ჩაქვში ძალოსნობის სავარჯიშო ახალი ბაზა აშენდება


ჩაქვში, აბაშიძის ქუჩა №2-ში მდებარე 3300 კვ.მ მიწის ნაკვეთზე ძალოსნობის სავარჯიშო ბაზა აშენდება. აჭარის ფინანსთა და ეკონომიკის სამინისტროს შპს „სტადიონმა“ დეტალური სამშენებლო დოკუმენტის პროექტისა და ხარჯთაღრიცხვის მომზადებაზე ტენდერი გამოაცხადა. სატენდერო თანხა 110 ათასი ლარია.

დაბა ჩაქვში ძალოსნები უკვე რამდენიმე წელია ისეთ დარბაზში ვარჯიშობენ, სადაც არც შუქი აქვთ და არც საშხაპე ცხელი წყლით. აჭარის ფინანსთა და ეკონომიკის სამინისტროში „ბათუმელებს“ განუცხადეს, რომ დაბა ჩაქვში, მიგინეიშვილის ქუჩის #17-ში არსებული შენობა-ნაგებობა, სადაც ძალოსნები ვარჯიშობენ, მათ ბალანსზე არ ირიცხება და არც არასდროს ირიცხებოდა. ამ ქონებას, სავარაუდოდ, საქართველოს ეკონომიკისა და მდგრადი განვითარების სამინისტრო განკარგავს.

ახალი ბაზა ამ შენობიდან დაახლოებით 500 მეტრის დაშორებით აშენდება.

ძალოსნობის სავარჯიშო ახალ ბაზაზე დაგეგმილია საერთაშორისო სტანდარტების შესაბამისი საჭირო სივრცეების მოწყობა. სპორტული დარბაზის ესკიზურ-ტექნიკური გეგმარება უკვე არსებობს. ტენდერის პირობების მიხედვით, სამშენებლო დოკუმენტის პროექტის შემუშავებისას გათვალისწინებული უნდა იყოს თანამედროვე სამშენებლო მასალების გამოყენება, ტერიტორიის რელიეფის თავისებურებები, შესასვლელი გზები, საკომუნიკაციო არხები. ტერიტორიის დაგეგმარება სრულ შესაბამისობაში უნდა იყოს სახანძრო უსაფრთხოების ნორმებთან.

პროექტების შედგენისას აუცილებლად გათვალისწინებული უნდა იყოს ასევე შეზღუდული შესაძლებლობების მქონე პირთათვის შენობის ადაპტაციის ღონისძიებები. საპროექტო სივრცეების დეტალური რეკომენდაციები და მოთხოვნები კი უნდა დამუშავდეს და შეთანხმდეს საქართველოს ძალოსნობის ეროვნულ ფედერაციასთან.

საპროექტო დოკუმენტაციის შედგენაზე გამოცხადებულ ტენდერში [რომელიც შემდეგ, მშენებლობის პროცესში ტექნიკურ ზედამხედველობასაც მოიცავს] წინადადებების მიღება 2019 წლის 28 აპრილს დაიწყება და 30 აპრილს დასრულდება. დოკუმენტაცია მზად უნდა იყოს გამარჯვებულთან ხელშეკრულების გაფორმებიდან 150 დღეში.

დოკუმენტაციის შედგენის შემდეგ ცალკე ტენდერი გამოცხადდება ბაზის მშენებლობაზე.

 

სავარჯიშო ბაზა ჩაქვში / რენდერი ესკიზურ-ტექნიკური გეგმარების დოკუმენტიდან

ტერიტორიის ადგილმდებარეობა ჩაქვში, სადაც ძალოსნობის სავარჯიშო ბაზა უნდა აშენდეს

ამ თემაზე:

ძალოსნები უშუქოდ და ცივი შხაპით სხვის შენობაში

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com