გარდაცვლილი პატიმრის ოჯახი ექსპერტიზის დასკვნას ელოდება


 

 

24  წლის ბათუმელი პატიმრის, გიგა ფარტენაძის გარდაცვალების ფაქტზე გამოძიება მიმდინარეობს, თუმცა მკვლელობის გამო ბრალი ჯერ არავისთვის წარუდგენიათ. ეს ინფორმაცია „ბათუმელებს“ პროკურატურის პრესსამსახურის თანამშრომელმა, ეკა ჩიჩუამ მოაწოდა. ოჯახის წევრებს  გამოძიების ინტერესებიდან გამომდინარე ექსპერტიზის დასკვნას არ აცნობენ.

„გეგუთის ციხეში გვიან ღამით, დახურულ საკანში, პატიმრებს შორის მოხდა კონფლიქტი, რა დროსაც ერთი პატიმარი გარდაიცვალა, სავარაუდოდ, ბლაგვი საგნის ჩარტყმით“, – განაცხადა სოზარ სუბარმა, სასჯელაღსრულების მინისტრმა პატიმრის გარდაცვალებიდან მეორე დღეს.

„2014 წლის 4 მარტს, დაახლოებით ღამის 2:30 საათზე, გეგუთის N14 დაწესებულებაში, ექვსადგილიან საკანში, სადაც ხუთი მსჯავრდებული იმყოფებოდა, პატიმრებს შორის დაპირისპირება მოხდა, რაც ერთ-ერთი მსჯავრდებულის გარდაცვალებით დასრულდა. პირველადი ინფორმაციით, გარდაცვლილ პატიმარს მრავლობითი დაზიანება აქვს მიყენებული, მათ შორის თავისა და ყელის არეში. გარდაცვალების ზუსტი მიზეზი ექსპერტიზის ჩატარების შემდეგ გახდება ცნობილი“,  წერია განცხადებაში, რომელიც სასჯელაღსრულების სამინისტრომ გაავრცელა.

ოჯახის წევრებისთვის დღემდე უცნობია სამედიცინო ექსპერტიზის დასკვნა. გარდაცვლილის ძმა, კობა ფარტენაძე ამბობს, რომ მათ ექსპერტიზის დასკვნის გაცნობის უფლებას „გამოძიების ინტერესებიდან გამომდინარე“ არ აცნობენ.

გარდაცვლილი პატიმრის ძმა საქართველოს პარლამენტის ადამიანის უფლებათა დაცვის კომიტეტის წევრებთანაც აპირებს შეხვედრას.

ნეტგაზეთის მასალების სხვა გამოცემებში გადაბეჭდვის წესი
ნათია როყვა