი შეჰყვნენ ამომრჩეველს ხმის მიცემის კაბინაში და მონაწილეობდნენ ხმის მიცემის პროცესში“ .

პროცესი დამკვირვებელმა ანა გაბელაშვილმა გადაიღო და საჩივარს თან დაურთო ვიდეო მტკიცებულების სახით.

ამ საჩივრით კომისიას „საერთაშორისო-გამჭვირვალობა საქართველომ“ მიმართა.

• წინასწარ გაფერადებული ბიულეტენი

კიდევ ერთი საჩივრის მიხედვით ქუთაისის #10-ე უბანზე ამომრჩეველს რეგისტრატორმა გადასცა წინასწარ გაფერადებული ბიულეტენი. დამკვირვებლის ინფორმაციით, ამ უბანთან ფულსაც არიგებდნენ:

„საარჩევნო უბნის გვერდით, ახლო მანძილზე დამკვირვებელმა დააფიქსირა ამომრჩეველთა აღრიცხვის არაერთი შემთხვევა. აღრიცხვა მიმდინარეობდა, როგორც უბანთან, ასევე იქვე გაჩერებული ავტომანქანიდან, საიდანაც ხდებოდა ამომრჩევლისთვის ფულის დარიგება“ – ვკითხულობთ საჩივარში.

• „მონაცემები არ დაემთხვა, ხმა მიაცემინეს“

დამკვირვებელი ქუთაისის #11 უბნიდან წერს:

„#11 უბანზე 08:45 წუთზე მივიდა ამომრჩეველი, რომლის მონაცემებიც არ ემთხვეოდა აპარატში არსებულ მონაცემებს, თუმცა კომისიის თავმჯდომარემ მას მისცა ხმის მიცემის უფლება“.

დამკვირვებელი ასევე წერს, რომ ამავე უბნის წინ მოქალაქე თამარ წვერავა აღრიცხავდა ამომრჩეველს, ის დამკვირვებელს ეუბნებოდა, რომ ელოდებოდა ავტობუსს, ამის პარალელურად კი განიხილავდა ვისთან რამდენი იყო მისატანი.

კიდევ ერთმა დამკვირვებელმა, ანა ციხელაშვილმა ფულის გადაცემის ფაქტები დააფიქსირა ქუთაისის #9 უბანთანაც. მისი ინფორმაციით, საარჩევნო უბანთან დილის 07:00 საათიდან იდგა თეთრი მიკროავტობუსი და ერთი მსუბუქი მანქანა, სადაც მსხდომი პირები აღრიცხავდნენ ამომრჩეველს და გადასცემდნენ მათ ფულს. დამკვირვებელმა ადგილზე პოლიცია გამოიძახა.

სხვა დამკვირვებელი წერს, რომ ქუთაისის #12 უბანზე ადგილი ჰქონდა აგიტაციას, კერძოდ, „ქართული ოცნების“ დამკვირვებელმა ნინო მარგველაშვილმა არაერთხელ მოუწოდა ამომრჩეველს ხმა „ქართული ოცნებისთვის“ მიეცა. დამკვირვებლის ინფორმაციით, ის მთელი დღის განმავლობაში საკუთარ მობილურში აღრიცხავდა ამომრჩეველს.

დამკვირვებლები წერენ, რომ ქუთაისის #18 უბანზე დაირღვა ფარულობა, დამკვირვებლებს არ აძლევდნენ პროცესზე სრულფასოვნად დაკვირვების საშუალებას, გადასატანი ყუთი დალუქვის გარეშე დააბრუნეს უბანზე, ერთ-ერთი ორგანიზაცია ამომრჩევლის გამოკითხვას აწარმოებდა უბნის შენობაში.

ასევე, #22-ე უბანზე რეგისტრატორები ისე იყვნენ ერთმანეთთან მიჯრით განთავსებული, რომ შეუძლებელი იყო ვერიფიკაციის პროცესის დაკვირვება.

• ფოტოსურათებიანი სიებით უბნის გვერდით

დამკვირვებელი წერს, რომ საარჩევნო უბნის გვერდით იმყოფებოდნენ პირები ფოტოსურათებიანი სიებით, უბანზე ახორციელებდნენ აგიტაციას, კერძოდ „ერთ-ერთმა პირმა დაიყვირა „ოცნების“ ნომერი და მიუთითა, ვისთვის უნდა მიეცათ ხმა“.

• ვერიფიკაციის აპარატმა არ აჩვენა – ხმა მიაცემინეს

24-ე უბანზე დამკვირვებელი წერს, რომ ამომრჩეველი ვერიფიკაციის აპარატმა არ აჩვენა, ის გაუშვეს, შემდეგ კი დაუძახეს და უთხრეს, რომ მისი ვინაობა დადასტურდა და ხმა მიაცემინეს.

• ამომრჩეველი – „ხმას თუ ვერ მივცემ, დამიჭერენ“

დამკვირვებლის ინფორმაციით, ქუთაისის #24-ე უბანზე მივიდა ამომრჩეველი, რომელიც ამ უბანზე არ იყო რეგისტრირებული. ის აცხადებდა, რომ დაიჭერდნენ, თუ ხმას ვერ მისცემდა.

ხოლო 25-ე უბანზე დააფიქსირეს აპარატების გაუმართავი მუშაობის შესახებ. კერძოდ ამოიბეჭდა სია, რომელიც არ იკითხებოდა. რეგისტრატორმა კი რამდენიმეჯერ ამომრჩევლის რეგისტრაციის შემდეგ არ ამობეჭდა ქვითარი.

• დამკვირვებელმა გააფერადებინა თავისი სასურველი ნომერი

„გამჭვირვალობა-საქართველოს“ დამკვირვებელი წერს, რომ ქუთაისის ოლქის 28-ე უბანზე ერთ-ერთი დამკვირვებელი, მარინა ამაშუკელი, რომელიც უბანზე ააიპ „სოციალურ გარემოს“ წარმოადგენდა, ამომრჩეველს შეჰყვა კაბინაში და მონაწილეობა მიიღო ბიულეტენის გაფერადებაში.

დამკვირვებლის ინფორმაციით, ამაშუკელმა ამომრჩეველს სთხოვა მისთვის სასურველი ნომერი გაეფერადებინა და დაეხმარა კიდეც გაფერადებაში.

დამკვირვებლები თითქმის ყველა უბანზე წერენ ფარულობის დარღვევაზე.

• არაუფლებამოსილი პირები უბნებზე

დამკვირვებელი წერს, რომ ქუთაისის 49-ე უბანზე იყვნენ არაუფლებამოსილი პირები, ამასთან, საუბნო-საარჩევნო კომისიის წევრები და დამკვირვებლები ენაცვლებოდნენ რეგისტრატორებს, შესაბამისად რეგისტრაციას ახორციელებდნენ პირები, რომლებსაც შესაბამისი უფლებამოსილება არ გააჩნდათ.

საჩივრებში წერენ ასევე დამკვირვებლების შეზღუდვაზე, როგორც კომისიის თავმჯდომარეების, ასევე კომისიების წევრების მხრიდან. მათ ვერიფიკაციის პროცესის დაკვირვების საშუალებასაც არ აძლევდნენ.

ეს მხოლოდ ნაწილია იმ დარღვევებისა, რაზეც დამკვირვებლებმა ქუთაისის საუბნო საუბნო-საარჩევნო კომისიებში საჩივრები დაწერეს.

სადამკვირვებლო ორგანიზაციები აცხადებენ, რომ ქუთაისის #59 ოლქში სხვადასხვა უბანზე დაფიქსირებული საჩივრები შესაძლოა ამ უბნების ბათილობის საფუძველი გახდეს. ასევე წერენ, რომ ამ დამკვირვებლებს მტრულ და ძალადობრივ გარემოში მოუწიათ მუშაობა.

_____________

ფოტოზე: არჩევნები ქუთაისში. ფოტო: „ბათუმელები“/მანანა ქველიაშვილი

დღეს, 30 ოქტომბერს, საქართველოს პრეზიდენტმა სალომე ზურაბიშვილმა პრესკონფერენცია გამართა. მან 26 ოქტომბერს ჩატარებულ არჩევნებზე დამკვირვებლების მიერ დაფიქსირებული დარღვევების ფაქტები აჩვენა ჟურნალისტებს.

„ეს არის ის კადრები, რომლებსაც  არც ახსნა სჭირდება, არც განმარტება. პირდაპირ იკითხება, თუ რა ხდებოდა და როგორ ჩატარდა 26 ოქტომბრის არჩევნები.

თურმე პროკურატურა ჩემგან ელოდება მტკიცებულებებს, მე ვიცოდი, რომ  პირიქით იყო. საგამოძიებო ორგანოს თვითონ უნდა მოეპოვებინა მტკიცებულებები. ნებისმიერ ნორმალურ ქვეყანაში ასე ხდება.

არ გამიგია, რომ პრეზიდენტს მოსთხოვოს საგამოძიებო ორგანომ მტკიცებულებები. აქ რომ მოვდიოდი, მოვისმინე ჟოზეფ ბორელისგან (დარღვევებზე), მე მგონი მასაც უნდა ჰკითხოს პროკურატურამ, რადგან როგორც ჩანს, ძალიან ბევრი მტკიცებულება გააჩნია მასაც.

პროკურატურა კიდეც უფრო უცნაურია, რადგან ცესკოს წუხილის საფუძველზე სთხოვს პრეზიდენტს მტკიცებულებებს. თურმე ცესკო შეურაცხყოფილია, რადგან მისი დისკრედიტაცია მიმდინარეობს. დისკრედიტაცია რატომ არის არ ვიცი, რადგან ეს არის ფაქტები და სწორედ მოქალაქეები არიან ჩართული ამ მტკიცებულებების მოგროვებაში. ასევე, სადამკვირვებლო მისიები, არასამთავრობოები და უზარმაზარი მასალა არსებობს უკვე.

ცესკოს დისკრედიტაცია შეიძლება მოჰყვეს იმ ფაქტების დადასტურებას, იმ სისტემური დარღვევების და გაყალბების დადასტურებას, რომლის გამოძიება ევალება პროკურატურას ან საერთაშორისო გამოძიებას“-განაცხადა სალომე ზურაბიშვილმა.

მისი თქმით, ხალხისა და დამკვირვებლების მიერ შეგროვებულ მასალას, როგორც ჩანს,  არც ეცნობა პროკურატურა. ის ამტკიცებს, რომ 26 ოქტომბერს ადგილი ჰქონდა მასშტაბურ და მრავალფეროვან გაყალბებას.

„ამომრჩევლის მოსყიდვა, დაშინება, ძალადობა, პირადობის მოწმობის ჩამორთმევა, გადამრავლება, კარუსელის დატრიალება და ყველაზე მნიშვნელოვანი,  რაც ახლახან საიამ აღმოაჩინა, ეს არის ხმის ფარულობის მასობრივი დარღვევა ელექტრონული სისტემის და იმ ფარატინა ფურცლების გამო.

ამაზე საიას არჩევნებადე ჰქონდა შეტანილი ცესკოში განცხადება და ცესკოს უნდა შეეცვალა ეს ფურცლები, მაგრამ არ გააკეთა.“- ამბობს ზურაბიშვილი.

ის ასევე შეეხო ემიგრანტების საკითხსაც და განაცხადა, რომ უცხოეთში მცხოვრებ საქართველოს მოქალაქეებს ფაქტობრივად წაართვეს ხმის უფლება, ამ დროს კი მილიონზე მეტი ამომრჩეველი გვყავს ემიგრაციაში.

„თქვენგან ითხოვს ხალხი მყისიერ გამოძიებას და არა ჩემგან მტკიცებულებებს და არავინ ელოდება, რომ ამ სიტუაციაში პროკურატურამ პრეზიდენტის მიმართ უნდა დაიწყოს პოლიტიკური პროცესები, რომელიც უცნაურად ემთხვევა მედვედევის გაცემულ მითითებებს.

ცესკოში ამ დროისთვის შეტანილია 1100-ზე მეტი საჩივარი და საჩივრები, რომლებიც 400 ათასამდე ხმის გაბათილებას შეეხება. ასევე, 2 263 უბნის შედეგების ბათილად ცნობის მოთხოვნაც არის, ამიტომ პროკურატურას ვურჩევ, რომ შეუდგეს თავის საქმეს და პრეზიდენტთან პოლიტიკურ ანგარიშსწორებას შეეშვას. პრეზიდენტი კი თავის საქმეს მიხედავს.

ამავე დროს მიდის ფსიქოლოგიური ზეწოლა საზოგადოებაზე, რომ არჩევნების შედეგების შედეგად გაჩენილ ფლუსტრაციას დაემატოს რაღაც დაძაბულობა, შიშები თუნდაც ჩემი მისამართით, რადგან ბევრი გზავნილი მივიღე – „ნუ გეშინიათ“. არ მეშინია და თქვენც ნუ გეშინიათ. ყველაფერი კარგად იქნება, წყნარად. უნდა დადგეს ამ არჩევნების რეალური შედეგები“-განაცხადა სალომე ზურაბიშვილმა.

„29 სექტემბერს ვსეირნობდი ბულვარის ტერიტორიაზე, რა დროსაც მომესმა მუსიკის ხმა ერას მოედნიდან. ვიფიქრე იმართებოდა ტურიზმის ფესტივალთან დაკავშირებული კონცერტი… გადავწყვიტე ერას მოედანზე შესვლა, სადაც აღმოვაჩინე, რომ იმართებოდა ერთ-ერთი საარჩევნო სუბიექტის მხარდასაჭერი კონცერტი.

აღნიშნულიდან გამომდინარე მყისიერად გავეცალე სცენასა და მიმდებარე ტერიტორიას მემედ აბაშიძის გამზირისკენ“, – წერს ბათუმის საოლქო-საარჩევნო კომისიის თავმჯდომარეს, ამავე ოლქის N25 საუბნო კომისიის თავმჯდომარე გიორგი ნაკაშიძე 4 ოქტომბრით დათარიღებულ ახსნა-განმარტებაში.

გიორგი ნაკაშიძე ბათუმში, ევროპის მოედანზე „ქართული ოცნების“ მხარდამჭერ კონცერტზე „ოცნების“ დროშით ხელში დააფიქსირეს.

ვინაიდან საარჩევნო კომისიის წევრს წინასაარჩევნო აგიტაციაში მონაწილეობის უფლება ეკრძალება, „ერთიანობა – ნაციონალური მოძრაობის“ წარმომადგენელმა 2 ოქტომბერს საჩივრით მიმართა საოლქო კომისიის თავმჯდომარეს და გიორგი ნაკაშიძის 2000 ლარით დაჯარიმება და უფლებამოსილების შეწყვეტა მოითხოვა.

გიორგი ნაკაშიძე ახსნა-განმარტებაში წერს, რომ მემედ აბაშიძის გამზირზე შეხვდა ახლობელი და ვინაიდან იყო დაღლილი ჩამოჯდა ტროტუართან ქვის ჯებირზე.

„ამ დროს ჩემთან მოვიდა პიროვნება და სწრაფად მომაწოდა ლურჯი ფერის პატარა დროშა, რომელიც მეგონა ევროკავშირის სიმბოლოიანი და მეგობართან საუბარში გართულმა, დაახლოებით 4-5 წუთში დავაკვირდი, რომ დროშა შეიცავდა საარჩევნო სუბიექტის სიმბოლოს.

დამატებით მინდა გაცნობოთ, რომ ჩემი ღრმა რწმენით ზემოთ აღნიშნული ფაქტი იყო წინასწარ გამიზნული პროვოკაცია და დარწმუნებული ვარ, რომ დროშა ხელში შემომაჩეჩა პროვოკაციულად განწყობილმა სუბიექტმა“, – წერს გიორგი ნაკაშიძე.

ამავე ახსნა-განმარტებაში ნაკაშიძე წერს, რომ აცნობიერებს მისი „როგორც საუბნო-საარჩევნო კომისიის ხელმძღვანელი პირის კანონისმიერ და მორალურ ვალდებულებებს. არ დამირღვევია და არც მომავალში დავარღვევ რეგულაციებს“.

N79 ბათუმის საოლქო საარჩევნო კომისიაში, 2024 წლის 10 ოქტომბერს შედგა ადმინისტრაციული სამართალდარღვევის ოქმი და მასალები შემდგომი რეაგირებისთვის ბათუმის საქალაქო სასამართლოში გადაიგზავნა.

სასამართლოს 2024 წლის 24 ოქტომბრის დადგენილებით გიორგი ნაკაშიძე გათავისუფლდა ადმინისტრაციული პასუხისმგებლობისგან „მცირემნიშვნელოვანი სამართალდარღვევის ჩადენის გამო და გამოეცხადოს სიტყვიერი შენიშვნა“:

2024 წლის 26 ოქტომბრის არჩევნებში გიორგი ნაკაშიძე ბათუმის 25-ე საარჩევნო საუბნო კომისიაში ბათუმის ოლქის მიერ იყო არჩეული.

შენიშვნა: სტატიის თავდაპირველ ვერსიაში ეწერა, რომ 26 ოქტომბრის არჩევნებზე ნაკაშიძე 25-ე უბანს თავმჯდომარეობდა, თუმცა, ბათუმის საოლქო კომისიის თავმჯდომარის 31 ოქტომბრის განცხადებით, „გიორგი ნაკაშიძე არ დაელოდა სასამართლოს გადაწყვეტილებას და დაწერა განცხადება უფლებამოსილების ვადამდე შეწყვეტასთან დაკავშირებით, რაც ოლქმა 13 ოქტომბერს დააკმაყოფილა“.

თუმცა, ცესკოს ოფიციალურ ვებგვერდზე გამოქვეყნებული „2024 წლის 26 ოქტომბრის პარლამენტის არჩევნებისთვის საუბნო საარჩევნო კომისიების შემადგენლობის“ მიხედვით ბათუმის საარჩევნო ოლქის 25-ე საუბნო კომისიის თავმჯდომარედ დღესაც [31 ოქტომბერს] გიორგი ნაკაშიძეა მითითებული.

საქართველოში 26 ოქტომბერს ჩატარებული არჩევნების შედეგების ლეგიტიმურობას არ აღიარებს ბარიერგადალახული არცერთი ოპოზიციური პარტია და პრეზიდენტი სალომე ზურაბიშვილი. როგორც პრეზიდენტი აცხადებს, არჩევნები ტოტალურად გაყალბდა.

დღეს, 30 ოქტომბერს, „ნაციონალური მოძრაობის“ ბათუმის ორგანიზაციის ხელმძღვანელმა ლევან ანთაძემ ჟურნალისტებთან განაცხადა, რომ პროკურატურამ მათი პარტიის წარმომადგენლები, რომლებიც არჩევნებს აკვირდებოდნენ, დაკითხვაზე დაიბარა.

მისი თქმით, პროკურატურაში დაბარებულ დამკვირვებლებს საჩივრები დაწერილი აქვთ მოსყიდვისა და ზეწოლის ფაქტებზე.

„პროკურატურამ დაიწყო ჩვენი წარმომადგენლების დაბარება, რომლებიც საარჩევნო დარღვევებზე წერდნენ საჩივრებს და ცდილობდნენ არჩევნების გაყალბებისთვის ხელი შეეშალათ. პროკურატურა ცდილობს, აღნიშნული პირებისგან ამოიღოს სასურველი ჩვენება სამართლებრივი მტკიცებულებების საპირწონედ.

ხელისუფლება აგონიაშია, ელოდება მასიურ პროტესტს და სწორედ ამ პროტესტის ჩახშობას ემსახურება მსგავსი ქმედებები“ – ამბობს ლევან ანთაძე.

მისი თქმით, პარტია არ მიატოვებს თანამებრძოლებს და უზრუნველყოფენ მათ სამართლებრივ დაცვას.

„მივმართავთ საიას და სხვა ორგანიზაციებს, რომ აქტიურად ჩაერთონ ამ პროცესში. ჩვენი დამკვირვებლები იძახებდნენ პატრულს, 112-ში ბევრი ზარი იყო, თუმცა არ ყოფილა რეაგირება მათი მხრიდან.

ჩვენი ინსტრუქცია არის ამ ადამიანების მიმართ, რომ ჩვენება არ მისცენ ივანიშვილის პროკურატურას და მაგისტრ მოსამართლესთან მისცენ ჩვენება.

მთავარი პრინციპია დარღვეული ამ არჩევნებზე – ეს არის ფარულობის პრინციპი. დღეს ვნახეთ, რომ პრეზიდენტის ბიულეტენზეც კი ჩანს, ვის მისცა მან ხმა. ფარულობა არის კონსტიტუციით გარანტირებული უფლება, რომ არ ვილაპარაკოთ ისეთ დარღვევებზე, როგორიც იყო ზეწოლა კრიმინალებისა და პარტიული კოორდინატორების მხრიდან ამომრჩეველზე.

საერთაშორისო ორგანიზაციებმა და ჩვენმა პარტნიორმა ქვეყნებმა მოითხოვეს არჩევნების ტოტალურად გაყალბებასთან დაკავშირებით გამოძიების დაწყება. ხელისუფლების ქმედება ამ საკითხზე კი ჰგავს იმას, როცა დამნაშავე იძიებს თავის მიერ ჩადენილ დანაშაულს.

ივანიშვილს და მის პარტნიორებს მოსკოვში გვინდა ვუთხრათ, რომ ქართველი ერის ნება ურყევია და ამ ნებას აუცილებლად აღვასრულებთ“ – ამბობს ლევან ანთაძე.

საქართველოში 26 ოქტომბერს საპარლამენტო არჩევნები ჩატარდა, რომლის შედეგებსაც არ ცნობენ ბარიერგადალახული ოპოზიციური პარტიები , საქართველოს პრეზიდენტი და საზოგადოების ნაწილი. ახალგაზრდა იურისტთა ასოციაცია ხმის მიცემის ფარულობის დარღვევის გამო ტექნოლოგიების გამოყენებით ჩატარებული ყველა უბნის (2263 უბანი) შედეგების ბათილად ცნობას ითხოვს.

ბათუმის ბულვარში ხანძარია. ცეცხლი რესტორნის შენობას უკიდია.

ადგილზე იმყოფებიან სამაშველო და სახანძრო სამსახურები.

საქართველოს იურისტთა ასოციაციის [საია] თავმჯდომარე, ნონა ქურდოვანიძე ქუთაისის #59-ე საოლქო კომისიას საჩივრით მიმართავს და ყველა საუბნო კომისიის შემაჯამებელი ოქმის ბათილობას ითხოვს.

საიას თავმჯდომარე ქუთაისის #59 საოლქო-საარჩევნო კომისიას ფარულობის დარღვევის ფაქტებზე წერს და განუმარტავს, რომ საქართველოს კონსტიტუციისა და საარჩევნო კოდექსის მიხედვით, არჩევნების ძირითადი პრინციპებია კენჭისყრის ფარულობა და ამომრჩევლის ნების თავისუფალი გამოვლენა. 

ნონა ქურდოვანიძის ინფორმაციით, კომისიებმა არჩევნების ძირითადი პრინციპი – კენჭისყრის ფარულობა და ამომრჩევლის თავისუფალი ნების გამოვლენა ვერ დაიცვეს. მისივე განმარტებით, უბნებზე დამონტაჟებული კამერები ზოგ შემთხვევაში უყურებდა კაბინებს, ზოგ შემთხვევაში – რეგისტრატორების მაგიდებს და ვერიფიკაციის აპარატებს. ეს კამერები უბნებზე „ქართული ოცნების“ წარმომადგენლებს ჰქონდათ დამონტაჟებული.

ბიულეტენების ხარისხი კი ვერ უზრუნველყოფდა იმას, რომ მის უკანა მხარეს არ დაეტოვებინა გაფერადებული წრის კვალი:

„ამ ორი მოცემულობის თანხვედრა ამომრჩევლის ნებაზე ზემოქმედების მაღალ რისკებს ადასტურებს და არღვევს ხმის ფარულობასა და ნების თავისუფალ გამოვლენას“,  – განმარტავს ნონა ქურდოვანიძე.

ქუთაისის საუბნო კომისიებში ამ და სხვა დარღვევებზე საუბნო და საოლქო კომისიებში საჩივრები სხვა ორგანიზაციებმაც დაწერეს. იმ ტიპის დარღვევები კი, რა მიზეზითაც ნონა ქურდოვანიძე ქუთაისის #59 ოლქის ყველა საარჩევნო უბნის შემაჯამებელი ოქმის ბათილობას ითხოვს, 26 ოქტომბრის საპარლამენტო არჩევნებზე თითქმის ყველა ოლქში დაფიქსირდა.

მაგალითად, ქუთაისში სხვა ორგანიზაციების დამკვირვებლების თანახმად, ერთ-ერთ უბანზე დაფიქსირდა გაფერადებული ბიულეტენის ამომრჩევლისთვის გადაცემის ფაქტი. უბანთან კი –  ფულის გადაცემის ფაქტი. გამოძახებული იყო პოლიციაც.

საარჩევნო უბნებთან ადგილი ჰქონდა ამომრჩევლის უწყვეტად აღრიცხვას, რის შემდეგაც „ოცნების“ კოორდინატორები ამომრჩევლებს ურეკავდნენ და ხმის მისაცემად მისვლას აიძულებდნენ.

ქუთაისის ოლქის შედეგების ბათილობის მოთხოვნით ნონა ქურდოვანიძემ საოლქო საჩივარი გუშინ, 29 ოქტომბერს დაარეგისტრირა.

___

მთავარი ფოტო: ქუთაისის 49-ე უბანი, სადაც კომისიის თავმჯდომარე, ირმა ყურაშვილი დამკვირვებელს არ აძლევდა უფლებას, ვერიფიკაციის აპარატს დაჰკვირვებოდა.

ბათუმის შოთა რუსთაველის სახელმწიფო უნივერსიტეტთან წარწერები გამოჩნდა – „ქოცობა ტეხავს! განქოცდი! არა რუსეთს! არ დანებდე! არა რუსულ ოცნებას!“

ეს და სხვა ანტირუსული წარწერები, „ბათუმელების“ ინფორმაციით, ბსუს-თან ახალგაზრდებმა დატოვეს, რომლებიც არჩევნების შედეგებს არ ცნობენ და ამბობენ, რომ მათი ხმები მოპარულია.

წარწერების წაშლა უნივერსიტეტთან მალევე დაიწყეს. ამ პროცესს პირადად ზედამხედველობდა ბათუმის ბულვარის დირექტორის პირველი მოადგილე ზაურ თურმანიძე. იგი ადგილზე „ბათუმელებს“ გაეცნო როგორც მოქალაქე.

პარტია „საქართველოსთვის“ ხელმძღვანელი გიორგი გახარია ცესკოსგან მოითხოვს, გასაჯაროვდეს 2024 წლის 26 ოქტომბრის არჩევნებზე მისული 2 76 791 ამომრჩევლის სრული ბაზა.

ეს ბაზა უნდა გადაეცეს ნეიტრალურ, ობიექტურ პლატფორმას, სადაც თითოეულ ამომრჩეველს ინდივიდუალურად უნდა შეეძლოს, გადაამოწმოს შემდეგი მონაცემები:

• მიიღო თუ არა მონაწილეობა არჩევნებში;
• რომელ უბანზე მიიღო მონაწილეობა;
• და რომელ საათზე მისცა ხმა.

„დღეს ცესკო გამოვარდა და თქვა, რომ ეს რაღაცნაირად პირად მონაცემებს ან კანონს არღვევს. კიდევ ერთხელ მინდა შევახსენო ცესკოს, რომ აქ საუბარია ამომრჩევლის მიერ საკუთარი ხმის მიცემის ფაქტის დადასტურებაზე.

ცესკოს საიტზე დღესაც არსებობს საინფორმაციო ბაზა, სადაც თითოეულ ჩვენგანს შეუძლია შევიდეს და გაადამოწმოს თავისი თავი, გადაამოწმოს, რომელ უბანზეა მიწერილი.

ჩვენ ვითხოვთ, ამ ინფორმაციას დაემატოს ის რეკვიზიტები, რომელიც ჩამოვთვალე.

ყველა ეს ინფორმაცია ცესკოს განკარგულებაშია და ამის გაკეთება შეუძლიათ ერთ საათში, არანაირი პრობლემა ამის არ არსებობს,“-ამბობს გახარია.

რატომ გვინდა ეს და რატომ მივმართეთ ცესკოს „სმარტმატიკის“ კონტრაქტის და კონტრაქტში შეტანილი ყველა ცვლილების გასაჯაროებით? – ამბობს გახარია. მისი თქმით, ჩვენ არ ვიცით როგორ არის „სამარტმატიკთან“ კონტრაქტი გაფორმებული და როდემდე შეინახება ეს ინფორმაცია.

„რადგან შეიძლება, ერთ კვირაში, ორ კვირაში ან ათ დღეში ეს ინფორაცია მიუწვდომელი გახდეს ჩვენთვის.

მეორე მხრივ, ამხელა დაძაბულობის და პოლიტიკური კრიზისის პირობებში, როდესაც ამხელა საერთაშორისო წნეხია ქვეყანაზე, როდესაც ქვეყანას ეკეტება ევროპული განვითარების გზა და სახელმწიფო თუ მართლა ამბობს, რომ არჩევნებზე არაფერი არ მომხდარა, ამ ინფორმაციის გასაჯაროება ერთხელ და სამუდამოდ დახურავს საკითხს იმასთან დაკავშირებით, რომ მოხდა არჩევნების შედეგებით მანიპულირება თუ არ მოხდა,“-ამბობს გიორგი გახარია.

შეგახსენებთ, რომ 2024 წლის 26 ოქტომბერს, საქართველოში საპარლამენტო არჩევნები ჩატარდა, რომლის შედეგებსაც არ აღიარებს ოპოზიციის ის ნაწილი, რომელმაც შეძლო 5%-იანი ბარიერის გადალახვა და ასევე, საქართველოს მოსახლეობის დიდი ნაწილი.

გუშინ, 28 ოქტომბერს, თბილისში მოქალაქეებმა მასობრივი საპროტესტო აქცია გამართეს. ისინი უნდობლობას უცხადებენ ხელისუფლებას და არ აღიარებენ არჩევნების შედეგებს.

„ერთიანობა – ნაციონალური მოძრაობა“ საერთაშორისო ექსპერტების მონაწილეობით ვერიფიკაციის აპარატების, ვერიფიკაციის დამადასტურებელი ქვითრების, ვერიფიკაციის აპარატებში არსებული სიის და ამომრჩეველთა ერთიანი სიის აუდიტს ითხოვს.

„ჩვენ გვაქვს ფაქტები: ვნახეთ, რომ ვერიფიკაციის აპარატის გადატვირთვისა და გაჭედვის არაერთი შემთხვევა დაფიქსირდა. ვერიფიკაციის სერვერი არ კითხულობდა პირადობებს და უწევდათ ხელით შეყვანა.

დარღვეული იყო სინქრონიზაცია, კერძოდ ერთსა და იმავე უბანზე განთავსებული აპარატები სხვადასხვა მონაცემს აჩვენებდა.

უბანზე არსებობდა მაღალსიჩქარიანი 5G ინტერნეტ კავშირი, რომელიც ჩართული იყო სპეციალურ ელექტრონულ მოწყობილობა – პლანშეტში.

ამ ყველაფრის ფონზე, მოვითხოვთ, საერთაშორისო ექსპერტების მონაწილეობით ჩატარდეს ვერიფიკაციის აპარატების, ვერიფიკაციის დამადასტურებელი ქვითრების, ვერიფიკაციის აპარატებში არსებული სიის და ამომრჩეველთა ერთიანი სიის აუდიტი,“ – ამბობს თამარ კორძაია, „ერთიანობა – ნაციონალური მოძრაობის“ ერთ-ერთი ლიდერი.

26 ოქტომბერს ჩატარებულ არჩევნებში მონაწილეთა ხმების 99%-ზე მეტი უკვე დათვლილია. ცესკო-ს ბოლო მონაცემებით, მმართველ პარტიას 53.931% აქვს. „ოცნების“ გარდა, 5%-იანი ბარიერი გადალახა კიდევ ოთხმა პარტიამ/კოალიციამ.

ბარიერგადალახული ოპოზიციური პარტიები და საქართველოს პრეზიდენტი სალომე ზურაბიშვილი საპარლამენტო არჩევნების შედეგებს არ აღიარებენ.

„არ ვაღიარებ ამ არჩევნებს. ამ არჩევნების აღიარება არ შეიძლება. ეს იგივეა, რაც რუსეთის აქ შემოსვლის აღიარება, რუსეთის მიმართ საქართველოს დაქვემდებარების,“ – თქვა სალომე ზურაბიშვილმა გუშინ, 27 ოქტომბერს, ორბელიანების სასახლეში გამართული ბრიფინგისას.

ცენტრალური საარჩევნო კომისიის წინასწარი მონაცემების თანახმად, საქართველოში თითქმის ყველა საარჩევნო უბანი დათვლილია და ხმათა უმრავლესობა „ქართულმა ოცნებამ“ მიიღო – 54.086 %, რაც 1 117 480 ხმაა.

რაც შეეხება ოპოზიციურ პარტიებს, ცესკოს წინასწარი მონაცემები ასე გამოიყურება:

• „კოალიცია ცვლილებისთვის გვარამია მელია გირჩი დროა“ – 10.923 % [225 680 ხმა]
• „ერთიანობა – ნაციონალური მოძრაობა“ – 10.122 % [209 137 ხმა]
• „ძლიერი საქართველო-ლელო, ხალხისთვის, თავისუფლებისთვის!“ – 8.781 % [181 424 ხმა]
• „გახარია საქართველოსთვის“ – 7.761 % [160 354 ხმა]

ეს ის პარტიები და ოპოზიციური გაერთიანებებია, რომლებმაც, ცესკოს ცნობით, გადალახეს 5-პროცენტიანი ბარიერი და პარლამენტში მოხვდებიან.

ასევე ცესკოს ცნობით, „გირჩმა“ ამომრჩეველთა ხმების 3.011% მიიღო – 62 217 ხმა, ხოლო „საქართველოს პატრიოტთა ალიანსმა“ – 2.442 %, ანუ 50 463 ხმა.

არჩევნებში სულ 18 პოლიტიკური სუბიექტი მონაწილეობდა. დანარჩენმა პარტიებმა ვერ გადალახეს 1-პროცენტიანი ზღვარიც.

ცესკოს წინასწარი შედეგები მნიშვნელოვნადაა აცდენილი ტელეკომპანია „ფორმულას“ დაკვეთით, ორგანიზაცია Edison Research-ის მიერ ჩატარებული ეგზიტპოლის შედეგებს. Edison Research-ის ეგზიტპოლის თანახმად, „ოცნებამ“ მიიღო 40,9% პროცენტი, ცესკოს მონაცემები კი ყველაზე ახლოსაა ტელეკომპანია „იმედის“ დაკვეთით, ორგანიზაცია „გორბის“ მიერ ჩატარებულ ეგზიტპოლის მონაცემებთან, რომელმაც „ოცნებას“ 56.1 პროცენტი დაუწერა.

ცესკოს წინასწარ მონაცემებს მსხვილი ოპოზიციური პარტიების ნაწილი არ ეთანხმება.

გუშინ, 26 ოქტომბერს, საპარლამენტო არჩევნების შემდეგ, განცხადება გააკეთეს პოლიტიკურმა გაერთიანებებმა: „კოალიცია ცვლილებებისთვის“, „ძლიერი საქართველო“, „ერთიანობა – ნაციონალურმა მოძრაობამ“ და, ასევე გახარიას პარტიამ.

„კოალიცია ცვლილებებისთვის“ აცხადებს, რომ არ აღიარებს არჩევნების შედეგებს, ვინაიდან არჩევნები მოპარულია. იმავეს აცხადებს „ერთიანობა – ნაციონალური მოძრაობა“. ასევე, კოალიცია „ძლიერი საქართველო“ ამბობს, რომ ცესკოს მიერ გამოცხადებული წინასწარი შედეგები არ შეესაბამება მოქალაქეთა რეალურ ნებას.

რაც შეეხება გახარიას პარტიას, პარტიამ განაცხადა, რომ დაელოდებიან საბოლოო შედეგებს და აქვთ არჩევნების გაყალბების – მათ შორის ე.წ. „კარუსელის“ – და ამომრჩევლის მოსყიდვის მტკიცებულებები და პარტიამ უკვე შეიტანა საჩივრები შესაბამის ორგანოებში.

არჩევნების დასრულების შემდეგ განცხადება გააკეთა სამოქალაქო ორგანიზაციების კოალიციურმა სადამკვირვებლო მისიამ -„ჩემი ხმა“.

„აშკარა გახდა, რომ შემუშავებული იყო არჩევნების გაყალბების კომპლექსური სქემა, რომლის განხორციელებისთვისაც გამოყენებული იქნა ისეთი მეთოდები, როგორიცაა ვერიფიკაციის სისტემის მოშლა, მარკირების პროცედურების დარღვევა და დამკვირვებლებისათვის ამომრჩეველთა იდენტიფიკაციის პროცედურების დაკვირვებაზე ხელშეშლა.

დღის პირველ ნახევარში მასობრივად ჰქონდა ადგილი ამომრჩევლებისთვის ორი ან მეტი ბიულეტენის გადაცემას. ასევე, დაფიქსირდა შემთხვევებიც, როდესაც ბიულეტენებზე მმართველი პარტია უკვე მონიშნული იყო“, — აცხადებენ სადამკვირვებლო მისიაში.

„ჩემი ხმა“ საუბრობს ასევე წინასაარჩევნო პერიოდში პირადობის მოწმობების ჩამორთმევისა და „ქირაობის” ცნობებზე, რაც მათი თქმით, გაყალბების სქემის ნაწილი იყო.

მისიაში ამბობენ, რომ სადამკვირვებლო ორგანიზაციების წარმომადგენლებზე დღის მანძილზე ხორციელდებოდა უპრეცედენტო ზეწოლა, რაც მოიცავდა ფიზიკურ თავდასხმებს, სიტყვიერ შეურაცხყოფას, დაშინებას, უბნებიდან გაძევებას საფუძვლის გარეშე, რაშიც ზოგიერთ შემთხვევაში პოლიციაც იყო ჩართული. ეს ყველაფერი კი პროცესზე დაკვირვებას უმრავლეს შემთხვევაში შეუძლებელს ხდიდა.

_____________

ფოტოზე: არჩევნები ბათუმში. ფოტო: „ბათუმელები“