საჯარო სკოლებისთვის „ინოვაციური სწავლების მეთოდების დანერგვის მიზნით“ აჭარის განათლების სამინისტრო ვირტუალური ლაბორატორიის [ფიზიკის] ელექტრონული პროგრამების შესყიდვას გეგმავს. ტენდერი გამოცხადებულია. სატენდერო თანხა კი 50 ათასი ლარია.
ელექტრონულ პროგრამებს სამინისტრო ქალაქ ბათუმის N1, N6, N13, N15, N16 და N20, ასევე, ხელვაჩაურის სოფლების – კაპრეშუმისა და მახინჯაურის და ქალაქ ქობულეთის N1 და N2 საჯარო სკოლებისთვის ყიდულობს.
„ელექტრონული ლაბორატორიის გამოყენებით მოსწავლე და მასწავლებელი ჩაატარებენ ცდებს როგორც ვირტუალურ, ასევე, რეალურ გარემოში, რაც იმას გულისხმობს, რომ რეალურ ვითარებაში ცდების ჩატარებისას მონიტორზე უნდა აისახებოდეს მოცემული ცდის თანმხლები უხილავი მოვლენების ვიზუალიზაცია. ლაბორატორიამ საშუალება უნდა მისცეს მოსწავლეს, პრაქტიკული რეალური ექსპერიმენტის დროს მიღებული მონაცემები ასახოს ვირტუალურ ლაბორატორიაში, გააანალიზოს შედეგები და გამოიტანოს სათანადო მეცნიერულად არგუმენტირებული დასკვნები,“ – აღნიშნულია შესასყიდი პროგრამების აღწერილობაში.
ტენდერში წინადადებების მიღება 2019 წლის 15 მაისს დაიწყება და 17 მაისს დასრულდება. გამარჯვებულმა ვირტუალური ლაბორატორიები შესაბამის სკოლებს ხელშეკრულების გაფორმებიდან 30 დღეში უნდა მიაწოდოს.
ტენდერის პირობის მიხედვით, „მიღება-ჩაბარების აქტის გაფორმებიდან 3 წლის განმავლობაში შესყიდვის ობიექტი მისი ნორმალური ექსპლუატაციის პირობებში არ უნდა ავლენდეს დეფექტებს. ამ ვადის განმავლობაში დეფექტის გამოვლენის შემთხვევაში მიმწოდებელი ვალდებულია შემსყიდველის მიმართვიდან ერთი სამუშაო დღის ვადაში უზრუნველყოს პრობლემის გამოსწორება, კერძოდ, უზრუნველყოს გამოვლენილი პროგრამული ხარვეზების აღმოფხვრა, ასევე, ოპერატიული სისტემის კომპიუტერში ჩაწერის შემთხვევაში პროგრამის ხელახალი ინსტალაცია“.
სამინისტრო ელექტრონული ლაბორატორიების გამარტივებული წესით [ტენდერის გარეშე] შეძენას გეგმავდა, თუმცა შესყიდვების სააგენტომ სამინისტროს ამაზე უარი უთხრა.
„სამინისტრომ სააგენტოს მიმართა დროის მოგების მიზნით. ვინაიდან თანხმობა ვერ მივიღეთ, პროგრამების შესყიდვაზე გამოცხადდება ელექტრონული ტენდერი. მართალია, შესყიდვის პროცედურები ტენდერის გამო დროში გაიწელება, თუმცა, იმედი გვაქვს, რომ სკოლებისთვის ამ პროგრამების შეძენას მიმდინარე სასწავლო წლის დასრულებამდე მოვასწრებთ,“ – გვითხრეს მაშინ აჭარის განათლების, კულტურისა და სპორტის სამინისტროში.
ამ თემაზე:
სამინისტრო სკოლებისთვის ფიზიკის ვირტუალური ლაბორატორიის პროგრამების შეძენას გეგმავს
