რეკლამა,სიახლეები

ბიამ მორიგი რეგიონალური შეხვედრა ბათუმში გამართა

18.04.2019 • 967
ბიამ მორიგი რეგიონალური შეხვედრა ბათუმში გამართა

B Talks-ის ფარგლებში, ბიას მორიგი შეხვედრა – “ადგილობრივი ბიზნესის გამოწვევები და განვითარების ახალი შესაძლებლობები” გაიმართა. B Talks ბათუმი ევროკავშირისა და გაეროს განვითარების პროგრამის(UNDP) მხარდაჭერით გაიმართა და მას აჭარის რეგიონში მოქმედი 150-მდე კომპანიის წარმომადგენელი დაესწრო.

შეხვედრაზე განხილეს აჭარის რეგიონისთვის აქტუალური ისეთი საკითხები, როგორიც არის ინვესტიციების მოზიდვის და ახალი ბაზრების ათვისების გზები, ტურიზმის განვითარება რეგიონში და ბიზნესის უფლებების დაცვა. ბიას წარმომადგენლებმა სტუმრებს აჭარის რეგიონის შემაჯამებელი სტატისტიკა წარუდგინეს და რეგიონალური ბიზნესის განვითარებისთვის ახალ შესაძლებლობებზე ისაუბრეს.

შეხვედრის ფარგლებში, გაიმართა პანელური დისკუსია, რომელსაც ესწრებოდნენ სპეციალურად მოწვეული სტუმრები – აჭარის ა.რ ტურიზმისა და კურორტების დეპარტამენტის თავმჯდომარე, სულხან ღლონტი, საქართველოს ბიზნესომბუდსმენი ირაკლი ლექვინაძე, აჭარის ფინანსთა და ეკონომიკის მინისტრის პირველი მოადგილე, თორნიკე კუჭავა. ასევე, ბათუმის პირველი ვიცე-მერი თენგიზ პეტრიძე, ვიცე-მერი, ლელა სურმანიძე და არქიტექტურის სამსახურის უფროსი, მირიან მეტრეველი. ბიზნესის წარმომადგენლებს საშუალება ჰქონდათ მოწვეული სტუმრებისგან მოესმინათ პასუხები მათთვის საინტერესო საკითხებზე.

B Talks-ის ფარგლებში, ბიზნესის წარმომადგენლებთან შეხვედრა უკვე მეექვსედ იმართება. შეხვედრების მიზანია საჭირო ინფორმაცია მიაწოდოს ქართულ კომპანიებს და ხელი შეუწყოს მათ განვითარებას. ბიამ უკვე ორი შეხვედრა გამართა თბილისში, სატრანსპორტო და სამშენებლო კომპანიებთან, რომლებსაც 200-მდე ქართული კომპანიის კომპანიის წარმომადგენელი დაესწრო. რაც შეეხება რეგიონალურ ბიზნესს, ქუთაისში, თელავსა და ზუგდიდში გამართულ შეხვედრებს 300-მდე კომპანიის წარმომადგენელი ესწრებოდა. B Talks-ის ფარგლებში, ბიას მორიგი შეხვედრა 2019 წლის შემოდგომაზე გაიმართება.

გადაბეჭდვის წესი


ასევე: