აჭარის მთავრობის თავმჯდომარემ და ბათუმის მერმა 9 მაისი მეორე მსოფლიო ომის ვეტერანებს ანატოლი კაჭარავას საფლავთან მიულოცეს, თუმცა ვეტერანები შეხვედრას არ დასწრებიან. აქ მხოლოდ ერთი ვეტერანი გამოჩნდა – ვასილ ტოცკი.
ბათუმის მერიის პრესსამსახურის უფროსი, თეკლა ჩიჩუა ამბობს, რომ შეხვედრის შესახებ ინფორმაცია ყველა ვეტერანს მიაწოდეს.
“როგორც გავიგე, მათ ფიზიკურად არ შეეძლოთ მისვლა,” – აღნიშნა თეკლა ჩიჩუამ. მისივე თქმით, მერიამ ვეტერანებს გადაადგილება ავტობუსით შესთავაზა.
ვეტერანმა ვასილ ტოცკიმ ომში გამარჯვებაზე ისაუბრა. მან ჟურნალისტებს ასევე უთხრა, რომ სტალინი ენატრება.
კაჭარავას საფლავი ყვავილებით მთავრობის სხვა წარმომადგენლებმაც შეამკეს.
დღეს საღამოს მერია ომის ვეტერანებს ვახშამზე ეპატიჟება, თუმცა უცნობია, მივლენ თუ არა იქ ვეტერანები. ვეტერანთა ოჯახებს 9 მაისის აღსანიშნავად 400-400 ლარს ჩაურიცხავენ.
ამჟამად ბათუმში მეორე მსოფლიო ომის 16 ვეტერანი ცხოვრობს.
9 მაისი ბათუმში
