Batumelebi | რატომ ჩუქნის გამწვანების უფროსის ოჯახის კომპანია მერიას ხეებს რატომ ჩუქნის გამწვანების უფროსის ოჯახის კომპანია მერიას ხეებს – Batumelebi
RU | GE  

რატომ ჩუქნის გამწვანების უფროსის ოჯახის კომპანია მერიას ხეებს

ბათუმის მერიის გამწვანებისა და ლანდშაფტური დაგეგმარების სამსახური ქალაქში ნაჩუქარ ხეებს რგავს. სამსახურის უფროსის, ლევან ჭანუყვაძის თქმით, ხე-მცენარეები მერიას შპს „აგრო დეკორ სერვისმა“ გადასცა.

„16 ხე-მცენარე – ტუია და ტირიფი „აგრო დეკორ სერვისმა“ გადმოგვცა. ეს არ არის ჩვეულებრივი ტირიფები, ხვიარა ტოტები აქვს, ადგილზე გამოყვანილი მცენარეებია, ოღონდ სელექციაა უცხოური.

ხე-მცენარეები ლუკა ასათიანისა და ზუბალაშვილის ქუჩებზე, მაღლივი კორპუსის ირგვლივ დაირგო, რადგან აქ გამწვანება ნაკლებია,“ –  თქვა ლევან ჭანუყვაძემ.

„ბათუმელების“ კითხვაზე, რატომ ჩუქნის კომპანია მცენარეებს მერიას? ლევან ჭანუყვაძე ამბობს: „იმიტომ, რომ ბათუმი იყოს კარგად“.

2016 წლის საჯარო რეესტრის ამონაწერის მიხედვით, „აგრო დეკორ სერვისის“  დირექტორი და მფლობელიც ლევან ჭანუყვაძეა. თუმცა, „ბათუმელებთან“ საუბარში ამბობს, რომ კომპანია ახლა ინგა ირემაძის ანუ მისი ოჯახის წევრის საკუთრებაშია. კომპანია სანერგეებს ფლობს.

გამწვანების სამსახურის უფროსი ამბობს, რომ „აგრო დეკორ სერვისის“ გარდა, მერიას  1 500 ძირი ციტრუსოვანი მცენარე „აგრო სერვის ცენტრმაც“ აჩუქა. ამ მცენარეებით ქალაქში ციტრუსოვანთა ხეივნები გაკეთდება.

„ადგილებს ვეძებთ, ჯერ შერჩეული არ გვაქვს, მანდარინის, ფორთოხლის ხეივნები გაკეთდება, რომელიც აპრობირებულია ევროპაში.  მცენარეები ძალიან ბევრია, ამდენს ალბათ ვერ ავითვისებთ.“

ერთი თვის წინ გამწვანების სამსახურმა  პროექტების შესარჩევად ახალი კამპანია წამოიწყო, – პროექტები სოციალურ ქსელში განათავსა. გამარჯვებული პროექტი „ლაიქების“ რაოდენობით უნდა გამოვლენილიყო. „გამარჯვებული პროექტი გამოვლინდა, რომელმაც „დაახლოებით 150 „ლაიქი“ მიიღო,“ – გვეუბნება სამსახურის უფროსი- „პროექტი „ბათუმი ცენტრალის“ წინ უნდა განხორციელდეს. მეორე პროექტი, რომელიც გვირაბის შემოსასვლელთან გვინდა გაკეთდეს, ახლა სოციალურ ქსელში  გვაქვს  და მოსახლეობის შეფასებებს  დაველოდებით“.

გამწვანების სამსახური მრავალწლიანი მცენარეების შესასყიდად ტენდერის გამოცხადებას ერთ კვირაში აპირებს. „200-ათასლარიანი ტენდერის გამოცხადებას ვაპირებთ მრავალწლიანი მცენარეების შესყიდვაზე. თანხა ძალიან მწირია ამხელა ქალაქისთვის, მაგრამ შემდეგ იქნებ დაგვიმატოს მერიამ,“- გვეუბნება ლევან ჭანუყვაძე.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com