ბათუმში, სელიმ ხიმშიაშვილის ქუჩაზე, შინდისის სკვერთან მშენებარე კორპუსიდან სამშენებლო მასალები გადმოცვივდა. მიუხედავად იმისა, რომ მშენებლობა ჯერ დასრულებული არ არის, უსაფრთხოებისთვის გათვალისწინებულ ღობეებსა და ბადეებს აქ ვერ ნახავთ.
„მასალები ცვივა და საფრთხეა ყოველთვის, ბავშვების გამო მეშინია უფრო… სულ ვიძახი, იმ მხარეს ნუ გადიხართ სათამაშოდ-მეთქი. გუშინწინ, ძლიერი ქარი როცა იყო, მეზობლის მანქანას დაეცა მშენებლობიდან გადმოვარდნილი ძელი,“ – გვიყვება შინდისის გმირების სკვერთან ერთ-ერთ კორპუსში მცხოვრები ნაირა დუმბაძე.
ავტომანქანაზე სამშენებლო მასალის დაცემის ფაქტს ავტომანქანის მესაკუთრეც ადასტურებს. მისი თქმით, კომპანიასთან მორიგება შედგა, ზარალი აუნაზღაურეს, პრეტენზია არ აქვს და კომენტარის სახით ვერაფერს გვეტყვის.
სამშენებლო მასალების ცვენის ფაქტს უარყოფენ კომპანია „Bala House“-ში. ეს კომპანია აშენებს საცხოვრებელ კორპუსს შინდისის სკვერთან. აქ გვითხრეს, რომ მოსახლეობას მათთვის სამშენებლო მასალების ცვენის პრობლემით არ მიუმართავს.
კომპანიის იურისტს, ნათია გოგიჩაიშვილს ასევე ვკითხეთ, რატომ არ აქვს კომპანიას სამშენებლო ბადე, რაც უსაფრთხოების ერთ-ერთი პირობაა.
„მშენებლობა უკვე დასრულებულია და მიმდინარეობს ფასადზე მუშაობა… ამიტომაც ამ ეტაპზე ბადე გამოყენებული არ არის,“ – გვიპასუხა ნათია გოგიჩაიშვილმა.
„ჩვენ ეს კომპანია დაახლოებით ერთი თვის წინ გავაფრთხილეთ. ძირითად სართულებზე კედლები უკვე ამოყვანილია, მაგრამ ბოლო სართული ჯერ კიდევ ღიაა. სავარაუდოდ ხვალ შევისწავლით ამ საქმეს და შესაძლოა, ეს კომპანია დაჯარიმდეს,“ – აღნიშნა ბათუმის მერიის არქიტექტურის სამსახურის სამშენებლო და საპროექტო განყოფილების უფროსმა, ირაკლი მოქიამ.
ეს არ არის პირველი შემთხვევა, როცა მშენებლობიდან ნივთები სახიფათოდ ცვივა. ასევე იშვიათად იპოვით ბათუმში მშენებლობას, სადაც სამშენებლო ბადეებს იყენებენ. მშენებლობის სტანდარტებს ბათუმის მერიის ზედამხედველობის სამსხური აკონტროლებს.
