Batumelebi

აჭარის საზოგადოებრივი მაუწყებლის დირექტორის, ნათია კაპანაძის გადაყენების შემდეგ, ტელევიზიის ოპერატორებმა გაფიცვა შეწყვიტეს. ისინი ამ წუთებში ჩვეულებრივ აგრძელებენ მუშაობას. ერთ-ერთი ოპერატორის, ლაშა ჯოყილაძის განმარტებით, გაფიცვა მხოლოდ დროებით შეწყვიტეს:

„მოვილაპარაკეთ და გადავწყვიტეთ საშუალება მივცეთ ახალ მენეჯმენტს განიხილოს ჩვენი პრობლემები, თუ სიტუაცია ისევ შევა ჩიხში, ჩვენ არ გამოვრიცხავთ, რომ გამოვიდეთ გარეთ და გავაგრძელოთ გაფიცვა“.

ოპერატორები აცხადებენ, რომ ხელფასის მომატებას ისინი დიდი ხანია ითხოვენ და ამის თაობაზე არაერთხელ მიმართეს საზოგადოებრივი მაუწყებლის უკვე ყოფილ  დირექტორს ნათია კაპანაძეს, თუმცა ამ საკითხის განხილვა 2020 წლისთვის გადაიდო.

აჭარის ტელევიზიის ოპერატორები დღეს გაიფიცნენ, მანამდე, ვიდრე ტელევიზიის სამეთვალყურეო საბჭო დირექტორის გადაყენების პროცედურას დაიწყებდა. ბორდმა დირექტორი უკვე გადააყენა.

ოპერატორი ლაშა ჯოყილაძე აცხადებს, რომ ეს პროცესი იმპიჩმენტის პროცედურისთვის შეგნებულად არ დაუმთხვევიათ:

„ჩვენი პროცესი დაიწყო იანვრის თვეში, ამ დროს ქალბატონი ნათიას იმპიჩმენტზე საუბარი არ ყოფილა. ჩვენ გაფიცვის შესახებ სამი დღით ადრე განვაცხადეთ, ბორდი 18-ში გეგმავდა იმპიჩმენტის პროცედურის განხილვას. მე არ გამოვრიცხავ, შესაძლებელია ჩვენი პრობლემაც გახდა ერთ-ერთი მიზეზი, ძალიან ბევრი პრობლემა იყო დაგროვებული, თუმცა ეს ბორდის პრეროგატივა იყო და ბორდმა გადაწყვიტა.“

ოპერატორი ამბობს, რომ ჯერ არ შეთანხმებულან ვადაზე, რასაც ისინი ხელფასების მომატების საკითხის განსახილველად ახალ მენეჯმენტს მისცემენ.

„თუკი  8 თვის შემდეგ წავიდოდა ნათია კაპანაძე იმიტომ, რომ მისი უფლებამოსილების ვადა იწურებოდა, ესე იგი, შესაძლებელია, სიტყვის თავისუფლება საფრთხის ქვეშ დამდგარიყო? შეუძლებელია, ჩვენ ამაზე ვილაპარაკოთ,“ – ასე პასუხობს „აჭარის ტელევიზიის“ მრჩეველთა საბჭოს თავმჯდომარე, ნატა იმედაიშვილი შეკითხვას სარედაქციო დამოუკიდებლობაში ჩარევის რისკთან დაკავშირებით, რომელიც შესაძლოა დირექტორის თანამდებობიდან გადაყენებით დაიწყოს. დღეს, 19 აპრილს, მრჩეველთა საბჭოს ოთხმა წევრმა დირექტორის – ნათია კაპანაძის იმპიჩმენტი დააკმაყოფილა.

ნატა იმედაშვილს ვკითხეთ, რის გამო დაუჭირა მხარი მან იმპიჩმენტს, რომელიც 10 აპრილს საბჭოს წევრებმა გიგა ჩხარტიშვილმა [„ქართული ოცნების“ კვოტა] და ირაკლი დარცმელიძე [„ერთიანი ნაციონალური მოძრაობის“ კვოტა] დასვეს. მრჩეველთა საბჭოს თავმჯდომარე ამბობს, რომ მისი პოზიცია დღეს ნათია კაპანაძის არაარგუმენტირებულობამ განაპირობა.

„რაზეც ნათია კაპანაძეს ჰქონდა არგუმენტი, ეს შეეხებოდა რეიტინგს, რომელიც მე ყველაზე ნაკლებად მაღელვებს… იყო დასაბუთება, რომ არსებობს ნდობა და გვყავს მაყურებელი, რომელმაც იცის, რომ აჭარის ტელევიზია არსებობს“, – ამბობს ნატა იმედაშვილი.

რა საკითხზე ვერ მიიღო პასუხი მრჩეველთა საბჭომ ნათია კაპანაძისგან? – ნატა იმედაშვილი რამდენიმე საკითხს ასახელებს, მათ შორის, პრიორიტეტების შეუსრულებლობას და უსამართლობის განცდას, რომელიც თანამშრომლების ნაწილს აქვს.

„დღეს უწოდეს ამ პროცესს მართული, მაგრამ ეს საბაბის გარეშე არ არსებობდა… ბოლო სხდომაზე ანგარიშის წარმოდგენის დროს იყო საუბარი იმაზე, რომ შესრულდებოდა პრიორიტეტები და გაკეთდებოდა გადაცემები განათლების შესახებ, ასევე საბავშვო გადაცემები და დოკუმენტური ფილმები. ჩვენ ველოდით, რომ დღეს იქნებოდა უფრო მეტი არგუმენტები…

ასევე თანამშრომლების ნაწილს აქვთ უსამართლობის განცდა იგივე სახელფასო გადანაწილებასთან დაკავშირებით. ძალიან ბევრ თანამშრომელს აქვს უსამართლობის განცდა. თანამშრომლებისთვის უცხო არ არის, რომ მან ერთ-ერთ მოწვეულ კონსულტანტს ორ თვეში 16 ათასი ლარი გადაუხადა,“ – აღნიშნა ნატა იმედაშვილმა.

საბავშვო გადაცემების არქონა, ან განათლების შესახებ ცალკე გადაცემა არის თუ არა საკმარისი მიზეზი იმპიჩმენტისთვის? – ნატა იმედაიშვილის თქმით, წლების განმავლობაში განიხილებოდა ეს პრობლემები და ბოლოს, როცა უმაღლეს საბჭოს ანგარიში ჩააბარა, როგორც მრჩეველთა საბჭოს თავმჯდომარე, ჰქონდა პირობა, რომ ეს პრობლემები მოგვარდებოდა.

„აჭარის ტელევიზია“ ნათია კაპანაძის დირექტორობის დროს არაერთი ადგილობრივი და საერთაშორისო ორგანიზაციის ანგარიშში მოხვდა, როგორც მიუკერძოებელი მაუწყებელი. ნატა იმედაშვილს ასევე ვკითხეთ, რატომ არ გახდა მისთვის ანგარიშგასაწევი იგივე ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) საბოლოო ანგარიშ, სადაც აჭარის ტელევიზია მოხვდა, როგორც ერთადერთი ქართული ტელესადგური, რომელმაც მაყურებელს არჩევნებში მონაწილეთა ზოგადი შედარება შესთავაზა. მრჩეველთა საბჭოს თავმჯდომარემ გვითხრა, რომ კვლევებს და, მათ შორის, ეუთოს დასკვნებს ენდობა, თუმცა ტელევიზიის მუშაობას დადებითად მაშინაც აფასებდნენ, როცა ის მთავრობის საქვეუწყებო დეპარტამენტი იყო.

„მე ვერ მოვიძიე ეს კვლევები, ხელთ არ მაქვს, მაგრამ 2013 წლამდეც კეთდებოდა აჭარის ტელევიზიის მისამართით დასკვნები, რომ არჩევნებს ეს ტელევიზია კარგად აშუქებდა… ეს მაღალი სტანდარტი აუცილებლად უნდა შენარჩუნდეს. მე მგონია, რომ მრჩეველთა საბჭომ უნდა აიღოს სწორედ ეს პასუხისმგებლობა. მე არ ვფიქრობ, რომ მრჩეველთა საბჭო, ან დირექტორია თავისუფლების გარანტი. მგონია, რომ ერთიანად უნდა მოხდეს ამის გადანაწილება,“ – აღნიშნა ნატა იმედაშვილმა „ბათუმელებთან“ საუბრის დროს.

103 თანამშრომელი და ქარტიის მონიტორინგი – არის თუ არა კაპანაძე აჭარა TV-ის დამოუკიდებლობის გარანტი 

„აჭარის ტელევიზიის“ მრჩეველთა საბჭომ დღეს, 19 აპრილს, მიიღო გადაწყვეტილება და ნათია კაპანაძე დირექტორის თანამდებობიდან გადააყენა. ნათია კაპანაძეს ბორდის ხუთი წევრიდან უნდობლობა ოთხმა წევრმა გამოუცხადა.

10 დღეში ახალი დირექტორის შესარჩევად კონკურსი გამოცხადდება.

ნათია კაპანაძეს ვადის ამოწურვამდე 6 თვე ჰქონდა დარჩენილი.

„ბათუმელების“ ინფორმაციით, აჭარის ტელევიზიის დირექტორად თორნიკე მჟავანაძის არჩევას აპირებენ.

„აჭარის ტელევიზიის“ მრჩეველთა საბჭომ დღეს, 19 აპრილს, ნათია კაპანაძე დირექტორის თანამდებობიდან გადააყენა. ნათია კაპანაძეს ბორდის ოთხმა წევრმა გამოუცხადა უნდობლობა.

10 დღეში ახალი დირექტორის შესარჩევად კონკურსი გამოცხადდება.

ვიდრე მრჩეველთა საბჭო ტელევიზიის ახალ დირექტორს შეარჩევს, დირექტორის მოვალეობას ავტომატურად მისი მოადგილე ასრულებს. „აჭარის ტელევიზიის“ დირექტორის მოადგილე მაუწყებლის განვითარების დარგში ამ დროისთვის ნათია ზოიძეა. დირექტორის მოვალეობის შესრულება სწორედ მას მოუწევს.

გათავისუფლებულ დირექტორს შეუძლია სასამართლოს მიმართოს. აქამდე არსებული პრაქტიკით, როცა საზოგადოებრივი მაუწყებლის დირექტორი გადააყენეს, სასამართლომ გამოცხადებული კონკურსი შეაჩერა.

„თუკი დირექტორს უნდობლობა გამოუცხადეს, მას შეუძლია სასამართლოს მიმართოს და უზრუნველყოფის სახით გამოცხადებული კონკურსის შეჩერებაც მოითხოვოს  საბოლოო გადაწყვეტილების მიღებამდე. ასეთი პრაქტიკა უკვე არსებობს: 2013 წელს საქართველოს საზოგადოებრივი მაუწყებლის დირექტორი გიორგი ბარათაშვილი გაათავისუფლეს. ამ დროს სასამართლომ გამოცხადებული კონკურსი შეაჩერა. სასამართლომ შესაძლოა ეს მოთხოვნა არ დააკმაყოფილოს,“ – განმარტავს მარიამ გოგოსაშვილი, „ახალგაზრდა იურისტთა ასოციაციის“ იურისტი.

რაც შეეხება კონკურსს, თუკი მას სასამართლო არ შეაჩერებს, მისი გამოცხადებიდან ერთ თვეში განცხადებების მიღება იქნება შესაძლებელი, მომდევნო სამ დღეში ქვეყნდება სია – ვის სურს ტელევიზიის დირექტორობა. კანდიდატებს ესაუბრება და ახალ დირექტორს ტელევიზიის მრჩეველთა საბჭო შემდეგ ერთ კვირაში არჩევს.

“არის თუ არა აჭარის ტელევიზია სანდო თქვენთვის?“- მიმართა ნათია კაპანაძემ ბორდის წევრებს და დარბაზს. დღეს, 19 აპრილს მრჩეველთა საბჭო ტელევიზიის დირექტორის იმპიჩმენტის საკითხს განიხილავს. სხდომა ამ წუთებშიც გრძელდება.

ნათია კაპანაძისთვის პასუხი ტელევიზიის სანდოობაზე ჯერ არ გაუციათ. მან მინიშნება იმ საერთაშორისო ორგანიზაციების დასკვნებზე გააკეთა, რომლის მიხედვითაც აჭარის ტელევიზია მიუკერძოებელია და გამორჩეული პლატფორმა შესთავაზა ამომრჩევლებს წიმასაარჩევნო პერიოდში.

„საფრთხე არ ემუქრება სიტყვის თავისუფლებას,“ – ამ სიტყვებით დაიწყო საკუთარი გამოსვლა მრჩეველთა საბჭოს წევრმა, გიგა ჩხარტიშვილმა. მან 10 აპრილს ირაკლი დარცმელიძესთან ერთად დააყენა ნათია კაპანაძის იმპიჩმენტის საკითხის განხილვა.

გიგა ჩხარტიშვილმა აქცენტი რეიტინგის კლებაზე გააკეთა. მისივე თქმით, ტელევიზიის დირექტორი თანამშრომლებს მრჩეველთა საბჭოს წევრებთან ურთიერთობას უკრძალავდა.

„ის იღებს ერთპიროვნულ გადაწყვეტილებებს… როგორც უნდა, ისე განკარგავს თანხებს,“ – აღნიშნა საბჭოს კიდევ ერთმა წევრმა, ირაკლი დარცმელიძემ. მან თქვა, რომ დირექტორს იმ თანამშრომლების ფინანსური წახალისება სთხოვა, რომლებიც „ლეოგრანდის“ ხანძრის პროცესს, ან 11-12 მარტის ბათუმის მოვლენებს აშუქებდნენ.

„არაფერი არ გაითვალისწინა, არავითარი რეაგირება,“ – დასძინა ირაკლი დარცმელიძემ.

„მე ყოველთვის ვმუშაობდი, ვმუშაობ და ვიმუშავებ კანონის შესაბამისად,“ – თქვა ნათია კაპანაძემ.

ნათია კაპანაძე სხდომაზე დოკუმენტებით მივიდა. მისი გამოსვლის დასრულების შემდეგ აჭარის ტელევიზიის დირექტორს კითხვებს დაუსვამენ. საბოლოოდ კი, მრჩეველთა საბჭოს წევრები დირექტორისთვის უნდობლობის გამოცხადების საკითხს უყრიან კენჭს.

„ეს პროცესი მართულია,“ – ამბობს მრჩეველთა საბჭოს წევრი ბეჟან გობაძე. მან უკვე თქვა, რომ ნათია კაპანაძის იმპიჩმენტის საკითხს მხარს არ დაუჭერს.

მრჩევეთა საბჭოს სხდომა აჭარის ტელევიზიის შენობაში გრძელდება.

მრჩეველთა საბჭოს ორი წევრი, რომლებიც ნათია კაპანაძის იმპიჩმენტს უჭერენ მხარს, აცხადებენ, რომ მისი მართვის პირობებში აჭარის საზოგადოებრივი მაუწყებელში შექიმნა კრიზისი როგორც ადამიანური რესურსების მართვის, ისე – პროგრამული პრიორიტეტების შესრულების კუთხით. ასევე, აღნიშნული ორი წევრის მოსაზრებით, კაპანაძე არასათანადოდ ხარჯავს მაუწყებლის ბიუჯეტს. თავად ნათია კაპანაძე მიიჩნევს, რომ მის წინააღმდეგ დაწყებული პროცესი პოლიტიკურად მოტივირებულია.

„აჭარის ტელევიზია“ ნათია კაპანაძის დირექტორობის პერიოდში, ტელევიზიის არსებობის განმავლობაში პირველად, არაერთ კვლევაში მოხვდა, როგორც დაბალანსებული მედიაორგანიზაცია.

წელს ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) საბოლოო ანგარიშში აჭარის ტელევიზია მოხვდა, როგორც ერთადერთი ქართული ტელესადგური, რომელმაც მაყურებელს არჩევნებში მონაწილეთა ზოგადი შედარება შესთავაზა. 

„აჭარის ტელევიზია“ მოხვდა „Human Rights Watch“-ის მიერ 2018 წლის იანვარში გამოქვეყნებულ ანგარიშშიც, რომელშიც დადებითად არის ასახული „აჭარის ტელევიზიის“ ეთერში რადიო „თავისუფლების“ იმ გადაცემების განთავსება, რომლებიც საზოგადოებრივი მაუწყებლის პირველმა არხმა დახურა.

აჭარის ტელევზიის სამეთავლყურეო საბჭოს წევრები არიან ნატა იმედაიშვილი [თავმჯდომარე], ირაკლი დარცმელიძე, გიგა ჩხარტიშვილი, გიორგი ირემაძე და ბეჟან გობაძე.

აჭარის ტელევიზიაში მიმდინარე პროცესებს საერთაშორისო საზოგადოების მხრიდან არაერთი გამოხმაურება მოჰყვა.

აღნიშნულ საკითხთან დაკავშირებით განცხადება 18 აპრილს გაავრცელა ეუთოს წარმომადგენელმა მედიის თავისუფლების საკითხებში ჰარლემ დეზირმა,ევროკავშირის ელჩმა საქართველოში კარლ ჰარცელმა, ასევე, აშშ-ის საელჩომ საქართველოში.

აჭარის უმაღლესი საბჭოს თავმჯდომარე დავით გაბაიძე, საზოგადოებრივი მაუწყებლის აჭარის ტელევიზიაში მიმდინარე პროცესებთან დაკავშირებით „ბათუმელებთან“ კომენტარს აკეთებს და ამბობს, რომ ამ თემაზე პოლიტიკოსები რაც უფრო ნაკლებად ისაუბრებენ, უკეთესი იქნება.

„ეს არის ტელევიზიის შიდა საქმე. ტელევიზიის ერთი ორგანო ესაუბრება მეორე ორგანოს. დირექტორიც და ბორდიც არის ტელევიზიის ნაწილი. აქედან გამომდინარე, პოლიტიკოსები რაც უფრო ნაკლებს ვილაპარაკებთ ამ თემაზე და ვიტყვით, ვფიქრობ, რომ ეს იქნება სწორი პოზიცია და ამ პრინციპს ვერ დავარღვევ.

ჩემმა ნებისმიერმა სიტყვამ შესაძლებელია გამოიწვიოს გაუგებრობები, გამომდინარე იქედან, რომ ტელევიზია არის დამოუკიდებელი და ზედმეტი სიტყვა და მოქმედება პოლიტიკოსის მხრიდან იქნება არასწორი“, – ამბობს დავით გაბაიძე.

აჭარის ტელევიზიის ბორდის ორი წევრი, ტელევიზიის დირექტორის იმპიჩმენტს ითხოვს. ბორდის წევრებმა დღეს, 19 აპრილს უნდა უყაროს კენჭი დირექტორის თანამდებობიდან გადაყენების საკითხს. დღეს, ხელფასების გაზრდის მოთხოვნით, ტელევიზიის 13 ოპერატორიც გაიფიცა.

ტელევიზიაში მიმდინარე პროცესებთან დაკავშირებით ინფორმაცია გაავრცელა ამერიკის საელჩომ საქართველოში. ევროკავშირის ელჩმა საქართველოში კარლ ჰარცელმა, ეუთოს წარმომადგენელმა მედიის თავისუფლების საკითხებში ჰარლემ დეზირმა.

დღეს, 19 აპრილს, აჭარის ტელევიზიის საინფორმაციო სამსახურის 13-მა ოპერატორმა გაფიცვა დაიწყო. აჭარის ტელევიზიის საინფორმაციო სამსახურის უფროსის მოადგილე, მაია მერკვილაძე ამბობს, რომ ზუსტად არ იცის, როგორ გააგრძელებენ მუშაობას და მოახერხებენ თუ ვერა საინფორმაციო გადაცემების ეთერში გაშვებას.

მაია მერკვილაძე: „ამ ეტაპზე გაფიცულია 13 ოპერატორი. ისინი საინფორმაციო სამსახურის ოპერატორები არიან. დღეს აღმოვაჩინეთ, რომ მათ შეუერთდნენ ორი ბიუროს – ხულოს და ქობულეთის ოპერატორებიც. ერთი ჯგუფი წასულია უკრაინაში არჩევნების გასაშუქებლად. ამ ეტაპზე მუშაობს მხოლოდ ორი ოპერატორი – ანალიტიკური მიმართულების ოპერატორები. ისინი ალბათ დღეს გადაიღებენ ბორდის სხდომას.

საინფორმაციო გადაცემებს არ ვიცი როგორ შევავსებთ. გვაქვს რამდენიმე თემატური მასალა, რომელსაც ალბათ გამოვიყენებთ დღეს“.

დღეს, 13:00 საათზე აჭარის ტელევიზიის სამეურვეო საბჭო ტელევიზიის დირექტორის იმპიჩმენტის საკითხს განიხილავს.

ბევრი ადგილობრივი და საერთაშორისო ორგანიზაცია აჭარის ტელევიზიის ირგვლივ განვითარებულ მოვლენებს აფასებს, როგორც რისკს სარედაქციო დამოუკიდებლობის კუთხით.

მთავარი ფოტო მაია მერკვლიაძის ფბ გვერდიდან.

დღეს 19 აპრილს, საზოგადოებრივი მაუწყებლის აჭარის ტელევიზიის ახალი ამბების 13 ოპერატორი გაიფიცა. ისინი ტელევიზიის შენობის წინ არიან შეკრებილი და აცხადებენ, რომ სანამ მათი მოთხოვნები არ დაკმაყოფილდება, მუშაობას არ გააგრძელებენ.

„ჩვენ გვქონდა მოთხოვნა გუშინ სახელფასო ანაზღაურებაზე და შეხვედრები გვქონდა მენეჯმენტთან, ეს პირველი შეხვედრა არ იყო, არამედ ბოლო იყო, რადგან უშედეგოდ დამთავრდა. იყო საუბარი – „მოდით ჩვენ ერთად დავიწყოთ მშენებლობა, ერთად რაღაც ვაკეთოთ“. ჩვენ რა უნდა ვაკეთოთ, ჩვენ ჩვენი საქმე გვაქვს“, – ამბობს ომარ ბერიძე, აჭარის საზოგადოებრივი მაუწყებლის პროფკავშირების კომიტეტის თავმჯდომარე.

„ბათუმელების“ კითხვაზე, რამდენი პროცენტით ითხოვენ ხელფასების მატებას, გაფიცული ოპერატორები არ აკონკრეტებენ. „ხელფასების მომატებაზე საერთოდ არ იყო საუბარი და შემდეგ წავიდა მუქარის ტონი, რომ „შენ გადიხარ გაფიცვაზე?“ მაშინ ავდექით და წამოვედით“, – ამბობს ომარ ბერიძე, რომელმაც გვითხრა, რომ ის ყველა გაფიცული ოპერატორის სახელით აკეთებს განცხადებას.

ოპერატორები დღეს დაგეგმილ სამეურვეო საბჭოს სხდომაზეც აპირებენ დასწრებას. დღეს, 13:00 საათზე სამეურვეო საბჭო აჭარის ტელევიზიის დირექტორის იმპიჩმენტის საკითხს განიხილავს.

ბევრი ადგილობრივი და საერთაშორისო ორგანიზაცია აჭარის ტელევიზიის ირგვლივ განვითარებულ მოვლენებს აფასებს, როგორც რისკს სარედაქციო დამოუკიდებლობის კუთხით.

ამავე თემაზე:

ბათუმში პუშკინისა და მელიქიშვილის ქუჩების გადაკვეთაში, ზამთარ-ზაფხულ, წლებია დგანან კლიენტების მომლოდინე მუშები. ისინი ძირითადად იმერეთის მუნიციპალიტეტებიდან არიან ჩამოსულები და თვიდასაქმების ამ ფორმის არჩევა მოუხდათ: როგორც თავად ამბობენ, ახლომახლო მცხოვრებ მოქალაქეებს მუშების ქუჩაში ჯგუფ-ჯგუფად დგომა აწუხებთ და სართულებიდან ნარეცხ ან ცხელ წყალსაც ასხამენ ხოლმე.

კორპუსის კედლებზე, რომლის ახლომახლოც მუშები იკრიბებიან, მათი ჩანთები კიდია. ჩანთებში მუშების სამოსი და პირადი ნივთებია. აქვე აწყია სამუშაო იარაღების დიდი, მძიმე ჩემოდნებიც. დგანან და კლიენტებს ელიან.

კაფელ-მეტლახის დაგება, სარემონტო სამუშაოები, მძიმე ტვირთების გადაზიდვა-გადმოზიდვა – ვისაც მუშის დახმარება სჭირდება ბათუმში ამ ადგილს აკითხავს. თუმცა თვითდასაქმებულები ამბობენ, რომ კლიენტი ძალიან ცოტა ჰყავთ, დღეში შეიძლება ,,ბირჟაზე“ ორი კლიენტი მივიდეს და სულ 5 კაცი დასაქმდეს, მაგრამ დანარჩენები იდგნენ და კვირაობით ელოდნენ სამუშაოს. „ვართ აქანა დამდგარი მაინც და ველოდებით ბედს“, – ამბობს გელა ხვედელიძე, რომელიც ბათუმში ჭიათურიდან ჩამოვიდა სამუშაოდ ათი წლის წინ.

„შეიძლება ისე დაღამდეს, ერთი კლიენტიც არ მოვიდეს. ბინის ქირა გვინდა, ჭამა გვინდა, ოჯახი მყავს ჭიათურაში, რომელიც ჩემგან ორ კაპიკს ელოდება. თუ რამეს ვიშოვი ბარათზე ვურიცხავ, თუ ვერ ვიშოვი კი ვარ ასე, რა ვქნა. მუშები რაც შეიძლება იაფიან ბინებს ვქირაობთ, ძირითადად პირველ სართულზე ,,პადვლებში“, – ამბობს გელა ხვედელიძე.

ვიდეო, მონტაჟი – ია ფრანგიშვილი.

მისი თქმით, კაფელ-მეტლახის და სარემონტო სამუშაოების მცოდნე ხელოსნებს გაუმართლათ, რადგან რაღაც იციან და შედარებით უკეთესი მდომარეობა აქვთ.

„კაფელი, მეტლახი – ასეთი რამეები რომ შემეძლოს კარგია. ვისაც ხელოსნობა არ გვეხერხება ფიზიკურად ვმუშაობთ, შემოვა ახლა მანქანა აგერ, რაღაცა აქვს დასაცლელი, შევთანხმდებით თანხაზე და წავიმუშავებ. ან შეიძლება მძიმე ტვირთი, სამშენებლო-სარემონტო მასალები ჰქონდეს ვინმეს ასატან-ჩამოსატანი მაღალ სართულებზე, ესაა ჩვენი საქმე. შარშან 80 დღე არ გაწვიმებულა ჭიათურაში – გვალვა, ფაროსანა, ყველაფერი მოგვესპო, რა მოსავალი უნდა მიგვეღო?“ – ამბობს გელა ხვედელიძე.

სანამ ბათუმში ჩამოვიდოდა, ჭიათურაში სოფლის მეურნეობის პროდუქტები მოჰყავდა. თუმცა, მისივე თქმით, იქ მიწა მწირია, ხვნა-თესვისა და სასუქების საფასური მიღებული პროდუქტების ფასს აჭარბებდა და შრომამ სოფლად გელა ხვედელიძისთვის აზრი დაკარგა.

მუშების „ბირჟა“ ბათუმში საცხოვრებელ კორპუსებთან ახლოსაა. კლიენტების მოლოდინში მუშები ხან კარტს თამაშობენ, ხანაც ხმამაღლა საუბარი უწევთ, რაც იქვე მდგარი კორპუსის მცხოვრებლებს აღიზიანებთ.

„აქ ოჯახები ცხოვრობს და ხანდახან ცოტა ხმამაღალი საუბარიც მოგვდის, ამიტომ ზოგჯერ ნარეცხ წყალს გადმოგვასხამენ ხოლმე სართულებიდან, ხან ცხელს, ხან ცივს (ცივი გვირჩევნია), მაგრამ ვითმენთ, რას ვიზამთ. ხანდახან ჩვენც ვაშავებთ, მაგრამ ფიზიკური შეურაცხყოფა მეტისმეტია. მუშები ვართ, მაგრამ ადამიანები ვართ“, – ამბობს გელა ხვედელიძე.

39 წლის ირაკლი ვერულიძეც მუშების ,,ბირჟიდანაა“ – მეუღლე და მცირეწლოვანი შვილი ჰყავს. ქობულეთიდან ბათუმში სამუშაოდ 15 წლის წინ ჩამოვიდა, ქობულეთში ოჯახი კორპუსში ცხოვრობდა და მცირე მიწის ნაკვეთი ჰქონდა, რაზეც მხოლოდ ცოტა კიტრის, პომიდვირს მოყვანას ახერხებდნენ. ეს საკმარისი აღარ იყო და ირაკლი ბათუმში წამოვიდა ოჯახთან ერთად. თავს ,,შავ მუშას“ უწოდებს და გელა ხვედელიძის მსგავსად კონკრეტული ხელობა არ აქვს. მძიმე ფიზიკურ შრომას ეწევა, რაც დიდი შემოსავლის წყარო არ არის. ოჯახი ერთი კვირის, ხანაც ათი დღის განმავლობაში 20 ლარით ცხოვრობს.

„ერთი კვირაა აქ ვდგავარ და ერთი თეთრის არ მიმუშავია. ორი დღეა ბავშვი მეხვეწება კანფეტი მომიტანეო და ვერ მიმაქვს, ეს ცხოვრებაა?

ჩვენი მთავრობა მთავრობა არაა. ყველა საკუთარი ჯიბისთვის იბრძვის. ქარხნები, საწარმოები რომ იყოს, გააკეთოს მთავრობამ და დაასაქმოს ეს ხალხი, ხო აღარ ვიწვალებდით ასე. რა თქმა უნდა, ქარხანაში წავიდოდა კაცი. აქ წანწალს ურჩევნია, რომ ერთ ადგილზე დასაქმდეს და ხელფასი ჰქონდეს“, – ამბობს 39 წლის მუშა.

ირაკლი ამბობს, რომ ზამთარი ყვეელაზე რთული დროა ,,ბირჟაზე“ თვითდასაქმებულებისთვის – ამ დროს სამუშაო თითქმის არაა, მაგრამ ყველა მაინც აქ დგას  იმედით, რომ რაღაც მაინც გამოჩნდება.

ვიდეო, მონტაჟი – ია ფრანგიშვილი.

„დაახლოებით ორი თვე ქუჩაში ვიყავი, ანუ სტაბილური საცხოვრებლის გარეშე… ხან დილის 6 საათზე ვრეკავდი 115-ზე, რომ ღამით იქნებ ერთი ადგილი გამოეყოთ ჩემთვის. ცხელ ხაზზე უამრავი ზარი შედის, სულ დაკავებაა… პირველად მეტროს დახურულ სადგურში მომიწია ადგილი, ის იყო თავშესაფარი, იატაკზე დაგებულ მატრასებზე ხალხი ეყარა, გასასვლელში დარბოდნენ ვირთხები… ძლივს დავიძინე.

იგივე მეორდებოდა – დილით ისევ ვრჩებოდი ქუჩაში მარტო და გამუდმებით უნდა მერეკა ცხელ ხაზზე, რომ ღამით ღია ცისქვეშ არ დავრჩენილიყავი,“ – ამას პარიზის რეგიონში მყოფი ირაკლი გვიყვება [სტატიაში შეცვლილია იმ ადამიანების სახელები, რომლებიც ლტოლვილის სტატუსის მიღებას ითხოვენ].

ირაკლი ერთ-ერთია ასეულობით საქართველოს მოქალაქეს შორის, ვინც საფრანგეთში ლტოლვილის სტატუსის მიღებას ელის. ახლა ირაკლი მეგობართან ერთად ცხოვრობს, რომელიც საფრანგეთის მოქალაქეა.

ვიზალიბერალიზაციის ამოქმედების შემდეგ საქართველოდან ევროპის ქვეყნებში თავშესაფრის მთხოვნელთა რაოდენობა 18 ათასამდე გაიზარდა. ბათუმის სახელმწიფო უნივერსიტეტში 20 მარტს გამართულ შეხვედრაზე გიორგი ტაბატაძემ, საგარეო საქმეთა სამინისტროს საკონსულო დეპარტამენტის დირექტორმა, ხაზი გაუსვა იმასაც, რომ განსაკუთრებით საფრანგეთში საქართველოს მოქალაქეების სიკვდილიანობის მაჩვენებელი გაიზარდა – ევროპის ქვეყნებიდან საფრანგეთში გამორჩეულად მეტი ადამიანი მიდის ჯანმრთელობის პრობლემით.

რა რეალობა ხვდებათ საფრანგეთში ჩასულ საქართველოს მოქალაქეებს? სიკვდილიანობის მაჩვენებლის ზრდა ხომ არ ნიშნავს იმას, რომ ადამიანების ნაწილი საერთოდ სამედიცინო მომსახურების გარეშე რჩება? რა რისკები ხვდებათ უცხო ქვეყანაში ჩასულ ადამიანებს? – „ბათუმელებმა“ ამ კითხვებზე პასუხის მიღება საფრანგეთში მცხოვრებ ქართველებთან სცადა, მათ შორის, მათთან, ვინც ჯანმრთელობის პრობლემის გამო დატოვა საქართველო. ვესაუბრეთ ოფიციალური უწყებების წარმომადგენლებსაც.

ადამიანები, რომლებიც თავშესაფარს ელიან

„როგორც ვიცი, სიტუაცია რადიკალურად მას შემდეგ შეიცვალა, როცა საქართველოს უსაფრთხო ქვეყნის სტატუსი მიანიჭეს,“ – განაგრძობს ირაკლი, რომელსაც „ფეისბუქში“ ვესაუბრეთ. – „ვფიქრობ, რომ ქართველების აღარ სჯერათ, ან იშვიათად სჯერათ. ქართველები აქ ჩამოდიან ოჯახებით, ბავშვებით… გადაჭედილია პრეფექტურები, ზოგი რას იტყუება და ზოგი – რას. ამას წინათ ვნახე, ორსულ ქალს ქუჩაში ეძინა… მეც რამდენიმე დღე მეტროში გავათენე. იცით, რომელი იყო ყველაზე გამორჩეული ადგილი ძილისთვის? – ტელეფონის ჯიხური. თუ მოვასწრებდი ყველას იქ მისვლას, კაი „პონტში“ ვიყავი, მთელი ღამე მშვიდად მეძინა. ახლა ვმუშაობ ხან რაზე, ხან – რაზე. შემწეობასაც ვიღებ, მაგრამ არაფერში მყოფნის… ინტერვიუ უკვე მქონდა ლტოლვილის სტატუსის მიღებაზე და ახლა პასუხს ველი. თუ უარს მეტყვიან, გავასაჩივრებ,“ – დაასრულა ირაკლიმ.

„ლოგიკურია ეს მაჩვენებელი სიკვდილიანობის მატებაზე. სადაც ადამიანები სამკურნალოდ და თავის გადასარჩენად მიდიან, იქ კვდებიან კიდეც,“ – გვითხრა შალვამ. ის პარიზის დროებით საცხოვრისშია მოთავსებული და მკურნალობს. ისიც ლტოლვილის სტატუსის მიღებას ცდილობს.

„ჩემი მეგობარიც გარდაიცვალა, რამდენიმე დღის წინ გადავასვენეთ ცხედარი საქართველოში, ახალგაზრდა კაცი იყო. სიმსივნე ჰქონდა… საქართველოში უთხრეს, ორ თვეში მოკვდებიო. აქ ჩამოვიდა და ორი წელი იცოცხლა…“ – ამბობს შალვა.

შალვას თავშესაფრის სტატუსის მიღებაზე უკვე უარი უთხრეს, თუმცა გადაწყვეტილება გაუსაჩივრებია და ახლა განსხვავებულ შედეგს ელის. შალვა მიიჩნევს, რომ საქართველოდან საფრანგეთისკენ წამსვლელთა რიგი არ შემცირდება, თუკი საქართველოს ხელისუფლება ჯანდაცვის სისტემაში არსებული პრობლემებით, კონკრეტულად კი ექიმების პროფესიონალიზმით არ დაინტერესდება.

კიდევ ერთი მიგრანტი საქართველოდან – სალომე ასევე ჯანმრთელობის პრობლემით წავიდა საფრანგეთში. ის გვიყვება, რომ მიგრანტები ლტოლვილის სტატუსის მისაღებად ყოველთვის „სხვა მიზეზს“ ასახელებენ, რადგან საქართველო აღარ მიიჩნევა იმ ქვეყნად, სადაც ადამიანებს საფრთხე ელით ჯანდაცვის პროგრამაზე ხელმიუწვდომლობის გამო.

სალომეს ემიგრაციის მიზეზად ოჯახში ძალადობა დაუსახელებია. ის ამ დრომდე თავშესაფრის სტატუსს ელის.

„აქ არ აინტერესებთ საქართველოში დასმული დიაგნოზი, თავიდან გიკვლევენ, თუნდაც წარადგინო დიაგნოზი… მე საქართველოში სიმსივნე დამიდგინეს, აქ ტუბერკულოზის საწყისი ფორმა. დამიჯერეთ, ფრანგ მედიკოსებს უამრავი სასწაული აქვთ ნანახი ქართველი ექიმებისგან,“ – ირწმუნება სალომე. მისივე თქმით, საფრანგეთში ჩასული საქართველოს მოქალაქე სამედიცინო დაზღვევას დაახლოებით 3 თვეში იღებს. ამ პერიოდში კი, სამედიცინო გამოკვლევები სრულდება. დაზღვევა ერთწლიანია, თუმცა იგი შესაძლოა გახანგრძლივდეს, თუკი ექიმი ამის საჭიროებას დაინახავს,“ – გვითხრა სალომემ.

რა ხვდებათ საფრანგეთში სამკურნალოდ ჩასულებს

საფრანგეთის კლინიკური კვლევების ცენტრის ქართველი თანამშრომელი, ჯანდაცვის სპეციალისტი ზაზა ფუტკარაძე რამდენიმე ფაქტორს ასახელებს, რის გამოც ადამიანები მკურნალობისთვის საფრანგეთში მიდიან. ის ასევე არის ასოციაციის „ქართველები საფრანგეთში“ ხელმძღვანელი და ხშირად უწევს სხვადასხვა ადამიანის ისტორიის მოსმენა. ზაზა ფუტკარაძე აღწერს პრობლემებს, რასაც საქართველოდან საფრანგეთში ჩასული ადამიანი, მათ შორის, ჯანმრთელობის პრობლემის მქონე პირი აწყდება. იგი მიიჩნევს, რომ მთავარი მაინც ინფორმაციის ნაკლებობაა, ან „მითების იმედად“ ყოფნა, რომ „ყველაფერი კარგად იქნება“.

See more

„ხშირად ადამიანები აქ ჩამოდიან ისე, რომ არ აქვთ ინფორმაცია: როგორ უნდა იმკურნალონ, სად მივიდნენ. იმისთვის, რომ საფრანგეთმა უფასოდ უმკურნალოს ადამიანს, საჭიროა კონკრეტული კრიტერიუმების დაცვა. საფრანგეთში ჩასვლა არ ნიშნავს იმას, რომ ავტომატურად მიიღებ სამედიცინო მომსახურებას. უცხო ქვეყნის მოქალაქეს, რომელსაც არ აქვს სამედიცინო დაზღვევა, უნდა დაადასტუროს დოკუმენტურად, რომ თავის ქვეყანაში ვერ უმკურნალეს, ან ვერ უმკურნალებენ, მაგალითად, ის, რომ შესაბამისი მეთოდი საქართველოში არ გამოიყენება…“ – განმარტავს ზაზა ფუტკარაძე.

„ქართველები საფრანგეთში“ – ამ ასოციაციის ინფორმაციით, ხშირად გვიანდება მკურნალობის კურსის მიღება: „მაგალითად, იქმნება ენის პრობლემა, ეს სერიოზული პრობლემაა… ყოფილა შემთხვევები, როცა საკმაოდ დამძიმებულ ვითარებაში ჩამოუყვანიათ საქართველოდან პაციენტი. ამ დროს უცნობია, მკურნალობის რა კურსი ჩაუტარდა მას საქართველოში, როგორია პაციენტის ისტორია. ამ ფაქტორების გათვალისწინებით მკურნალობის მიღება გვიანდება და პაციენტის მდგომარეობა მძიმდება,“ – გვიყვება ზაზა ფუტკარაძე.

ნდობა ექიმსა და პაციენტს შორის – საფრანგეთში მცხოვრები ზაზა ფუტკარაძე ფიქრობს, რომ ეს ისევ მთავარი ფაქტორია, რის გამოც ადამიანები რისკების მიუხედავად საფრანგეთში, ან ევროპის სხვა ქვეყნებში მიდიან და ფიზიკურ გადარჩენას ცდილობენ.

„აქ ჩამოსული ადამიანების ისტორიებიდან ჩანს, რომ საქართველოში ისევ გვაქვს პრობლემები დიაგნოსტირებასთან დაკავშირებით. ისინი ბოლო შანსს იყენებენ ევროპის ქვეყანაში წასვლით,“ – დასძინა ჩვენთან ზაზა ფუტკარაძემ.

ვინ იღებს რეალურად თავშესაფარს ევროპაში? 

„ადამიანებს რომ ჰქონდეთ რეალური ინფორმაცია, რა პროცედურებთან და სირთულეებთან არის დაკავშირებული ლტოლვილის სტატუსის მიღება, 50 პროცენტი არ გარისკავდა ამას, მით უმეტეს, მძიმე დაავადების მქონე, თოთო ბავშვებით ხელში, ან ორსული ქალები,“ – ამბობს სალომე საძაგლიშვილი, საფრანგეთის მიგრაციის და ინტეგრაციის სამსახურის თანამშრომელი, ასოციაციის French Refugee Council ვიცე-პრეზიდენტი. მას საქართველოდან ყოველკვირეულად საშუალოდ 20 ადამიანი უკავშირდება. თითოეულ მათგანს საფრანგეთში ლტოლვილის სტატუსის მიღება სურს.

„ლტოლვილის სტატუსის მოთხოვნა არ ნიშნავს იმას, რომ საფრანგეთში ავტომატურად მოგცემს სახლს და შეგიქმნის კომფორტს. სამწუხაროდ, ხშირად ასე ფიქრობენ. ლტოლვილის სტატუსის მოთხოვნა მარტივად ნიშნავს იმას, რომ სამშობლოში ვეღარ დაბრუნდები, რადგან შენს სიცოცხლეს იქ კონკრეტული მიზეზით საფრთხე ემუქრება და სახელმწიფო ამის აღმოსაფხვრელად არაფერს აკეთებს. რაც მთავარია, ეს უნდა დასტურდებოდეს დოკუმენტურად. საუბარია შემთხვევაზე, როცა ადამიანის საყოველთაოდ აღიარებული უფლებები ილახება, მაგალითად, ქალი გინეიდან, რომელიც ამბობს, რომ მის ქვეყანაში გოგონებს ისევ უსახიჩრებენ სასქესო ორგანოებს. ჩამოვიდა ქალი და თქვა, რომ მისი და ამ საშინელი ტრადიციის შედეგად ბავშვობაში გარდაიცვალა, თვითონ გადაიტანა და ახლა თავის მცირეწლოვან ქალიშვილთან ერთად გამოაღწია ქვეყნიდან.. ლტოლვილის სტატუსს იღებენ ადამიანები საომარი ტერიტორებიდან და ასე შემდეგ,“ – გვიყვება სალომე საძაგლიშვილი.

ძირითადად რა რისკების გადალახვა უწევთ საფრანგეთში ჩასულ მოქალაქეებს, ვიდრე ისინი სტატუსს მიიღებენ? – სალომე საძაგლიშვილის თქმით, მთავარი სირთულე საფრანგეთში და კონკრეტულად პარიზის რეგიონში ღამის გასათევის პოვნაა.

„ჩვენ, ანუ მიგრაციის სამსახურიც კი, როცა ვრეკავთ ცხელ ხაზზე, 115-ზე, ხშირად ვერ გვპასუხობენ და საათობით ველით დაკავშირებას… ბინა პარიზის რეგიონში განსაკუთრებით ძვირია. ერთხელ როცა მიიღებ დროებით ღამის თავშესაფარს, ეს არ ნიშნავს, რომ მეორე დღესაც იქ იქნები. არა მხოლოდ ქართველები და სხვა ქვეყნის მოქალაქეები, თავად ფრანგებიც ხშირად რჩებიან ქუჩებში. ისინი ღამეს ათევენ მეტროებში, სადგურებში, ხიდების ქვეშ… საბუთების შეტანიდან ინტერვიუს ჩანიშვნას ზოგჯერ რამდენიმე კვირა სჭირდება.

ხშირად ადამიანები საქართველოდან მოდიან ეკონომიკური პირობებიდან გამომდინარე. ამ ხალხმა არ იცის, რომ საფრანგეთი არავითარ შემთხვევაში არ ანიჭებს თავშესაფარს არავის იმიტომ, რომ მას თავის ქვეყანაში უჭირს, ან სახლი არ აქვს, ეს გამორიცხულია,“ – კატეგორიულად ხაზს უსვამს საუბრის ამ ნაწილს საფრანგეთის მიგრაციის სამსახურის თანამშრომელი. ის ამავდროულად არის ასოციაციის „ქართველები საფრანგეთში“ ვიცე-პრეზიდენტი.

„უსაფრთხო ქვეყანა“ – ევროპის ქვეყნები და მათ შორის საფრანგეთი ამ სტატუსს აღიარებს. ეს სტატუსი ლტოლვილის სტატუსის მიღებას კიდევ უფრო ართულებს. სალომე საძაგლიშვილის თქმით, საფრანგეთი საქართველოს მოქალაქეებიდან დაახლოებით 93 პროცენტს უარს ეუბნება ლტოლვილის სტატუსის მინიჭებაზე.

როცა ლტოლვილის სტატუსის მომლოდინეთა რიცხვი ყოველდღიურად იზრდება

რას უნდა აკეთებდეს ასეთ ვითარებში საქართველოს ხელისუფლება, როცა ვიზალიბერალიზაციის შემდეგ ლტოლვილის სტატუსის მომლოდინეთა რაოდენობა ყოველდღიურად იზრდება? – ექსპერტი ევროკავშირის საკითხებში, ვანო ჩხიკვაძე მოკლევადიან და გრძელვადიან გეგმაზე საუბრობს. მისი თქმით, ხელისუფლება „თითქოს ყველა არსენალს“ იყენებს, მაგრამ ეფექტური საინფორმაციო კამპანია ამ მიმართულებით არ არსებობს.

„საინფორმაციო კამპანიას ხელისუფლება აწარმოებს, მაგრამ ამას დიდი ეფექტი არ გააჩნია. სამიზნე ჯგუფის წინასწარი ანალიზი უნდა ჩატარდეს, უნდა შევისწავლოთ წინასწარ, რა აინტერესებს ხალხს და მათზე მორგებული გზავნილები უნდა გავრცელდეს. შესაძლოა ერთი-ორი წარმატებული ისტორია გავრცელდეს, როგორ მიიღო კონკრეტულმა პირმა თავშესაფარი და ამან შესაძლოა გადაწონოს მთელი საინფორმაციო კამპანია. შესაბამისად, საინფორმაციო კამპანიის აქვს ძალიან დიდი მნიშვნელობა“, – გვითხრა ვანო ჩხიკვაძემ.

ევროინტეგრაციის ექსპერტი ასევე მიიჩნევს, რომ უნდა გაგრძელდეს მუშაობა „უსაფრთხო ქვეყნის“ სტატუსის მიღებაზე ევროკავშირის ყველა ქვეყანაში და ეს უნდა მოხდეს საქართველოში დისკრიმინაციის ფაქტების აღმოფხვრის რეალური და ეფექტური მექანიზმების შექმნის პარალელურად.

„სიღარიბე – ეს არის მთავარი მიზეზი, რის გამოც ადამიანები ევროპის ქვეყნებში ითხოვენ თავშესაფარს. გრძელვადიან გეგმაში ამას ვგულისხმობდი – ხელისუფლება უნდა ზრუნავდეს სიღარიბის მაჩვენებლის შემცირებაზე,“ – ამბობს ექსპერტი ევროკავშირის საკითხებში, ვანო ჩხიკვაძე.

„შეჩერების მექანიზმი“, ანუ უვიზო მიმოსვლის გაუქმების პროცესი ჯერ არ დაწყებულა, თუმცა ეს თემა ევროსტრუქტურებში გააქტიურებულია. ექსპერტი ვანო ჩხიკვაძე მიიჩნევს, რომ ევროკავშირი ძირითადად პოლიტიკური ფაქტორით ინარჩუნებს ამ დრომდე დუმილს.

„ოფიციალურად არა, მაგრამ რეალურად ამაზე ჩვენი ხელისუფლების წარმომადგენლებსაც ხშირად ესაუბრებიან. შეჩერების მექანიზმს აქვს არა მხოლოდ ტექნიკური, არამედ პოლიტიკური განზომილება – რეალურად ეს ძალიან კარგი გადაწყვეტილება იქნება პრორუსულად განწყობილი ძალებისთვის, ეს საქართველოს ევროინტეგრაციის მხარდამჭერებსაც ძალიან დაარტყამს,“ – დასძენს ექსპერტი.

რას აკეთებს ხელისუფლება? 

საინფორმაციო კამპანიის გაძლიერებას  ევროპელი პარტნიორები რომ სთხოვენ საქართველოს ხელისუფლებას, ამას ვლადიმერ კონსტანტინიდიც ადასტურებს, საგარეო საქმეთა სამინისტროს წარმომადგენელი. მისივე თქმით, ხელისუფლება ყველა საკომუნიკაციო არხს იყენებს. პრობლემას კი უფრო „სტერეოტიპული აზროვნება“ ქმნის.

„ყველა საკომუნიკაციო არხი გვაქვს გამოყენებული ფაქტობრივად, რაც არის ხელმისაწვდომი და გათვლილია ყველა სეგმენტზე, მათ შორის, იმ ადამიანებზე, რომლებიც, ვთქვათ, ვერ ფლობენ თანამედროვე ტექნოლოგიებს… საინფორმაციო კამპანიას იმდენად ინტენსიური ხასიათი აქვს, რომ რეგიონებშიც კი დავიწყეთ სიარული. ჩვენ მათ ვაცნობთ, როგორც სიკეთეებს, ასევე რისკებს, რაც შეიძლება ამან გამოიწვიოს. აქცენტირება კეთდება იმაზე, რომ თუკი კონკრეტული ადამიანი, ბოროტად გამოიყენებს ამას, ეს შეიძლება ცუდად აისახოს საჯარო ინტერესებსა და ქვეყნის ინტერესებზე.

ერთ-ერთ მთავარ როლს თამაშობს სტერეოტიპული წარმოდგენები: 90 -იანი წლების შუა პერიოდიდან ყოფილი საბჭოთა ქვეყნებიდან დასავლეთ ევროპაში იყო მიგრაციის მაღალი ტალღა. ეს, ძირითადად, ეკონომიკური პირობებით იყო გამოწვეული. ადამიანები ამ დროს ასე თუ ისე ახერხებდნენ გარკვეული სტატუსის მოპოვებას. არსებობდა მექანიზმები, რომ მათ ფიზიკურად ყოფნა ევროპაში გაეხანგრძლივებინათ. ეს წარმოდგენები იმდენად იყო გავრცელებული, რომ ეს შემორჩათ ადამიანებს…“ – მიიჩნევს ვლადიმერ კონსტანტინიდი, საქართველოს საგარეო საქმეთა სამინისტროს წარმომადგენელი.

საგარეო საქმეთა სამინისტროში არ იზიარებენ პოზიციას, რომ საინფორმაციო კამპანიას შესაძლოა სხვაგვარად სჭირდება დაგეგმვა.

ვლადიმერ კონსტანტინიდის დაკვირვებით, ადამიანებს, რომლებიც ევროპის ქვეყნებში თავშესაფარს ითხოვენ, ხშირად ატყუებენ „დამკვალიანებლებიც“, რომლებიც ფულს იღებენ სამუშაოს დაპირებითა და უცხო ქვეყანაში ვიზის ლეგალური სტატუსის მინიჭებით.

რა მოლოდინს უჩენენ საგარეო საქმეთა სამინისტროს წარმომადგენლები ევროპელ პარტნიორებს, როცა საუბარი სიღარიბეს ეხება, როგორც მიგრაციის მთავარ მიზეზს? – ვლადიმერ კონსტანტინიდმა ამჯერადაც არჩია ადამიანების მორალზე გაემახვილებინა ყურადღება და არა ხელისუფლების  პასუხისმგებლობაზე. საგარეო საქმეთა სამინისტროს წარმომადგენელმა აქვე დაგვამშვიდა, რომ „შეჩერების მექანიზმის“ ამოქმედების რეალური საფრთხე ჯერ არ არსებობს.

„დასამალი არ არის, რომ ადამიანების დიდი ნაწილი, ვინც საზღვარგარეთ მიემგზავრება, არის ის, რომ გაიუმჯობესონ მატერიალური პირობები… ჩვენი, როგორც საგარეო უწყების ამოცანაა, რომ ეს ისტორიული მონაპოვარი შენარჩუნებულ იქნას და საფრთხე არ დაემუქროს… „შეჩერების მექანიზმი“ არსებობს და იგი იდგა სხვა ქვეყნებთან მიმართებაშიც, თუ ეს მიიღებს უკონტროლო ხასიათს. დღეისთვის ამის რეალური საფრთხე არ არსებობს. ჩვენი უცხოელი პარტნიორები ხედავენ, რომ რეადმისიის პირობებს ზედმიწევნით ვასრულებთ,“ – გვითხრა ვლადიმერ კონსტანტინიდმა.

საგარეო საქმეთა სამინისტრო ინფორმირებულია იმაზეც, რომ იგივე საფრანგეთში იმატა ჯანმრთელობის პრობლემის მქონე საქართველოს მოქალაქეების მიმართვიანობის მაჩვენებელმა. სამინისიტროს წარმომადგენელს, ვლადიმერ კონსტანტინიდს ჩვენ ასევე ვკითხეთ, ჰქონდათ თუ არა კომუნიკაცია ჯანდაცვის სამინისტროსთან, რადგან ადამიანები საზღვარგარეთ მიდიან მაშინ, როცა სამშობლოში მათ ვერ მკურნალობენ.

„არა, ეს არ არის ჩვენი უწყების კომპეტენცია,“ – გვიპასუხა ვლადიმერ კონსტანტინიდმა. მისივე თქმით, საფრანგეთის ოფიციალური, ან არაოფიციალური უწყებებიდან სამინისტროს არ აქვს კონკრეტული მონაცემები, საქართველოს რამდენი მოქალაქე რჩება იგივე საფრანგეთში სამედიცინო მომსახურების მიღმა, რამდენი იღუპება, რამდენი იღებს დაზღვევას და ასე შემდეგ.

საგარეო საქმეთა სამინისტროში თვლიან, რომ ევროკავშირის ქვეყნებში ლეგალური დასაქმების შესაძლებლობა შეამცირებს არალეგალური მიგრაციის მაჩვენებლებს.

მთავარი ფოტო: კარვები პარიზის რეგიონში. ხიდის ქვეშ ლტოლვილის სტატუსის მოლოდინში მყოფ ადამიანებს, მათ შორის, ქართველები კარვებში ცხოვრობენ. გიორგი ჯუგაშვილის ფოტო

__________

რეალური ისტორიების გაცნობის შემდეგ შეავსეთ ტესტი და გაიგეთ, რა გზის გავლა უწევს ლტოლვილის სტატუსის მოპოვების ნებისმიერ მსურველს. ტესტი მომზადებულია საქართველოს საგარეო საქმეთა სამინისტროსა ვებგვერდზე გამოქვეყნებული მასალებისა და ასოციაცია „ქართველები საფრანგეთში“ მიერ გამოცემული ცნობარის მიხედვით.

დაიწყეთ ტესტის შევსება

ვის შეუძლია ევროპაში თავშესაფრის მიღება [ტესტი]

See more

როგორ დავეხმაროთ მეტყველებისა და სმენის პრობლემების მქონე ბავშვებს? – ამ თემაზე დღეს, 18 აპრილს, ბათუმის ამერიკულ კუთხეში, საზოგადოებრივი ორგანიზაცია „სთეფ ფორვარდის“ ორგანიზებით, მშობლებსა და სპეციალისტებს ტრენინგი ჩაუტარდათ. პროექტის ფარგლებში ამავე თემაზე ლექცია განათლების, მედიცინისა და ფსიქოლოგიის მიმართულების ბსუ-ს სტუდენტებისთვისაც ჩატარდა.

„პორტუგალიის უნივერსიტეტიდან ჩამოვიდა სპეციალისტი, განვითარების ფსიქოლოგიის მიმართულებით, რომელიც უშუალოდ სმენის პრობლემებზე მუშაობს. დღეს შეხვედრა გვქონდა სმენის პრობლემების მქონე ბავშვების მშობლებთან და ამ მიმართულების სპეციალისტებთან.

პროექტის მიზანია, თუ როგორ უნდა დაიგეგმოს სტრატეგიები და მიდგომები სმენის პრობლემების მქონე ადამიანების დასახმარებლად. მუშავდება ამ მიმართულებით ტრენინგ-კურსები და მომავალ წელს იქნება პილოტირება. პროექტში ჩართვა შეუძლია ნებისმიერ დაინტერესებულ პირს ნებისმიერი სფეროდან იმისათვის, რომ შეძლონ სმენის პრობლემების მქონე ადამიანებთან ურთიერთობა“, – გვეუბნება ბათუმის რუსთაველის უნივერსიტეტის განათლების ფაკულტეტის ხარისხის უზრუნველყოფის სამსახურის უფროსი და განათლების პროგრამის ხელმძღვანელი, ნანა მაკარაძე. ბსუ პროექტის ერთ-ერთ პარტნიორია.

ტრენინგზე 19 მშობელი იყო მიწვეული. ერთ-ერთი სმენადაქვეითებული ბავშვის მშობლის – ქრისტინა ბერიძის თქმით, მსგავსი ტიპის პროექტები მას ეხმარება იმაში, რომ სწორად დაგეგმოს თავისი შვილის განვითარება.

„ჩემს შვილს აქვს მეოთხე ხარისხის სმენის დაქვეითება, ესაჭიროება ოპერაცია და მნიშვნელოვანია, რომ ვიცოდე, როგორ უნდა ვიზრუნო იმისთვის, რომ ჩემი შვილი განვითარდეს. დღეს მივიღე საჭირო და მნიშვნელოვანი ინფორმაცია, რაც ჩემს შვილთან მიმართებაში დამეხმარება“, – გვეუბნება ის.

„სთეფ ფორვარდის“ დირექტორი მანანა ინაიშვილი: „საქართველოში სმენადაქვეითებულ პირთა ზუსტი სტატისტიკა არ არსებობს. ჯანმრთელობის მსოფლიო ორგანიზაციის მონაცემებით, ყოველ ათას ბავშვზე სამი სმენადაქვეითებული და ერთი ყრუ ბავშვი იბადება. აჭარაში ჩვენ დავიწყეთ  მონაცემთა ბაზის შეგროვება და გამოკითხვებით შევაგროვეთ დაახლოებით 250 ბავშვი და ახალგაზრდა, ვისაც სმენის პრობლემები აქვს.

ვინაიდან შარშან დაიწყო სახელმწიფო უნივერსალური სკრინინგი და ხდება ახალშობილების შემოწმება, ასევე იქნება კონფიდენციალური რეგისტრაციისა და მიდევნების სისტემა. ამის შემდეგ  გვეცოდინება, რამდენი სმენადაქვეითებული ბავშვი გვყავს ქვეყანაში“.

პროექტის ფარგლებში ავეიროს უნივერსიტეტის ჯანმრთელობის სკოლის ლექტორი, იზაბელ მონტეირო და კოსტაც იმყოფებოდა ამერიკულ კუთხეში. ის ამბობს, რომ სმენადაქვეითებული ბავშვების პრობლემების მოგვარებისთვის მნიშვნელოვანია დროული ზომების მიღება. ამ პროცესში ერთნაირად მნიშვნელოვანია მშობლის, განათლებისა და ჯანდაცვის სისტემის ერთობლივი ჩართულობა.

იზაბელ მონტეირო და კოსტა ტრენინგზე

„ამ მიმართულებით ჩვენს ქვეყანას უფრო მეტი გამოცდილება აქვს და ვფიქრობ, შევძლებთ ჩვენი გამოცდილების გაზიარებას. მეტყველებისა და სმენის მიმართულებით საქართველოში ახლა იწყება მუშაობა. ვფიქრობ, მშობლებისთვის ძალიან მნიშვნელოვანია მეტყველების თერაპევტთან თანამშრომლობა, რადგან მხოლოდ მშობელი მარტო ვერ მოახერხებს პრობლემის მოგვარებას“, – გვეუბნება ის.

პროექტი 2016 წელს დაიწყო და მიმდინარე წლის ოქტომბრამდე გაგრძელდება. პროექტი ხორციელდება ERASMUS+-ის „უკეთესი კომუნიკაციის ხელ­შეწ­ყო­ბისა“ და ილიას სახელმწიფო უნივერსიტეტის ერთობლივი თანამშრომლობის ფარგლებში.

დღეს, 18 აპრილს, აჭარის საზოგადოებრივი მაუწყებლის თანამშრომლების ნაწილმა ბრიფინგი გამართა. 103 თანამშრომლის სახელით განცხადება გააკეთა აჭარის რადიოს საინფორმაციო სამსახურის ხელმძღვანელმა თამილა დოლიძემ. მისი თქმით, ტელევიზიის თანამშრომლების ნაწილს პრეტენზია აქვს ტელევიზიის დირექტორის ნათია კაპანაძის მმართველობასთან დაკავშირებით.

„ჩვენ ვხედავთ მართვაში არსებულ ხარვეზებს. დირექტორის მხრიდან ერთპიროვნულ გადაწყვეტილებებს და უსამართლო დამოკიდებულებას თანამშრომლების მიმართ.

დიდი ხანია მომწიფდა პრეტენზიები შრომის ანაზღაურების სამართლიან გადანაწილებასთან დაკავშირებით, რაც  თანამშრომლებს მოტივაციას უკარგავს, მათ შორის ვარ მეც“, – ამბობს თამილა დოლიძე.

განცხადების ტექსტში ასევე საუბარია იმაზე, რომ დირექტორი ტელევიზიის თანამშრომელს მრჩეველთა საბჭოსთან ლაპარაკს უკრძალავს.

„ცალკეული პარტიების, არასამთავრობო ორგანიზაციების თუ პიროვნებების განწყობით, აჭარის ტელევიზიას თითქოს ყველაზე დემოკრატი დირექტორი ჰყავს, თუმცა ეს მხოლოდ პოპულიზმის გამოძახილია. სარედაქციო დამოუკიდებლობა მხოლოდ ნათია კაპანაძის დამსახურება არ არის, არამედ იმ გუნდის, რომელიც აჭარის ტელევიზიაში მუშაობს“, – ნათქვამია განცხადებაში, რომელიც ბრიფინგზე წაიკითხა თამილა დოლიძემ.

ბრიფინგის მონაწილე ტელევიზიის თანამშრომლები იმედოვნებენ, რომ მათ პოზიციას მრჩეველთა საბჭო გაითვალისწინებს. აღნიშნულ განცხადებას ტელევიზიის ჟურნალისტებიდან მხოლოდ ერთმა, მარი ბოლქვაძემ მოაწერა ხელი, რომელიც გადაცემა „ჰეშთეგის“ წამყვანია. საინფორმაციო სამსახურის ჟურნალისტები ხელმომწერებს შორის არ არიან.

აჭარის ტელევიზიის ხუთწევრიანი ბორდის ორმა წევრმა, ირაკლი დარცმელიძემ და გიგა ჩხარტიშვილმა ტელევიზიის დირექტორის ნათია კაპანაძის იმპიჩმენტის საკითხი რამდენიმე დღის წინ დააყენა. მათი განცხადებით, დირექტორი მართვისას იღებს ერთპიროვნულ გადაწყვეტილებებს, რაც უარყოფითად აისახა ტელევიზიისა და რადიოს საქმიანობასა და იმიჯზე.

დირექტორის თანამდებობიდან გადაყენების საკითხს ტელევიზიის მრჩეველთა საბჭომ, ხვალ 19 აპრილს უნდა უყაროს კენჭი.

ნათია კაპანაძე აჭარის ტელევიზიის დირექტორად 2016 წლის ოქტომბერში აირჩიეს. მას ამ პოსტზე ვადის ამოწურვამდე 6 თვეზე მეტი დრო დარჩა.

დღემდე არაერთმა საერთაშორისო და ადგილობრივმა ორგანიზაციამ გამოთქვა ეჭვი, რომ ტელევიზიის გარშემო განვითარებული მოვლენები აჩენს ამ მაუწყებლის რისკებს.

დღეს ამ საკითხზე განცხადება გაავრცელა ამერიკის შეერთებული შტატების საელჩომ საქართველოში.

საზოგადოებრივი მაუწყებლის აჭარის ტელევიზიისა და რადიოს დირექტორის, ნათია კაპანაძის იმპიჩმენტის საკითხის განხილვამდე ორი დღით ადრე მრჩეველთა საბჭოს ფეისბუქგვერდზე აჭარის ტელევიზიისა და რადიოს თანამშრომლების წერილი გამოქვეყნდა, რომელიც მაუწყებელში განვითარებულ ბოლოდროინდელ მოვლენებს ეხმიანება.

„ვემიჯნებით მაუწყებლის სახელით გაკეთებულ განცხადებას მაუწყებლის დირექტორის იმპიჩმენტის საკითხთან დაკავშირებით არსებულ საფრთხეებზე. ასევე, ვემიჯნებით საკითხის პოლიტიკურ ჭრილში განხილვას. ვაცხადებთ, რომ სარედაქციო დამოუკიდებლობა არ არის ნათია კაპანაძის მონაპოვარი და სიტყვის თავისუფლება უზრუნველყოფილია ტელევიზიისა და რადიოს საზოგადოებრივ მაუწყებლად გარდაქმნის მომენტიდან და გვჯერა, ასევე გაგრძელდება მომავალშიც“, – აღნიშნულია წერილში.

ამავე წერილში წერია, რომ დღეს აჭარის ტელევიზიაში არსებობს „შიშის ფაქტორი“ და „ბევრი თანამშრომელი დათრგუნული და იმედგაცრუებულია არსებული მდგომარეობით. ნებისმიერ ორგანიზაციაში, მით უფრო საზოგადოებრივ მედიაში შიშის არსებობა დაუშვებელია“, – ვკითხულობთ წერილში. აქვე საუბარია იმაზე, რომ ტელევიზიის დირექტორი მართვისას იღებს ერთპიროვნულ და არაკომპეტენტურ გადაწყვეტილებებს, რაც უარყოფითად აისახა ტელევიზიისა და რადიოს საქმიანობასა და იმიჯზე.

„ტელევიზიისა და რადიოს თანამშრომლებს აქვთ უამრავი პრეტენზია დირექტორთან სხვადასხვა საკითხთან დაკავშირებით, მათ შორისაა სამართლიანი ანაზღაურების საკითხიც“, – აღნიშნულია წერილში, რომელიც სრულდება წერილის გასაჯაროვების მოთხოვნითა და იმედით, რომ „მიმდინარე პროცესები მშვიდობიანად, საზოგადოების და მაუწყებლის თანამშრომლების ინტერესების გათვალისწინებით დასრულდება, ტელევიზია და რადიო გააგრძელებს თავისუფალ გარემოში განვითარებას და იქნება საზოგადოების სამსახურში.“

წერილი 16 მარტით თარიღდება და როგორც საბჭოს გვერდზე გამოქვეყნებულ ინფორმაციაშია აღნიშნული, მას ხელს აჭარის ტელევიზიისა და რადიოს 103 თანამშრომელი აწერს. მრჩეველთა საბჭოს გვერდზე გამოქვეყნებულ წერილს არ ახლავს უშუალოდ ხელმომწერთა სია, თუმცა „ბათუმელებს“ ეს სია მრჩეველთა საბჭომ მოაწოდა. ხელმოწერათა უმრავლესობა ძირითადად ბუნდოვანია და მკაფიოდ არ იკითხება.

წერილში საუბარია, რომ ტელევიზიის იმიჯი ზიანდება ნათია კაპანაძის მენეჯმენტის პირობებში, თუმცა საპირისპიროს ამბობს კვლევები, რომელიც პერიოდულად ქვეყნდება და საუბარია აჭარის ტელევიზიის საქმიანობაზე დადებით ჭრილში. რატომ არ ენდობიან კვლევებს წერილის ხელმომწერები? – გვინდოდა ეს კითხვა რამდენიმე ხელმომწერისთვის დაგვესვა, მაგალითად, თამილა დოლიძისთვის, რომელიც ახალი ამბების სამსახურის უფროსის მოადგილეა რადიოს მიმართულებით. მან გვითხრა, რომ შეკითხვებს ამ ეტაპზე ვერ უპასუხებს, ვიდრე პოზიციები საბოლოოდ არ შეჯერდება სხვა ხელმომწერებთან.

ჩვენ ასევე ვცადეთ საავტორო-შემოქმედებითი გადაცემების სამსახურის უფროსთან, იმედა თავდგირიძესთან დაკავშირება, რათა დაგვეზუსტებინა, რა იგულისხმება თანამშრომლების „შიშებსა“ და „დათრგუნვაში“. მან ჩვენს სატელეფონო ზარს არ უპასუხა.

არის თუ არა „სარედაქციო დამოუკიდებლობა ნათია კაპანაძის მონაპოვარი“ და იყო თუ არა აჭარის ტელევიზიაში „სიტყვის თავისუფლება უზრუნველყოფილი ტელევიზიისა და რადიოს საზოგადოებრივ მაუწყებლად გარდაქმნის მომენტიდან“ – როგორც თანამშრომლების წერილშია მითითებული.

მაგალითად, 2016 წელს საქართველოს ჟურნალისტური ეთიკის ქარტიის მაუწყებლების ახალი ამბების წინასაარჩევნო მედიამონიტორინგის ანგარიშში აღნიშნულია, რომ „აჭარის ტელევიზიამ“ ყველაზე მეტი დრო „ქართული ოცნების“ გაშუქებას დაუთმო. მონიტორიგი 31 აგვისტოდან 25 სექტემბრამდე პერიოდში ჩატარდა, ამ დროს „აჭარის ტელევიზიის“ საზოგადოებრივი მაუწყებლის სტატუსით საქმიანობდა და ნათია კაპანაძე დირექტორი არ იყო.

„აჭარის ტელევიზიის“ ეთერში ყველაზე მეტი დრო „ქართული ოცნების“ გაშუქებას დაეთმო, ყველაზე მაღალი დადებითი გაშუქების მაჩვენებელი ადგილობრივ ხელისუფლებას ჰქონდა, დათმობილი დროის 8%. ყველაზე მეტი უარყოფითი ტონი საარჩევნო სუბიექტებს შორის „ნაციონალური მოძრაობის“ მიმართ დაფიქსირდა, მისთვის დათმობილი დროის 30%. ნეიტრალური გაშუქებით ყველაზე მაღალი მაჩვენებელი პრემიერ-მინისტრს და პრეზიდენტს ჰქონდა – 100-100%,“ – წერია ანგარიშში. 

2016 წელს ეთიკის ქარტიის მედიამონიტორინგმა „აჭარის ტელევიზია“ სხვა მაუწყებლებს შორის გამოარჩია, როგორც ტელევიზია, რომელიც „ბიძინა ივანიშვილს ყველაზე პოზიტიურად წარმოაჩენდა.“

„ბიძინა ივანიშვილი ყველაზე პოზიტიურად ტელეკომპანია აჭარის ეთერში წარმოჩინდა, მისთვის დათმობილი დროის 45%“, – წერია მედიამონიტორინგის ამ ანგარიშში. 

ამავე ანგარიშში ეთიკის ქარტიამ „აჭარის ტელევიზიის“ ეთერში ქსენოფობიის და თურქოფობიის ფაქტის ტირაჟირებაც დააფიქსირა. „აჭარის ტელევიზიის ეთერში სამონიტორინგო პერიოდში ქსენოფობიის და თურქოფობიის ფაქტის შეუსაბამო ტირაჟირება დაფიქსირდა. ასევე იყო ბალანსის დარღვევის რამდენიმე შემთხვევაც,“ – აღნიშნულია მედიამონიტორინგის ანგარიშში. 

საზოგადოებრივი მაუწყებლის აჭარის ტელევიზიისა და რადიოს ისტორიაში ეს პირველი შემთხვევაა, როცა ამ უწყების 103 თანამშრომელი ერთ წერილს აწერს ხელს. ტელევიზიის თანამშრომლები ასე ერთსულოვნად აქამდე ტელევიზიასთან დაკავშირებულ არც ერთ მნიშვნელოვან ფაქტს არ გამოხმაურებიან: მათ შორის, საინფორმაციო სამსახურის უფროსის, ირინა ყურუას გათავისუფლებას 2014 წელს, როცა აჭარის ტელევიზიის მაშინდელმა დირექტორმა საინფორმაციო სამსახურის უფროსს ჯერ აჭარის რადიოში შესთავაზა გადასვლა, შემდეგ კი სამსახურიდან გაათავისუფლა და არც მაშინ, როცა საინფორმაციო სამსახური ორმა პროდიუსერმა დატოვა აჭარის ტელევიზია. მაშინ მათ განაცხადეს, რომ სამსახურის დატოვების მიზეზი გახდა საეჭვო სარედაქციო გადაწყვეტილებები.

აჭარის ტელევიზიის თანამშრომლებს ტელევიზიის იმიჯის დაზიანებად არ ჩაუთვლიათ არც ის ფაქტი, როცა 2015 წელს აჭარის ტელევიზიის ვებგვერდიდან მოიხსნა სიუჟეტი, რომელშიც აჭარის მთავრობის მაშინდელი თავმჯდომარის ერთ-ერთ აქტივობას საზოგადოებაში მკვეთრად ნეგატიური შეფასება მოჰყვა.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭო დირექტორისათვის უნდობლობის გამოცხადების საკითხს 19 აპრილს განიხილავს. სხდომა 13 საათზეა ჩანიშნული.

19 აპრილსვე გეგმავენ გაფიცვას აჭარის ტელევიზიის ახალი ამბების ოპერატორები, რომლებიც ანაზღაურების მატებას ითხოვენ.

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს ტელევიზიის დირექტორის იმპიჩმენტის მოთხოვნით ორმა წევრმა: ირაკლი დარცმელიძემ [ერთიანი ნაციონალური მოძრაობის კვოტით წარდგენილი წევრი] და გიგა ჩხარტიშვილმა [ქართული ოცნება] მიმართა. გაიმართება ფარული კენჭისყრა, რომელშიც საბჭოს ხუთივე წევრი მონაწილეობს.  ხუთწევრიანი ბორდიდან უმრავლესობა, ანუ სამი წევრი თუკი მისცემს ხმას მოქმედი დირექტორის წინააღმდეგ, ნათია კაპანაძე თანამდებობას დატოვებს.

ნათია კაპანაძე აჭარის ტელევიზიის დირექტორად 2016 წლის ოქტომბერში აირჩიეს. მას ამ პოსტზე ვადის ამოწურვამდე 6 თვეზე მეტი დრო დარჩა. სამწლიანი ვადის განმავლობაში, ეს არის პირველი შემთხვევა, როცა ნათია კაპანაძის იმპიჩმენტის საკითხი დადგა დღის წესრიგში.

აჭარის ტელევიზიის დირექტორის შესაძლო იმპიჩმენტთან დაკავშირებით ბოლო დღეებში არასამთავრობო ორგანიზაციებმა და პოლიტიკურმა პარტიებმა გაავრცელეს განცხადებები. განცხადებებში ნათქვამია, რომ აჭარის ტელევიზია და რადიო ნათია კაპანაძის დირექტორობის პერიოდში არაერთი საერთაშორისო და ადგილობრივი ავტორიტეტული ორგანიზაციის მხრიდან შეფასდა, როგორც თავისუფალი, მიუკერძოებელი და მზარდი ინსტიტუტი, მკვეთრად პოლარიზებულ და პოლიტიზებულ მედიაგარემოში; „ხელისუფლებას არ აწყობს დაბალანსებული ტელევიზია და გადაწყვიტა მის საქმიანობაში ჩარევა და ამ გეგმის ნაწილია ტელევიზიის დირექტორის გადაყენება“; ჩნდება სარედაქციო დამოუკიდებლობაზე შეტევის რისკი და ა.შ.   

აჭარის ტელევიზიის დირექტორის შესაძლო იმპიჩმენტის საკითხს გამოეხმაურა ევროკავშირის ელჩი, კარლ ჰარცელიც, რომლის განცხადებითაც აჭარის ტელევიზია არის ის აქტივი, რომელსაც დღევანდელ მედიაგარემოში გაფრთხილება სჭირდება.

დღეს აჭარის ტელევიზიის დირექტორის იმპიჩმენტის საკითხს გამოეხმაურა ეუთოს წარმომადგენელი.

16 აპრილს, სამშაბათს, საფრანგეთის პრემიერ-მინისტრმა ედუარდ ფილიპმა იმ შესაძლო გზებსა და საშუალებებზე ისაუბრა, რითაც უახლოეს ხანებში იქნება შესაძლებელი პარიზის ღვთისმშობლის ტაძრის აღდგენა.

პრემიერ-მინისტრის განცხადებამდე პრეზიდენტმა ემანუელ მაკრონმა, ხანძრის გაჩენიდან მეორე დღეს განაცხადა, რომ პირვანდელი სახით კათედრალი 5 წელიწადში უნდა აღდგეს.  სპეციალისტების თქმით, რთულია ამ ეტაპზე განისაზღვროს, რა დრო დასჭირდება და ზუსტად რა ფინანსურ რესურსს მოითხოვს აღდგენითი სამუშაოები.

გამოცემა  FIGARO-ს ინფორმაციით მინისტრთა საბჭო ელისეს სასახლეში შეიკრიბება და სპეციალისტებთან ერთად იმსჯელებს პერიოდულად რეკონსტრუქციის საკითხებზე. საბჭოს განცხადების მიხედვით შემოწირულობების ხარჯვითი ნაწილი იქნება სრულიად გამჭვირვალე და განისაზღვრება თითოეული ევროს დანიშნულება ნოტრ-დამის აღდგენისას.

რეკონსტრუქციის სპეციალურმა საბჭომ შეიმუშავა შემომწირველთა წამახალისებელი მიდგომა: ფიზიკური პირები და კომპანიები, რომლებიც ტაძრის აღსადგენად შეწირავენ თანხას, სანაცვლოდ ისინი კომუნალურ გადასახადებზე მიიღებენ ფასდაკლებას.

შეიქმნა სპეციალური ვებპორტალიც www.rebatirnotredame.gouv.fr სადაც მსურველებს ოთხ სხვადასხვა ფონდში თანხის ჩარიცხვით შეეძლებათ კათედრალის რეკონსტრუქციაში წვლილის შეტანა.

არქიტექტორთა საერთაშორისო კონკურსი დამწვარი კოშკის აღსადგენად

კათედრალის კოშკი, რომლის ჩამონგრევის კადრებიც 15 აპრილს პირდაპირ ეთერში მთელმა მსოფლიომ ნახა, 1859 წელს ააგო არქიტექტორ ეჟენ ვიოლე ლე დუკმა. პრემიერ მინისტრის ედუარდ ფილიპის განცხადების მიხედვით საფრანგეთი არქიტექტორთა საერთაშორისო კონკურსს გამოაცხადებს. ახალი კოშკი ან ძველის იდენტური ასლი უნდა იყოს ან ჰქონდეს პირვანდელი ფორმები მაგრამ ჰარმონიულად ერწყმოდეს მას თანამედროვე არქიტექტურისთვის დამახასიათებელი დეტალებიც.

დღეს, საფრანგეთის დროით 16:00 საათზე ელისეს სასახლეში კათედრალის აღდგენის საქმეში ჩართული პირები შეიკრიბნენ. მათ კათედრალის აღდგენის საკითხებსა და არქიტექტორთა საერთაშორისო კონკურსზე დეტალურად უნდა იმსჯელონ.

ნოტრ-დამის აღდგენის საკითხებით დაინტერესებული სპეციალური საბჭოს შემადგენლობაშია პრეზიდენტი მაკრონი, პრემიერი, მინისტრები, პარიზის მერი, საფრანგეთის ეროვნული საბჭოსა და ეროვნული სენატის პრეზიდენტები, ასევე იუნესკოს გენერალური დირექტორი ოდრი აზული და წარმომადგენლები ნოტრ-დამიდან – არქიეპისკოპოსი და სხვები. შეხვედრა ამ წუთებშიც მიმდინარეობს.

წყარო: LE FIGARO