Batumelebi

ბათუმში, ბარათაშვილის 24-ში უნებართვოდ დანგრეულ ისტორიულ სახლზე „ბათუმელების“ შეკითხვას აჭარის მთავრობის თავმჯდომარემ, ზურაბ პატარაძემ ასე უპასუხა: „მნიშვნელოვანია, რა აშენდება იქ.“

რატომ არ აღმოჩნდა მთავრობისთვის  მნიშვნელოვანი ისტორიული სახლის ქალაქის ცენტრში უკანონოდ დანგრევა? – კითხვაზე ზურაბ პატარაძემ გვიპასუხა, რომ მერიასთან ერთად საერთო პოზიციის შემუშავებას ელოდება.

„მიმდინარეობს მუშაობა, შედგა საბჭოს სხდომა, სადაც მუშაობენ არქიტექტორები. აუცილებლად შემუშავდება საერთო პოზიცია. ჩვენ ყველაფერს გავაკეთებთ იმისთვის, რომ შევინარჩუნოთ ქალაქის ძველი ნაწილი, რომ იქ არ მოხდეს სტიქიური მშენებლობები და მაღალი კორპუსების აშენება. ჩვენ მაქსიმალურად გავითვალისწინებთ ბათუმელების ინტერესებს. მე ჯერ-ჯერობით თავს ვიკავებ, დაველოდები საბოლოო შედეგს“.

რა იგულისხმება „საბოლოო შედეგში“, როცა ისტორიული სახლი უკვე განადგურებულია?

„იგულისხმება ის, რომ იქ უნდა განხორციელდეს მშენებლობა. არსებობს პროექტი ამასთან დაკავშირებით, მერია მუშაობს და უახლოეს პერიოდში იქნება სრული სურათი… მნიშვნელოვანია, რომ შევინარჩუნოთ ძველი ქალაქი, ისტორიულად ულამაზესი შენობები. ამ მიმართულებით ჩვენ ყველაფერს გავაკეთებთ“, – ამბობს აჭარის მთავრობის თავმჯდომარე.

„რას კონკრეტულად?“  – ეს კითხვა ზურაბ პატარაძემ უპასუხოდ დატოვა. გვითხრა, რომ „ცოტა ხანში იქნება პასუხი“.

ბარათაშვილის 24-ში კომპანია „დარ ბილდინგი“ 7-სართულიანი საცხოვრებელი კორპუსის აშენებას აპირებს.

„ჩვენ ყველაფერს გავაკეთებთ იმისთვის, რომ თუ სადმე არის დარჩენილი შავი ხვრელები, კორუფციის რისკები, იგი უნდა აღმოიფხვრას“, – განაცხადა დღეს, 25 თებერვალს ზურაბ პატარაძემ, აჭარის მთავრობის თვამჯდომარემ „5 მილიონი ლარის მითვისების საქმეზე“.

საუბარია აჭარის ფინანსთა და ეკონომიკის სამინისტროს კუთვნილი შპს „ჰიგიენა 2009“-ის ხელმძღვანელების წინააღმდეგ დაწყებულ გამოძიებაზე. კონრკეტულად, ამ სახელმწიფო შპს-ს დირექტორს, ირაკლი ცეცხლაძეს ქობულეთში ახალი ნაგავსაყრელის მშენებლობსითვის განკუთვნილი ფულის, დაახლოებით 5 მილიონის ლარის მითვისება ედება ბრალად.

„მკაფიოდ მინდა ვთქვა, ყველა დაისჯება, თუკი ვინმეს აქვს სურვილი, რომ საბიუჯეტო სახსრებით ისარგებლოს, ეს არის გამორიცხული.  ჩვენ ვებრძვით კორუფციას. არავითარ შემთხვევაში არ მივცემთ ამის საშუალებას საჯაროს მოხელეს, დაუშვეებელია კორუფცია. გამოძიების ინტერესებიდან გამომდიბარე, თავს შევიკავებ დამატებითი კომენტარისგან“, – უთხრა ზურაბ პატარაძემ ჟურნალისტებს. მან დღეს სოფელ კაპრეშუმში ახალი სკოლის მშენებლობას ჩაუყარა საფუძველი.

„ბათუმელებმა“ ზურაბ პატარაძეს ჰკითხა, არის თუ არა მისი ინფორმაციით დაწყებული ძებნა დავით ბალაძეზე, ეკონომიკის ყოფილ მინისტრზე, ასევე დადგება თუ არა მოქმედი ეკონონიმიკის მინისტრის პასუხისმგებლობის საკითხი.

„მე ვიცი, რომ ბრალდება წაუყენეს ირაკლი ცეცხლაძეს, ამ საწარმოს დირექტორს. ხაზგასმით მინდა ვთქვა, რომ არ დავუშვებთ კორუფციას ჩვენს რეგიონში. პასუხისმგელობა დადგება ყველა იმ თანამდებობის პირის, ვინც იყო ჩართული ამ დანაშაულში. ჩვენ ვიცით, რასთან გვაქვს საქმე და ბოლომდე ვიბრძოლებთ კორუფციის წინააღმდეგ“, – გვიპასუხა ზურაბ პატარაძემ.

მთავრობის თავმჯდომარეს შევახსენეთ, რომ სამართლებრივი პასუხისგებლობის გარდა, არსებობს პოლიტიკური პასუხისმგებლობაც. გარდა ამისა, რატომ არ არის სახელმწიფო შპს-ს დირექტორი შეზღუდული, მილიონობით სახელმწიფო თანხის განკარგვის დროს?

ზურაბ პატარაძემ თქვა, რომ არსებობს „შავი ხვრელები“, „რისკები კორუფციისთვის“ და მთავრობის მუშაობა ამ კუთხით გააქტიურდება.

„დაველოდოთ გამოძიებას, აუცილებლად იქნება განცხადებები ამასთან დაკავშირებით“, – დაამატა აჭარის მთავრობის თავმჯდომარემ.

25 თებერვალი საბჭოთა ოკუპაციის დღეა.

საქართველოს პარლამენტის 2010 წლის 21 ივლისის დადგენილება: „ვინაიდან 25 თებერვალი არის საქართველოს ანექსიისა და ოკუპაციის დღე და ვინაიდან რუსეთის ფედერაციას დღემდე ოკუპირებული აქვს საქართველოს ტერიტორიის მნიშვნელოვანი ნაწილი, საქართველოს პარლამენტი ადგენს:

• გამოცხადდეს ყოველი წლის 25 თებერვალი საბჭოთა ოკუპაციის დღედ.
• დაევალოს საქართველოს მთავრობას ყოველი წლის 25 თებერვალს ოკუპაციის მსხვერპლთათვის პატივის მიგებისა და საბჭოთა ოკუპაციის დღისადმი მიძღვნილი სხვა ღონისძიებების პროგრამის შემუშავება და განხორციელება.
• ყოველი წლის 25 თებერვალს საქართველოს მთელ ტერიტორიაზე დაშვებულ იქნეს საქართველოს სახელმწიფო დროშები.
• ყოველი წლის 25 თებერვალს საქართველოს მთელ ტერიტორიაზე გამოცხადდეს წუთიერი დუმილი ოკუპაციის მსხვერპლთათვის პატივის მისაგებად.
• ეთხოვოთ საზოგადოებრივ ორგანიზაციებს, კერძო დაწესებულებებსა და საწარმოებს, თავი შეიკავონ საბჭოთა ოკუპაციის დღეს მასობრივი საზეიმო და გასართობ-სანახაობრივი ღონისძიებების გამართვისგან“.

უზენაესმა სასამართლომ განუხილველად დატოვა გულნაზ ღლონტის საქმე. შესაბამისად, ძალაში დარჩა გადაწყვეტილება, რომლის მიხედვითაც, გულნაზ ღლონტის გათავისუფლება ხელვაჩაურის გამგებეობიდან უკანონოდ შეფასდა. სასამართლოს გადაწყვეტილებით, ის ხელვაჩაურის გამგეობამ სამსახურში უნდა დააბრუნოს და 2015 წლის იანვრიდან აღდგენის დღემდე განაცდურიც გადაუხადოს.

2015 წლის იანვარში გულნაზ ღლონტი ხელვაჩაურის გამგეობიდან მაშინ გაათავისუფლეს, როცა იგი დეკრეტულ შვებულებაში იმყოფებოდა. მანამდე იგი სოფელ განთიადში გამგებლის რწმუნებულის მოვალებას ასრულებდა. გამგეობამ კონკურსი ჩაატარა, თუმცა სასამართლოს შეფასებით, გამგეობას არ უნდა განეხილა ვაკანსიად ის სამუშაო ადგილი, რომელიც ფეხმძიმე ქალს ჰქონდა დაკავებული.

2016 წლის თებერვალში ხელვაჩაურის გამგებლის ხელმოწერილი გათავისუფლების ბრძანება უკანონოდ მიიჩნია ბათუმის საქალაქო სასამართლომ. მოსამართლე ჯუმბერ ბეჟანიძის გადაწყვეტილება მაშინ ხელვაჩაურის გამგებელმა, ნადიმ ვარშანიძემ ასე შეაფასა: „ეს იყო ანომალიური მოვლენა სასამართლოს მხრიდან, ასეთ გადაწყვეტილებას სხვაგან ვერ ნახავთ“.

როგორ აფასებს ნადიმ ვარშანიძე საქმის წაგებას სააპელაციო და უზენაეს სასამართლოებში? – კითხვებს ხელვაჩაურის გამგებელმა ამჯერად აღარ უპასუხა. გამგეობის პრესსამსახურის ცნობით, უზენაესი სასამართლოს გადაწყვეტილება  გამგეობას ჯერ არ ჩაბარებია და კომენტარს მისი გაცნობის შემდეგ გააკეთებენ.

„ანომალურ მოვლენად“ შეფასებული ბათუმის სასამართლოს გადაწყვეტილება ნადიმ ვარშანიძეს ზემდგომ ინსტანციაში აღარ გაუსაჩივრებია. სარჩელით სააპელაციო სასამართლოს ჯიმშერ ბერიძემ მიმართა. ის ხელვაჩაურის გამგეობის თანამშრომელია, რომელმაც კონკურსის შემდეგ, 2015 წლიდან გულნაზ ღლონტი ჩაანაცვლა. მანამდე, ბათუმის სასამართლოში ჯიმშერ ბერიძე მხოლოდ დაინტერესებულ პირის სტატუსით მონაწილეობდა.

2016 წლის ივნისში ქუთაისის სააპელაციო სასმართლომ განიხილა და ძალაში დატოვა მოსამართლე ჯუმბერ ბეჟანიძის მიერ მიღებული გადაწყვეტილება. ჯიმშერ ბერიძემ უზენაეს სასამართლოს მიმართა, სადაც მას საქმის წარმოებაში მიღებაზე უარი უთხრეს.

„ხელვაჩაურის გამგეობა ვალდებულია აღადგინოს უკანონოდ გათავისუფლებული თანამშრომელი და გადაუხადოს განაცდური“, – გვითხრა ანა მდირაძემ, „ახალგაზრდა იურისტთა ასოციაციის“ იურისტმა. მისი შეფასებით, გამგეობას აქვს უფლება გაათავისუფლოს თანამშრომელი, ამ შემთხვევაში ჯიმშერ ბერიძე, რომელიც კონკურსის წესით დაინიშნა.

აქვს თუ არა უფლება ჯიმშერ ბერიძეს, რომელმაც ვაკანტური ადგილი კონკურსის შედეგად დაიკავა, იდავოს სასამართლოში ხელვაჩაურის გამგეობის წინააღმდეგ – ანა მდინარაძე ამბობს, რომ აქვს.

„ამ კუთხით კანონმდებლობა მოწესრიგებული არ არის. კონკურსის წესით დანიშნულ პირს აქვს უფლება მიმართოს სასამართლოს, თუმცა კანონი საჯარო სამსახურის შესახებ ითვალისწინებს შრომითი ურთიერთობის შეწყვეტას იმ შემთხვევაში, როცა სასამართლოს გადაწყვეტილებით უკანონოდ ფასდება იმავე პოზიციაზე მის დანიშვნამდე მომუშავე პირის გათავისუფლება“, – გვითხრა ანა მდინარაძემ.

ჯიმშერ ბერიძემ „ბათუმელებს“ უთხრა, რომ სასაუბროდ არ სცალია. რაც შეეხება განაცდურს – ხელვაჩაურის გამგეობას ამ დროისთვის ნადიმ ვარშანიძის უკანონო გადაწყვეტილებისთვის დაახლოებით 10 ათასი ლარი აქვს გადასახდელი.

„საერთაშორისო გამჭვირვალობა – საქართველო” უმაღლესი საბჭოს საკონსტიტუციო, იურიდიულ და საპროცედურო საკითხთა კომისიას მიმართავს, უახლოეს სხდომაზე იმსჯელოს უმაღლესი საბჭოს დეპუტატების: ზაზა ოქუაშვილისა და დავით თედორაძის ინტერესთა შეუთავსელობის ფაქტების შესახებ; მოუწოდებს უმაღლესი საბჭოს დეპუტატებს: გიორგი ცინცქილაძეს, გიორგი მანველიძეს, გია აბულაძეს, ილია ვერძაძეს უმოკლეს დროში შეიტანონ ცვლილებები წარდგენილ ქონებრივ დეკლარაციებსა და დოკუმენტში ასახონ გასულ წელს მიღებული შემოსავალი; საჯარო სამსახურის ბიუროს უფროსს – დაიწყოს ადმინისტრაციული წარმოება საბჭოს იმ წევრებისთვის სანქციების დასაკისრებლად, რომელთაც კანონით გათვალისწინებულ ვადაში ან/და სრულად არ წარუდგენიათ ქონებრივი დეკლარაცია – ამაზე დღეს, 23 თებერვალს, გამართულ ბრიფინგზე „საერთაშორისო გამჭვირვალობა – საქართველოს“ ბათუმის ოფისში მალხაზ ჭკადუამ ისაუბრა, ორგანიზაციის რეგიონული ოფისების მენეჯერმა. ორგანიზაციამ დღეს აჭარის უმაღლესი საბჭოს მეოთხე მოწვევის დეპუტატების ბიზნესინტერესების შესახებ კვლევა წარმოადგინა.

„საერთაშორისო-გამჭვირვალობა საქართველოს“ კვლევის შედეგად გამოიკვეთა, რომ აჭარის უმაღლესი საბჭოს წევრებს – ზაზა ოქუაშვილსა და დავით თედორაძეს ინტერესთა შეუთავსებლობა აქვთ, საბჭოს რამდენიმე წევრთან დაკავშირებული კომპანიები აქტიურად მონაწილეობდნენ ადგილობრივი თვითმმართველობის ორგანოებისა და სხვა შემსყიდველი ორგანიზაციების მიერ გამოცხადებულ სახელმწიფო შესყიდვებში, ხოლო ნუგზარ სურმანიძესთან, გიორგი ცინცქილაძესთან, ხვიჩა შარაშიძესთან და გია აბულაძესთან დაკავშირებულ შპს-ებთან ათეულობით პირდაპირი შესყიდვის ხელშეკრულებებიც გაფორმდა. ასევე, უმაღლესი საბჭოს წევრების ნაწილს კანონით დადგენილ ვადებში არ წარმოუდგენიათ ქონებრივი დეკლარაცია.

[highlight color=red ] უმაღლესი საბჭოს წევრები, რომელთა ინტერესები სახელმწიფო შესყიდვებს უკავშირდება [/highlight]

ნუგზარ სურმანიძე – უმაღლესი საბჭოს ჯანდაცვისა და სოციალური დაცვის საკითხთა კომისიის თავმჯდომარე მედიკამენტებისა და სამედიცინო მოწყობილობების იმპორტიორი კომპანია „ვიტაფარმის” 10%-იანი წილის მფლობელია. 2017 წლის 20 იანვარს შევსებულ ქონებრივ დეკლარაციაში სურმანიძეს მითითებული აქვს, რომ აღნიშნულ კომპანიიდან 2016 წელს 2850 ლარი მიიღო.

აღნიშნულმა შპს-მ სამკურნალო დაწესებულებების მიერ გამოცხადებულ 48 ტენდერში გაიმარჯვა და ჯამში 3 მილიონზე მეტი ლარის შემოსავალი მიიღო, მათ შორის 2012-2016 წლებში, როდესაც ნუგზარ სურმანიძე აჭარის ავტონომიური რესპუბლიკის ჯანმრთელობისა და სოციალური დაცვის მინისტრი იყო, მანამდე კი სურმანიძე ამავე უწყების მინისტრის მოადგილე იყო. 48 ტენდერში, სადაც კომპანიამ გაიმარჯვა, „ვიტაფარმს“ 27-ში კონკურენტი არ ჰყოლია.

შპს „ვიტაფარმთან” აჭარაში მოქმედი სამედიცინო და სხვა საჯარო დაწესებულებები აქტიურად აფორმებდნენ პირდაპირი შესყიდვის ხელშეკრულებებსაც: 2012 წლის აპრილიდან 2016 წლის დეკემბრის ჩათვლით, კომპანიას 44 პირდაპირი მიყიდვის ხელშეკრულებებით მიღებული აქვს 73 000 ლარზე მეტი. 44 ხელშეკრულებიდან მხოლოდ 5 ითვალისწინებდა 5 000 ლარზე მეტი ღირებულების მომსახურების გაწევას.

შპს „ვიტაფარმას“ მომსახურების შემსყიდველებს შორის ბათუმის რესპუბლიკური კლინიკური საავადმყოფო ლიდერობს.
ხვიჩა შარაშიძე – საჯარო რეესტრის მონაცემებით, შარაშიძე რამდენიმე სამშენებლო კომპანიის მეწილეა: „დუპლესი – სამშენებლო კომპანიაში”,„დუპლექსში”, „ვოქსში”, „ჩემს სახლში” აჭარის უმაღლესი საბჭოს წევრი 50%-იან წილებს ფლობს. აღნიშნული კომპანიები ბათუმში საცხოვრებელ სახლებს აშენებენ. ქონებრივ დეკლარაციაში აღნიშნულია, რომ შარაშიძემ „დუპლექსიდან” 2016 წელს, შემოსავლის სახით, 143 675 ლარი მიიღო.

დასახელებული კომპანიებიდან ერთ-ერთი – „ვოქსი“ 2012 წელს აქტიურად აფორმებდა პირდაპირი მიყიდვის ხელშეკრულებებს აჭარის ფინანსთა და ეკონომიკის სამინისტროსთან, კომპანიამ სარესტორნო მომსახურების 21-ჯერ გაწევის სანაცვლოდ უწყებისგან 36 000-ზე მეტი ლარი მიიღო.

გიორგი ცინცქილაძე – 2016 წლის 12 დეკემბრამდე შპს „ხელვაჩაურის საგზაოს“ დირექტორი იყო.

გიორგი ცინცქილაძის დირექტორობის დროს „ხელვაჩაურის საგზაომ“ 34 სახელმწიფო ტენდერში მიიღო მონაწილეობა, მათგან 25-ში გაიმარჯვა. ამ ტენდერებიდან 19-ში „ხელვაჩაურის საგზაოს“ კონკურენტი არ ჰყოლია – ყველა კონტრაქტი კომპანიამ აჭარის ავტონომიური რესპუბლიკის საქვეუწყებო დაწესებულებასთან – საავტომობილო გზებისა და სამელიორაციო სისტემების მართვის დეპარტამენტთან გააფორმა. ჯამში კომპანიამ ელექტრონული ტენდერების გზით 1 782 642 ლარი მიიღო.

ამავე დეპარტამენტმა 2012 წლის სექტემბრიდან 2015 წლის აგვისტოს ჩათვლით, „ხელვაჩაურის საგზაოს“ პირდაპირი შესყიდვის 9 ხელშეკრულება გაუფორმა – ჯამში კომპანიამ სამშენებლო სამუშაოების გაწევისთვის აღნიშნულ წლებში პირდაპირი შესყიდვის გზით 384 206 ლარი მიიღო.

გია აბულაძე – „ერთიანი ნაციონალური მოძრაობის” პროპორციული სიით აჭარის უმაღლეს საბჭოში არჩეული წევრი გია აბულაძე, საბჭოს ოფიციალურ ვებგვერდზე გამოქვეყნებული ინფორმაციის თანახმად, 2012 წლის 20 ნოემბრიდან 2014 წლის 14 მარტის ჩათვლით, შპს „ოცნების“ დირექტორი იყო. ეს შპს 1996 წელს დაფუძნდა, სამეურნეო საქონელს ყიდის და კომერციულ საქმიანობას ეწევა.

შპს „ოცნება“, კონკურენციისა და შესყიდვების სააგენტოს მონაცემებით, 7 ელექტრონულ ტენდერში მონაწილეობდა, საიდანაც ორში გაიმარჯვა და მომსახურების გაწევის სანაცვლოდ, 10 880 ლარი მიიღო. გაცილებით მეტია იმ ხელშეკრულებათა რაოდენობა, რომელიც პირდაპირი შესყიდვის წესით გაფორმდა შპს-თან: 2012 წლის 26 მარტიდან 2016 წლის 18 ნოემბრის ჩათვლით, სხვადასხვა სახელმწიფო დაწესებულებასთან შპს „ოცნებამ” მომსახურების პირდაპირი გზით გაწევის მიზნით, 62 ხელშეკრულება გააფორმა, ჯამში 44 026 ლარი მიიღო, მათ შორის გია აბულაძის დირექტორობის დროს გაფორმდა 19 პირდაპირი შესყიდვის ხელშეკრულება ჯამური ღირებულებით 11 438 ლარი. არც ერთი პირდაპირი შესყიდვის ხელშეკრულება 5 000 ლარზე მეტი ღირებულების მომსახურების გაწევას არ ითვალისწინებდა.

გია აბულაძე 2010-2012 წლებში ავტონომიური რესპუბლიკის განათლების, კულტურისა და სპორტის მინისტრი იყო. მასთან დაკავშირებული კომპანიის – „ოცნების” პირდაპირი შესყიდვების უმრავლესობა სწორედ ზოგადსაგანმანათლებლო, სასპორტო და სახელოვნებო სკოლებისთვის მომსახურების გაწევას ითვალისწინებდა. „ოცნების” დირექტორობის დროს გია აბულაძის მიერ გაფორმებული 19-ვე პირდაპირი მიყიდვის ხელშეკრულების ხელმომწერები ზემოდასახელებული სკოლების, ასევე ბათუმის საზღვაო აკადემიის, აჭარის განათლების ფონდის, კოლეჯ “ბლექსის” ადმინისტრაციის ხელმძღვანელები არიან.

გია აბულაძე სხვა კომპანიის დირექტორიც იყო – აქტიური წინასაარჩევნო კამპანიის დაწყებამდე, 2016 წლის 1-ელ აგვისტოს, კომპანია „ჯიაიემჯი აპარტმენტის” ხელმძღვანელობიდან გადადგა. 2013 წლის 19 ივლისს რეგისტრირული შპს-ს 100%-იანი წილი ავსტრიაში რეგისტრირებულ კომპანია GIMG-ს ეკუთვნის და საქმიანობის სფერო გასართობი ღონისძიებების ორგანიზებაა. 2014 წლის 29 აგვისტოს აღნიშნულ კომპანიასთან, გია აბულაძის დირექტორობის დროს, ბათუმის კულტურის ცენტრმა მომსახურების პირდაპირი შესყიდვის ხელშეკრულება გააფორმა: „ჯიაიემჯი აპარტმენტს”, 1500 ლარის მიღების სანაცვლოდ, ბათუმობის დღესასწაულზე მიწვეული სტუმრების ფურშეტით გამასპინძლება დაევალა.

უცნობია, რა თანხა მიიღო გია აბულაძემ „ჯიაიემჯი აპარტმენტის” დირექტორობიდან 2016 წლის 1-ელ აგვისტომდე, რადგან 2017 წლის 23 იანვარს შევსებულ ქონებრივ დეკლარაციაში ამ კომპანიიდან მიღებულ შემოსავალზე არაფერია მითითებული, რაც წინა ანალოგიური შემთხვევების მსგავსად, კანონის მოთხოვნათა უგულებელყოფაა.

კვლევაში ასევე აღნიშნულია, რომ იმ კომპანიების წარმომადგენლებმა, რომლებიც კავშირში არიან უმაღლესი საბჭოს ზოგიერთ წევრთან, პოლიტიკური შემოწირულებების სახით, თანხა ძირითადად 2012 წლის საპარლამენტო არჩევნების წინა პერიოდში გადარიცხეს. 2016 წელს კი უმაღლესი საბჭოს დეპუტატებთან დაკავშირებულ პირებს პოლიტიკური შემოწირულება არ განუხორციელებიათ.

სრული კვლევა იხილეთ აქ.

ფოტოზე: მალხაზ ჭკადუა

ამავე თემაზე:

ვინ უნდა რეაგირებდეს დეპუტატ დავით თედორაძის მიერ ჩადენილ კანონდარღვევაზე

გაზრდილი ბიუჯეტი, ანუ “ცისფერი მთები” აჭარის მწერალთა კავშირში

დღეს, 23 თებერვალს, ბათუმში, სასტუმრო „ჰილტონში“, საქართველოს სტრატეგიული კვლევებისა და განვითარების ცენტრი, განათლების განვითარების და დასაქმების ცენტრთან თანამშრომლობით, მართავს ყოველწლიურ სტუდენტურ კონკურსს „სტუდენტები სოციალური მეწარმეობის მხარდასაჭერად“.

კონკურსი 2012 წლიდან იმართება და 2017 წელს ის განხორციელდება ევროკავშირის დაფინანსებით მიმდინარე პროექტის ფარგლებში „სოციალური მეწარმეობა – ინოვაციური მიდგომა ეკონომიკური და სოციალური ცვლილებებისათვის“.

კონკურსის ფარგლებში, ახალციხეში, ბათუმში, ქუთაისსა და თბილისში დაიგეგმა სემინარები და გაცნობითი შეხვედრები სოციალური მეწარმეობის თემაზე.

კონკურსში მონაწილეობის მიღება შეუძლიათ საქართველოს აკრედიტირებული უმაღლესი სასწავლებლების სტუდენტებს, რომლებიც ირიცხებიან ბაკალავრიატის ან მაგისტრატურის ნებისმიერ სასწავლო პროგრამაზე და კურსზე.

კონკურსი რამდენიმე ეტაპად იმართება და მოიცავს სტუდენტებისთვის როგორც თეორიული ცოდნის მიწოდებას სოციალური მეწარმეობის თემასთან დაკავშირებით, ისე პრაქტიკულ ღონისძიებებს.

ოფიციალური ინფორმაციით, კონკურსში მონაწილეობას შერჩეული 12 გუნდი მიიღებს. კონკურსის ფორმატი არსებული სოციალური საწარმოს პრობლემური ამოცანის გადაწყვეტას გულისხმობს. 12 გუნდიდან შეირჩევა 4 საუკეთესო და თითოეული მათგანი მიიღებს 1500-ლარიან დაფინანსებას მათი თეორიული პროექტების პრაქტიკაში განსახორციელებლად.

ფინალურ ეტაპზე კი გამოვლინდებიან ჟიურის რჩეულები და 1 გამარჯვებული სტუდენტური გუნდი.

კონკურსში მონაწილეობა უფასოა და ღონისძიებებით გათვალისწინებულ ხარჯებს დაფარავენ ორგანიზატორები.

ბათუმის რუსთაველის სახელმწიფო უნივერსიტეტის ოთხმა პროფესორმა, რუსთაველის ეროვნული სამეცნიერო ფონდის გრანტი მოიპოვა.

ფონდმა დააფინანსა ფუნდამენტური და გამოყენებითი კვლევების პროფესორების: მამია ფაღავას, მალხაზ ჩოხარაძის, შოთა მამულაძისა და მაია ვანიძის სამეცნიერო პროექტები.

ბსუ-ს ადმინისტრაციის ინფორმაციით, შოთა მამულაძე „ისტორიული ჭანეთის ცენტრალურ ნაწილში დაცული ქართული კულტურული მემკვიდრეობის ძეგლებზე“ იმუშავებს, მამია ფაღავას ხელმძღვანელობით სამეცნიერო პროექტი „ტაო“ (ისტორიულ-ფილოლოგიური გამოკვლევა) განხორციელდება,  მალხაზ ჩოხარაძის ხელმძღვანელობით კი – „მარადიდი“.

აქედან მხოლოდ ერთი – მაია ვანიძე იმუშავებს საბუნებისმეტყველო მეცნიერებების მიმართულებით, თემაზე – „თაფლისა და ღვინის ქიმიური შემადგენლობის შესწავლა მაღალი წნევის სითხური ქრომატოგრაფირებით“. პროექტი  ორწლიანია და ბიუჯეტი 233 ათასი ლარს შეადგენს.

ოფიციალური ინფორმაციით, პროექტის – „მარადიდი“ და „ტაო“-ს  ბიუჯეტი 149 700 ლარს შეადგენს. ხოლო შოთა მამულაძის პროექტი 150 000 ლარით დაფინანსდება.

აჭარის ფინანსთა და ეკონომიკის სამინისტროს მიერ დაფუძნებული შპს „ჰიგიენა 2009“-ის ხელმძღვანელობას დიდი ოდენობით სახელმწიფო თანხის მითვისება ედება ბრალად. საუბარია ნაგავსაყრის პროექტზე, რომელიც ქობულეთში, სოფელ ცეცხლაურის ტერიტორიაზე უნდა აშენებულიყო.

საქართველოს ფინანსთა სამინისტროს საგამოძიებო სამსახურის მიერ გავრცელებულ ინფორმაციაში ვკითხულობთ:

„2017 წლის 21 თებერვალს დაიწყო გამოძიება სისხლის სამართლის საქმეზე, დანაშაულის ჩადენის ფაქტზე, რაც გათვალისწინებულია  საქართველოს სისხლის სამართლის კოდექსის 182 – ე მუხლის მე – 2 ნაწილის „დ“  და მე-3 ნაწილის „ბ“ ქვეპუნქტით, რაც გულისხმობს განსაკუთრებით დიდი ოდენობით სახელმწიფოს კუთვნილი თანხის მართლსაწინააღმდეგოდ მითვისებას სამსახურებრივი მდგომარეობის გამოყენებით“.

საგამოძიებო სამსახურში „ბათუმელებს“ უთხრეს, რომ სახელმწიფო შპს-ს ხელმძღვანელი პირები იმყოფებიან მიმალვაში და „ტარდება ყველა ოპერატიული, გადაუდებელი ღონისძიება მათ დასაკავებლად“.შპს-ეს ხელმძღვანელი ირაკლი ცეცხლაძე იყო.

„ახლა ამ შპს-ს დირექტორად დაინიშნა გიორგი ლომთათიძე. ის აჭარის მთავრობის პრესასთან და საზოგადოებასთან ურთიერთობის დეპარტამენტის უფროსის, სოფიო გუჯაბიძის მეუღლეა [გიორგი ლომთათიძე აქამდე ერთ-ერთ კერძო კომპანიაში მუშაობდა-ავტ]. ჩვენი აზრით, საქმე გვაქვს მიზანმიმართულ კორუფციულ სქემასთან. ამ საქმეზე ინფორმაცია გვაქვს ბოლო ორი დღეა, მაგრამ სამინისტრო არ ადასტურებდა შპს „ჰიგიენა 2009“-ის დირექტორის, ირაკლი ცეცხლაძის გაუჩინარებას. ჩვენი ინფორმაციით, მან დაახლოებით 5 მილიონი მიითვისა“, – ამბობს ელგუჯა ბაგრატიონი, „ერთიანი ნაციონალური მოძრაობის“ წევრი.

მას შემდეგ, რაც ჟურნალისტებისთვის ცნობილი გახდა ენმ-ის წევრის ელგუჯა ბაგრატიონის ბრიფინგის შინაარსის შესახებ, ამ საკითხზე პარალელურ რეჟიმში ბრიფინგი გამართა აჭარის ფინანსთა და ეკონომიკის მინსიტრმა, რამაზ ბოლქვაძემ:

„შპს „ჰიგიენა 2009-ში“ აღმოჩენილი დარღვევებისა და ფინანსური შეუსაბამობების შესახებ ჩვენ დაუყოვნებლივ ვაცნობეთ საქართველოს ფინანსთა სამინისტროს საგამოძიებო სამსახურს. საქმე აღძრულია სისხლის სამართლის კოდექსის 182-ე მუხლით, მიმდინარეობს გამოძიება. მინდა განვაცხადო: სახელმწიფო სახსრების მითვისება და სახელმწიფოს ხარჯზე ხელის უკანონოდ მოთბობა არავის შერჩება. ყველა კანონდამრღვევი კანონის მთელი სიმკაცრით დაისჯება. კიდევ ერთხელ მინდა ხაზგასმით აღვნიშნო, ამ ეტაპზე მიმდინარეობს გამოძიება და საქმეზე ობიექტური ჭეშმარიტება შესაბამისი კომპეტენტური ორგანოების მიერ იქნება დადგენილი.დაველოდოთ გამოძიების შედეგებს. აქვე მინდა აღვნიშნო,რომ ნაგავსაყრის პროექტის განხორციელება ჩვეულ რეჟიმში გაგრძელდება.“

რამაზ ბოლქვაძემ უპასუხოდ დატოვა „ბათუმელების“ კითხვები, როდის მიმართა საგამოძიებო სამსახურს, რა ოდენობის თანხის მითვისებაზეა საუბარი, ვინ იძებნება კონკრეტულად ან ვინ დაინიშნა სახელმწიფო შპს-ს ახალ დირექტორად.

რაც შეეხება კომპანიაში ახალი ხელმძღვანელის დანიშვნას, გიორგი ლომთათიძემ „ბათუმელებს“ დაუდასტურა, რომ ის დღეს დილით დაინიშნა „ჰიგიენა 2009“-ის ხელმძღვანელად. გვითხრა, რომ გამოძიების და წინა დირექტორის შესახებ ინფორმაცია არ აქვს. გიორგი ლომთათიძე ადასტურებს, რომ იგი ნამდვილად სოფიო გუჯაბიძის მეუღლეა.

ამავე თემაზე:

ახალი ნაგავსაყარი და განსახლების გეგმა

ახალი ნაგავსაყრელი – ერთლარიანი სხვაობა ტენდერში

უმაღლეს საბჭოს ამ დრომდე არ განუხილავს იმ დეპუტატების საქმე, რომლებიც სხვა ორგანიზაციებშიც მუშაობენ და დამატებით ანაზღაურებას იღებენ. ნინო ჩხეტია, უმაღლესი საბჭოს იურიდიული კომისიის თავმჯდომარე „ბათუმელებთან“ ამბობს, რომ თითოეული დეპუტატის ინტერესთა შეუთავსებლობაზე კომისია გაფართოებულ სხდომაზე, მომავალ კვირას იმსჯელებს.

ერთ-ერთი ასეთი დეპუტატი, ვისზეც „ბათუმელები“ წერდა, დავით თედორაძეა. ის ჟურნალ „ჭოროხის“ რედაქტორის მოადგილეა და ხელფასის სახით ხელზე 554 ლარს იღებს. „ჭოროხს“ გამოსცემს „აჭარის მწერალთა სახლი“ და ის აჭარის განათლების სამინისტრომ გასული წლის ბოლოს დააფუძნა.

„ახალაზრდა იურისტთა ასოციაცია“ დავით თედორაძის შემთხვევას კანონდარღვევად აფასებს, რადგან დეპუტატი რედაქციაში „მენეჯერული ფუნქციის ანაზღაურებისთვის“ იღებს ხელფასს. თავად დავით თედორაძე მიიჩნევს, რომ კანონს არ არღვევს. მისი ანაზღაურება უმაღლეს საბჭოში 4652 ლარია.

უმაღლესი საბჭოს კიდევ ერთი დეპუტატი, ილია ვერძაძე პროფესიული კავშირების აჭარის ორგანიზაციის ხელმძღვანელის პოსტს ინარჩუნებს. დეპუტატმა „ბათუმელებს“ არ უთხრა, იღებს თუ არა ანაზღაურებას, როგორც პროფკავშირის ხელმძღვანელი.

„აჭარის რეგლამენტი უშვებს იმის შესაძლებლობას, რომ დეპუტატის ინტერესთა შეუთავსებლობაზე გავრცელდეს საქართველოს კანონის მოქმედება, ხოლო ასეთ კანონს წარმოადგენს „საჯარო სამსახურში ინტერესთა შეუთავსებლობისა და კორუფციის შესახებ“ საქართველოს კანონი, სადაც განმარტებულია, რომ აჭარის არ უმაღლესი საბჭოს წარმომადგენელს (დეპუტატს) უფლება არა აქვს ასრულებდეს რაიმე ანაზღაურებად სამუშაოს, გარდა სამეცნიერო, პედაგოგიური ან შემოქმედებითი საქმიანობისა“, – ამბობს გიორგი ხიმშიაშვილი, ახალგაზრდა იურისტთა ასოციაციის აჭარის ფილიალის ხელმძღვანელი.

ვინ უნდა ახდენდეს რეაგირებას, როცა დეპუტატი კანონს არღვევს? – კითხვაზე გიორგი ხიმშიაშვილმა გვიპასუხა, რომ მხოლოდ უმაღლეს საბჭოს შეუძლია რეაგირება და სხვა მექანიზმი კანონმდებლობაში გაწერილი არ არსებობს.

იურისტის განმარტებით, საკითხი თავდაპირველად იურიდიულ და საპროცედურო საკითხთა კომისიამ უნდა შეისწავლოს, ფაქტის დადასტურების შემთხვევაში კი, საკითხი კენჭისყრაზე უნდა გავიდეს. „საბოლოოდ უმაღლესმა საბჭომ უნდა გადაწყვიტოს, შეუწყვეტს თუ არა უფლებამოსილებას დეპუტატს, რომელიც არღვევს კანონს „ინტერესთა შეუთავსებლობის შესახებ“.

„ჯერ დავით თედორაძის საკითხით არ დავინტერესებულვართ“, – ამბობს ნინო ჩხეტია, უმაღლესი საბჭოს იურიდიული კომისიის თავმჯდომარე. ის მიიჩნევს, რომ ვიდრე კომისია გადაწყვეტილებას არ მიიღებს, საკუთარი პოზიცია არ უნდა გააჟღეროს.

ნინო ჩხეტიამ გვითხრა ის, რომ ამ კუთხით საქართველოს პარლამენტის პრაქტიკას გაეცნო: „იქ ასეთი განსაკუთრებული შეზღუდვები არსებობს. ერთადერთი შეზღუდვა, რაზეც შეიძლება გავრცელდეს სამართლებრივი მსჯელობა, არის ანაზღაურების მიღება. ამ საკითხებზე აუცილებლად ვიმსჯელებთ“.

ქალაქის საკრებულოს თავმჯდომარის განცხადება, რომელიც გაზეთ „ბათუმელების“ 21.02.2017 წლის სიახლეების გვერდზე გამოქვეყნდა, სერიოზულ შეშფოთებას იწვევს. დემოკრატიული ღირებულებებისა და ადამიანზე ორიენტირებული პოლიტიკის გამტარებელ სახელმწიფოში არჩეული საჯარო პირის მიერ საკუთარი ამომრჩევლების/აქტიური ადამიანების მიმართ გამოხატული მსგავსი დამოკიდებულება შოკისმომგვრელია, რომ არაფერი ითქვას ქალაქის საკრებულოს თავმჯდომარის პოზიციაზე საკუთარი ქალაქის ისტორიისა და მემკვიდრეობის მიმართ.

ბ-ნი სირაბიძის განცხადების შინაარსი ცდება ერთი კონკრეტული თანამდებობის პირის კვალიფიკაციას. უფრო მეტიც, მისი განცხადების სტილი და პათოსი გვაფიქრებინებს, რომ საკრებულოს თავმჯდომარეს წარმოდგენა არ აქვს საკუთარ უფლემოსილებებსა და მოქალაქეთა წინაშე აღებულ პასუხისმგებლობაზე.

ამონარიდი ლაშა სირაბიძის განცხადებიდან:

„რაც შეეხება აქტივისტებს, რომელთა ინტერესიც ისტორიული სახლების გადარჩენაა, საკრებულოს თავმჯდომარის თქმით, ისინი სერიოზულ კომენტარსაც კი არ იმსახურებენ, რადგან ეს ის ხალხია, ვისაც „რეალურად არ უნდა საქართველოს განვითარება“ – განცხადების ეს ნაწილი, ისევე როგორც მთელი განცხადება  ალოგიკურია, რადგანაც, ერთი მხრივ, თავადაც აღიარებს, რომ აქტივისტები ისტორიული შენობების გადარჩენას ცდილობენ, მეორე მხრივ კი ასეთი ღირებულების მქონე მოქალაქეები მას მიაჩნია საქართველოს განვითარების მოწინააღმდეგეებად (ისტორიული და კულტურული  მემკვიდრეობა კი ამ ქვეყანაში დაცულია კანონით). გამოდის, რომ კანონს და  მოქალაქეებს  სახელმწიფო მართვის ინსტიტუტი  უპირისპირდება.

ლაშა სირაბიძე ამ შემთხვევაში წარმოადგენს არჩევითი ორგანოს ხელმძღვანელს, ამიტომაც ჩვენ მის განცხადებას აღვიქვამთ ბათუმის საკრებულოს პოზიციად. განვითარებული დემოკრატიის ქვეყანაში ასეთი შინაარსის განცხადება გამოიწვევდა პირის პოლიტიკურ პასუხისმგებლობას. როგორც დანიშნულ, ასევე არჩეულ თანამდებობის პირებს არ  აქვთ უფლება თავისი განცხადებებით აქტიური მოქალაქეების ჯგუფების  მარგინალიზებას შეუწყოს ხელი. მოქალაქეების პატივისცემა კი მათი არჩევანი კი არა, მათი ვალდებულებაა. გამომდინარე აქედან ჩვენ ველოდებით ბათუმის საკრებულოს სხვა წევრების განცხადებებს, გვაინტერესებს, ისინი ემიჯნებიან თუ ეთანხმებიან ლაშა სირაბიძის განცხადებას.

ჩვენ, „დაიცავი ძველი ბათუმის“ წევრებს, გვაქვს უფლება ვიცოდეთ ქალაქისა და რეგიონის მმართველ გუნდში რა დამოკიდებულება აქვთ მათი თანაპარტიელის – ლაშა სირაბიძის ამ საგანგაშო განცხადების თაობაზე .

საინიციატივო ჯგუფი „დაიცავი ძველი ბათუმი“

პირველი საქმე, რომელზეც მოსამართლე მანანა კობახიძეს მოუწევს გადაწყვეტილების მიღება, სტუდენტების სარჩელია. საკონსტიტუციო სასამართლოს მეორე კოლეგიამ, რომლის შემადგენლობაშიც მანანა კობახიძე 15 თებერვლიდან შევიდა, დღეს მოისმინა მხარეთა არგუმენტები „აუდიტორია 115“-ის სარჩელზე.  გადაწყვეტილება სარჩელის დასაშვებობაზე კოლეგიას ჯერ არ მიუღია.

„არ შეიძლება ერთ სტუდენტურ გაერთიანებას ჰქონდეს ექსკლუზივი“,- მიმართა მოსამართლეებს გიორგი გოცირიძემ, საია-ს იურისტმა. იგი საკონსტიტუციო სასამართლოში „აუდიტორია 115“-ის ინტერესებს იცავს.

მოსარჩელეები მიიჩნევენ, რომ უნივერსიტეტის აკადემიურ საბჭოში ჩართვის უფლება მხოლოდ სტუდენტურ თვითმმართველობას არ უნდა ჰქონდეს.

დღევანდელ სხდომაზე გიორგი გოცირიძემ რამდენიმე არგუმენტი დაასახელა იმის საჩვენებლად, თუ რატომ უნდა მიიღოს გადაწყვეტილება სასამართლომ ამ საკითხზე. ერთ-ერთი არგუმენტი „ბოლონიის პროცესი“, ასევე, 2003 წელს მიღებული „ბერლინის კომუნიკეა“, სადაც წერია, რომ სტუდენტურმა გაერთიანებებმა მაქსიმალურად ბევრი ღონისძიება უნდა განახორციელონ უნივერსიტეტის მართვაში სტუდენტების მაქსიმალური ჩართვის მისაღწევად.

მოსარჩელე ხაზს უსვამს კანონის შეზღუდვას – თუკი არ გახდები სტუდენტური თვითმმართველობის წევრი, ვერ გახდები აკადემიური საბჭოს წევრი. ასეთია პრაქტიკა იმის მიუხედავად, რომ სტუდენტური თვითმმართველობა არის ნებაყოფლობითი გაერთიანება, იგი არ არის იურიდიული პირი და არც უნივერსიტეტის სტრუქტურული ერთეულია.

„უნივერსიტეტის ადმინისტრაციამ უნდა შექმნას შესაძლებლობა, შეიქმნას სტუდენტური თვითმმართველობა. სხვა ვალდებულება კანონით მას არ აქვს“- უთხრა სასამართლოს პარლამენტის წარმომადგენელმა.

პარლამენტი ამ საქმეში მოპასუხე მხარეა. თუკი საკონსტიტუციო სასამართლო სტუდენტების სარჩელს დააკმაყოფილებს, პარლამენტს მოუწევს ცვლილების შეტანა კანონში „უმაღლესი განათლების შესახებ“.

22 თებერვალს, გვიან ღამით, ბათუმში, ღამის კლუბ ,არენაში“  გაჩენილი ხანძრის შედეგად დაშავებული პირები თბილისში დამწვრობის ცენტრში გადაიყვანეს. სასწრაფო სამსახურის ინფორმაციით, ხანძრის შედეგად ერთი ქალი გარდაიცვალა, ორი ქალი და ერთი მამაკაცი კი სხეულის მძიმე დამწვრობებით მოათავსეს საავადმყოფოში.

სასწრაფო დახმარების სამსახურის ინფორმაციით, ხანძრის შედეგად დაშავებული პირები, სავარაუდოდ საქართველოს მოქალაქეები არიან.

შს სამინისტროს ინფორმაციით, გამოძიება დაწყებულია სსკ-ის 187-ე მუხლის მესამე ნაწილით, რაც გულისხმობს ნივთის დაზიანებას ან განადგურებას ცეცხლის წაკიდებით ან აფეთქებით, რამაც გაუფრთხილებლობით ადამიანის სიცოცხლის მოსპობა გამოიწვია.

აჭარის ჯანდაცვის სამინისტროს ინფორმაციით, დაშავებული პირების მკურნალობის ხარჯებს, სახელმწიფო დაზღვევა აანაზღაურებს.

პარლამენტმა 22 თებერვალს კენჭი უნდა უყაროს კანონპროექტს ფარულ სატელეფონო მოსმენებზე. ახალი მოდელის მიხედვით, ე.წ. „გასაღები“ ახალი საჯარო სამართლის იურიდიული პირის დაქვემდებარებაში გადავა, თუმცა ეს უწყება ანგარიშვალდებული სუს-თან იქნება. სუს-ი, ანუ სახელმწიფო უსაფრთხოების სამსახური დღემდე ახორციელებს ფარულ საგამოძიებო მოქმედებებს, მათ შორის, მოსმენებს.

მეორე „გასაღები“, ანუ კონტროლის ბერკეტი, პერსონალურ მონაცემთა დაცვის ინსპექტორს აქვს. ეს მოდელი საკონსტიტუციო სასამართლომ გასულ წელს ანტიკონსტიტუციურად შეაფასა და პარლამენტს მიმდინარე წლის 31 მარტამდე მისცა დრო ახალი კანონის მისაღებად.

კამპანია „ეს შენ გეხებას“ წევრები მიიჩნევენ, რომ თუკი უმრავლესობა მხარს დაუჭერს იურიდიული კომიტეტის მიერ წარმოდგენილ მოდელს, ხელისუფლება შეუსრულებელს დატოვებს საკონსტიტუციო სასამართლოს გადაწყვეტილებას.

„ბათუმელები“ „ეს შენ გეხებას“  წევრს, „საერთაშორისო გამჭვირვალობა საქართველოს“ საპარლამენტო მდივანს, ლიკა საჯაიას ესაუბრა.

რა მოლოდინი გაქვთ, დაამტკიცებს პარლამენტი კანონპროექტს „სატელეფონო მოსმენებზე“? 

იმის გათვალისწინებით, რომ „ქართულ ოცნებას“ ჰყავს უმრავლესობა, ეს კანონპროექტი იქნება მიღებული, რაც ძალიან სამწუხაროა. წინა კვირას, როცა ამ კანონპროექტის განხილვა იყო, დარბაზი იყო ცარიელი. უმრავლესობიდან მხოლოდ ერთი-ორი დეპუტატი იყო წარმოდგენილი. ჩვენ გვქონდა მოლოდინი, რომ ცხარე დისკუსია იქნებოდა ამ თემაზე, რადგან უკანონო მოსმენა ეხება ყველა მოქალაქეს. დისკუსია პარლამენტში ამ თემაზე პრაქტიკულად არ ყოფილა.

იყო თუ არა დისკუსია კანონპროექტზე მუშაობის პროცესში, სადაც კამპანია „ეს შენ გეხება“ ჩაერთო?

არა, არც ამ ეტაპოზე ყოფილა დისკუსია. საკონსტიტუციო სასამართლოს გადაწყვეტილების მიღების შემდეგ იურიდიულმა კომიტეტმა შექმნა სამუშაო ჯგუფი და გაიმართა სამი შეხვედრა. პირველ ორ შეხვედრაზე მიდიოდა ჩვენი და საკონსტიტუციო სასამართლოს კრიტიკა, რომ ეს იყო გაუგებარი გადაწყვეტილება. მესამე შეხვედრის დროს კი, ეს კანონპრექტი წარმოადგინა იურიდიულმა კომიტეტმა.

საკონსტიტუციო სასამართლომ თქვა, რომ კონტროლის მექანიზმი არ იყო საკმარისი. გამოვიდა, რომ ხელისუფლებამ ამ კონტროლის მექანიზმის გაძლიერების ნაცვლად, დაასუსტდა იგი. ვგულისხმობ იმას, რომ პერსონალურ მონაცემთა დაცვის ინსპექტორს არსებული მოდელით ორი გასაღები აქვს. თავდაპირველად უსაფრთხოების სამსახურმა უნდა წარმოადგინოს სასამართლოს გადაწყვეტილება, რითაც დასტურდება, რომ მოსმენა კანონიერია და იღებს ინსპექტორის ნებართვას მოსმენის დაწყებაზე. ინსპექტორის „მეორე გასაღები“ აქტიურდება მაშინ, თუკი დადგინდება, რომ მოსმენამ დადგენილ დროს გადააჭარბა, ან დაირღვა სასამართლოს გადაწყვეტილება სხვა კუთხით.

ახალი მოდელის მიხედვით, ახალდაფუძნებულ საჯარო სამართლის იურიდიულ პირს აღარ ექნება ვალდებულება ინსპექტორის ნებართვა მიიღოს მოსმენის დასაწყებად. ინსპექტორის „გასაღები“ მხოლოდ იმ შემთხვევაში იმუშავებს, თუკი უკანონო მოსმენის ფაქტს დაადგენს პერსონალურ მონაცემთა დაცვის ინსპექტორის აპარატი.

„ეს შეენ გეხებას“ შეთავაზება რა იყო და რა არგუმენტით თქვა მასზე უარი საპარლამენტო უმრავლესობამ? 

ჩვენ შევთავაზეთ იყო შექმნილიყო ახალი უწყება, რომელიც იქნებოდა მაქსიმალურად დამოუკდიებელი და დისტანცირებული უსაფრთხოების სამსახურისგან, რომელიც დღეს ფარულ სატელეფონო მოსმენას ახორციელებს. ეს უწყება განახორციელებდა ფარულ მოსმენას იმ შემთხვევაში, თუკი სუსი წარმოადგენდა სასამართლოს გადაწყვეტილებას იმის შესახებ, რომ მოსმენა იყო საჭირო. ამ ახალი ორგანოს ხელმძღვანელს დანიშნავდა პარლამენტი და ანგარიშვალდებულიც მხოლოდ პარლამენტთან იქნებოდა.

საკონსტიტუციო სასამართლომ თავის გადაწყვეტილებაში თქვა, რომ არ უნდა ჰქონდეს მოსმენის ტექნიკური აღჭურვილობა იმ უწყებას, რომელიც დაინტერესებულია გამოძიების შედეგით. ამჯერად სუს-ის დაქვემდებარებაში არსებულ დეპარატამენტს შეუცვლიან სტატუსს და იქნება საჯარო სამართლის იურიდიული პირი, რომლის ხელმძღვანელსაც აირჩევს კომისია. კომისიის ხელმძღვანელი იგივე უსაფრთხოების სამსახურის უფროსია.

რაც შეეხება უარს ჩვენს შეთავაზებაზე. გვითხრეს, რომ ჩვენ გვინდოდა რაღაც ახალი მონსტრის შექმნა. იყო ასევე არგუმენტი: რატომ უნდა აირჩიოს პარლამენტმა იმ უწყების ხელმძღვანელი, რომელსაც აქვს აღმასრულებელი ფუნქცია. გაუგებარი არგუმენტია, რადგან პარლამენტი ირჩევს მარეგულირებელი კომისიის თავმჯდომარეს, სახალხო დამცველს, პერსონალურ მონაცემთა დაცვის ინსპექტორს და ასე შემდეგ.

ხელისუფლებისგან მოვისმინეთ არგუმენტიც, რომ მოდელი, რაზეც თქვენ საუბრობთ, არ არსებობს ევროპის არც ერთ ქვეყანაში.

ასეა. ევროპის ქვეყნებში ძირითადად „გასაღები“ არის კომუნიკაციების კომპანიების, მობილური ოპერატორების ხელში. ამ გზით ჩვენ არ წავედით, რადგან ვიცოდით, რომ ამაზეც უარს მივიღებდით. უფრო კომპრომისული ვარიანტი ვარჩიეთ. ასე თუ მივუდგებით, დღეს არსებული მოდელიც არის ექსპერიმენტი, რომელმაც ვერ გაამართლა. ევროპის ქვეყნებში არც ესაა აპრობირებული, რომ ორი გასაღებით კონტროლდებოდეს ფარული სატელეფონო მოსმენა.

უფრო შორს თუ წავალთ, უსაფრთხოების სამსახური რომ ახორციელებს მოსმენას, ესეც საბჭოთა ექსპერიმენტი იყო, რომელიც ჩვენ დღემდე ვერ დავშალეთ. ფრაქცია „რესპუბლიკელების“ შეთავაზება იყო, რომ კომუნიკაციების მარეგულირებელ კომისიას ჰქონოდა „გასაღები“, მაგრამ ამაზეც უარი განაცხადა საპარლამენტო უმრავლესობამ. დღეს ხელიუფლებას აქვს არგუმენტი, რომ პერსონალურ მონაცემთა დაცვის ინსპექტორს აქვს „გასაღები“ და ეს არის კონტროლი, მაგრამ უცნობია, როგორ და როდის დაადგენს ინსპექტორი უკანონო მოსმენის ფაქტს.

მაგრამ, თუ უკანონო მოსმენა დაფიქსირდა, ამ ჩანაწერს ხომ ვეღარ წარადგენს საგამოძიებო ორგანო სასამართლოში? 

ასეა, მაგრამ მთავარი რისკი იქმნება მაშინ, როცა სასამართლოს გვერდის ავლით უსმენენ ადამიანებს. ამ პროცესში, როცა სასამართლო გადაწყვეტილებას იღებს მოსმენაზე და სუსი მოსმენას ახორციელებს, რისკი მინიმალურია. ამჯერად რისკი კიდევ უფრო იზრდება, რადგან ახალმა უწყებამ შესაძლოა შექმნას ახალი სტრუქტურული ერთეულები, მაგალითად, რეგიონებში, რაც კიდევ ზრდის შესაძლებლობას, უფლებამოსილება ცალკეულმა პირებმა ბოროტად გამოიყენონ.

რას ნიშნავს ამ კანონპროექტის მიღება?

ეს ნიშნავს იმას, რომ ხელისუფლება არ ასრულებს საკონსტიტუციო სასამართლოს გადაწყვეტილებას, ანუ ის უარს ამბობს კონსტიტუციურ მართლწესრიგზე. გამოდის, რომ პატივს არ ვცემთ კონსტიტუციას. ასეთი რამ დემოკრატიულ ქვეყნებში არ ხდება.

გაასაჩივრებთ თუ არა ახალ კანონს ფარულ მოსმენებზე ისევ საკონსტიტუციო სასამართლოში? 

ამას აღარ ვაპირებთ, რადგან საკონსტიტუციო სასამართლო დიდი ალბათობით ისევ იმავეს იტყვის, რომ ეს არის ანტიკონსტიტუციური, მაგრამ სასამართლო ვერ მიიღებს ახალ კანონს პარლამენტის ნაცვლად. ჩვენ ვაპირებთ მივმართოთ ევროპის ადამიანის უფლებათა დაცვის სასამართლოს. ამ კუთხით უკვე არსებობს გადაწყვეტილება „ზახაროვი რუსეთის წინააღმდეგ“. ცუდი ისაა, რომ ეს ყველაფერი დროში გაიწერება. პარლამენტის გადაწყვეტილება არ ნიშნავს, რომ პროცესი დასრულდა. არ შეიძლება ამას მოქალაქეები შეეგუონ. ჩვენ უნდა გვქონდეს წითელი ხაზები, რომლების გადაკვეთის უფლება არავის უნდა მივცეთ.

ხვალ, 22 თებერვალს, აუდიტორია #115 საკონსტიტუციო სასამართლოში უმაღლესი განათლების შესახებ კანონში არსებულ საფაკულტეტო საბჭოში არჩევის წესს ასაჩივრებს, რომელიც აუდიტორია #115-ის აზრით დისკრიმინაციულია და ყველა სტუდენტს არ აძლევს საუნივერსიტეტო მართვის პროცესში თანაბარი ჩართულობის საშუალებას.

აუდიტორია #115-ის წევრის, ირაკლი კუპრაძის თქმით, საფაკულტეტო საბჭოში არჩევის წესი დისკრიმინაციულია იმიტომ, რომ უნივერსიტეტის მართვის პროცესში ჩართულობის უფლება აქვს ყველა სტუდენტს თანაბრად, რაც ბოლონიის პროცესის მიერ აღიარებული პრინციპია, თუმცა, უმაღლესი განათლების შესახებ კანონში არსებობს ჩანაწერი, რომლის მიხედვითაც საფაკულტეტო საბჭოში აირჩევიან მხოლოდ ის სტუდენტები, რომლებიც სტუდენტური თვითმმართველობის წარმომადგენლები არიან:

„აუცილებელი წინაპირობა არის ეს, არადა უნდა იყოს პირდაპირი არჩევის წესი, რომელიც ყოველგვარი ჯგუფის, დაჯგუფების და ერთობის გარეშე ყველა სტუდენტს თანაბრად მისცემს პირდაპირი წესით არჩევის შესაძლებლობას, როგორიცაა, მაგალითად, წარმომადგენლობით საბჭოში თსუ-ში“.

არსებულ საკანონმდებლო ხარვეზებზე თავისი დასკვნა  საქართველოს სახალხო დამცველმაც გამოაქვეყნა და ხელისუფლებას  შესაბამისი ცვლილებებისკენ მოუწოდა. თუმცა, როგორც ირაკლი კუპრაძე ამბობს, ხელისუფლების მხრიდან საპასუხო ნაბიჯი დღემდე არ განხორციელებულა.

ხვალ საკონსტიტუციო სასამართლო სარჩელის დასაშვებობაზე იმსჯელებს.

შპს „გოდერძი რიზორტს“ ზურაბ ჭურკვეიძე უხელმძღვანელებს. აჭარის ფინანსთა და ეკონომიკის სამინისტროს ინფორმაციით, ახალი დირექტორი თანამშრომლებს მინისტრმა რამაზ ბოლქვაძემ წარუდგინა.

ზურაბ ჭურკვეიძე აჭარის ფინანსთა და ეკონომიკის სამინისტროში ქონების მართვისა და პრივატიზების დეპარტამენტს ხელმძღვანელობდა. სამინისტროს ინფორმაციით, ზურაბ ჭურკვეიძე წარმატებულად უძღვებოდა თავის საქმეს, ამიტომაც ის ახლა აჭარის მაღალმთიანეთის განვითარებისთვის იმუშავებს.

ყოფილ დირექტორს, ჯემალ ბოლქვაძეს კი, ასევე სამინისტროს ინფორმაციით, მინისტრი რამაზ ბოლქვაძე „სამინისტროს გუნდში“ დასაქმებას დაჰპირდა. თუმცა, კონკრეტულად რა თანამდებობას შეჰპირდნენ მას, ამის შესახებ ჯერ არ არის ცნობილი.

„გოდერძი რიზორტს“-ის 100% წილის მფლობელი აჭარის ავტონომიური რესპუბლიკაა. აჭარის ფინანსთა და ეკონომიკის სამინისტროში კი ამ დროისთვის, მინისტრის ორი მოადგილის თანამდებობაა ვაკანტური.