“უკვდავი პოლკის” აქციაზე შეკრებილები ბათუმში უკვე დაიშალნენ. მათ წელს გეორგიევსკის ლენტები და საბჭოთა ტოტალიტარული რეჟიმის სხვა სიმბოლოები არ გამოუყენებიათ.
“გაგვაფრთხილეს და ამიტომ არ გამოვიყენეთ, ჩვენ არ ვართ პოლიტიკური მოძრაობა,”- გვითხრა ლიკა ზახაროვამ, ეროვნული კონგრესის და უკვდავი პოლკის ორგანიზატორმა. მას და პოლკის სხვა მხარდამჭერებს გმირთა ხეივანში, ჟიული შარტავას ბიუსტთან და 9 აპრილის მემორიალთან მიახლოების საშუალება არ მისცეს. კონტრაქცია გმირთა ხეივანში „ნაციონალური მოძრაობის“ და არასამთავრობო ორგანიზაცია „ალტერნატივას“ წევრებმა გამართეს. მხარეებს შორის პოლიციელები ჩადგნენ. „უკვდავი პოლკის“ წევრები მალე და მსვლელობით ხეივნის შესასვლელისკენ გაბრუნდნენ.
„რა შუაშია აქ პოლიტიკა… მე მოვედი იმისთვის, რომ წინაპრები გავიხსენო. ჩემი ბაბუა ომში დაიღუპა,“ – აღნიშნა დარეჯან დიასამიძემ. მას, აქციის სხვა მონაწილეების მსგავსად, „უკვდავი პოლკის“ შესახებ ვკითხეთ. შეკრებილებმა გვიპასუხეს, რომ „რუსეთი და პუტინი არაფერ შუაშია“.
„არ ვიცი, რატომ დაგვიპირისპირდნენ ასე, ეს მათ ჰკითხეთ… ყველა ადამიანს თავისი აზრი აქვს. მე ვფიქრობ, რომ ორივესთან შესაძლებელია მეგობრობა, რუსეთთან და ევროპასთანაც,“ – განაცხადა თალიკო გაბეჩავამ.
„უკვდავი პოლკი” არ ცნობს საქართველოს საერთაშორისო კანონმდებლობით აღიარებულ საზღვრებს და სუვერენიტეტს. მათ ოფიციალურ ვებგვერდზე აფხაზეთი და სამაჩაბლო დამოუკიდებელ სახელმწიფოებადაა მოხსენიებული. „უკვდავ პოლკს“ პრორუსული ორგანიზაციები ხელმძღვანელობენ. აქციის კიდევ ერთმა მონაწილემ, ალექსანდრე მიკირტიჩიანმა გვითხრა, რომ პოლკის შესახებ მას აქამდე არ სმენია.
„მოვედი წინაპრების გასახსენებლად… ევროპა არის საქართველოს გამოსავალი. მე ვიცი, რომ ევროპის ქვეყნებშიც არსებობს ეს პოლკი და ყველგან აღნიშნავენ ფაშიზმზე გამარჯვების დღეს,“ – აღნიშნა ალექსანდრე მიკირტიჩიანმა. ის ბათუმში ცხოვრობს.
ომის ვეტერანებს დღევანდელი დღე ბათუმის მერიამ და აჭარის მთავრობამ ანატოლი კაჭარავას საფლავთან მიულოცეს, თუმცა ამ ღონისძიებას მხოლოდ ერთი ვეტერანი დაესწრო.
