„ამ გამოდევნებას თუ არ დაანებებთ თავს, მე გეუბნებით თქვენ, რომ ვითხოვ, აკრედიტაცია შეგიჩერონ… მეჩქარება, უნდა დავჯდე, თავმჯდომარე უნდა ვიყო, საკითხები მაქვს მოსამზადებელი“ – ასე მიმართა აჭარის საზოგადოებრივი მაუწყებლის ჟურნალისტს, ნინო ხოზრევანიძეს, გია ვოლსკიმ, პარლამენტის ვიცე-სპიკერმა, საპარლამენტო უმრავლესობის ლიდერმა. მისი გაღიზიანება გამოიწვია ჟურნალისტის მიერ კითხვის დასმის მცდელობამ, ბათუმში მეჩეთის აშენებასთან დაკავშირებით ბიძინა ივანიშვილის გაცხადებული პოზიციის შესახებ.
„მე გესაუბრებით და თითქოს თქვენ ჯინაზე მიღებთ, მერე თუ გნებავთ გიპასუხებთ“ – უთხრა გია ვოლსკიმ ჟურნალისტს.
მანამდე კი ვოლსკი გააღიზიანა აჭარის საზოგადოებრივი მაუწყებლის ჟურნალისტის კითხვამ – რატომ არ აძლევენ მუსლიმ თემს მეჩეთის მშენებლობის საშუალებას.
„უკვე გადაწყვიტეთ, რომ ჩვენ არ ვაძლევთ? გირჩევთ, როგორც ჩემ ახალგაზრდა მეგობარს, და მე ამას ტყვილა არ ვამბობ, პოლიტიკური ინსინუაციების ჩამოკიდებას თქვენ კითხვებზე დაანებეთ რა თავი… ქართულ მუსლიმ თემს აქვს საგანგებო დამსახურება ჩვენი ქვეყნის წინაშე, ყველანაირად, გინდა ერთგულებით, გინდა თავგანწირვით და ისტორია შეგვიძლია ამაზე მოვყვეთ. მეორე საკითხი არის ის თემა, რასაც ჰქვია საზოგადოების კონსენსუსის აუცილებლობა, ვინაიდან მეჩეთებთან და ჯამეებთან დაკავშირებით, ქართველ მუსლიმთა უფლებებთან დაკავშირებით საქართველოში შეკითხვები არ არსებობს.
აქედან გამომდინარე, არიან ადამიანები, საზოგადოების ერთი გარკვეული ნაწილი, რომელიც მიიჩნევს, რომ პრობლემაა თვითონ ხელოვნური და ამან შეიძლება დაძაბულობა გამოიწვიოს. ამ იდეის მხარდამჭერი მუსლიმ თემშიც არსებობს, რომ საზოგადოებრივი წესრიგი, კონსენსუსი არის მათთვის მნიშვნელოვანი. ასე რომ ამ თემის გაღვივება, წამოწევა, გამწვავება, რასაკვირველია არის ის, რასაც ჩვენ ოპონენტები ყოველთვის შეეცდებიან. ვფიქრობ, საზოგადოებრივი კონსესუსის მომზადება, საზოგადეობის მომზადებაა ამისთვის მნიშვნელოვანად საჭირო, რომ ეს გადაწყდეს“ – განაცხადა გია ვოლსკიმ.
