Batumelebi

უნივერსიტეტი

ჰუმანიტარულ მეცნიერებათა ფაკულტეტი დაკომპლექტებულია მაღალკვალიფიციური აკადემიური პერსონალით, ფაკულტეტზე არჩეულია 70 პროფესორი (19 – სრული, 35 – ასოცირებული და 16 – სისტენტ პროფესორი). ჰუმანიტარულ მეცნიერებათა ფაკულტეტი ახორციელებს სამივე საფეხურის, – ბაკალავრიატი, მაგისტრატურა, დოქტორანტურა, – საგანმანათლებლო პროგრამებს.

ფაკულტეტზე მოქმედებს შემდეგი საგანმანათლებლო პროგრამები:

ბაკალავრიატი:

ქართული ფილოლოგია
რუსული ფილოლოგია
თურქული ფილოლოგია
ინგლისური ფილოლოგია
გერმანული ფილოლოგია
ფრანგული ფილოლოგია
ისტორია
თურქეთისმცოდნეობა
ფილოსოფია
თარგმანმცოდნეობა

ბაკალავრიატის ორი საგანმანათლებლო პროგრამა, – ქართული ფილოლოგია და ისტორია, – სრულ სახელმწიფო დაფინანსებას იღებს.

აღსანიშნავია, რომ ყველა დეპარტამენტი მუშაობს ახალ საგანმანათლებლო პროგრამებზე, რაც ფაკულტეტს კიდევ უფრო კონკურენტუნარიანსა და მიმზიდველს გახდის მომავალი აბიტურიენტებისათვის.

საგანგებოდ მინდა შევჩერდე ევროპეისტიკის დეპარტამენტის ახალ საბაკალავრო პროგრამაზე, რომელზე მუშაობაც უკვე დასრულებულია. ესაა ინგლისურენოვანი საბაკალავრო პროგრამა ინგლისურ ფილოლოგიაში. ამ პროგრამის შექმნის აუცილებლობა, უპირველეს ყოვლისა, განაპირობა სწავლების ინტერნაციონალიზაციამ: ბოლო წლებში ფაკულტეტზე გაიზარდა უცხოელ სტუდენტთა რაოდენობა (თურქეთი, საბერძნეთი, რუსეთი და სხვ.), რომლებიც არ ფლობენ ქართულ ენას; ასევე, ყოველწლიურად გაცვლითი პროგრამების ფარგლებში გვყავს უცხოელი სტუდენტები (ერთი ან ორი სემესტრით). სწორედ მათი ინტერესების გათვალისწინებით შეიქმნა და ამოქმედდება ინგლისურენოვანი პროგრამა.

ვფიქრობთ, ჩვენი რეგიონის თავისებურებების გათვალისწინებით, მნიშვნელოვანია ჩვენს უნივერსიტეტში აღმოსავლეთმცოდნეობის მიმართულების განვითარება, კერძოდ, თურქეთთან, ირანთან, ჰუმანიტარულ მეცნიერებებში (ისტორია, ლინგვისტიკა, ლიტერატურის ისტორია, არქეოლოგია, ეთნოლოგია, ფოლკლორი და ა.შ.) საერთო სამეცნიერო-კვლევითი პროექტების, ექსპედიციებისა და ა.შ. განხორციელება (ამ ქვეყნებში ისტორიულად ქართული წარმოშობის მოსახლეობის არსებობის გათვალისწინებით), ასევე საგანმანათლებლო სფეროში თანამშრომლობა: გაცვლითი პროგრამები, სტუდენტთა მოზიდვა ჩვენს უნივერსიტეტში.

ჰუმანიტარულ მეცნიერებათა ფაკულტეტის სამაგისტრო საგანმანათლებლო პროგრამებია:

• ლინგვისტიკა (ქართული ენა, რუსული ენა, 
• თარგმანმცოდნეობა);
• ლიტერატურის თეორია და ქართული 
• ლიტერატურათმცოდნეობა;
• ევროპეისტიკა (ინგლისური, გერმანული, ფრანგული 
• ფილოლოგია, ტრანსლატოლოგია, ბრიტანული და 
• ამერიკული ლიტერატურა);
• ისტორია;
• ეთნოლოგია;
• შავიზღვისპირეთისა და კავკასიის არქეოლოგია

ჰუმანიტარულ მეცნიერებათა ფაკულტეტის სადოქტორო საგანმანათლებლო პროგრამებია:

• ლინგვისტიკა
• ლიტერატურათმცოდნეობა
• ისტორია
• არქეოლოგია

ფაკულტეტის სადოქტორო პროგრამების კონკურენტუნარიანობაზე მეტყველებს ის ფაქტი, რომ მიმდინარე წელსაც აღნიშნულ პროგრამებზე მისაღებმა გამოცდებმა კონკურსის პირობებში ჩაიარა.

ჰუმანიტარულ მეცნიერებათა ფაკულტეტზე ფუნქციონირებს წლების განმავლობაში, საქართველოში სხვადასხვა ქვეყნების საელჩოებთან და საერთაშორისო ორგანიზაციებთან ურთიერთობის ბაზაზე შექმნილი ცენტრები და კაბინეტები – ამერიკანისტიკის ცენტრი, თურქოლოგიის ცენტრი, ანგლისტიკის, რომანისტიკისა და გერმანისტიკის, ასევე კლასიკური ფილოლოგიის, ბიზანტინოლოგიისა და ნეოგრეცისტიკის კაბინეტები. ეს სასწავლო კაბინეტები აღჭურვილია სპეციალიზებული ბიბლიოთეკებითა და თანამედროვე ტექნიკით, რაც დიდ დახმარებას უწევს როგორც სტუდენტებს, ასევე პროფესორ-მასწავლებლებს მათ საქმიანობაში.

თანამედროვე უნივერსიტეტში განუყოფელია სწავლება და მეცნიერული კვლევა. მხოლოდ მათი წარმატებული სიმბიოზის შემთხვევაში შეგვიძლია ვისაუბროთ ძლიერ და თანამედროვე უნივერსიტეტზე. ფაკულტეტზე სამეცნიერო კვლევების გაზრდას ხელს შეუწყობს სადოქტორო კვლევების განხორციელება და მეცნიერული კვლევების პუბლიკაცია მაღალრეიტინგულ გამოცემებში. ფაკულტეტის პროფესორ-მასწავლებლები მონაწილეობენ ეროვნულ და საერთაშორისო საგრანტო პროექტებში.

ფაკულტეტზე ჩამოყალიბდა საერთაშორისო კონფერენციებისა და სიმპოზიუმების წარმატებულად ორგანიზების ტრადიცია (ჰუმანიტარული მეცნიერებები ინფორმაციულ საზოგადოებაში (2009), სემიოტიკის პირველი სამეცნიერო კონფერენცია (2010), ბიზანტინოლოგია საქართველოში – 2 (2007) და – 4 (2013), საერთაშორისო სიმპოზიუმი ლექსიკოგრაფიაში- 1(2010) და – 2 (2012) და სხვ.), რაც მომავალშიც გაგრძელდება და ხელს შეუწყობს სამეცნიერო კვლევების განვითარებასა და ფაკულტეტის პოპულარიზაციას.

ჩვენი უნივერსიტეტის პოტენციური შესაძლებლობების, ასევე მისი გამორჩეული ადგილმდებარეობის გათვალისწინებით, ვფიქრობთ, პერსპექტიულია ფაკულტეტზე საზაფხულო სკოლების პროექტების განხორციელება, რაც უკავშირდება ტრიმესტრული სწავლების პრინციპის დანერგვას. ამ მიმართულებით უკვე გვაქვს გარკვეული შედეგები და სამომავლო გეგმები: კერძოდ, წარმატებით მუშაობს ქართველოლოგიის საზაფხულო სკოლა (გერმანიის უნივერსიტეტებთან ერთად), რომლის მუშაობაში აქტიურად არიან ჩართულნი ფაკულტეტის პროფესორ-მასწავლებლები, მაგისტრანტები, დოქტორანტები.

რამდენიმე წელია წარმატებით მუშაობს დოქტორანტთა საზაფხულო სემინარი „დაად” – ის ფონდთან თანამშრომლობით.

სამომავლოდ დაგეგმილი გვაქვს საზაფხულო სკოლის პროექტის განხორციელება სხვა მიმართულებებითაც.

სტუდენტები აქტიურად უნდა იყვნენ ჩართული სწავლებისა და კვლევის პროცესების წარმართვაში, რაც ხელს შეუწყობს მათ სოციალურ, გონებრივ და ემოციურ განვითარებას. სტუდენტი არ უნდა განიხილებოდეს მხოლოდ სწავლების ობიექტად, არამედ უნდა გამოიკვეთოს მისი, თანასწორი მონაწილეობა როგორც სასწავლო, ისე კვლევით პროცესებში. როცა ვსაუბრობთ სტუდენტზე ორიენტირებულ უნივერსიტეტზე, მხედველობაში სტუდენტთა მრავალმხრივი ინტერესების დაკმაყოფილება უნდა გვქონდეს. ჩვენი ფაკულტეტი ყოველთვის გამოირჩეოდა სტუდენტთა ღონისძიებების სიმრავლით. ამ დღეებში, ჩვენი ფაკულტეტის სტუდენტებისა და პროფესორ-მასწავლებლების ინიციატივით, ვიწყებთ ფართომასშტაბიან ჰუმანურ აქციას, ვაბარებთ სისხლს ბათუმის სისხლის ბანკს.

სტუდენტთა მხარდაჭერის მიზნით, სწავლების ინტერნაციონალიზაციის განვითარებისათვის, საერთაშორისო განათლების ცენტრთან მჭიდრო თანამშრომლობით, სისტემატურად იმართება გაცვლითი პროგრამებისა და საერთაშორისო პროექტების პრეზენტაციები (ევროპული განათლების დღე, ამერიკული განათლების დღე, შემოქმედებითი წერის კონკურსები და ა.შ.).

აქვე შევნიშნავთ, რომ სტუდენტთა სოციალური მხარდაჭერის მიზნით, ფაკულტეტის პროფესორ-მასწავლებლები ხელფასის 1%-ს ყოველთვიურად რიცხავენ სოციალურად დაუცველ სტუდენტთა დახმარების ფონდში.

შეგვიძლია ვთქვათ, რომ ჰუმანიტარულ მეცნიერებათა ფაკულტეტის ძლიერი მხარეებია:

• სტუდენტთა სტაბილური რაოდენობა;
• აკრედიტებული საგანმანათლებლო პროგრამების მრავალფეროვნება;
• გაცვლითი პროგრამების შესაძლებლობები;
• დამსაქმებელთა ინტერესი;
• სამეცნიერო პოტენციალი, 
• წარმატებული სამეცნიერო-კვლევითი მუშაობა;
• კომპეტენტური სამეცნიერო-პედაგოგიური კადრები.

ჰუმანიტარულ მეცნიერებათა ფაკულტეტს აქვს შესაბამისი აკადემიური პოტენციალი და რესურსები, რომ დასძლიოს სირთულეები და განახორციელოს დასახული მიზნები, რაც, საბოლოო ჯამში, ხელს შეუწყობს სასწავლო და სამეცნიერო საქმიანობის წარმატებით განხორციელებას და, ამის საფუძველზე, მომავალი თაობის კონკურენტუნარიან სპეციალისტად აღზრდასა და ღირსეულ მოქალაქედ ჩამოყალიბებას.

ქართული ფილოლოგიის დეპარტამენტი

ძვირფასო აბიტურიენტებო!

თქვენ გეძლევათ შანსი ქართული ფილოლოგიის სპეციალობაზე სწავლით მშობლიურ ქალაქში მიიღოთ სრულყოფილი განათლება და ეზიაროთ ჰუმანიზმის, დემოკრატიის პრინციპებს, ისწავლოთ ადამიანური ურთიერთობები, რაც მოგცემთ პროგრესულ და თავისუფალ პიროვნებებად ჩამოყალიბების გარანტიას.

არ გაუშვათ ხელიდან შანსი, ისწავლოთ ქართულ ფილოლოგიის სპეციალობაზე სრული სახელმწიფო დაფინანსებით. სრულყოფილი განათლება და უფასო სწავლა, მინიმალური დანაზოგი და მაქსიმალური სარგებელი _ ეს ყველაზე ხელსაყრელი ინვესტიციაა მომავლის გონივრულად დასაგეგმავად.

ნანა ცეცხლაძე, ასოცირებული პროფესორი, ქართული ფილოლოგიის დეპარტამენტის ხელმძღვანელი 

ისტორიის, არქეოლოგიისა და ეთნოლოგიის დეპარტამენტი

ჩვენი დეპარტამენტი ერთ-ერთი წარმატებული დეპარტამენტია უნივერსიტეტში. დღეისათვის დეპარტამენტში ფუნქციონირებს ისტორიისა და თურქეთისმცოდნეობის სპეციალობების სამივე საფეხურის (ბაკალავრიატის, მაგისტრატურის, დოქტორანტურის) და არქეოლოგიის მაგისტრატურისა და დოქტორანტურის საგანმანათლებლო პროგრამები.

ჩვენი რეგიონის თავისებურებების გათვალისწინებით მნიშვნელოვანია ბათუმის შოთა რუსთაველის სახელმწიფო უნივერსიტეტში აღმოსავლეთმცოდნეობის მიმართულების განვითარება, სადაც გაერთიანდება თურქეთისმცოდნეობისა და თურქული ფილოლოგიის საგანმანათლებლო პროგრამები.

ისტორიისა და თურქეთისმცოდნეობის სპეციალობების საგანმანათლებლო პროგრამების არჩევით თქვენ ირჩევთ წარმატებულ მომავალს.

ემზარ მაკარაძე, პროფესორი, ისტორიის, არქეოლოგიისა და ეთნოლოგიის დეპარტამენტის ხელმძღვანელი

ფილოსოფიის დეპარტამენტი

 ჩვენი მიზანია დავეხმაროთ სტუდენტ-ახალგაზრდობას თანამედროვეობის გამოწვევების გაცნობიერებასა და თანამედროვე აზროვნების ძირითადი პარადიგმების ინტერდისციპლინარული ანალიზის აუცილებლობის გააზრებაში. დეპარტამენტის ამოცანაა სტუდენტის აზროვნებისა და ლოგიკური მსჯელობის, დისკუსიაში მონაწილეობისა და დიალოგის კულტურის უნარის გაუმჯობესება, მოქალაქეობრივი პოზიციის ჩამოყალიბება, სტუდენტის მიერ თანადროული სამყაროს ძირითადი მენტალური მოთხოვნების შეფასება და თეორიული ცოდნის გამოყენება ცხოვრებისეული პრობლემების გადაწყვეტისას.

ლალი ანთიძე, ასოცირებული პროფესორი, ფილოსოფიის დეპარტამენტის ხელმძღვანელი

ევროპეისტიკის დეპარტამენტი

 
ევროპეისტიკის დეპარტამენტი, რომელშიც შედის სამი ძირითადი პროგრამა: ინგლისური ფილოლოგია, ფრანგული ფილოლოგია და გერმანული ფილოლოგია, ერთ-ერთი წარმატებული დეპარტამენტია ბათუმის შოთა რუსთაველის სახელმწიფო უნივერსიტეტში. აქ მუშაობენ მაღალი კვალიფიკაციის პროფესორ-მასწავლებლები, რომლებიც სტაჟირებას გადიან უცხოეთის უნივერსიტეტებში, მონაწილეობენ სხვადასხვა საერთაშორისო სამეცნიერო კონფერენციებსა და გრანტებში. ისინი ზრუნავენ სტუდენტების ცოდნის გაღრმავებაზე, მათი პროფესიული უნარ-ჩვევების ჩამოყალიბებასა და განვითარებაზე. ეს საშუალებას აძლევს სტუდენტებს დასაქმდნენ შრომით ბაზარზე და მონაწილეობა მიიღონ საერთაშორისო გაცვლით პროგრამებში. ფრანგული და ინგლისური ფილოლოგიის მიმართულების კურსდამთავრებულებს აჭარის განათლების სამინისტროს „ევრო-ოდისეის” პროგრამა სთავაზობს სტაჟირებას, დასაქმებას ევროპის ქვეყნებში. დეპარტამენტის მაღალ რეპუტაციაზე მეტყველებს უცხოელი სპეციალისტების მიერ აქ მომუშავე პროფესორების კვალიფიკაციის მაღალი შეფასება.

ირინე გოშხეთელიანი, პროფესორი, ევროპეისტიკის დეპარტამენტის ხელმძღვანელი

სლავისტიკის დეპარტამენტი

ევროპულ სივრცეში საქართველოს ინტეგრაცია ახალგაზრდობას ახალი გამოწვევების წინაშე აყენებს: თანამედროვე კონკურენტუნარიანი სპეციალისტი მშობლიურთან ერთად ორ ან სამ უცხო ენასა და მთარგმნელობით უნარ-ჩვევებსაც უნდა ფლობდეს. საქართველოს ეკონომიკური განვითარების საქმეში, ტურიზმისა და ბიზნესის სფეროში დღეს განსაკუთრებით მნიშვნელოვანია სლავური ენის ცოდნა, რადგან სლავური ქვეყნები ცენტრალური და აღმოსავლეთ ევროპის მნიშვნელოვან ნაწილს შეადგენენ, სლავურ ენებზე 400 მილიონზე მეტი ადამიანი საუბრობს. სლავისტიკის დეპარტამენტი ამ უნარ-ჩვევების დაუფლებაში დაგეხმარებათ.

ჩვენთან მეგობრული და ამავე დროს პროფესიონალური გარემოა. ჩვენი სტუდენტები პროფესორ-მასწავლებლებთან ერთად მონაწილეობენ ადგილობრივ და საერთაშორისო ღონისძიებებში, რომლებიც იმართება საქართველოსა და უცხოეთში; მონაწილეობენ სხვადასხვა გაცვლით პროგრამაში არა მხოლოდ სლავურ ქვეყნებში.

ისწავლეთ ჩვენთან და ჩვენ დაგეხმარებით ცოდნის შეძენაში, გაგიზიარებთ ჩვენს გამოცდილებას, გპირდებით, რომ კარგ სპეციალისტებად, პროფესიონალებად ჩამოყალიბდებით.  

ქეთევან სვანიძე, ასოცირებული პროფესორი, სლავისტიკის დეპარტამენტის ხელმძღვანელი

ქართველოლოგიის ცენტრი

 

ჰუმანიტარულ მეცნიერებათა ფაკულტეტზე ფუნქციონირებს ქართველოლოგიის ცენტრი (ყოფილი ქართველოლოგიის ინსტიტუტი), რომლის კვლევის ძირითადი მიმართულებაა ჭოროხის აუზის “ქვეყნების” – აჭარა, შავშეთი, კლარჯეთი, ტაო, სპერი და მუჰაჯირთა შთამომავლების – ყოფისა და კულტურის კვლევა.

ცენტრის თანამშრომლები ამჯერად მუშაობენ ორ სამეცნიერო პროექტზე: “მუჰაჯირები” და “კლარჯეთი”.

ცენტრი ყოველწლიურად აწყობს კომპლექსურ ექსპედიციებს (დღემდე მოეწყო 15 ექსპედიცია) “ჭოროხის ქვეყნებში” და მუჰაჯირთა შთამომავლებით დასახლებულ სოფლებში თურქეთის რესპუბლიკის შიდა რეგიონებში, ყოველწლიურად ატარებს შემაჯამებელ კონფერენციას (ჩატარდა 11 კონფერენცია), კვლევის შედეგები იბეჭდება გამოცემაში “კრებული”. ექსპედიციებსა და კვლევით საქმიანობაში ჩართული არიან სტუდენტებიც, უმეტესად მაგისტრანტები და დოქტორანტები.

ცენტრს სამეცნიერო მიმოქცევაში ფოლკლორულ-დიალექტოლოგიურ და ეთნოლოგიურ მასალებთან ერთად შემოაქვს ოსმალური აღწერის მასალები, რაც მნიშვნელოვანი წყაროა ოსმალობისდროინდელი სამხრეთ საქართველოს ისტორიული სურათის აღსადგენად. ქართველოლოგიის ცენტრი ჰუმანიტარული კვლევების მნიშვნელოვანი კერაა ჰუმანიტარულ მეცნიერებათა ფაკულტეტზე.

 პროფესორი მამია ფაღავა

 სტუდენტები ჰუმანიტარული ფაკულტეტის შესახებ 

 კახაბერ ქამადაძე, ისტორიის, არქეოლოგიისა და ეთნოლოგიის დეპარტამენტის არქეოლოგიის სპეციალობის დოქტორანტი: ბათუმის სახელმწიფო უნივერსიტეტში 2005 წელს ჩავირიცხე, ისტორიის სპეციალობაზე. ბაკალავრიატის დასრულების შემდეგ სწავლა გავაგრძელე მაგისტრატურაში საქართველოს ისტორიის სპეციალობით. 2012 წლიდან ჩავირიცხე ბათუმის შოთა რუსთაველის სახელმწიფო უნივერსიტეტში, არქეოლოგიის სპეციალობის სადოქტორო პროგრამაზე. ჩემი სამეცნიერო ინტერესების სფერო გახლავთ შუა საუკუნეების ისტორიისა და არქეოლოგიის საკითხები. იმედი მაქვს, დაწყებულ საქმეს ბოლომდე მივიყვან და სადოქტორო პროგრამასაც წარმატებით გავართმევ თავს.

მინდა დიდი მადლობა გადავუხადო ბათუმის სახელმწიფო უნივერსიტეტს, ყველა პროფესორ-მასწავლებელს, განსაკუთრებით ისტორიის, არქეოლოგიის და ეთნოლოგიის დეპარტამენტში მოღვაწე ადამიანებს ჩვენ მიმართ გაწეული ღვაწლისთვის.

მეგი მანველიძე, თურქეთისმცოდნეობის სპეციალობის III კურსის სტუდენტი: ბათუმის შოთა რუსთაველის სახელობის სახელმწიფო უნივერსიტეტში 1995 წლიდან არსებობს თურქეთისმცოდნეობის საგანმანათლებლო პროგრამა, რომელიც დიდი პოპულარობით სარგებლობს ჰუმანიტარულ მეცნიერებათა ფაკულტეტზე. უკვე მესამე წელია საბაკალავრო განათლებას ვიღებ აღნიშნულ მიმართულებაზე, ვეუფლები როგორც ისტორიულ, ასევე ლინგვისტურ განათლებას, ვსწავლობ თურქულ, არაბულ და ოსმალურ ენებს. პროგრამის ფარგლებში გავიარე პრაქტიკული კურსები თურქულ ენაში სამსუნსა და სტამბულში.

ამ მიმართულებით ყველა პირობაა იმისა, რომ აღმოსავლეთმცოდნეობის მიმართულებამ სათანადო ადგილი დაიკავოს უნივერსიტეტის ცხოვრებაში.

ანა დიასამიძე, ინგლისური ფილოლოგიის IV კურსის სტუდენტი: ბათუმის უნივერსიტეტში სწავლა საინტერესო გამოცდილება იყო და არის ჩემთვის. უნივერსიტეტში 100%-იანი გრანტით ჩავირიცხე და მოვხვდი სასურველ ფაკულტეტზე. ყველაზე საინტერესო ჩემთვის პირველი წელი იყო, როდესაც ზოგად კურსებს გავდიოდი. გავეცანი ფილოსოფიას, კულტურის ისტორიას, საქართველოს ისტორიას, ანტიკურ ლიტერატურას, რისი მეშვეობითაც მნიშვნელოვანი ზოგადი განათლება მივიღე. ასევე ამ წლების მანძილზე შევისწავლე დასავლეთ ევროპული, ანგლო-ამერიკული ლიტერატურა, წავიკითხე უამრავი წიგნი, რითაც გავიფართოვე მსოფლმხედველობა და რამაც დიდი როლი ითამაშა ჩემს პიროვნულ ჩამოყალიბებაში. უნივერსიტეტში მიღებული ცოდნა საშუალებას მაძლევს მონაწილეობა მივიღო გაცვლით პროგრამებში და ევროპის წამყვანი სასწავლებლის მაგისტრატურის სტუდენტი გავხდე.

გიორგი დიასამიძე, რუსული ფილოლოგიის II კურსის სტუდენტი:“რუსული ფილოლოგიის” სპეციალობაზე, სადაც მე ვსწავლობ, პროფესორ-მასწავლებელთა ძლიერი შემადგენლობაა. მე ავირჩიე ბათუმის შოთა რუსთაველის სახელმწიფო უნივერსიტეტი იმიტომ, რომ ვიცი, მე აქ მივიღებ სათანადო განათლებას. ეს არის კარგი ადგილი, რათა გავაძლიერო არა მარტო ჩემი ცოდნა, არამედ გავიმდიდრო ჩემი სულიერი სამყაროც, რადგან მე ამ უნივერსიტეტში მაქვს ურთიერთობა პროფესიონალ ადამიანებთან. ეს კი შემძენს მეტ ცოდნას და გამოცდილებას, რაც დამეხმარება გავხდე საზოგადოეის ღირსეული წევრი.

თინიკო პაპიძე, ქართული ფილოლოგიის IV კურსის სტუდენტი: ბათუმის უნივერსიტეტში, ქართული ფილოლოგიის სპეციალობაზე სწავლა ჩემი ისეთი არჩევანია, რომელმაც მოლოდინს გადააჭარბა. ძნელია ამომწურავად ვისაუბრო ადამიანებზე, რომლებმაც ასეთი ძლიერი გავლენა მოახდინეს ჩემზე, დიდი ძალისხმევით, მონდომებითა და სიყვარულით გადმოგვცეს ყველაზე მნიშვნელოვანი რამ _ ცოდნა. ბედნიერი ვარ, რომ ყველა ლექტორი, რომელიც მასწავლის, დიდი პასუხისმგებლობით ეკიდება თავის საქმეს. აქ გატარებული სტუდენტობა ნაყოფიერი, მრავლისმომცემი და საინტერესოა; ჩვენთან ყველა პირობაა კარგი სწავლისთვის: ხელმისაწვდომი სახელმძღვანელოები, პროფესიონალურად შედგენილი სილაბუსები, ელექტრონული სასწავლო კურსები, საინტერესო ლექციები…

ბათუმის უნივერსიტეტში გატარებული წლები საუკეთესოა არა მარტო ცოდნის გასაღრმავებლად, არამედ ადამიანური ურთიერთობების სასწავლადაც. ველოლიავები დარჩენილ სტუდენტურ დღეებს. გახდით ბსუ-ს სტუდენტები და მიაღწევთ წარმატებებს.

მინდია ცეცხლაძე, ფილოსოფიის სპეციალობის I კურსის სტუდენტი:როდესაც ბათუმის შოთა რუსთაველის სახელმწიფო უნივერსიტეტის სტუდენტი გავხდი, დიდხანს ვყოყმანობდი, თუ რომელი სპეციალობა ამერჩია ჰუმანიტარული მიმართულებით. თავდაპირველად, მინდოდა ინგლისური ენის სპეციალისტი გავმხდარიყავი, თუმცა შემდეგ მტკიცედ გადავწყვიტე ფილოსოფოსობა. ამაში ძალიან დამეხმარა სასწავლო კურსი „ფილოსოფიის შესავალი” და მისი წამყვანი პროფესორები, მანამდე საერთოდ არ ვიცოდი, თუ რას ნიშნავდა ფილოსოფია და ფილოსოფოსობა. სწორედ ამ კურსით მიღებულმა ცოდნამ მომცა სტიმული და შესაძლებლობა დავდგომოდი ფილოსოფიის შესწავლის რთულ გზას. დღეს უკვე ფილოსოფია ჩემთვის განსაკუთრებული ღირებულების საგანია და ბევრს ახალს და საინტერესოს სამომავლოდაც ველოდები მის უსასრულო ლაბირინთებში.

ლანა ბურკაძე, არქეოლოგიის სპეციალობის II კურსის მაგისტრი: ჩემი ურთიერთობა ბათუმის შოთაა რუსთაველის სახელმწიფო უნივერსიტეტთან 2008 წლიდან დაიწყო, როდესაც ჩავაბარე ჰუმანიტარულ მეცნიერებათა ფაკულტეტის ისტორიის სპეციალობაზე. ჩემი სპეციალობიდან გამომდინარე ვმონაწილეობდი სხვადასხვა არქეოლოგიურ თუ ეთნოლოგიურ ექსპედიციებში, კონფერენციებსა თუ სემინარებში, როგორც ჩვენს უნივერსიტეტში, ასევე საქართველოს სხვადასხვა უნივერსიტეტებში. უნდა აღინიშნოს ლექტორების თბილი და უშუალო დამოკიდებულება სტუდენტების მიმართ, რაც სტუდენტს საშუალებას აძლევს იყოს უფრო თავისუფალი და თავდაჯერებული. უნივერსიტეტი ასევე იძლევა საშუალებას აქტიურად იყო ჩართული უნივერსიტეტის მართვაში, დაგეგმო და განახორციელო შენთვის საინტერესო პროექტები. ყოველივე ამან განაპირობა ის, რომ ბაკალავრიატის დასრულების შემდეგ მაგისტრატურაც ჩემს საყვარელ უნივერსიტეტში გავაგრძელე.

ჯგუფს „ბაბილონი” დაარქვეს. რატომ? – ამაზე საუბარი უჭირთ. ამბობენ, რომ უნდათ რეპს საქართველოში უფრო მეტი მსმენელი ჰყავდეს. მათი ტექსტები უმეტესად ბათუმზეა, წერენ ყველაფერზე, რაც ამ ქალაქში ხდება და რაც არ მოსწონთ.

ზურა: “სხვადასხვა ჯგუფში ვიყავით. ლაშა ჯგუფ „სემიში” 11 წელი აკეთებდა რეპს, მე და გიორგი „rep rise”-ის წევრები ვიყავით ორი წელი, წარმატებულადაც ვმუშაობდით, კონცერტები გვქონდა, 2010 წელს “ალტერვიზიაში” ვმონაწილეობდით. 2011-ში “ნიჭიერის” ნახევარფინალშიც მოვხვდით. მერე ინტერესთა კონფლიქტის გამო ჩვენ წამოვედით. საერთოდ, ცხოვრებაში არაფერს ვნანობ და არც ამ ფაქტს. ასე ჯობდა, ახლა უფრო კარგ რამეს ვაკეთებ.”

ლაშა: „2003 წელს ჩამოყალიბდა ჯგუფი “სემი”. ვაკეთებდით მუსიკას, რომელიც მასას არ მოსწონდა, თუმცა ყოველთვის გვყავდა ჩვენი მსმენელი, კასეტა გამოდიოდა მაშინ „ჯეო რეპი”, სადაც იკრიბებოდა ყველა ის პროდუქტი, რაც იქმნებოდა რეპშემსრულებლების მიერ. შემოსავლიანი არც მაშინ არ ყოფილა ეს საქმე და არც ახლა არ არის, უბრალოდ ჩვენსას ვისწორებთ რა.”

ოთხმა დაიწყო, თუმცა მალევე ჯგუფს კიდევ ორი წევრი შეემატა, სიმონა და თამთიკე: „თამთიკე თბილისში სწავლობს, თუმცა მუშაობას არ ვაჩერებთ, სოლოებზე ვმუშაობთ ან მუსიკას ვწერთ, ტექსტს. ყოველთვის ვცდილობთ, რაღაც ახალი შემოვიტანოთ.” – ამბობს გიორგი.

უფრო მეტი ჯგუფის წევრებზე

ზურა გოცირიძე, იგივე ანარქია 18, ხუმრობს, რომ მხოლოდ ეს მეტსახელი აღმოჩნდა თავისუფალი, ისე კი იდეოლოგიური შეხედულებისამებრ აარჩია: „ილიას უნივერსიტეტში „პოლიტოლოგიას” ვსწავლობდი, მმართველობის ეს სისტემა ახლოსაა ჩემთან. შეიძლება ქაოსურად ჟღერს, მაგრამ მე ვფიქრობ, რომ ადამიანებს, ყველანაირი კანონის გარეშე შეუძლიათ ერთმანეთთან თანაცხოვრება. თუმცა ეს იყო მრავალი წლის წინ, ამჟამად ბათუმის უნივერსიტეტში მაგისტრატურას ვასრულებ იურიდიული მიმართულებით, თავისუფალ დროს კი მუსიკას ვუთმობ. როგორც იურისტი, წარმომიდგენია საკუთარი თავი, ადვოკატის თანაშემწეც ვიყავი, თუმცა არ ვაპირებ ამ მიმართულებით მუშაობას, ჩემთვის უმთავრესი მუსიკაა. ისე, ეს ორი საქმიანობა ერთადაც მშვენივრად გამოდის, იურიდიული განათლება მეხმარება ტექსტის წერისას, ადვოკატს საუბარში რეპის ტექნიკა სჭირდება, სათქმელი რომ გასაგებად წარმოთქვა, ამ ტექნიკას უნდა ფლობდე. მე ვხედავ კონტაქტს,” – ამბობს ზურა.

გიორგი ბაკურიძე, ფსევდონიმით ბენქს, საზღვაო აკადემიის სტუდენტია: „კაპიტანი უნდა გავხდე სამომავლოდ, გემის მართვის სურვილი ბავშვობიდან მაქვს. თუმცა ჩემი საყვარელი საქმიანობა მაინც მუსიკას უკავშირდება. მინდა, ისეთი სიახლე შემოვიტანოთ ამ სფეროში, რომ უფრო და უფრო მეტი მსმენელი გაგვიჩნდეს. 13 წლისამ დავიწყე ტექსტების წერა, მერე მელოდიების გაკეთებაც დავიწყე. ყოველთვის რეპი მომწონდა.”

ლაშა თავაძე, იგივე ტუგა. ეს ზედმეტსახელი იმიტომ შეარქვეს, რომ უცენზურო სიტყვების გამოყენება უყვარს, რაზეც ჯგუფის წევრების თანხმობას ვერ იღებს, ამის გამო ჩამწერ სტუდიაში შეპარვა უწევს. ამბობს, რომ ეს საჭიროა პროტესტის გამოსახატავად: „ჯგუფში ყველაზე ძირძველი რეპერი ვარ. ბავშვობიდან ვუსმენ როკს, მაგრამ რეპს მეტი რიტმულობა მოაქვს. მერე რეპისა და როკის სინთეზი გავაკეთე, ძალიან კარგი გამოდის. ყველაფერს ვაპროტესტებთ, რაც მოძრაობს და ჯერ არ მოძრაობს იმისთვის, რომ იმოძრაოს. რეპი არ არის სიმღერები სიყვარულზე, რეპი პროტესტია,” – ამბობს ლაშა.

ტექსტებს ერთადაც წერენ და ცალ-ცალკეც, მუსიკას ზურა და გიორგი აწყობს. ტექსტის წერა ყველაზე მეტად რომას ეზარება. რომა ზოსიძე 18 წლისაა, ბათუმის უნივერსიტეტში ტურიზმის ფაკულტეტზე სწავლობს, პირველ კურსზეა: „რეპი არის ყველაზე თავისუფალი სტილი, შეგიძლია მუსიკით აბსოლუტურად ყველაფერზე ილაპარაკო. მე ჩემი მუსიკით ჩემ ირგვლივ არსებულ მოვლენებზე ვსაუბრობ. ყველაფერზე ვწერ, გარდა სიყვარულისა.”

სიმონა კავთელაძე ჯგუფის ყველაზე ახალი წევრია, ამასთანავე ყველაზე პატარა, 16 წლის, სკოლის მოსწავლე: „ხშირად გვიგზავნიან ვიდეოებს, თავიანთ შესრულებულ რეპს გვაფასებინებენ, ასე გამოაგზავნა სიმმაც. ღრმა პოეზია მოდიოდა მისი ნამღერიდან, ტექსტებს ძალიან კარგად წერს, თუმცა ცოტა სევდიანია, რეპს კი სხვანაირი რიტმი აქვს, ამ ხრივ სტილია შესაცვლელი, რადგან ჩვენს მსმენელს აქტიური მუსიკა მოსწონს.” – ამბობს ზურა.

თამთიკე ჯგუფში ერთადერთი გოგონაა. ზურასთან და გიორგისთან ერთად ჯგუფ „Rep rise”-ის წევრი იყო. სოულის სტილში მისამღერებს აკეთებს სიმღერებზე. ჯგუფის წევრებს კიდევ ერთი გოგოს დამატებაც სურთ, თუმცა ამ დრომდე სასურველ კანდიდატურას ვერ მიაკვლიეს, როგორც ამბობენ, რთულია საქართველოში რეპის წამკითხველი გოგოს პოვნა.

კონცერტები ხშირად არ აქვთ, ვერც ხელშეწყობას ხედავენ, თუმცა მაინც რეპის ერთგულები რჩებიან, ასე უფრო კარგად გამოხატავენ გულისტკივილს. ოცდაათამდე სიმღერა აქვთ მზად და ხუთი კლიპი, ყველაფერს ამას თავიანთი ხარჯებით აკეთებენ:

„მუსიკას, ტექსტებს ჩვენ ვწერთ, თავად ვაკეთებთ აუდიოვერსიას, გიორგის აქვს ჩამწერი აპარატურა სახლში. ვწერთ კლიპის სცენარს, ვიღებთ, ჩვენ ვამონტაჟებთ, ჩვენვე ვუკეთებთ პიარს. თავად ვცდილობთ კონცერტებში მონაწილეობას, ან თავად ვაკეთებთ კონცერტს, აპარატურასაც კი ჩვენ ვასწორებთ კონცერტზე.” – ამბობს ზურა.

„უკვე საკმაო რაოდენობის მსმენელი გვყავს, ინტერნეტით გვიკავშირდებიან სხვა რეგიონებიდან, თბილისიდანაც, გვგულშემატკივრობენ, გვთხოვენ მათთან ჩასვლას, რამდენჯერმე ჩავატარეთ კონცერტი ბათუმის უნივერსიტეტში, ყოველ ჯერზე მთლიანად ივსებოდა დარბაზი.” – ამბობს გიორგი.

 „ბაბილონის“ მოსასმენად გახსენით ლინკი.

„ასეთი ბავშვები აპათიურებიც არიან, თითქოს არაფერი აინტერესებთ“, – ამბობს ლია კაკაურიძე, აჭარის ენდოკრინოლოგიური ცენტრის ექიმი, რომელიც სამი წელია აჭარის ჯანდაცვის სამინისტროს პროგრამის ფარგლებში მოსწავლეებსა და ბაღის აღსაზრდელებს იკვლევს. მისი თქმით, მოზარდებში იოდდეფიციტი განსაკუთრებით ხშირად გვხვდება, რადგან ამ დროს ორგანიზმის ინტენსიური ზრდა-განვითარება მიმდინარეობს.

„ყურადღებით უნდა იყოს მშობელი და ყველაფერი არ უნდა მიაწეროს გარდატეხის ასაკს. უნდა გვახსოვდეს, რომ სამწუხაროდ, ჩვენ ვცხოვრობთ იოდდეფიციტის ენდემურ კერაში. ადრე ითვლებოდა, რომ ეს კერა იყო მაღალმთიანი აჭარა, მაგრამ მთელი აჭარაა უკვე ამ არეალში. ეს არ არის მხოლოდ ჩვენი ქვეყნის პრობლემა, დღეისათვის მსოფლიო მოსახლეობიდან დაახლოებით ერთი მილიარდი განიცდის იოდის დეფიციტს“, – ამბობს ლია კაკაურიძე.

რატომ არის ორგანიზმისთვის მნიშვნელოვანი იოდი და რას იწვევს მისი დეფიციტი? ენდოკრინოლოგი განმარტავს: „იოდის ნაკლებობა ორგანიზმში იწვევს ფარისებრ ჯირკვლის განვითარების შეფერხებას. იოდი არის ფარისებრი ჯირკვლის ჰორმონების საშენი მასალა და როცა ორგამიზს არ მიეწოდება საკმარისი რაოდენობის იოდი, ეს იწვევს ამ ჰორმონების ნაკლებობას და ვითარდება ჰიპოთირეოზი, დაავადება, რომელიც ფარისებრი ჯირკვლის დაქვეითებას იწვევს. ამას, თავის მხრივ, მოჰყვება სერიოზული პრობლემები, ჩამორჩენა ფსიქოსომატურ განვითარებაში და უკიდურეს შემთხვევაში საქმე იდიოტიამდეც შეიძლება მივიდეს. საბედნიეროდ ასეთი შემთხვევები იშვიათია ჩვენთან.“

სპეციალისტები იოდდეფიციტის საუკეთესო პროფილაქტიკად იოდიზებული მარილის გამოყენებას მიიჩნევენ. მარილს ადამიანი ყოველ დღე მოიხმარს, თუმცა აქაც არსებობს ერთი წესი. ლია კაკაურიძის განმარტებით, იოდიზებული მარილის გამოყენება მხოლოდ მაშინაა ეფექტური, თუკი მარილით კერძს მომზადების შემდეგ ვანელებთ, რადგან ხარშვისას იოდი ორთქლდება და იგი სასარგებლო აღარ არის. რაც შეეხება პროდუქტებს, რომლებიც იოდდეფიციტის დაძლევაში ეხმარება მოზარდს და ზრდასრულ ადამიანსაც, ეს არის ოკეანის თევზი (მდინარის თევზი ნაკლებად სასარგებლოა) და ზღვის პროდუქტები. ასევე: ჩაი, შედედებული რძე, შავი პური და ყავა. ხილს შორის შედარებით მეტ იოდსს შეიცავს ფეიჰოა, კარალიოკი და კივი.

აჭარის ჯანდაცვის სამინისტროს პროგრამის ფარგლებში ბაღის აღსაზრდელებსა და 1-8 კლასის მოსწავლეებს სახელმწიფო მესამე წელია უფასო გამოკვლევებს ატარებს. ლია კაკაურიძე ამ პროგრამაში მესამე წელია მონაწილეობს. იგი ამბობს, რომ მოზარდებში იოდდეფიციტის სიმპტომები ხშირად გვხვდება და მიუხედავად იმისა, რომ სახელმწიფო პროგრამის ფარგლებში სკოლის მოსწავლეებისა და ბაღის აღსაზრდელების გამოკვლევა უფასოდ ხორციელდება, სკოლაში, შემოწმებისას გაცემული მიმართვის საფუძველზე, მშობლები მაინც ნაკლებად აქცევენ ამ პრობლემას ყურადღებას.

„პროგრამაში შედის უფასო ექოსკოპია, უფასო ჰორმონალური გამოკვლევები, მაგრამ მომართვიანობა მცირეა. მშობლები რატომღაც ამ თემას არ აქცევენ სათანადო ყურადღებას. მეორედ რომ მივედი სკოლაში და ბავშვი გავსინჯე, რომელსაც შარშან ვუთხარი, რომ ჩიყვი ჰქონდა, აღმოჩნდა, რომ ახლაც იგივე მდგომარეობაა. თვალშისაცემი პრობლემა არ არის ეს და ალბათ ამიტომ არ აქცევენ მშობლები ყურადღებას. როცა გარედან შესამჩნევია, მაშინ აკითხავენ ექიმს. მშობლებს მინდა მივმართო, ბავშვი სკოლიდან რომ მოიტანს ამბავს, მივიდნენ იქ, სადაც მიმართვა ექნებათ, ან დარეკონ ჩვენთან, ენდოკრინოლოგიურ ცენტრში და ნუ წაუყრუებენ ამ ამბავს, ეს გამოკვლევები უფასოა“, – ამბობს ლია კაკაურიძე.

იოდდეფიციტის სამკურნალოდ იოდიზებული ტაბლეტების თვითნებურად მიღებისაგან სპეციალისტები მოზარდებს და ზრდასრულებსაც თავშეკავებას ურჩევენ. დოზირება უმჯობესია ექიმთან შეთანხმებით განისაზღვროს, რადგან ზედმეტი იოდი ორგანიზმისათვის მავნებელია, ისევე როგორც მისი დეფიციტი.

ექსპრესტესტი _ აკლია თუ არა ორგანიზმს იოდი

თუ ადვილად იღლებით, ცუდად გამოიყურებით, ყველაფერი გავიწყდებათ, ჩქარი სიარულისას სუნთქვა გეკვრით, ცუდად გესმით, სახეზე დაგედოთ მოყვითალო ფერი, თვალების ქვემოთ არეები შეგიშუპდათ, ენაზე შესამჩნევია კბილების ანაბეჭდები, გიჭირთ ცხვირით სუნთქვა, მიმართეთ ექიმს – ეს იოდდეფიციტის ნიშნებია. თქვენს ეჭვს დაადასტურებს მარტივი ტესტი: ყურის საწმენდი ჩხირის ერთი ბოლო ამოაწეთ იოდის 5%-იან ხსნარში და დაიხატეთ ბადე წინამხრის შიგნითა ზედაპირზე. თუ ორი საათის შემდეგ ხაზები გაქრა, ორგანიზმში იოდის დეფიციტია.