Batumelebi

კომპანია „ალიანს სიტიმ“ ბათუმში, ზღვის პირას, ე.წ. „ლუჟკოვის სახლის“ დემონტაჟი დაიწყო. ქალაქის მერიამ შენობის დანგრევაზე ნებართვა იმ დროს გასცა, როცა კომპანიას მასთან ახალი პროექტი შეთანხმებული არ ჰქონდა. თუმცა, დამტკიცებული იყო გენგეგმა, რომელიც სამომავლოდ გარკვეული პარამეტრების მშენებლობას უშვებს. ამ პარამეტრების მიხედვით, კომპანია „ლუჟკოვის სახლის“ ნაცვლად 50-სართულიან ცათამბჯენს ააშენებს. ერთ-ერთი ვერსიით, ამ ადგილზე შეიძლება ააშენონ არა ერთი, არამედ სამი ცათამბჯენი, რომლებსაც ერთი სივრცე გააერთიანებს.

10 მრავალსულიანი, დევნილი ოჯახი ბათუმში, ახალაშენებულ კორპუსში ბინის მფლობელი გახდა.

ბათუმში, ლეონიძის ქუჩაზე, ორი 16-სართულიანი კორპუსი საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და აჭარის ავტონომიური რესპუბლიკის მთავრობის ერთობლივი პროექტის ფარგლებში აშენდა.

სამინისტრომ 154 ბინა, გრძელვადიანი განსახლების კრიტერიუმების შესაბამისად, 2019 წლის დასაწყისში გაანაწილა. დარჩენილ 10 ოთხოთახიან ბინაზე დამატებითი განაცხადების მიღება გამოცხადდა და ისინი დევნილ ოჯახებს დღეს გადაეცათ.

ამავე კორპუსებში საცხოვრებელი ფართები სოფელ წაბლანაში სტიქიური მოვლენების შედეგად დაზარალებულმა 208 ეკომიგრანტმა ოჯახმაც მიიღო.

იძულებით გადაადგილებულ ოჯახებს ოთხოთახიანი ბინების გასაღებები საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილემ გრიგოლ გიორგაძემ და აჭარის ავტონომიური რესპუბლიკის ჯანმრთელობისა და სოციალური დაცვის მინისტრმა ზაალ მიქელაძემ გადასცეს.

დღეს, 29 ივნისს, ბათუმში დილიდან გადაუღებლად წვიმს. ბათუმის ქუჩები უკვე არაერთხელ დაიტბორა. ბათუმში წყლის ნაკადის გატარებას სანიაღვრე სისტემა ახერხებს და, შესაბამისად, მოქალაქეებს პრობლემები ნაკლებად ექმნებათ. თუმცა „ოცნების ქალაქში“ ასე არ ხდება – ქოხებში მცხოვრები ოჯახები მთელი დღის განმავლობაში საკუთარი ძალებით ცდილობენ ქოხებიდან წყლის დაცლას, მაგრამ ეს არც ისე მარტივია.

„ოცნების ქალაქიდან“ გვწერენ, რომ რამდენიმე ქოხებში ამ დროისთვისაც დგას წყალი და, როგორც ჩანს, ქოხების მესაკუთრეებს ღამის გათევა ასეთ პირობებში მოუწევთ.

აქ ამბობენ, რომ უკვე გამოიძახეს სამაშველო სამსახური, მაგრამ მისულმა ჯგუფმა თქვა, რომ წყალს ქოხებიდან ვერ ამოტუმბავენ, რადგან არ იციან, სად შეიძლება გადატუმბონ ეს წყალი. აქ მცხოვრების თქმით, დარეკეს ბათუმის წყლის ცხელ ხაზზეც, სადაც უთხრეს, რომ ეს საკითხი მათ კომპეტენციაში არ შედის.

ბათუმელი ედო მჟავანაძე ამბობს, რომ დღეს ბათუმის აეროპორტში გადაიღო ბუკლეტები, რომელზეც საქართველოს რუკაა გამოსახული. ამ რუკაზე საქართველოს ტერიტორიული მთლიანობა დარღვეულია – ტერიტორია, სადაც საქართველოს იურისდიქცია ვრცელდება, წითელი ფერით არის აღნიშნული, ხოლო ოკუპირებული აფხაზეთი და სამხრეთ ოსეთი ნაცრისფრად. სარეკლამო ფლაიერს აწერია, რომ ის ტურისტულ კომპანია – „ავი ჯორჯიას“ ეკუთვნის. ამ ფლაიერებს შემოსულ ტურისტებს ურიგებენ.

„ბათუმელები“ კომპანიას ბუკლეტზე მითითებულ ნომერზე დაუკავშირდა და ჰკითხა, თუ რატომ არის დატანილი ბუკლეტზე საქართველოს რუკა მსგავსი ფორმით.

კომპანიის წარმომადგენელმა განაცხადა, რომ მათ ბუკლეტზე მხოლოდ ის ადგილები მიანიშნეს, სადაც კომპანიის ოფისებია წარმოდგენილი.

„ეს არ არის საქართველოს რუკა, აქ მინიშნებულია ის ადგილი, სადაც ჩვენი ოფისებია. ბათუმის, ქუთაისის და თბილისის სერვისები აწერია. არანაირი პოლიტიკური არ არის აქ“, – გვეუბნება კომპანიის წარმომადგენელი.

კითხვაზე, კომპანიის სერვისები ერთ ფერში გამოსახულ საქართველოს რუკაზე რატომ არ დაიტანეს? კომპანიის წარმომადგენელი ამბობს: ის, რომ რუკაზე საქართველოს შემადგენლობაში არ ჩანს აფხაზეთი და სამხრეთ ოსეთი, მხოლოდ დიზაინის ამბავია.

„არანაირი პოლიტიკური ამბავი აქ არ არის და არ ვაპირებთ არანაირი დიზაინის შეცვლას“, – ამბობს კომპანიის წარმომადგენელი.

სტატია გამოქვეყნებიდან მალევე კომპანია გამოხმაურება, მათი გადაწყვეტილების შესახებ შეგიძლიათ აქვე წაიკითხოთ.

ბათუმის საფეხბურთო სტადიონის სკამები ლურჯი ფერის იქნება. მშენებარე სტადიონზე, სკამები ყველაზე ბოლოს დამონტაჟდება, თუმცა, „ბათუმელების“ ინფორმაციით სტადიონის მშენებლობა შესაძლოა დაგეგმილზე გაცილებით ადრე დასრულდეს. არსებული გეგმით, მშენებლობის პირველი და მეორე ეტაპები, ანუ მთლიანად საფეხბურთო სტადიონის მშენებლობა, 2020 წლის 15 ოქტომბრამდე უნდა დამთავრდეს.

„სამუშაოები წინსწრებით მიმდინარეობს… კონკრეტულად რა დროში დასრულდება მთლიანად მშენებლობა, ამ ეტაპზე ზუსტად ვერ გეტყვით. არსებული ტემპით ვადაზე ადრე დამთავრდება“ – გვითხრეს შპს „სტადიონში“.

ბათუმის საფეხბურთო სტადიონის სკამის ფერის შესარჩევად დისკუსია ჯერ კიდევ 2019 წლის იანვარში ფეისბუქში დაიწყო. „მხოლოდ თეთრი და ლურჯი“ –„დინამო ბათუმის“ ფანები ითხოვდნენ, ბათუმის ახალ სტადიონზე მხოლოდ ამ ორი ფერის სკამები დამონტაჟებულიყო.

მოგვიანებით კი აჭარის ფინანსთა და ეკონომიკის სამინისტრომ თავის ფეისბუქგვერდზე მშენებარე სტადიონის სავარძლების ფერის შესარჩევად გამოკითხვა გამოაქვეყნა. სამინისტრო მომხმარებელს ორ ფერს – ცისფერსა და ლურჯს სთავაზობდა. სამინისტროს პრესსამსახურის ინფორმაციით, ფერები ქალაქის, ზღვისა და ბათუმის „დინამოს“ ლოგოს ფერების მიხედვით შეარჩიეს.

ამ გამოკითხვის მიხედვით ხმები ასე გადანაწილდა: ცისფერი – 35%, ლურჯი – 65%.

შესაბამისად, სამინისტროში გვითხრეს, რომ გადაწყდა ლურჯი ფერის სკამების დამონტაჟება.

აჭარის ფინანსთა და ეკონომიკის სამინისტროს შპს „სტადიონმა“ ბათუმის საფეხბურთო სტადიონის მშენებლობაზე ტენდერი ორჯერ გამოაცხადა. პირველ ტენდერში [პირველი ეტაპის სამუშაოები] გამარჯვებულ კომპანია „ანაგთან“ ხელშეკრულება 99 448 408 ლარზეა გაფორმებული დღგ-ს გარეშე [117 349 122 ლარი დღგ-ს ჩათვლით].

ამავე კომპანიამ გაიმარჯვა მეორე ეტაპის სამუშაოების შესყიდვაზე გამოცხადებულ ტენდერშიც. „ანაგმა“ მეორე ეტაპის სამუშაოების შესრულება „სტადიონს“ 20 მილიონ 780 ათას ლარად შესთავაზა [სატენდერო თანხა 21 922 803 ლარი იყო]. ხელშეკრულება კი მასთან 24 520 400 ლარზე [დღგ-ს ჩათვლით] 2019 წლის 10 აპრილს გაფორმდა.

სტადიონის მშენებლობის პირველი ეტაპის სამუშაოების შესრულებას ტექნიკურ ზედამხედველობას ტენდერში გამარჯვებული კომპანია „სიემსი“ უწევს, რომელთანაც ხელშეკრულება 2 388 580 ლარზეა გაფორმებული.

„სტადიონი“ მეორე ეტაპის სამუშაოების ტექნიკურ ზედამხედველსაც ტენდერით შეარჩევს. სატენდერო თანხა 576 670 ლარია. წინადადებების მიღება 2019 წლის 7 ივლისს დაიწყება და 10 ივლისს დამთავრდება.

„ვერ გეტყვით, რა იყო უარის მიზეზი, მე დეპარტამენტის თანამშრომელი ვარ,“ – ასე გვიპასუხა აჭარის გზების დეპარტამენტის უფროსის მოადგილემ, დავით ბექაიამ კითხვაზე: რატომ ვერ მიიღო თანხმობა ამ უწყებამ საქართველოს მთავრობიდან ექსკავატორების შეძენაზე.

აჭარის გზების დეპარტამენტს ექსკავატორების შეძენაზე თბილისიდან რომ უარი უთხრეს, ამის შესახებ უმაღლესი საბჭოს წევრმა, გიორგი რომანაძემ გუშინ, უმაღლესი საბჭოს სხდომაზე ისაუბრა. გიორგი რომანაძის თქმით, დეპარტამენტს სპეციალური ტექნიკის დაქირავება უწევს, რაც ბევრად ძვირი ჯდება, ვიდრე მისი შეძენა. გიორგი რომანაძე საფინანსო კომიტეტის უფროსია და მანამდე გზების დეპარტამენტს ხელმძღვანელობდა. გუშინვე თორნიკე რიჟვაძემ დეპუტატებს უთხრა, რომ ამ თემაზე მიმდინარეობს მოლაპარაკებები.

დავით ბექაია, აჭარის გზების დეპარატმენტის უფროსის მოადგილე ამბობს, რომ საქართველოს მთავრობიდან მათ არ მიუღიათ წერილობითი დასაბუთება, რის გამო ეთქვათ უარი ექსკავატორების შეძენაზე. დეპარტამენტი დაახლოებით მილიონნახევარი ლარით 5 ერთეული ტექნიკური საშუალების შეძენას გეგმავდა. გზების დეპარტამენტმა მთავრობისგან მხოლოდ ორი ექსკავატორის შეძენაზე მიიღო თანხმობა და ამისთვის ბიუჯეტიდან 513 ათასი ლარი დაიხარჯა.

„დეპარტამენტი ახორციელებს გზების გაწმენდით სამუშაოებს, არხების გაწმენდას… გამომდინარე იქედან, რომ ავტოპარკი მოძველებულია, იგი საჭიროებს ყოველწლიურ განახლებას. სტიქიების დროს ჩვენ გვიწევს ტექნიკის დაქირავება მუნიციპალიტეტებში. რა თქმა უნდა, ქირაობას შეძენა სჯობს,“ – გვითხრა დავით ბექაიამ.

გზების დეპარტამენტში ასევე გვითხრეს, რომ ტექნიკის შეძენის საჭიროებას რამდენიმე ცენტრალური უწყება ერთობლივად სწავლობს.

საგანგებო სიტუაციების მართვის სამსახური მოსახლეობას აფრთხილებს თავი შეიკავონ ზღვაში შესვლისგან შტორმის გამო.

ამ დროისათვის საქართველოში, შავი ზღვის სანაპირო ზოლზე ფიქსირდება 4-ბალიანი შტორმი და უამინდობის გამო, მოსალოდნელია შტორმის გაძლიერება.

კატეგორიულად აკრძალულია მცირეწლოვანი ბავშვების უმეთვალყურეოდ დატოვება სანაპირო ზოლზე – აღნიშნულია საგანგებო სტუაციების მართვის სამსახურის განცხადებაში.

საგანგებოს განცხადებით, სანაპირო ზოლზე აღმართულია წითელი ალმები, რაც ზღვაში შესვლის აკრძალვის დროებითი მანიშნებელია. ასევე, მობილიზებულია წყალზე მაშველებთა დამატებითი ჯგუფები, ისინი პატრულირებენ სანაპირო ზოლზე და ხმის გამაძლიერებლებით მოსახლეობას რამდენიმე ენაზე მოუწოდებენ დაიცვან უსაფრთხოების ნორმები, მოსალოდნელი საფრთხის თავიდან ასარიდებლად.

შტორმის ჩადგომის შემდეგ, როდესაც წყალში შესვლა ნებადართული იქნება, სანაპირო ზოლზე აღიმართება თეთრი ალმები.

ფოტო: საგანგებო სიტუაციების მართვის სამსახური

საქართველოს ეროვნული ბანკის [სებ] ინფორმაციით, 2019 წლის მაისში წლიურმა ინფლაციამ 4.7 პროცენტი შეადგინა, ხოლო აპრილთან შედარებით ფასების საერთო დონე 0.5 პროცენტით გაიზარდა.

სების მონაცემებით, თუ აპრილში ინფლაციის მაჩვენებლის [4.1 პროცენტით] მატების მთავარი მიზეზი სიგარეტისა და კარტოფილის გაძვირება იყო, მაისში აპრილთან შედარებით ინფლაციის მატებაზე მნიშვნელოვნად კარტოფილის და ბენზინის გაძვირებამ იმოქმედა, რომლებიც შესაბამისად 31 და 5 პროცენტით გაძვირდა.

„საპირისპიროდ, სეზონური ფაქტორების გამო, ყველის და ზოგიერთი ბოსტნეულის გაიაფებამ ინფლაციის მაჩვენებელზე შემცირების მიმართულებით იმოქმედა“ – აღნიშნულია სების მაისის თვის მიმოხილვაში.

მიმოხილვის მიხედვით, წლიურ გამოხატულებაში, მაისში სამომხმარებლო კალათაში ფასის ყველაზე მნიშვნელოვანი ცვლილება 2019 წლის დასაწყისში სიგარეტზე აქციზის გადასახადის ზრდის [შედეგად, სიგარეტის გაძვირების] გამო მოხდა. იმპორტირებული და ადგილობრივად წარმოებული ფილტრიანი სიგარეტი, შესაბამისად, 30 და 31 პროცენტით, ხოლო ადგილობრივად წარმოებული უფილტრო სიგარეტი 104 პროცენტით გაძვირდა.

მაისში სურსათის ინფლაციამ 8.4 პროცენტი შეადგინა. აქედან ყველაზე დიდი წვლილი პურის გაძვირებაზე მოდის, რომელიც გასული წლის დეკემბერში
გაძვირდა და, შესაბამისად, მაისში წლიურად 15-პროცენტიანი ზრდა დაფიქსირდა. საპირისპიროდ, წლიურად მნიშვნელოვნად გაიაფებული იყო ვაშლი [36 პროცენტით].

„გრძელდება ტანსაცმლისა და ფეხსაცმლის ბოლო წლებში ჩამოყალიბებული გაიაფების ტენდენცია. ამ ჯგუფის ფასები წინა წლის მაისთან შედარებით საშუალოდ 7 პროცენტით დაბალი იყო. საბაზო ინფლაცია, რომელიც სამომხმარებლო კალათიდან გამორიცხავს მაღალი მერყეობით გამორჩეულ სურსათის, ენერგომატარებლების და თამბაქოს ფასებს, მაისში მთლიან ინფლაციაზე მნიშვნელოვნად ნაკლები იყო და 1.1 პროცენტს შეადგენდა… დაბალი საბაზო ინფლაცია მომავალში მთლიანი ინფლაციის მაჩვენებლის შემცირების სიგნალს იძლევა“ – აღნიშნულია ბანკის ანგარიშში.

ამ თემაზე:

https://netgazeti.ge/news/359819/

ქობულეთის რამდენიმე სოფელს წლებია წყალი შეზღუდვით მიეწოდება, განსაკუთრებით რთული სიტუაცია სოფელ ქვედა კვირიკეშია, კერძოდ, ბერაძეების უბანში, სადაც ზაფხულობით წყალი ყველაზე სანუკვარი სითხე ხდება – აქ წყალი კვირაში რამდენჯერმე, თითო საათით მოდის. აქაური ქალები სუფთა წყლის მოსაპოვებლად დღეში რამდენჯერმე, დამრეც ფერდობზე, ტყის გავლით, წყაროზე ჩადიან. 300-400 მეტრ მანძილზე მინიმუმ 10-15 ლიტრი წყლის ზიდვა მათთვის უსიამოვნო რუტინაა. მათი ხელები ამ მძიმე შრომისთვის გაწაფულია.

დალი აბუსელიძე კვირიკეში 26 წელია ცხოვრობს. ამბობს, რომ წყალი აქ ყოველთვის პრობლემა იყო, მაგრამ ერთ ხანს ცოტათი გამოსწორდა სიტუაცია, ახლა კვლავ იმავე პრობლემის წინაშე დგანან. დალი ამბობს, რომ ზაფხულობით წყალი მასთან კვირაში ერთხელ მოდის, ისიც ერთი საათით – “21-ე საუკუნეა, ამაზე არ უნდა გვიწევდეს ლაპარაკი. კვირიკეში ზაფხულობით ონკანში წამოსული წყალი ფუფუნებაა. წყალი აქ მაშინ მოდის, როცა ძლიერი წვიმაა, ისიც მღვრიე“. მაგრამ ყოველთვის ასე არ ხდება – დღეს, 28 ივნისს, კვირიკეში ნამდვილად მოვიდა ძლიერი წვიმა, მაგრამ წყალი ონკანებში მაინც არ აქვთ.

დალი წყლის ეკონომიურ მოხმარებაზე აქაური ქალების გამოცდილებას გვიზიარებს. ამბობს, რომ იატაკებსა და აივნებს ხელის ნაბანი წყლით რეცხავენ – “ბოსტანში მწვანილი აღარ მაქვს, მაგრამ მაგას რას დავეძებ, დაბანას რომ ვახერხებდეთ ნორმალურად”.

დალიმ იქვე, კვირიკეს წყაროზე ჩაგვიყვანა, სადაც დღეში რამდენჯერმე ჩადიან სასმელი წყლის მოსაგროვებლად. “ეს ერთადერთი სუფთა წყაროა, საიდანაც სასმელ წყალს ვიღებთ. 15 წლის წინ სარეცხი აქ ჩამოგვქონდა გასარეცხად, აქვე იდგა პატარა ოთახი, სადაც დასაბანად მოდიოდა ხალხი. მერე თითქოს რაღაც სამუშაოები ჩატარდა, გამოცვალეს ძველი მილები, მაგრამ ზაფხულობით წყალი ისევ არ გვაქვს. წყაროც თითქმის დამშრალია, ალბათ ერთი საათი უნდა ელოდო,, ორი ლიტრი დასალევი წყალი რომ მოაგროვო”, – ამბობს ის.

2012-2015 წლებში წყლის სისტემის რეაბილიტაციისთვის ქობულეთის ოთხ სოფელში, მათ შორის სოფელ კვირიკეში, 4 მილიონამდე ლარი დაიხარჯა.

უშუალოდ ქვედა კვირიკეში წყალსადენის სარეაბილიტაციო სამუშაოებზე 2013 წელს გამოცხადებულ ტენდერში კომპანია „უნივერსალ ჯორჯია 2008“-მ გაიმარჯვა. შესრულებულ სამუშაოებში ქობულეთის გამგეობამ 186 944 ლარი გადაიხადა.

2013 წელს მარტო სალექარის რეაბილიტაციისთვის ქობულეთის ბიუჯეტიდან 19 690 ლარი გამოიყო.

სოფელ კვირიკეს წყალსადენის სათავე ნაგებობის, რეზერვუარებისა და ქსელის რეაბილიტაციისთვის ქობულეთის მუნიციპალიტეტმა 167 668 ლარი 2015 წელსაც დახარჯა.

2019 წელს ხუთ სოფელში, მათ შორის კვირიკეში [ასევე ქვედა აჭყვა, ბობოყვათი, სამება, მუხაესტატე], ჭაბურღილების მოწყობის საპროექტო-სახარჯთაღრიცხვო დოკუმენტაციაც შეისყიდა 13 353 ლარად, თუმცა ჭაბურღილების მოწყობის სამუშაოებზე ტენდერი ჯერ არ გამოუცხადებია.

კვირიკეში თითქმის ყველა ეზოში შეგხვდებათ დიდი ზომის, ლურჯი წყლის ავზი, რომლის საშუალო ფასიც 200-500 ლარია. ავზის დასამაგრებელი კონსტრუქცია დაახლოებით 500 ლარი ჯდება, წყლის საქაჩი ელექტრომოწყობილობის ფასი კი – 150 ლარია. დალი ამბობს, რომ სისტემის გამართვის საშუალება ბევრს არ აქვს, ზოგიერთ მათგანს ეს სისტემა განვადებითაც კი აქვს შეძენილი.

ამ სოფელში იმედი ჰქონდათ, რომ სიღარიბეს ტურისტების წყალობით დაძლევდნენ, მაგრამ ტურისტები უწყლობის გამო მაქსიმუმ 2 დღეს ჩერდებიან და მერე ტოვებენ სოფელს. ასე მოუვიდა დალისაც, „სტუმრები ორი დღის მერე წავიდნენ იმის გამო, რომ წყალი შეწყდა”,  –  გვიყვება დალი.

ციცინო კახიძემ წყლის ავზი 7 წლის წინ შეიძინა. “მაშინ მხოლოდ ბაკში 600 ლარი გადავიხადე. იმ დროს წყალი საერთოდ არ იყო, დაქირავებული მანქანით ამომქონდა სხვადასხვა ჭურჭლით და ბაკს ვავსებდი. ახლა ზოგჯერ მოდის, მაგრამ ისიც ძალიან მღვრიეა, საჭმლის მოსამზადებლად არ გამოდგება, მხოლოდ დასაბანად და გასარეცხად ვიყენებთ”, – ამბობს ის.

ციცინო კახიძის ეზოში ორი ონკანია, მათგან ერთი გაუქმებულია – ეს იმიტომ, რომ ბავშვებმა თამაშისას შემთხვევით არ დაცალონ მოგროვებული წყალი. როგორც დალი ამბობს, აქ ყველა წვეთი ძვირფასია.

“სოფელში წყალს ყველა ეკონომიურად მოიხმარს, მაგრამ მაინც არ გვყოფნის. სოფელში მწვანილი არ უნდა იყოს? ვერაფერს ვრწყავთ, წყალი საოჯახო საქმეებისთვისაც არ გვყოფნის, სარწყავებზე საუბარიც ზედმეტია”.

ციცინოს მეზობლის, ნინო ნიქაბაძის ოჯახის მდგომარეობა კი უწყლობის გამო ბევრად ცუდ დღეშია, ვიდრე სხვა მისი მეზობლების. ნინო სამი შვილის დედაა, ყოველ დილით ხუთ საათზე დგება და სამსახურში მიდის, სახლში მოსულს კი წყლის ამოსატანად ქობულეთისკენ რამდენიმე კილომეტრის გავლა უწევს.

[toggle title=”დააწკაპუნეთ აქ და ნახეთ ქობულეთის მერიის არგუმენტები კვირიკეში უწყლობაზე”]ქობულეთის მუნიციპალიტეტის მერიის განმარტებით, ბოლო წლებში კლიმატის ცვლილების გამო ფიქსირდება გვალვა, რაც წყლის დებეტის ნაკლებობას იწვევს. ამიტომაც მერიის გადაწყვეტილებით, იმ სოფლებში, სადაც ზაფხულში წყალი შრება და ალტერნატიული წყლის მიწოდების საშუალება ვერ გამოიძებნა, გადაწყდა, რომ მოსახლეობას წყალი გრაფიკით მიაწოდონ.

ამ დროისთვის მუნიციპალიტეტი დამატებითი ჭაბურღილების შეძენისთვის რიგ ღონისძიებებს ატარებს. მათ შორის გათვალისწინებულია სოფელ მუხაესტატეში 2 დამატებითი და სოფელ ჯიხანჯურში 4 ახალი ჭაბურღილის ამოქმედება. მუნიციპალიტეტის სამი სოფლისთვის – სამება, კვირიკე და ბობოყვათი  – ჭაბურღილების მოწყობის პროექტი უკვე შეძენილია. 

“ორჯერ ჩავდივარ, წყალი არ გვყოფნის, ბავშვები სკოლისთვის და ბაღისთვის უნდა მოვამზადო. სამსახურიდან მოსულმაც უნდა გადავივლო, წყალი კი წვეთიც არ არის. ბაკის შესაძენად სახსრები არ მყოფნის, ეს თანხა ისევ ბავშვების საჭმელს მოაკლდება, ამიტომაც წყალს ვიმარაგებთ, როგორც შეგვიძლია. ამას წინათ მთელი კვირა ხელით ვრეცხე სარეცხი, სხვა დროს ნახევარი საათით მოსული წყალი ნახევრად რეცხავს სარეცხს, ამიტომ მიწევს სარეცხის გამოღება მანქანიდან და ხელით დასრულება რეცხვის”, – ამბობს ის.

ნინო წყაროზე თავის პატარა ანანოსთან ერთად პლასტმასის ბოთლებით მომარაგებული ჩადის, ცარიელი ბოთლის წაღებაში პატარაც ეხმარება, უკანა გზაზე კი წყლით დამძიმებული ჭურჭელი ნინოს მოაქვს.

ნახეთ რას ყვებიან ქალები თავიანთ უწყლო ყოფაზე: 

მომცრო ზომის ბლოკნოტი, რომლის ყდაზეც სტალინია გამოსახული, ბათუმში, „ბიბლუს გალერეაში“ იყიდება, იმავე სერიის, იმავე ზომისა და ფორმის სხვა ბლოკნოტებთან ერთად, რომლებზეც გამოსახულია აჭარული ხაჭაპური და ხინკალი.

ამ სერიაში გამოცემულ ბლოკნოტებს უკან ინგლისურენოვანი წარწერა აქვს, რომელიც ყდაზე გამოსახულებას განმარტავს. მაგალითად, ხინკლისგამოსახულებიანი ბლოკნოტის უკანა ყდაზე ვკითხულობთ, როგორ უნდა ვჭამოთ ხინკალი; სტალინის ბლოკნოტზე დატანილი ინგლისურენოვანი ტექსტი კი იმის შესახებ გვამცნობს, რომ მან სახელი „სტალინი“ დაირქვა რევოლუციონერობისას. კერძოდ, გააერთიანა რკინის რუსული სახელწოდება „სტალ“ და „ლენინი“. ლენინმა სიკვდილამდე დაწერა ანდერძი, რომლითაც მოუწოდებდა ძალაუფლებიდან სტალინის ჩამოშორების შესახებ და მას „დაწყევლილ, ბრუტალურ მოძალადეს“ უწოდებდა. სტალინმა შექმნა გულაგი, შრომითი ბანაკი, სადაც მონებივით შრომობდნენ კრიმინალები და პოლიტპატიმრები. აღნიშნულია, რომ სტალინის მარჯვენა ხელი იყო მოლოტოვი.

აქვე ვკითხულობთ, რომ სანამ სტალინს უწოდებდნენ, ის იყენებდა კობას სახელს, კობა კი იყო გმირი რუსული ლიტერატურიდან [სავარაუდოდ, იგულისხმება ქართველი მწერლის, ალექსანდრე ყაზბეგის მოთხრობის „მამის მკვლელის“ პერსონაჟი].

ბლოკნოტების ეს სერია შპს „კოლორში“ დაიბეჭდა, რომელიც „პალიტრა ჯგუფს“ ეკუთვნის. „პალიტრას“ ეკუთვნის „ბიბლუსის“ მაღაზიათა ქსელიც.

რა ნიშნით შეირჩა სტალინის პორტრეტი ბლოკნოტის ყდაზე დასაბეჭდად? – ამ კითხვაზე პასუხის მისაღებად „კოლორიდან“ „ბიბლუსში“ გადაგვამისამართეს. „ბიბლუსის“ შესყიდვების სამსახურში კი გვითხრეს, რომ სტალინის გამოსახულებით ბლოკნოტები ქსელიდან უკვე ამოღებულია და როგორც ჩანს, მხოლოდ ბათუმის „ბიბლუსში“ დარჩა.

„გარკვეულ პერიოდში შემოტანილი გვქონდა და ახლა, განსაკუთრებით რაც ეს ამბები დაიწყო [თბილისში 20 ივნისის აქციის დარბევის შემდეგ], მას შემდეგ ალაგებულია სრულად ქსელიდან და არსად არ იყიდება, განსაკუთრებით სტალინის თემა. მანდ, როგორც ჩანს, რამდენიმე ცალი ჩარჩენილი იყო. ისე კი, პირველები ვიყავით, ვინც ამ თემას მაქსიმალურად განუდგა, ასე ვთქვათ. პირიქით, ახლა ახალი მაისურები შემოგვაქვს რუსეთი ოკუპანტია და ასე შემდეგ,“ – გვითხრა ნათია ვაშაკიძემ, შესყიდვების მენეჯერმა.

ნათია ვაშაკიძემ ასევე აღნიშნა, რომ ბლოკნოტებზე მხოლოდ სტალინის პორტრეტი არ იყო და ბევრი სხვა ცნობილი ადამიანის პორტრეტითაც დაბეჭდეს ბლოკნოტი, თუმცა კიდევ რომელი ისტორიული პირის პორტრეტით დაიბეჭდა ბლოკნოტები ამ სერიაში, ნათია ვაშაკიძემ ვერ გაიხსენა. მან აღნიშნა, რომ ძალიან ბევრ ბლოკნოტს ბეჭდავენ და ასე ვერ გვიპასუხებს.

სტალინის გამოსახულებით სუვენირების გაყიდვა საქართველოში ბოლო წლებში განსაკუთრებით აქტიურად დაიწყო. „ბათუმელებმა“ ამ თემაზე არაერთი მასალა მოამზადა.

ეს კანონდარღვევაა – მიიჩნევს ანნა მდინარაძე, ახალგაზრდა იურისტთა ასოციაციის აჭარის ფილიალის ხელმძღვანელი. იურისტი „თავისუფლების ქარტიას“ ეყრდნობა, რომლის მიხედვითაც „კომუნისტური ტოტალიტარული სიმბოლიკა − ისეთი სიმბოლიკაა, რომელიც დაკავშირებულია კომუნისტურ ტოტალიტარულ იდეოლოგიასთან და გამოხატავს კომუნისტურ ტოტალიტარულ რეჟიმს.“

იურისტი განმარტავს, რომ მსგავს შემთხვევაზე რეაგირება სახელმწიფო უსაფრთხოების სამსახურში არსებულმა სპეციალურმა კომისიამ უნდა მოახდინოს.

„მიმართვის შემთხვევაში, კომისიის უფლებამოსილი პირი ვალდებულია აღმოფხვრას კომუნისტური ტოტალიტარული ან/და ფაშისტური სიმბოლიკა. ამ პუნქტით გათვალისწინებული უფლებამოსილი პირის მიერ კომისიის მითითების შეუსრულებლობა ან არაჯეროვნად შესრულება იწვევს კანონით გათვალისწინებულ პასუხისმგებლობას,“ – ამბობს ანნა მდინარაძე. მისივე თქმით, მითითების შეუსრულებლობა 1000 ლარით დაჯარიმებას გამოიწვევს.

ვან გოგი და ლადო გუდიაშვილი გამორჩეულად უყვარს. ხუთი წლიდან ხატავს, სამხატვრო აკადემია დაამთავრა და მას შემდეგ ზეთით, გუაშით, ნახშირით, აკრილით მუშაობს. საპატიმროში ყოფნისას, სადაც საღებავები არ იყო, ასანთით ხატავდა მუყაოსა და კედლებზე. ციხიდან ნახატებს არ ატანდნენ და იქვე ჩუქნიდა პატიმრებს.

მიშა ვაზაგაშვილი სასჯელს თითქმის 3-წელიწადნახევარი იხდიდა.

„ციხის წლები? ამაზე ლაპარაკი არ მინდა, ვისთვის როგორ, მაგრამ ციხე ჩემთვის ფსიქოლოგიური ტრავმა იყო, არ მინდა გახსენება. 2018 წლის ივნისში გავთავისუფლდი. ხატვა მსიამოვნებს, ამ დროს სხვაგან ვარ. ადრე ქედაში ჩოგბურთის კორტები იყო, ორი წელი ვთამაშობდი, 35 ბავშვს ვავარჯიშებდი… ახლა აღარ“, – ამბობს მიშა.

ახლა მხატვართა კავშირის წევრია, მხატვრები თვეში ერთხელ იკრიბებიან და გამოფენებს გეგმავენ. მიშას პერსონალური გამოფენა ჯერ არ ჰქონია, თუმცა სამომავლოდ ამაზეც ფიქრობს.

გათავისუფლების შემდეგ დასაქმება ყოფილი პატიმრების ერთ-ერთი მთავარი პრობლემაა, გამონაკლისი არც მიშა ვაზაგაშვილია, ამჯერად სტაბილური სამსახური არ აქვს.

,,ბულვარში ვხატო? იცით, რამდენი მხატვარია ბათუმში?…

ადამიანებს ვერ ვუგებ, ასე მოხდა ციხის შემდეგ. რატომ? არ ვიცი, უცნაურად მეჩვენებიან, ბათუმიც სხვანაირია უკვე, მიყურებენ როგორც ციხიდან გამოსულს, ამას ვგრძნობ… მაგრამ ახლობლებისა და ნათესავებისთვის ასე არ არის. სხვები არ მაინტერესებს“, – ამბობს მიშა.

ძირითადად შინ ხატავს. მოლბერტი, პალიტრა, საღებავები და ფუნჯები – ცოტა ხნის წინ „დემოკრატიის ინსტიტუტის“ ყოფილი პატიმრების გაძლიერების პროექტის ფარგლებში მიშას ხატვისთვის საჭირო ნივთები და მასალები გადასცეს. პროგრამის მიზანი ყოფილი პატიმრების, მათი ოჯახის წევრებისა და პრობაციონერების რეაბილიტაცია – რესოციალიზაციაა.

„დემოკრატიის ინსტიტუტი“ პროექტს პარტნიორ ორგანიზაციებთან ერთად ახორციელებს იმერეთში, აჭარაში, გურიასა და სამეგრელო – ზემო სვანეთში. პროექტის ფინანსური მხარდამჭერი ევროკავშირია.

„ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“ მიზნად ისახავს:

• ყოფილ პატიმართა ჯანმრთელობის მდგომარეობის გაუმჯობესების ხელშეწყობას; 
   იურიდიულ დახმარებას
• ბენეფიციართა გადამისამართებას შესაბამისი პროფილის სამედიცინო დაწესებულებაში
•  ბენეფიციართა დახმარებას (ადვოკატირებას), რომ ისარგებლონ კუთვნილი სამედიცინო შეღავათებით და შესაბამისი სახელმწიფო პროგრამებით
• ყოფილი პატიმრების, პრობაციონერებისა და მათი ოჯახის წევრების მცირე სამეწარმეო ინიციატივების წახალისებას.
• სამიზნე ჯგუფების დასაქმების ხელშეწყობას

ზემოთ ჩამოთვლილი სერვისებით სარგებლობა შეუძლიათ ყოფილ პატიმრებს, პატიმართა ოჯახის წევრებსა და პრობაციონერებს. ამისთვის მათ უნდა მიმართონ:

აჭარაში – დემოკრატიის ინსტიტუტს – ქ.ბათუმი, ჭავჭავაძის ქ. №107, ტელ: (0422) 27 57 44

იმერეთში – აფხაზინტერკონტს / ქ.ქუთაისი, ნინოშვილის ქ. №27, ტელ: (0431) 26 48 61

გურიაში – გურიის ახალგაზრდულ რესურსცენტრს /ოზურგეთი, რუსთაველის ქ. №4, ტელ: (0496) 27 41 26

სამეგრელოში– ფონდ თანაზიარს / ზუგდიდი, რუსთაველის ქ. №88 /ტელ: (0415) 22 10 78

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

საქართველოს ეროვნული ბანკის [სებ] მონაცემებით, ქვეყნის მთლიანმა საგარეო ვალმა, 2019 წლის 31 მარტის მდგომარეობით, 17.8 მლრდ აშშ დოლარი [48 მილიარდი ლარი] შეადგინა.

„2019 წლის პირველ კვარტალში საქართველოს მთლიანი საგარეო ვალი 10.2 მილიონი აშშ დოლარით გაიზარდა. აქედან, ოპერაციული ცვლილებების გამო საგარეო ვალი 5.6 მლნ აშშ დოლარით, ფასის ცვლილებების გამო – 50.2 მლნ. აშშ დოლარით და სხვა ცვლილებების გამო – 23.6 მლნ აშშ დოლარით გაიზარდა. ამავდროულად, საკურსო ცვლილებების გამო ვალი 69.1 მლნ. აშშ დოლარით შემცირდა“ – აცხადებს ეროვნული ბანკი.

სების მონაცემებით:

სახელმწიფო საგარეო ვალმა, 2019 წლის 31 მარტის მდგომარეობით, შეადგინა 7.4 მლრდ აშშ დოლარი , რომლიდანაც სამთავრობო სექტორის ვალია 5.4 მლრდ აშშ დოლარი, ეროვნული ბანკის ვალდებულებები – 376.4 მლნ აშშ დოლარი, ხოლო სახელმწიფო საწარმოების ობლიგაციები და სესხები, შესაბამისად, 810.3 მლნ აშშ დოლარი და 886.2 მლნ აშშ დოლარი.

საბანკო სექტორის საგარეო ვალმა შეადგინა 4.2 მლრდ აშშ დოლარი, სხვა სექტორების საგარეო ვალმა – 5.4 მლრდ აშშ დოლარი და კომპანიათაშორისო ვალმა – 2.4 მლრდ აშშ დოლარი. მთლიანი საგარეო ვალის 89.7 პროცენტი დენომინირებულია უცხოური ვალუტით.

საქართველოს წმინდა საგარეო ვალმა, 2019 წლის 31 მარტის მდგომარეობით, 10.4 მლრდ აშშ დოლარი (28.1 მლრდ ლარი) შეადგინა, რაც ბოლო ოთხი კვარტლის მშპ-ს 64.4 პროცენტია. აქედან, სახელმწიფო სექტორის წმინდა საგარეო ვალი 3.9 მლრდ აშშ დოლარია (10.6 მლრდ ლარი), რაც მშპ-ს 24.2 პროცენტია.

2019 წლის პირველ კვარტალში საქართველოს ეროვნული ბანკის საგარეო ვალი 7.2 მლნ აშშ დოლარით გაიზარდა. აქედან, ოპერაციული ცვლილებების გამო გამო ეროვნული ბანკის საგარეო ვალდებულებები 8.0 მლნ აშშ დოლარით გაიზარდა, ხოლო საკურსო ცვლილების გამო, ვალი 0.8 მლნ აშშ დოლარით შემცირდა.

„მთლიანი საგარეო ვალის სტატისტიკა ჰარმონიზებულია საგადასახდელო ბალანსთან. იგი მოიცავს სახელმწიფო (სამთავრობო სექტორი, სახელმწიფო საწარმოები და ეროვნული ბანკი) და კერძო სექტორის (საბანკო და სხვა სექტორები) საგარეო ვალს. საგარეო ვალის სტატისტიკა წარმოებულია საერთაშორისო სავალუტო ფონდის მიერ შემუშავებული მეთოდოლოგიის, „საგარეო ვალის სტატისტიკა, სახელმძღვანელო შემდგენელთათვის და მომხმარებლებისათვის” – 2003, შესაბამისად“ – აცხადებს სები.

2019 წლის 27 ივნისის მდგომარეობით ლარი დოლართან 3.2 თეთრით, ევროსთან კი 4 თეთრით გაუფასურდა – სავალუტო ვაჭრობის შედეგად ერთი აშშ დოლარის ოფიციალური ღირებულება 2.87 ლარი, ხოლო ერთი ევროს ფასი 3.27 ლარია.

https://netgazeti.ge/news/376375/