პუტინის მარშად წოდებული „უკვდავი პოლკის” აქციის პარალელურად დღეს ბათუმში, გმირთა ხეივანში, კონტრაქციაც გაიმართა. „თქვენ ხართ რუსეთის აგენტები, მოშორდით ცხრა აპრილის მემორიალს!” – ისმოდა აქციაზე რამდენიმე წუთის წინ კონტრაქციის მხრიდან „უკვდავი პოლკის” აქციის მონაწილეების მიმართულებით. ორ საპირისპირო აქციას შორის პოლიციის კორდონია მობილიზებული.
ქობულეთის საკრებულოს წევრი ენმ-დან ბონდო თედორაძე, კონტრაქციის მონაწილე: ,,ჩვენს უახლეს ისტორიაში არ გასულა ათწლეული, რუსეთს ომი არ ეწარმოებინოს. 90-იან წლებში სწორედ პროვოკაციების გზებით დაიკავა რუსეთმა საქართველოს ტერიტორიები. გასაგებია, რომ სამამულო ომში გამარჯვებას ზეიმობენ ვეტერანები და მათ ამის უფლება აქვთ, თუმცა მათ უნდა დაიცვან საქართველოში მოქმედი კანონი, რომ აქ აკრძალულია საბჭოთა ოკუპაციური სიმბოლიკის გამოყენება.”
პოლიციის კორდონმა ორი საპირისპირო აქცია ერთმანეთისგან განაცალკევა. ,,უკვდავი პოლკის” აქციაზე დაახლოებით 40-მდე მონაწილეა შეკრებილი. კონტრაქციაც არ გამოირჩევა მონაწილეთა მრავალრიცხოვნობით.
აღსანიშნავია, რომ ,,უკვდავი პოლკი” არ ცნობს საქართველოს საერთაშორისო კანონმდებლობით აღიარებულ საზღვრებს და სუვერენიტეტს: მათ ოფიციალურ ვებგვერდზე აფხაზეთი და სამაჩაბლო დამოუკიდებელ სახელმწიფოებადაა მოხსენიებული.
„უკვდავ პოლკს“ პრორუსული ორგანიზაციები ხელმძღვანელობენ.
9 მაისი, „უკვდავი პოლკის“ მოწინააღმდეგეების აქცია ბათუმში
