დღეს, პირველ ნოემბერს, ბათუმში უსახლკარო დედებს შვილებთან შეხვედრის საშუალება პოლიციელებმა არ მისცეს.
საუბარია უსახლკაროებზე, რომლებმაც არჩევნებამდე რამდენიმე დღით ადრე ბათუმსა და ქობულეთში სახელმწიფოს კუთვნილი 4 მიტოვებული შენობა დაიკავეს. ერთ-ერთი შენობა ბარცხანის დასახლებაში თავდაცვის სამინისტროს ეკუთვნის.
რამდენიმე უსახლკარო ამ შენობაში 10 დღის წინ შეიჭრა. თავდაცვის სამინისტრო უსახლკაროებს შენობიდან არ ასახლებს, თუმცა აფრთხილებს, რომ თუ ისინი შენობას დატოვებენ, უკან ვეღარ დაბრუნდებიან.
ბავშვებს დღეს უსახლკარო დედების ნახვა სურდათ, მაგრამ მათ ამის საშუალება პოლიციელებმა არ მისცეს.
„დღეს ოჯახის ახლობლებმა უსახლკარო დედებთან მათი მცირეწლოვანი შვილები მიიყვანეს, მაგრამ პოლიციელებმა დედებს ბავშვების ნახვის საშუალება არ მისცეს. დედები ჭიშკრებიდან ყოფდნენ ხელებს და ისე ცდილობდნენ ხელით მაინც მოჰფერებოდნენ საკუთარ შვილებს…
ჩვენ, ვინც გარეთ ვართ, მოვითხოვეთ ბავშვები შესულიყვნენ შიგ, მაგრამ პოლიცია გამოიძახეს და წინ გადაგვიდგნენ. იძალადეს უსახლკარო ქალებზე, რომლებიც გარეთ ვიდექით, ერთ-ერთი დაშავებული ქალი ახლა სასწრაფოს მანქანაშია.
ვაგრძელებთ უსახლკაროები აქციას აჭარის მთავრობასთან. ამ საღამოს შიმშილობას გამოვაცხადებთ, თუ თორნიკე რიჟვაძე არ შეგხვდება და უსახლკაროები საცხოვრისს არ მიიღებენ“, – უთხრა „ბათუმელებს“ უსახლკაროების აქციის ორგანიზატორმა, ნაილი ბეჟანიძემ.
