კომპანია „დარ ბილდინგმა“ ბათუმში, ბარათაშვილის #24-ში, ისტორიული სახლი უნებართვოდ დაანგრია. უკვე რამდენიმე დღეა არასამთავრობო ორგანიზაციები ამ ფაქტს აპროტესტებენ და მათ ძველ ბათუმში მორატორიუმის მოთხოვნით პეტიციაც კი შეიმუშავეს.
„ბათუმელები“ დაინტერესდა ბათუმის საკრებულოს თავმჯდომარის, ლაშა სირაბიძის მოსაზრებით, როგორ შეიძლება საკრებულო დაეხმაროს მოქალაქეებს ისტორიული მნიშვნელობის შენობების გადარჩენაში, მითუმეტეს, რომ სახლი დეველოპერმა მერიასთან შეთანხმების გარეშე დაანგრია.
„საკრებულო არ არის ის ორგანო, რომელიც ვინმეს სჯის“, – ამბობს საკრებულოს თავმჯდომარე. მისივე განმარტებით, ის არ არის მათ რიცხვში, ვისაც ისტორიული სახლების გადარჩენა უნდა, უფრო მათ გულშემატკივრობს, ვისაც ახალი ძველს ურჩევნია:
„კულტურული მემკვიდრეობის ძეგლი არ ყოფილა და შეიძლება ახალი შენობაც ისეთი ფორმით აშენდეს და ისეთი იერსახე მიეცეს, რომ ხვალინდელი ისტორია იქნება“, – ამბობს ლაშა სირაბიძე.
რაც შეეხება აქტივისტებს, რომელთა ინტერესიც ისტორიული სახლების გადარჩენაა, საკრებულოს თავმჯდომარის თქმით, ისინი სერიოზულ კომენტარსაც კი არ იმსახურებენ, რადგან ეს ის ხალხია, ვისაც „რეალურად არ უნდა საქართველოს განვითარება.“
„ …დამოკიდებულება არის კატეგორია ხალხის, რომ საერთოდ მშენებლობის შეჩერებაზეც კი თანახმა არიან და ხვალიდან რომ არაფერი არ აშენდეს, მაგაზეც მზად არიან. ის ჩვენი ოპონენტები, რომლებსაც რეალურად არ სურთ საქართველოს განვითარება და არ აღელვებთ თუნდაც ხვალინდელი ქალაქის ბედი. ამიტომ მაგაზე სერიოზულ პასუხს ვერ გაგცემთ.“
