სტუდენტური არასამთავრობო ორგანიზაცია “ახალგაზრდული კოლეგია”, იწყებს ახალ პროგრამაზე მუშაობას, რომელიც მიზნად ისახავს სტუდენტური აქტივობის გაზრდას, მათ ჩართულობას საუნივერსიტეტო ცხოვრებაში, გააქტიურებას უნივერსიტეტის პრობლემების მოგვარებაში, გადაწყვეტილების მიღების პროცესებში, სხვადასხვა ღონისძიებებისა და აქტივობის განხორციელებაში.
იდეის ერთ-ერთ ავტორი ამავე უნივერსიტეტის სტუდენტი დიანა ბაუჟაძეა. „იდეა დღეს გაგვიჩნდა რამდენიმე სტუდენტს. გვინდა უნივერსიტეტში სიტუაცია გამოცოცხლდეს და სტუდენტები უფრო აქტიურები გახდნენ“- გვეუბნება ის. იდეის ავტორები არ ეძებენ ფინანსურ მხარდაჭერას, რადგან ფიქრობენ რომ ლექტორებიც და არასამთავრობო ორგანიზაციებიც ამ პროექტში ენთუზიაზმით უნდა ჩაერთონ:
„პროგრამის ფარგლებში სტუდენტებს ჩაუტარდებათ სხვადასხვა ტრენინგ-სემინარი. გვინდა ის ადამიანები მოვიწვიოთ, ვინც იცნობს ჩვენს უნივერსიტეტში არსებულ სიტუაციას, უსწავლია ან ასწავლის ჩვენს უნივერსიტეტში. ასე პრობლემის იდენტიფიკაციისთვის დრო არ დაგვეკარგება, რადგან მათთვის ცნობილია სტუდენტებში არსებული პრობლემატიკა, გვინდა პროგრამაში ჩაერთონ ის სტუდენტები რომლებიც პირველ-მეორე კურსზეა. მე ვიცნობ ბევრ სტუდენტს რომელსაც უნდა იყოს აქტიური მოქალაქე, თუმცა არ იცის ეს როგორ გააკეთოს“- ამბობს დიანა.
