საქართველოში სამუშაო ვიზიტით იმყოფებიან AS Tallink Grupp-ის აღმასრულებელი დირექტორი პაავო ნოგენე, დირექტორთა საბჭოს წევრი კადრი ლანდი და კადრებისა და განვითარების დირექტორი ვაჰურ აუსმესი.
კომპანიის წარმომადგენლებმა 8-9 მაისს სამუშაო შეხვედრები გამართეს აჭარის არ მთავრობის თავმჯდომარესთან თორნიკე რიჟვაძესთან, საქართველოს საზღვაო ტრანსპორტის სააგენტოს ხელმძღვანელობასთან, ბათუმის სახელმწიფო საზღვაო აკადემიისა და ბათუმის ნავსადგურის მენეჯმენტის წარმომადგენლებთან.
შეხვედრა ესტონეთის უმსხვილესი საზღვაო კომპანია – AS Tallink Grupp-ის წარმომადგენლებთან
მხარეებს შორის საკმაოდ ნაყოფიერი შეხვედრები გაიმართა. შეხვედრებზე ესტონურ მხარეს გააცნეს რეგიონის საკრუიზო ტურიზმის განვითარების პერსპექტივები, საზღვაო სფეროში დაგეგმილი და განხორციელებული ცვლილებები და განიხილეს კომპანიის გეგმები და წინადადებები საქართველოს დროშის ქვეშ გემების რეგისტრაციას და
გემის ეკიპაჟის ქართველი მეზღვაურებით დაკომპლექტებასთან დაკავშირებით.
მიღწეულ იქნა უმნიშვნელოვანესი შეთანხმება საზღვაო აკადემიის სტუდენტების პრაქტიკით უზრუნველყოფის თაობაზე. აქვე აღვნიშნავთ, რომ რომ AS Tallink Grupp-სა და ბათუმის სახელმწიფო საზღვაო აკადემიას მრავალწლიანი და მრავალმხრივი თანამშრომლობა აკავშირებს.
AS Tallink Grupp-ი არის ესტონეთის ყველაზე დიდი საკრუიზო და სატვირთო გემების კომპანია ბალტიის ზღვის რეგიონში, რომელსაც 14 თანამედროვე გემისაგან შემდგარი ფლოტი ჰყავს და მაღალი ხარისხის სატრანსპორტო სერვისებს სთავაზობს მომხმარებელს.
