Batumelebi

კაზინო „ინტურისტის“ ყოფილი თანამშრომლები კუთვნილ ანაზღაურებას მიმდინარე წლის იანვრიდან ითხოვენ. მათ რამდენჯერმე აქციაც კი გამართეს. სასტუმრო „ინტურისტის“ მფლობელმა „მეტრო ჰოლდინგმა“ დღეს განცხადება გაავრცელა, რომელსაც უცვლელად გთავაზობთ:

„ბოლო პერიოდში სასტუმრო „ინტურისტ პალასში“ არსებულ „ლიბერთი კაზინოს“ პერსონალის დავალიანებასთან დაკავშირებულმა დავამ დიდი აჟიოტაჟი გამოიწვია საზოგადოებაში, რაც უარყოფითად აისახა „მეტრო ჰოლდინგის“ იმიჯზე. განვმარტავთ, რომ „მეტრო ჰოლდინგს“ იჯარით ჰქონდა გაცემული სასტუმროში არსებული ფართი და არ გააჩნდა არანაირი ვალდებულება აღნიშნული პერსონალის წინაშე, სახელფასო დავალიანებასთან დაკავშირებით. რადგან, არსებული პრობლემა კიდევ გადაუჭრელია და დროში გაიწელა, გვინდა გაცნობოთ, რომ ჰოლდინგის დამფუძნებლის და თავმჯდომარის ბ-ნი გალიფ ოზთურქის კეთილი ნებით, ხვალ 22 თებერვალს, „მეტრო ჰოლდინგის“ მიერ აღნიშნული დავალიანებები სრულად დაიფარება“.

ბათუმში კაზინო „ლიბერთი ინტურისტი“ 2019 წლის 5 იანვრიდან აღარ მუშაობს. „ბათუმელებს“ კაზინოს დახურვის მიზეზად ლიცენზიის ვადის გასვლა დაუსახელეს.

გაიხსნება თუ არა კაზინო „ინტურისტში“, ჯერ უცნობია, თუმცა „მეტრო ჰოლდინგის“ შვილობილ კომპანიას ახალი კაზინოს ახალ მისამართზე გახსნის ვალდებულება აქვს.

„მეტრო ატლას ჯორჯიამ“, ბათუმში, ახალ ბულვართან, 200-ნომრიანი სასტუმრო და კაზინო 2020 წლის 12 მარტამდე უნდა აამოქმედოს.

ამ თემაზე ვრცლად:

საქართველოს ფინანსთა სამინისტროს საგამოძიებო სამსახურის ცნობით, ბათუმში ხორცის ნახევარფაბრიკატების ფალსიფიკაციის ორი ფაქტი გამოვლინდა და  ორი კომპანიის ხელმძღვანელი პასუხისგებაში მისცეს.

„გამოძიებით დადგინდა, რომ ბრალდებულები ქალაქ ბათუმში მდებარე ხორცის ნახევარფაბრიკატების საწარმოებში, ფალსიფიცირებულ – თვისობრიობა შეცვლილ ხორცპროდუქტებს (კოტლეტი, გუფთა, ხინკალი) აწარმოებდნენ.

ექსპერტიზის დასკვნის თანახმად,  პროდუქტების შემადგენლობა არ შეესაბამებოდა ეტიკეტზე მითითებულ მონაცემებს – მზა პროდუქტში დაბალი იყო ცხიმის, ცილის და ფარშის მასური წილის შემცველობა, ასევე ენერგეტიკული ღირებულება“ – აღნიშნულია საგამოძიებო სამსახურის მიერ გავრცელებულ ინფორმაციაში.

დანაშაულისათვის, საქართველოს სისხლის სამართლის კოდექსის 197-ე მუხლის პირველი ნაწილი სასჯელის სახით ითვალისწინებს თავისუფლების აღკვეთას 1-დან 3 წლამდე ვადით.

საინიციატივო ჯგუფი “დაიცავი ძველი ბათუმი” ღია წერილით მიმართავს ბათუმის მერს, ლაშა კომახიძეს.

“ბათუმელები” უცვლელად გთავაზობთ წერილს.

“ბატონო ლაშა,
ჩვენს მიზანს არ წამოადგენს მეცადინეობა წერით უნარების განვითარებაში, მაგრამ სხვა გზა ვერ მოვძებნეთ მოგაწვდინოთ ჩვენი ხმა.
დღეს, თქვენ მოქალაქეთა საინიციატივო ჯგუფი „დაიცავი ძველი ბათუმის“ კიდევ ერთი ღია წერილის წაკითხვა მოგიწევთ.

ჩვენს აღელვებას იწვევს ის ფაქტი, რომ მთავრობის თავმჯდომარესთან არსებული ე.წ. ზონალური საბჭო არა მხოლოდ დაუსაბუთებელ, არამედ ქალაქისთვის საზიანო გადაწყვეტილებებს იღებს.
ე.წ. ზონალურმა საბჭომ 2019 წლის 8 თებერვალს, ერთ დღეში გადაწყვიტა ისტორიული დაცვის ზონაში მყოფი რამდენიმე სახლი დაანგრიოს. თვალსაჩინოებისთვის მოვიყვანთ რამდენიმე მაგალითს.

ე.წ. ზონალურმა საბჭომ გასცა ნებართვები და შესაბამისად იგეგმება:

• ჟორდანიასა და მაზნიაშვილის ქუჩების კვეთაში, ორი ორსართულიანი სახლის დემონტაჟის ხარჯზე შპს „პროგრეს სიტის“ მიერ 15 მეტრის სიმაღლის სასტუმროს მშენებლობა;

• მემედ აბაშიძის ქუჩა N7-ში მდებარე მიწის ნაკვეთზე არსებულ მრავალბინიან საცხოვრებელ სახლზე დაშენება, რეკონსტრუქციის მიზნით;

• რუსთაველის ქუჩა N21-ში და ვაჟა ფშაველას ქუჩა N27-ში მდებარე მიწის ნაკვეთებზე ორი მრავალბინიანი საცხოვრებელი სახლის მშენებლობა;

ეს სია არასრულია, თუმცა საკმარისია ე.წ. ზონალური საბჭოს ლუსტრაციისთვის და იმის დასადასტურებლად, რომ საბჭოს მიერ დადგენილო პრაქტიკა – ერთ კალენდარულ დღეშიც კი, ქალაქისთვის სერიოზული ზიანის მომტანია.

აქედან გამომდინარე, მოგმართავთ თქვენ, ქალაქის არჩეულ მერს! რადგან ქალაქის ნგრევის შეჩერების ინსტრუმენტი გააჩია იმ ინსტიტუციას, რომელსაც თქვენ წარმოადგენთ. მოვითხოვთ, ე.წ. ზონალური საბჭოს გადაწყვეტილებები მიიჩნიოთ მხოლოდ რეკომენდაციად და არ გაითვალისწინოთ უპირობოდ!

ვაცნობიერებთ, რომ აჭარის მთავრობის თავმჯდომარის თორნიკე რიჟვაძის განცხადება, რომელიც მან ბიზნესომბუდსმენთან შეხვედრის დროს 2018 წლის 5 დეკემბერს გააკეთა იყო საფრთხის შემცველი. ეს იყო მისი მხრიდან პირდაპირი მუქარა, რომ მუნიცალიპალიტებები მშენებლობის ნებართვების გაუცემლობის შემთხვევაში “გულგრილობისა და გადაწყვეტილების მიუღებლობისთვის“ აგებდნენ პასუხს. ჩვენ ვხედავთ, რომ ბატონი რიჟვაძის განცხადება შესაბამისმა ორგანოებმა მიიღეს პირდაპირ დავალებად და მწვანე შუქი აუნთეს ქალაქის ნგრევის ქრონიკას.

მოგეხსენებათ, რომ აჭარის მთავრობა ადგილობრივი თვითმართველობის კომპენტაციებში ვერ ჩაერევა. მშენებლობების ნებართვის გაცემა არის მუნიციპალიტეტის უფლებამოსილება, თქვენ და თქვენი თანამშრომლები ანგარიშვალდებულები ხართ არა ბატონი რიჟვაძის, არამედ კანონის და მოქალაქეების წინაშე.

15 თებერვალს, თბილისში, საქართველოს კულტურული მემკვიდრეობის ეროვნულ სააგენტოში გაფართოებულ შეხვედრაზე, თქვენ კიდევ ერთხელ დარწმუნდებოდით რამდენად დიდი მნიშვნელობა აქვს თითოეულ სახლს ბათუმის ისტორიული ზონის გადასარჩენად. თქვენი პრეროგატივაა ბათუმის დაცვა.
მოგიწოდებთ, ბათუმის ისტორიული დაცვის ზონაში მშნებლობების ნებართვის გაცემაზე გამოაცხადოთ მორატორიუმი, სანამ ისტორიულ ზონას არ ექნება სპეციალური მარეგულირებელი დოკუმენტი” – ვკითხულობთ ღია წერილში.

ავტომატური ქრობის სისტემა, მინიმუმ ორი ცეცხლმაქრი ერთ სართულზე, საევაკუაციო გეგმა და გასასვლელები – კიდევ რა არის აუცილებელი იმისთვის, რომ დაწესებულებამ სახანძრო უსაფრთხოებაზე შემოწმება წარმატებით გაიაროს? – საგანგებო სიტუაციების სამსახურმა მთელი ქვეყნის მასშტაბით შენობა-ნაგებობების სახანძრო უსაფრთხოების კუთხით შემოწმება დაიწყო.

კანონის თანახმად, სპეციალისტები საზოგადოებრივი დაწესებულების  ყველა შენობას შეამოწმებენ. ისევე როგორც სხვა რეგიონებში, ბათუმშიც, შემოწმებას საგანგებო სიტუაციების მართვის სამსახურის ადგილობრივი ფილიალი არ აწარმოებს და სპეციალისტებთან ერთად თბილისის ჯგუფი მუშაობს.

დარღვევის გამოვლენის შემთხვევაში კანონი 500-ლარიან ჯარიმას ითვალისწინებს. ხარვეზების გამოუსწორებლობისთვის ჯარიმა, ეტაპობრივად, გაიზრდება და, შესაძლოა, 10 000 ლარსაც კი მიაღწიოს.

საცხოვრებელი სახლების შემოწმებას კანონი მხოლოდ 22 მეტრზე მაღალ შენობებში ითვალისწინებს. ზუსტად რას ითვალისწინებს კანონი? – ამ და სხვა საკითხებზე სპეციალისტმა ფრიდონ  მგელაძემ განგვიმარტა:

ბატონო ფრიდონ, რომ განგვიმარტოთ, კანონით დაწესებულებებს კონკრეტულად რას ევალებათ სახანძრო უსაფრთხოების თვალსაზრისით?

კანონით განსაზღვრულია, თუ რა ზომები უნდა ჰქონდეს გატარებული შენობის მეპატრონეს იმისათვის, რომ ხანძრის შემთხვევაში არ მოხდეს დაკვამლიანება. თუ დაკვამლიანება მაინც მოხდება, ასევე კანონი განსაზღვრავს, როგორ უნდა იყოს აღჭურვილი შენობა, რომ უზრუნველყოფილი იყოს შენობაში მყოფი ადამიანების უსაფრთხოება. რეგულაციების მიხედვით, 15 მეტრ სიმაღლემდე არ არის აუცილებელი ავტომატური ქრობის სისტემის დამონტაჟება, სხვა შემთხვევაში აუცილებელია. ეს სისტემა ითვალისწინებს წყლის მილების გაყვანას ქსელში და ხანძრის დროს, ტემპერატურის მატების შედეგად, სკდება – წნევით დატუმბული წყალია მილებში [რაც ჭერში უნდა იყოს დამალული] და ის ავტომატურად აქრობს ცეცხლს.

15 მეტრამდე შენობებზე, სადაც საზოგადოებრივი დაწესებულებაა, დამონტაჟებული უნდა იყოს კვამლის ავტომატურად აღმომჩენი სისტემა, იგივე ავტომატური სახანძრო სიგნალიზაცია. თუ დაკვამლიანება იქნება, რომელიმე სათავსოში, სიგნალი გადაეცემა რვა ტელეფონზე, რვა მომსახურე პერსონალს ტელეფონში მიუვა მესიჯი, თუ სად არის კონკრეტულად დაკვამლიანება, ამაზეა მიბმული მართვის პულტი, რომელზეც ზუსტად ჩანს, თუ რომელ სართულზე, რომელ ოთახშია დაკვამლიანება. ამის შემდეგ უკვე შესაძლებელია ხელის ცეცხლმაქრების გამოყენება, კანონი უშვებს ოთხ კილოგრამამდე  და ზემოთ ცეცხლმაქრების არსებობას შენობაში. სართულზე უნდა იყოს არანაკლებ ორი ცეცხლმაქრი. ვიდრე მოვა სახანძრო სამსახური.

გარდა ამისა, შენობაში აუცილებლად უნდა იყოს ევაკუაციის გზის მაჩვენებლები. თუ იქნება ავტონომიურ კვებაზე ძალიან კარგია, თუ არა, ფოსფორის არაკალი მაინც უნდა იყოს, რომ ღამის საათებში ადამიანმა გზა გაიკვლიოს საევაკუაციო გასავლელებამდე.

აუცილებელია ასევე მომსახურე პერსონალთან ინსტრუქტაჟის ჩატარება, რაც უნდა დაფიქსირდეს სპეციალურ – ხანძარსაწინააღმდეგო ინსტრუქტაჟის აღრიცხვის ჟურნალში. ყველა მომსახურე პერსონალს წელიწადში არანაკლებ ერთხელ უნდა ჩაუტარდეს ხანძარსაწინააღმდეგო ინსტრუქტაჟი. მისივე ხელმოწერით უნდა დადასტურდეს, რომ მას გავლილი აქვს წესები და ფლობს ინფორმაციას შენობაში გატარებული უსაფრთხოების წესების შესახებ. მან უნდა იცოდეს ასევე, როგორ მოიქცეს ხანძრის აღმოჩენის შემთხვევაში.

სკოლის ან საბავშვო ბაღის შემთხვევაში, რაიმე განსხვავებული მოთხოვნა ემატება ამ ყველაფერს?

რა თქმა უნდა, ეს ყველაფერი საგანმანათლებლო შენობებშიც სავალდებულოა, სკოლაც სახანძრო უსაფრთხოების ქვეშ მყოფი ობიექტია. კანონში ზუსტი ჩამონათვალია, თუ რომელი ობიექტები ექვემდებარება სახანძრო უსაფრთხოებას. როცა ზედამხედველობის სამსახური შედის ქვემდებარე ობიექტზე, ჯერ ხანძრის ქრობის სისტემის გამართულობაზე ამახვილებს ყურადღებას, ავტომატურად აღმომჩენ სისტემას და ცეცხლმაქრების არსებობასაც ამოწმებს. მნიშვნელოვანია საევაკუაციო გზების გამართულობაც, საევაკუაციო გზებზე არ უნდა იყოს არავითარი წვადი მასალები, რასაც შეიძლება ცეცხლი მოეკიდოს. გასასვლელები ისე უნდა იყოს მოწყობილი, რომ მოძრაობის დროს ადამიანს დაბრკოლება არ უნდა შეექმნას.

რაც შეეხება ძველ, საბჭოთა კავშირის დროს აშენებულ შენობებს?

ძველ დროის ორსართულიანი შენობაც კი უზრუნველყოფილი იყო გარე სახანძრო კიბით. დღეს, სამწუხაროდ, სამშენებლო პროექტები სახანძრო ზედამხედველობის სამსახურთან არ თანხმდება. ეს უკვე აუცილებელია და კანონითაც სავალდებულოა, უკვე აშენებულში თუ ეს ღონისძიებები არ არის გატარებული. თავისთავად ცხადია, რომ იქ ადამიანის უსაფრთხოება სრულყოფილად დაცული არ არის. ახლა ასეთ შენობებს ვერაფერს ვერ ვუშველით. თუმცა სახანძრო უსაფრთხოების სამსახური ასეთ შემთხვევაში მიაქცევს ყურადღებას იმას, რომ გაკეთდეს ავტომატური ქრობის სისტემა და ავტომატურად აღმომჩენი სახანძრო სიგნალიზაციის სისტემები. ეს აუცილებელია.

ლიფტებთან დაკავშირებით რაიმე განსაკუთრებული მოთხოვნები არის კანონში?

მაგალითად სასტუმროში, როგორც კი ავტომატური სახანძრო სიგნალიზაცია ჩაირთვება, პარალელურად ჩაირთვება კვამლგამწოვი სისტემაც, ამის პარალელურად ავტომატურად ლიფტი ჩამოდის პირველ სართულზე და იბლოკება. ამ ლიფტით უკვე ადამიანი ვერ ისარგებლებს. კანონით აკრძალულია, ხანძრის ან ავარიის შემთხვევაში ლიფტით სარგებლობა – სპეციალური ნიშნებიც უნდა იყოს გამოკრული, რომ  ლიფტით არ უნდა ისარგებლო.

ექვემდებარება თუ არა შემოწმებას საცხოვრებელი სახლები?

12 სართულზე მაღალი შენობა სახანძრო უსაფრთხოების სამსახურს ექვემდებარება. 37 მეტრზე მაღალ შენობაში აუცილებლად უნდა იყოს გათვალისწინებული ავტომატური ქრობის სისტემა, მაგრამ ეს ძალიან ძვირი სიამოვნებაა. ძვირი უჯდებათ მშენებლებს და ამიტომაც საქართველოში ამ სისტემის გვერდის ავლით აშენებენ მაღალ სახლებს. მისი ფასი მშენებლობის ღირებულების 10-15 პროცენტს აღწევს. ეს არ არის პატარა თანხა, ამიტომაც ურჩევნიათ გვერდი აუარონ.

„საფრთხე აღმოფხვრილია,“ – ირწმუნება ხელვაჩაურის მერი, ჯუმბერ ვარდმანიძე სოფელ მარადიდის დატბორვასთან დაკავშირებით, თუმცა მან კონკრეტულად არ იცის, რის გამო შეიქმნა პრობლემა, ან რა გამორიცხავს მორიგ საფრთხეს. წერილობით განმარტებას ხელვაჩაურის მერი ჰესის მფლობელი კომპანია „აჭარენერჯი 2007“-გან უახლოეს დღეებში ელოდება.

ხელვაჩაურის მერის ინფორმაციით, ტექნიკური ხარვეზი თურქეთში მდებარე ჰესზე შეიქმნა.

„ჩვენ მაშინვე დავუკავშირდით ამ კომპანიას, წყლის დონემ დაიწია და ახლა ნორმაშია. დაახლოებით ორ საათამდე დასჭირდა წყლის დონის დაკლებას. როგორც კომპანიაში თქვეს, ზედა ჰესიდან, რაც თურქეთში მდებარეობს, შეიქმნა პრობლემა. ჩვენ ვამზადებთ მიმართვას, რომ მოიხადოს კომპანიამ ბოდიში და თუ საჭირო იქნება, კანონმდებლობიდან გამომდინარე, დაჯარიმდება კიდეც,“ – გვითხრა ჯუმბერ ვარდმანიძემ.

რა ოდენობის ზარალი მიადგა სოფელს დატბორვით? – ხელვაჩაურის მერი ამბობს, რომ ზარალი ჯერ არ დაუთვლიათ. „თუ ასანაზღაურებელია, აანაზღაურებენ, რა თქმა უნდა,“ – დასძენს ჯუმბერ ვარდმანიძე.

სოფელ მარადიდში მდინარე ჭოროხი სამანქანე გზაზე დღეს, 20 თებერვალს გადმოვიდა და სასაფლაოს ნაწილი დატბორა.

ამერიკულმა კომპანია ,,af&co”-მ 2019 წლის ტენდენციებში აჭარული ხაჭაპური წლის კერძად დაასახელა, ქართული სამზარეულო კი – წლის სამზარეულოდ. 

 ,,af&co” საკონსულტაციო კომპანიაა, რომელიც რესტორნების, საკვებისა და სასმელის, მასპინძლობის მარკეტინგის უმთავრეს ტენდენციებს პერიოდულად ასახელებს. 

 აჭარული ხაჭაპური წლის კერძად თავისი გემოს – ყველისა და კვერცხის ნაზავის, ასევე, ინსტაგრამზე ხშირი პოსტების წყალობით დასახელდა.   

ეკატერინე ბოგატოვა ვეტერინარია. ბათუმის ცხოველთა თავშესაფარში მუშაობს და დღეში საშუალოდ 10-12 ოპერაციას აკეთებს.

თავშესაფარი, სადაც ბათუმის მერიის დაფინანსებით უპატრონო ცხოველების აღრიცხვა და სტერილიზაცია-კასტრაცია ხდება, აეროპორტის გზატკეცილზე მდებარეობს. უკვე ექვსი წელია ეკატერინე ამ გზაზე დადის, იგი თავშესაფრის მთავარი ვეტერინარია.

ჩემი ბავშვობის ოცნება ავისრულე ცხოველთა თავშესაფარში მუშაობითო – ამბობს. ყვება, რომ ექვსი წლის იყო, როცა ამბობდა, „ძაღლის ექიმი“ უნდა გამოვიდეო.

„მაშინ ვეტერინარი არ ვიცოდი რას ნიშნავდა და ასე ვამბობდი. შემთხვევითი არ არის ეს, დედაჩემს უყვარდა ძალიან ცხოველები და ეცოდებოდა ქუჩის ძაღლები. თბილისიდან ვარ, ადრე, ჩემ ბავშვობაში, ქუჩებში მანქანა ჩამოივლიდა, აიყვანდნენ ქუჩის ძაღლებს და კლავდნენ. დედაჩემი ქრთამს აძლევდა მძღოლებს, რომ ძაღლები გადაერჩინა და ზოგი სახლში მოჰყავდა. რომ დავიბადე, სახლში ოთხი ძაღლი გვყავდა, 15 წლის რომ ვიყავი – უკვე ცხრა ძაღლი, მერე კატებიც დაემატა და, ფაქტობრივად, ცხოველების გარემოცვაში გავიზარდე,“ – ამბობს ეკატერინე.

იგი იხსენებს, როგორ იღებოდა ყოველ დილით თბილისში მისი სახლის ჭიშკარი, საიდანაც გამოდიოდნენ ძაღლები და სასეირნოდ მიდიოდნენ. მათ თან მიჰყვებოდა ეკატერინეც. მიუხედავად ოჯახში ცხოველების სიყვარულისა, პროფესიის არჩევისას წინააღმდეგობა მაინც შეხვდა. ჩემს ოჯახში ყველა ან მეცნიერებით იყო დაკავებული, ან მუსიკით, ვეტერინარია კი პრესტიჟული მიმართულება არ ყოფილა, მაგრამ მაინც ჩემი გავიტანეო, ყვება.

„შემიძლია ვთქვა, რომ ვოცნებობდი თავშესაფარში მუშაობაზე, რადგან გავიზარდე ისეთ სიტუაციაში, რომ ვგრძნობდი რა აუცილებელი და საჭირო იყო თავშესაფარი ცხოველებისთვის,“ – ამბობს ეკატერინე.

თბილისიდან ბათუმში ჩამოსვლის გადაწყვეტილება თავის დროზე სწრაფად მიიღო. იმ პერიოდში დედა გარდაეცვალა, ისე ცუდად ვიყავი ფსიქოლოგიურად, მიუხედავად იმისა, რომ ჩვილი ბავშვი მყავდა, მივხვდი, გარემო უნდა შემეცვალაო, უცებ ბათუმში გამოჩნდა ვაკანსია, ორ დღეში ჩავალაგე ბარგი და ჩამოვედიო – ყვება. მხოლოდ ექვსი თვით აპირებდა ჩამოსვლას, მაგრამ 10 ივნისს 7 წელი სრულდება, რაც ამ ქალაქში ცხოვრობს.

„ჯამში უკვე 16 წელია ვმუშაობ. მართალი გითხრათ, დავიღალე, ძალიან სტრესული საქმეა, ძნელია უპატრონო ცხოველების ტანჯვის ყურება, ზოგი ისეთი გამხდარია, ფეხზე ვერ დგება, ზოგი – მოწამლული, ზოგს ლურსმნები აქვს გადაყლაპული… ვერ წარმოიდგენთ, როგორ ექცევიან საწყალ ძაღლებს. მაგრამ, დაღლილობის მიუხედავად, ვერ დატოვებ საქმეს, რომელიც დაიწყე, ჯერ ერთს გააკეთებ, მერე მეორე საქმეა… ვერ შეეშვები იოლად,“ – ამბობს ის.

ახლა თავშესაფარში ახალ ფლიგელს აშენებენ. აქ  ორი განყოფილება იქნება – ძაღლებისთვის და კატებისთვის.

მიუხედავად იმისა, რომ დილიდან გვიან საღამომდე ოთხფეხა პაციენტებთან უწევს ყოფნა, შინაური ცხოველები მაინც ჰყავს: გერმანული ნაგაზი გრეიკო და ბენზელი ქუჩის კატა თათუნია.

გრეიკო ლეკვი იყო, როცა იყიდა. გამხდარი და დარწყილიანებული ლეკვი იყო და შემეცოდაო, ამბობს, კატა კი მისი უშუალო პაციენტი იყო.

„პატარა, ავადმყოფი კნუტი იყო თავშესაფარში რომ მოიყვანეს. სტაციონარში გვყავდა, გამოჯანმრთელდებოდა, გადავიყვანდით – ისევ ავად ხდებოდა და ვაბრუნებდით. ოთახში რომ შევდიოდი, ვოლიერიდან გაშლილ თათს გამოჰყოფდა უხმოდ, ასე მოფერებას ითხოვდა, ამიტომაც დავარქვი თათი, თათუნია. გავაშვილეთ და დაგვიბრუნეს უკან, ფაქტობრივად მომაკვდავი. მივხვდი, რომ მე უნდა წამეყვანა,“ – ყვება ეკა.

16-წლიანი მუშაობის განმავლობაში ცხოველებთან დაკავშირებულ არა ერთ სიტუაციასთან ჰქონია შეხება. მიიჩნევს, რომ საქართველოში, ძირითადად, ცხოველების მიმართ ორმაგი უკიდურესობა ახასიათებთ, ან ძალიან უყვართ – ან ძალიან სძულთ. არის ისეთი შემთხვევებიც, როცა მეპატრონეს ძაღლი უნდა, მაგრამ არც ერთი თეთრი არ ემეტება მის მოსავლელად.

„უზარმაზარი ჯიპით დადიან  სანადიროდ და ცოფის ერთ ვაქცინას არ გაუკეთებენ ძაღლს. ეს ხომ ძაღლია, რაში სჭირდებაო… არადა, ძაღლი ოჯახის წევრია, მას კვება სჭირდება, ვაქცინა, მოვლა… ისეთი ხალხიც არის, ძაღლს დღის განმავლობაში ქუჩაში რომ უშვებენ, სახლში რა უნდა ძაღლსო. კი, არსებობს კანონი, მაგრამ…“

კითხვაზე, რა ტიპის დახმარება სჭირდება ცხოველთა თავშესაფარს, ეკა ამბობს, რომ ეს შეიძლება იყოს მეორადი ტანსაცმელი, რომელსაც პალეტებზე უგებენ ძაღლებს ვოლიერებში. ამის საჭიროება კი განსაკუთრებით ზამთარში აქვთ.

ხელვაჩაურის მუნიციპალიტეტის სოფელ მარადიდში მდინარე ჭოროხი სამანქანე გზაზე გადმოვიდა და სასაფლაოს ნაწილი დატბორა.

სოფლებში – მარადიდსა და ძაბლავეთში ადმინისტრაციულ ერთეულებთან ურთიერთობის განყოფილების უმცროსი სპეციალისტის, თემურ დიდმანიძის თქმით, მდინარეში წყლის დონემ მატება დაახლოებით 12 საათზე დაიწყო.

„მანქანების სავალი გზის დაახლოებით 25 მეტრია დატბორილი, სოფლის სასაფლაოზეა წყალი შემოსული და სასოფლო-სამეურნეო ნაკვეთებზე. ხალხი გამოვიდა და გადაკეტა „კირნათი ჰესის“ შესასვლელი, რადგან დატბორვას ჰესს უკავშირებენ“, – უთხრა „ბათუმელებს“ თემურ დიდმანიძემ, რომელიც ახლა „კირნათი ჰესთან“ იმყოფება.

დატბორვის ფაქტი სოფელ მარადიდში გასულ წელსაც დაფიქსირდა, როცა დაგუბებულმა ჭოროხმა გზის ნაპირამდე მოაღწია და ეზოები დატბორა.

„კირნათი ჰესს“ კომპანია „აჭარენერჯი“ ფლობს.

დღეს, 20 თებერვალს, დღის ორ საათზე მაჭახელას ხეობაში აქცია იმართება.

აქციის მონაწილეებმა მაჭახელას თოფის მონუმენტთან ასფალტი წითლად შეღებეს და STOP დააწერეს. როგორც აქციის ერთ-ერთი მონაწილე, უშანგი ნაგერვაძე აცხადებს, ეს არის ახალგაზრდების გზავნილი მთავრობის მისამართით, იმის დასტურად, რომ მათ არ სურთ მაჭახელას ხეობაში ჰესის აშენება:

„აქ არიან მაჭახელას ხეობიდან ემიგრირებული ახალგაზრდები, ადგილობრივი ახალგაზრდები და ყველა ერთად ვაკეთებთ აქცია პერფორმანსს – „არა ჰესებს“, რომ მივცეთ სიგნალი მშენებლ კომპანიას და სახელწიფოს – აქ ჩვენ ჰესის აშენებას არ დავუშვებთ. ესაა ახალგაზრდების პოზიცია მაჭახელას ხეობაში“.

ჰესის აშენებას მაჭახელას ხეობაში მთავრობასთან გაფორმებული მემორანდუმის საფუძველზე კომპანია „მაჭახელა ჰესი“ გეგმავს. ამ კომპანიის 100-პროცენტიან წილს „სილქ როუდ ენერჯი“ ფლობს. კომპანიაში „ბათუმელებს“ უთხრეს, რომ „მიმდინარეობს კონცეპტუალურ პროექტზე მუშაობა, რომელიც საჭიროებს წინასაინჟინრო კვლევების წარმოებას [ტოპოგრაფია, ჰიდროლოგია, გეოლოგია].  „სილქ როუდ ენერჯიში“ ირწმუნებიან, რომ ჰესი დაცული ტერიტორიისგან მოშორებით აშენდება.

ბათუმისა და ლაზეთის მიტროპოლიტი დიმიტრი პრესკონფერენციის გამართვას აპირებს. ინფორმაცია ამის შესახებ „ბათუმელებს“ ბათუმისა და ლაზეთის ეპარქიის პრესსამსახურში დაუდასტურეს, თუმცა ჯერჯერობით უცნობია თარიღი, კონკრეტულად როდის გაიმართება პრესკონფერენცია.

კითხვაზე, შეეხება თუ არა პრესკონფერენცია გიორგი მამალაძის საკითხს, პრესსამსახურში განაცხადეს, რომ ბრიფინგი ნაწილობრივ ამ თემასაც შეეხება.

ამჟამად გიორგი მამალაძე ღუდუშაურის კლინიკაში იმყოფება, სადაც იგი საპატიმრო დაწესებულებიდან 15 თებერვალს გადაიყვანეს.

დეკანოზი გიორგი მამალაძე ბათუმის წმ. ნიკოლოზის სახელობის ტაძრის წინამძღვარმა, დეკანოზმა ნიკოლოზ გიგატაძემ 16 თებერვალს აზიარა.

დეკანოზ გიორგი მამალაძეს თბილისის საქალაქო სასამართლომ 9-წლიანი პატიმრობა 2017 წლის 5 სექტემბერს მიუსაჯა. სასამართლომ დეკანოზი პატრიარქ ილია მეორის მდივან–რეფერენტის, შორენა თეთრუაშვილის მკვლელობის მომზადებაში ცნო დამნაშავედ.

შპს „ბათუმის წყლის“ ინფორმაციით, მახინჯაურის ტერიტორიაზე ავარიულად დაზიანდა წყალმომარაგების მილი.

კომპანიის განცხადებით, სარემონტო სამუშაოებისთვის, დღეს, 19 თებერვალს, 18-დან 22 საათამდე წყლის მიწოდება შეუწყდება მახინჯაურის და განთიადის ტერიტორიაზე მცხოვრებ აბონენტებს.

ხულოში, სოფელ პაქსაძეებში, გაჩენილი ხანძრის შედეგად მეჩეთის დამხმარე ნაგებობა, სულ 70 კვ.მ. ფართობი დაიწვა. საგანგებო სიტუაციების მართვის სამსახურის ინფორმაციით, ამ დროისათვის ხანძარი ლიკვიდირებულია.

შემთხვევის შედეგად არავინ დაშავებულა. ადგილზე მუშაობდა სამი სახანძრო-სამაშველო ჯგუფი.

________________

ფოტო: საგანგებო სიტუაციების მართვის სამსახური

პროკურატურის წერილობითი მტკიცებულებების გამოკვლევა “ქურდული სამყაროს წევრობის საქმეზე” ადვოკატების მონაწილეობის გარეშე შედგა – პროკურორმა ირაკლი დონდოლაძემ ადვოკატების შეკითხვებზე პასუხის გაცემა საჭიროდ არ ჩათვალა.

“გაიგეთ, რაც წავიკითხე, ესაა,” – რამდენჯერმე მოკლედ მოუჭრა პროკურორმა ადვოკატებს, როცა მათ სხვადასხვა შეკითხვა გაუჩნდათ.

ოქმების წაკითხვის დაწყებიდან დაახლოებით ერთი საათის შემდეგ პროტესტი ბრალდებულებმა – ზაალ ახვლედიანმა და შოთა კეკელიძემ გამოხატეს.

“აგდებული დამოკიდებულებაა, ბატონო მოსამართლევ. აბა, ადვოკატები რისთვის გვყავს? შენიშვნა მაინც მიეცით…” – მიმართა მოსამართლეს ბრალდებულმა ზაალ ახვლედიანმა.

“ხომ ხედავთ, რა დღეში ჩაგვაგდეთ, ბრალდებულები აქეთ გვიცავენ უკვე,” – იქვე თქვა ადვოკატმა მზია დიასამიძემ.

“პოეზიის საღამოზე ხომ არ ვართ? მტკიცებულების გამოკვლევა არ ნიშნავს მხოლოდ მის წაკითხვას,” – დაამატა კიდევ ერთმა ადვოკატმა.

ვიდრე მოსამართლე რამეს იტყოდა, პროკურორმა მიმართა მოსამართლეს:

“გთხოვთ, შენიშვნა მისცეთ დაცვის მხარეს”.

მოსამართლე ლევან გელოვანს შენიშვნა არც ერთი მხარისთვის მიუცია. მან განმარტა, რომ პროკურორმა, დაცვის მხარის მიმართვის შემთხვევაში, საკითხი უნდა დააზუსტოს.

საქმის განხილვა გრძელდება. მოწმეების დაკითხვის პროცესი ჯერ არ დასრულებულა.

ქურდული სამყაროს წევრობისა და ქუჩურ გარჩევებში მონაწილეობის ბრალდებით სამართალდამცველებმა 11 პირი 17 ივლისს ბათუმში დააკავეს. საქმის მასალების მიხედვით, ბრალდებულები ემუქრებოდნენ დაზარალებულებს, სცემდნენ და დიდი ოდენობით თანხას სძალავდნენ ქურდული „ობშიაკის“ შესავსებად. საქმის მასალებში არის კიდევ ერთი საინტერესო დეტალიც – კანონიერ ქურდობაში ბრალდებულები „დაზარალებულებს  ემუქრებოდნენ სახელის გამტეხი ცნობების გავრცელებით“.

ამ თემაზე:

21 თებერვალს, გიდების საერთაშორისო დღეს, საქართველოში მომუშავე გიდები მასშტაბურ აპოლიტიკურ აქციას აანონსებენ. ამ დღეს ბათუმში, ქუთაისში, თბილისსა და სხვა დიდ ქალაქებში გიდები უფასო „ქალაქის ტურებს“ ჩაატარებენ და აქცია-პერფორმანსს მოაწყობენ სახელწოდებით „ეს საქართველოა“. გიდები ამ ფორმით აპროტესტებენ სახელმწიფო სიმბოლიკის – საქართველოს რუკის დამახინჯებას.

„საქართველო აფხაზეთიდან იწყება, ცხინვალის რეგიონი ქვეყნის გულია, საქართველო მხოლოდ თბილისი არაა! #ესსაქართველოა #ძალაერთობაშია“, – ასეთია აქციის მთავარი მესიჯი.

უფასო ტურზე მისვლა  ყველა მსურველს შეეძლება.

„ვიწვევთ ყველა ახლობელს, შინაურს, ქალაქის სტუმარს, მთავრობას და არასამთავრობო ორგანიზაციებს, კერძო სექტორის წარმომადგენლებს, სკოლებს და უნივერსიტეტებს, მეზობლებს და მეგობრებს,” – ნათქვამია ოფიციალური მიმართვის ტექსტში, რომელსაც გიდები ავრცელებენ.

„რუკების დამახინჯება არ დაწყებულა დღეს და გუშინ. შარშანაც იყო იგივე პრობლემა. გადავწყვიტეთ, რადგან გიდების საერთაშორისო დღე მოდის 21 თებერვალს, ამ დღეს რაღაც ფორმით გაგვეპროტესტებინა ეს პრობლემა, რომელზეც რატომღაც ყველა თვალს ხუჭავს ან, უბრალოდ, ვერ ხედავენ ამაში პრობლემას. ბათუმში უფასო ექსკურსიას ჩაატარებს 15-მდე გიდი. 12 საათზე შევიკრიბებით ევროპის მოედანზე და ტურიც აქედან დაიწყება. გიდების გარდა, ასევე, მონაწილეობენ ტურისტულ სფეროში მომუშავე მოხალისეები, რომლებიც ავტომანქანითაც მოემსახურებიან ტურისტებს და გაიყვანენ მთიან აჭარაში,“ – ამბობს გიდი სალომე გორგილაძე. ის აქციაში სხვა გიდებთან ერთად მიიღებს მონაწილეობას.

საქართველოს რუკის დამახინჯების წინააღდეგ 13 თებერვალს უკვე გაიმართა ონლაინ-ფლეშმობი. ტურიზმის სფეროში დასაქმებულებმა იმ რუსული კომპანიების ქმედება გააპროტესტეს, რომლებმაც  საქართველოს რუკა დამახინჯებულად [აფხაზეთისა და სამაჩაბლოს გარეშე] განათავსეს თავიანთ ვებგვერდებზე.

21 თებერვალს დაგეგმილი აქცია-პერფორმანსში მონაწილე გიდებმა თავიანთი მოთხოვნა გაავრცელეს. მათი მოთხოვნები ასეთია:

„ყველამ, უცხოურმა კომპანიებმა, ტურ-ოპერატორებმა, პატივი სცენ საქართველოს სახელმწიფო სიმბოლიკას, მსოფლიოს მიერ აღიარებულ საზღვრებში საქართველოს ტერიტორიულ მთლიანობას. პატივი ეცეს ქვეყნის რუკას, დროშას, ისტორიას, კულტურას და ტრადიციებს. შეწყდეს უკანონო ტურისტული საქმიანობა საქართველოს მიერ არაკონტროლირებად ტერიტორიებზე. დაცული იქნას სახელმწიფო თუ  საერთაშორისო სამართლის ნორმები და კანონი ოკუპირებულ ტერიტორიებთან დაკავშირებით”.

ფეისბუქზე შექმნილია დაგეგმილი საპროტესტო აქციის ივენთი.

გიდების განმარტებით, აქციის მთავარი მიზანია, სრულიად აპოლიტიკურმა პროფესიონალი გიდების გაერთიანებულმა ჯგუფმა, გამოაფხიზლოს მთავრობა, დაიცვას ქვეყნის იმიჯი, პრესტიჟი, კანონმდებლობა, სხვა ქვეყნებსაც აიძულოს პატივი სცენ საქართველოს სახელმწიფო სიმბოლიკას, შეწყვიტონ სეპარატისტული რეგიონების ტურისტულ ზონებად გამოყენება და დაემორჩილონ საერთაშორისო სამართლის ნორმებს.

უფასო „ქალაქის ტურები“ მთელი ქვეყნის მასშტაბით, დღის 12 საათზე დაიწყება. ბათუმში უფასო ტურში მონაწილეობის მისაღებად მსურველები ევროპის მოედანზე უნდა მივიდნენ.

ხულოს მუნიციპალიტეტში ორი დღეა თოვს. როგორც ხულოს მერიაში გვითხრეს, დაბაში თოვლის სიმაღლე რამდენიმე სანტიმეტრია, მაღალ სოფლებში კი დაახლოებით 40-60 სანტიმეტრს აღწევს.

„ამ დილით გაითიშა შუქი თხილვანის თემში, ხიხაძირსა და რიყეთში, თუმცა ამ დროისთვის პრობლემა აღმოფხვრილია და მუნიციპალიტეტის მოსახლეობას ელექტროენერგია სრულად მიეწოდება. დილიდან იწმინდებოდა გზები, გადაადგილება ყველგან შესაძლებელია, ახლა მიმდინარეობს თხილვანის ადმინისტრაციულ ერთეულში შიდა სასოფლო გზების მოწესრიგება, სხვა მხრივ შეფერხება არ არის,“ – გვითხრეს ხულოს მერიაში.

სინოპტიკოსების ცნობით, დღეს და ხვალ, 19-20 თებერვალს აჭარის მაღალმთიანეთში ძირითადად ღრუბლიანი ამინდი შენარჩუნდება, ღამით კი 2-7 გრადუსი ყინვაა მოსალოდნელი. ამინდის პროგნოზის თანახმად, 21 თებერვლიდან მთიან აჭარაში კვლავ თოვაა მოსალოდნელი.

ფოტოები ხულოს სოფლებიდან, დანისპარაულიდან და თხილვანადან მოგვაწოდეს.