გამომგონებელი ბავშვები

ბათუმის ერთ-ერთ კერძო სკოლაში  STEM აკადემია მეორე წელია არსებობს, სადაც მოსწავლეები თანამედროვე ტექნოლოგიების გამოყენებით ინოვაციურ პროექტებს ქმნიან. ბავშვებთან მენტორი მასწავლებელი უტა კილასონია და პედაგოგი ჯაბა შაინიძე მუშაობენ. ამჟამად ბავშვები ოთხ პროექტზე მუშაობენ და როგორც „ბათუმელებს“ უთხრეს, მომავალ წელს კონკურსში მონაწილეობასაც აპირებენ.

STEM აკადემია მოიცავს ოთხი საგნის – მათემატიკის, მეცნიერების, ინჟინერიისა და ტექნოლოგიების ინტეგრირებულ სწავლებას. როგორც სკოლა „პროგრესში“ გვეუბნებიან, სწორედ ეს არის მთავარი ღირებულება, რადგან ეს აჩვევს ბავშვებს ოთხ საგანზე ინტეგრირებულად ფიქრს, „აქ შეძენილი უნარ-ჩვევებით ბავშვები მუშაობენ პროექტებზე“, – გვეუბნება პედაგოგი.

STEM აკადემიის მოსწავლეები

ბექა ბერიძე STEM აკადემიის ერთ-ერთი მოსწავლეა, ის ამწეს აკეთებს. როგორც ბექა გვეუბნება, მისი გამოგონების ინოვაციურობა ის არის, რომ ამწე მუშაობს წყალზე.

„ამწეს შეუძლია აიღოს სხვადასხვა ნივთი, მის შესაქმნელად ვიყენებთ შპრიცებს, ჯოხებსა და წყალს. წყალი შპრიცების მეშვეობით მოძრაობს და აიძულებს ამწეს, რომ იმოძრაოს. მილებში სხვადასხვა ფერის წყალია ჩასხმული და ამის მიხედვით ვარკვევთ, თუ რომელი მილით რომელი მოქმედება უნდა შეასრულოს ამწემ“, – გვეუბნება ბექა.

გენკა შუბითიძე და ბექა ბერიძე

ლევან მელაძისა და ანრი მამულაძის გამოგონებას „ჭკვიანი სახლი“ ჰქვია. მათ გააკეთეს ვიდეოთვალი, რომელიც პერიმეტრს აკონტროლებს და მათი აზრით, დღეს არსებული ვიდეოთვალებისგან იმით განსხვავდება, რომ უფრო სენსიტიურია და საფრთხის შემთხვევაში სახლის ან სხვა ობიექტის მეპატრონესთან ტექსტურ შეტყობინებას აგზავნის.

ბექა ვანაძე თანაგუნდელებთან ერთად მზის ენერგიის მიმღებ მოწყობილობაზე მუშაობს

„ვიდეოთვალი მოძრაობს და თუკი რაიმე უცხო სხეული ჩამოეფარება, უშვებს ელექტრონულ ხმოვან ტალღებს და ნათურა წითლად ინთება. სმს შეტყობინების აპლიკაციაზე ვმუშაობთ და რამდენიმე თვეში ამასაც დავასრულებთ“, – გვეუბნება ლევან მელაძე.

ანრი მამულაძე ამბობს, რომ სამომავლოდ სურს შექმნან ისეთი პროგრამა, რომელიც ავტომანქანის ავარიაში მოხვედრის რისკს შეამცირებს.

„გვინდა შევქმნათ მექანიზმი, რომელიც ბარიერის დანახვაზე სწრაფად რეაგირებს და იწვევს ავტომანქანის გაჩერებას“.

ბექა ვანაძე მზის ენერგიის მიმღებ სისტემაზე მუშაობს. „ამ მოწყობილობას შეუძლია მზის ენერგია გარდაქმნას ელექტრონულ ენერგიად. როგორც ვიცით, ნავთობი და ქვანახშირი მილევადი ენერგორესურსებია და გვჭირდება ენერგიის ალტერნატიული წყაროებიც.

მზე 5 მილიარდი წელია რაც არსებობს და კიდევ ამდენი წელი იარსებებს, ამიტომ სინათლის ენერგია უნდა გარდავქმნათ ელექტროენერგიად“, – გვეუბნება ბექა.

STEM აკადემიის მოსწავლეები

ბექას აზრით, ეს გამოგონება ძალიან პრაქტიკულია და მისი  დანერგვა ნებისმიერ ოჯახს შეუძლია.

„2-3 გაკვეთილი დასჭირდა ამის დამზადებას. გარდა ამისა, მიყვარს კომპიუტერული თამაშები და ამაზეც მინდა, რომ ვიმუშაო. კალკულატორის გაკეთება მაქვს დაწყებული“, – ამბობს ბექა.

ანა შელია და მისი მეგობრები კი little bit პროგრამის მეშვეობით სხვადასხვა კომპიუტერულ თამაშს ქმნიან. „ამ პროგრამას სხვადასხვა ფუნქცია აქვს და ვცდილობთ, მისი დახმარებით განსხვავებული თამაშები ავაწყოთ“, – გვეუბნება ანა.

ანა შელია და მისი მეგობრები კომპიუტერული თამაშების შექმნაზე მუშაობენ

რამდენიმე დღის წინ სკოლამ ინოვაციების ფესტივალს უმასპინძლა, სადაც სხვადასხვა რეგიონიდან STEM აკადემიის მოზარდებს თავიანთი ინოვაციური პროექტები ჰქონდათ წარმოდგენილი. გამოფენაში ბათუმის სტემ აკადემიის მოსწავლეებიც მონაწილეობდნენ, თუმცა საკონკურსო ნამუშევრების წარდგენას მომავალ წელს აპირებენ.

„წელს მხოლოდ დათვალიერებაში მივიღეთ მონაწილეობა, მომავალ წელს კი გვინდა კონკურსში მონაწილეობა და გამარჯვებაც“, – ამბობენ ბავშვები.