ხალხს უკეთ რომ შეატყობინოს განათლების რეფორმის შესახებ, სამინისტრო 254 ათას ლარს დახარჯავს


საქართველოს განათლების, მეცნიერების, კულტურისა და სპორტის სამინისტრო მიიჩნევს, რომ განათლების სისტემაში მიმდინარე რეფორმის კუთხით „მედიით კომუნიკაცია არ აღმოჩნდა საკმარისი ამხელა მასშტაბის ინფორმაციის მიწოდებისათვის“, ამიტომ, ვინაიდან „ცვლილებები ეხება ძალიან ბევრ ადამიანს, მიზანშეწონილია, რაც შეიძლება სწრაფად დაიწყოს მარკეტინგული/საკომუნიკაციო კამპანია და ამით, გარანტირებული იყოს ყველა სამიზნე ჯგუფისთვის რაციონალური ინფორმაციის მიწოდება განათლების რეფორმის შესახებ“.

ამ კამპანიისთვის კი, სამინისტრო 254 ათას 162 ლარის ტენდერის გარეშე დახარჯვას გეგმავს, რისთვისაც სახელმწიფო შესყიდვების სააგენტოს თანხმობისთვის უკვე მიმართა.

„მიმდინარე პერიოდში რეფორმის ყველა მიმართულების განხორციელების ხედვა ჩამოყალიბებულია და ამ ეტაპისთვის რეფორმის უწყვეტად და შეუფერხებლად დაგეგმვა-განხორციელებისთვის პრინციპულად მნიშვნელოვანია საზოგადოების ინფორმირების მიზნით აქტიური საკომუნიკაციო კამპანიის წარმართვა 2018-2019 წლის სასწავლო პროცესის დასრულებამდე“, – აღნიშნულია სამინისტროს განაცხადში.

სამინისტრო ასევე აცხადებს, რომ სისტემას ჰყავს ძალიან დიდი და მასშტაბური სამიზნე აუდიტორია – მოსწავლეები, მშობლები, მასწავლებლები, სტუდენტები, ლექტორები, ექსპერტები, საერთაშორისო ორგანიზაციები, მეცნიერები და ა.შ. სამინისტრო კი, კვლევების საშუალებით ამოწმებს მათი ინფორმირებულობის დონეს:

„კვლევის შედეგებიდან გამომდინარე, საზოგადოების დიდი ნაწილი ჯერ კიდევ ფიქრობს, რომ განათლების რეფორმა მოიცავს მხოლოდ „გამოცდების გაუქმებას“, მასწავლებლებს არ აქვთ ინფორმაცია მათ მიერ ჩასაბარებელი გამოცდების შესახებ, მოსწავლეებისა და მშობლებისთვის უცნობია, რომ გამოცდები რეფორმირდა და არა მთლიანად გაუქმდა, რომ მათ მოუწევთ სხვადასხვა საფეხურზე გამოცდების ჩაბარება და ა.შ.“

განათლების სამინისტროს ინფორმაციით, გაფორმებულია ხელშეკრულება შპს „ეისითი“-სთან [ღირებულება 345 033 ლარი] განათლების სისტემის ერთიანი კომპლექსური რეფორმის ფარგლებში კვლევისა და საკონსულტაციო მომსახურებისთვის, „რომლითაც სამინისტრო ეტაპობრივად იღებს რეფორმისადმი საზოგადოების განწყობისა და მისი ინფორმირებულობის შესახებ გარკვეულ ინფორმაციას. აღნიშნულის საფუძველზე კვლევის შედეგების პირველადი მონაცემები სამინისტროსთვის ცნობილი გახდა მიმდინარე წლის 7 მაისს [მიღება-ჩაბარების აქტით ამ კონკრეტული კვლევისთვის გადახდილია 38 337 ლარი], რამაც გავლენა იქონია საკომუნიკაციო კამპანიის დაგეგმვა/განხორციელების პროცესზე და დაგვაყენა მითითებული მომსახურების შეზღუდულ ვადებში შესყიდვის საჭიროების წინაშე“.

„მნიშვნელოვანია, უმოკლეს ვადაში მოხდეს შესყიდვა გამარტივებული წესით, რომელიც, თავის მხრივ, კომპლექსურ შესყიდვას წარმოადგენს და ცალკეულ კომპონენტებად ტენდერის საშუალებით და არა ერთიანად მისი შესყიდვის განხორციელება, ჩაშლის საფრთხის ქვეშ დააყენებს პროექტის მიმდინარეობას,“ – მიიჩნევენ სამინისტროში.

საკომუნიკაციო კამპანიის მომსახურება მოიცავს შემდეგ კომპონენტებს:

  • რეფორმის დოკუმენტის ანალიზი; შეხვედრები/ინტერვიუები რეფორმის ავტორებთან; საკომუნიკაციო ტონალობის განსაზღვრა;
  • კამპანიის კრეატიული კონცეფცია და არხებში განშლა (მაგალითად, სოცმედიაგვერდის ნიმუში და რამდენიმე პოსტის მაგალითი);
  • ვიზუალური სტილი (ფერები და layout-ი); საკომუნიკაციო გეგმა (ეტაპები);
  • ვიდეორგოლების (2) სცენარები; ვიდეორგოლების (2) დამზადება.

საკომუნიკაციო კამპანიის მომსახურების გაწევის ვადა, სამინისტროს გათვლებით, ხელშეკრულების გაფორმებიდან, სავარაუდოდ, 3 თვე იქნება.

სამინისტროს განაცხადი შესყიდვების სააგენტოში განხილვის პროცესშია. განხილვის საბოლოო თარიღი კი 2019 წლის 15 მაისია.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com