Batumelebi

ოფიციალური მონაცემებით, რომელიც „ბათუმელებმა“ ახლახან გამოითხოვა, 2012 წლიდან დღემდე საქართველოში სულ 2 971 საქმეზე შედგა იძულებითი აღსრულება. ეს იმას ნიშნავს, რომ ბოლო შვიდი წლის განმავლობაში უსახლკაროდ სწორედ ამდენი ოჯახი დარჩა.

იძულებით გამოსახლების ყველაზე მაღალი მაჩვენებელი 2018 წელს იყო – 700 ოჯახი.

აღსრულების ეროვნული ბიუროს მიერ მოწოდებული საჯარო ინფორმაციის მიხედვით, წელს, მაისის ჩათვლით, იძულებით 261 ოჯახი უკვე გამოასახლეს საცხოვრებლიდან.

იძულებითი აღსრულება წლების მიხედვით:

[checklist]

• 2018 წელი – 700 ოჯახი
• 2017 წელი – 579 ოჯახი
• 2016 წელი – 246 ოჯახი
• 2015 წელი – 373 ოჯახი
• 2014 წელს – 298 ოჯახი
• 2013 წელს – 233 ოჯახი
• 2012 წელი – 181 ოჯახი

[/checklist]

აღსრულების ეროვნული ბიუროს 2019 წლის დარჩენილ პერიოდში უკვე 181 მიმდინარე საქმე აქვს. არ არის გამორიცხული ამ საქმეების რაოდენობა ისევ გაიზარდოს.

სტანდარტულ ინფორმაციას ბათუმი-თბილისის მატარებელში ვეღარ მოისმენთ. ინფორმაცია უკვე მხოლოდ ქართულ და ინგლისურ ენებზე ცხადდება.

„საქართველოს რკინიგზის“ ამ სიახლის შესახებ „ბათუმელებს“ ერთ-ერთმა მგზავრმა შეატყობინა.

„ეს გადაწყვეტილება რკინიგზამ ოთხი თვის წინ მიიღო,“ – ირწმუნებიან „საქართველოს რკინიგზის“ პრესცენტრში. პრესცენტრის ინფორმაციით, რუსულ ენაზე ინფორმაციის გამოუცხადებლობა არ უკავშირდება 20 ივნისის მოვლენებს და ოკუპაციის წინააღმდეგ მიმდინარე საპროტესტო აქციებს. პრესცენტრში ვერ გვითხრეს, რატომ ცხადდებოდა მანამდე ინფორმაცია რუსულ ენაზე  და რის გამო მიიღეს ეს გადაწყვეტილება რკინიგზაში.

მიუხედავად საქართველოს რკინიგზის პრესცენტრის განცხადებისა, ადამიანებმა, რომლებმაც ბათუმი-თბილისის მატარებლით მაისსა და ივნისის დასაწყისში იმგზავრეს, გვითხრეს, რომ ინფორმაცია სამ ენაზე მოისმინეს: ქართულ, რუსულ და ინგლისურ ენებზე. კონკრეტულად 4 ივნისს ბათუმიდან თბილისისკენ მოძრავ მატარებელში ინფორმაცია სამ ენაზე გამოცხადდა.

ერთი თვე გავიდა მას შემდეგ, რაც აჭარის მთავრობის თავმჯდომარემ ტურიზმის სფეროს წარმომადგენლების შენიშვნები მოისმინა ბათუმში და არა მარტო ამ ქალაქში, ტურისტულ ინფრასტრუქტურასთან დაკავშირებით. შეხვედრაზე, რომელიც სასტუმრო „რედისონში“ შედგა,  გიდები საუბრობდნენ იმაზე, რომ ქალაქის ღირსშესანიშნაობები, რომლებიც დატანილია ტურისტულ რუკაზე და რომელთა სანახავადაც მიჰყვათ ტურისტები, ისე არ გამოიყურება, როგორც სარეკლამო ბუკლეტზე.

მაგალითად, ერთ-ერთი ასეთი ობიექტი „ალი და ნინო“, ღამით გაუნათებელია. „მოძრაობს ნელა და მეტალიც გასაწმენდია“, – ამბობდნენ გიდები.

მოუწესრიგებელია ნავსადგურთან არსებული „ჭაჭის თაუერიც“, რომელმაც თავდაპირველი ფუნქცია დიდი ხანია დაკარგა. ჭაჭის თაუერში არც ჭაჭაა და კარებიც დაკეტილია. კოშკის ირგვლივ  არც შადრევნები მუშაობს. ქალაქის სასეირნო ზოლში მდებარე შენობის ღიობები კი სანაგვედ არის ქცეული.

დიდი ხანია არ ფუნქციონირებს ქალაქის ცენტრალურ ნაწილში, დრამატული თეატრის წინ განთავსებული ნეპტუნის შადრევანიც. შესაბამისად, შადრევანში წყალი არ არის და არც ღამის განათებებია ჩართული.

ბათუმში ტურისტული სეზონი ოფიციალურად 15 ივნისს გაიხსნა. რა შეიცვალა სეზონის გახსნის შემდეგ და მოაგვარა თუ არა მერიამ ამ ობიექტებთან დაკავშირებული პრობლემები? „ბათუმელები“ ამის გასარკვევად ბათუმის მერიის საქალაქო ინფრასტრუქტურისა და კეთილმოწყობის სამმართველოს დაუკავშირდა, სადაც განაცხადეს, რომ ნეპტუნის შადრევანზე სარეაბილიტაციო სამუშაოები დასრულდა და მისი ჩაბარება 15 დღეში იგეგმება.

„გლუვი გამოიცვალა და დაემატა რვა რქოვანა, შადრევნის შიგნით კაბელები შეიცვალა, განახლდა იზოლაცია, ეს ყველაფერი დაჯდა 102 ათასი ლარი. შესრულებულ სამუშაოებს მალე ჩავიბარებთ“, – გვითხრეს სამმართველოს პრესსამსახურში.

რაც შეეხება ჭაჭის თაუერს, ბათუმის მერიაში აცხადებენ, რომ თაუერთან დაკავშირებით, ჯერჯერობით, რაიმე ცვლილება ჯერ-ჯერობით არ იგეგმება.

„ალი და ნინო“ ბათუმის ბულვარის ბალანსზეა. ბულვარის დირექტორი ირაკლი ჯინჭარაძე ამბობს, რომ სკულპტურის განათებასთან დაკავშირებული პრობლემა წელს მოგვარდება, თუმცა სკულპტურის მოძრაობა ვერ აჩქარდება.

„ჩვენ დიდი ხანია გვაქვს მიმოწერები გერმანელ სპეციალისტებთან, რომლებმაც თავის დროზე დაამონტაჟეს ეს ქანდაკება. როგორც ისინი გვიხსნიან, ამ ორი ქანდაკების ერთმანეთში გადასვლის დრო ვერ ჩამოვა 10 წუთზე, რადგან პროექტით 20-წუთიანი ინტერვალია გათვალისწინებული. ჩვენ შეგვიძლია დავაპროგრამოთ ათ წუთზეც, თუმცა ეს ძეგლის მიმართ იქნება არასწორი მოქცევა, რადგან ტექნიკური ინჟინრის რეკომენდაციაა, რომ  მოძრაობის დაჩქარება ქანდაკების დეფორმაციას გამოიწვევს“, – ამბობს ირაკლი ჯინჭარაძე.

რაც შეეხება განათებას, ირაკლი ჯინჭარაძის თქმით, გერმანელი სპეციალისტები 20 ივლისისთვის აპირებენ ჩამოსვლას და განათებას თვითონ დაამონტაჟებენ. „ეს ის ინჟინერია, რომელმაც განათება 2010 წელს დააპროექტა თამარ კვესიტაძესთან ერთად. განათების განახლება 7 ათასი ევრო ჯდება და თანხის პრობლემა არ არის, ველოდებით სპეციალისტს და ეს საკითხი მოგვარდება“, – გვეუბნება ბულვარის დირექტორი.

ბათუმმა 9 ივლისს, „World Travel Awards“-ის ჯილდო მიიღო პორტუგალიაში, როგორც ევროპის სწრაფად მზარდი ტურისტული მიმართულების ქალაქმა.

აჭარის მუნიციპალიტეტების საკრებულოებში ფრაქციების ინიციატივების რაოდენობა შემცირდა – „საერთაშორისო გამჭვირვალობა – საქართველო“ კვლევის ანგარიშს აქვეყნებს, რომელიც 2017 წლის ნოემბრიდან 2019 წლის თებერვლამდე პერიოდს მოიცავს.

კვლევის შედეგად გამოიკვეთა, რომ 2017-2018 წლებში უშუალოდ ფრაქციების და ფრაქციათა ინიციატივების რაოდენობამ საგრძნობლად იკლო 2014-2016 წლების საკვლევ პერიოდთან შედარებით. 2014-2016 წლებში 35 ფრაქცია ფუნქციონირებდა, ხოლო 2017-2018 წლებში – 29, შემცირდა ინიციატივების რაოდენობაც – 38-დან 33-მდე.

• საანგარიშო პერიოდში ხელვაჩაურის, ხულოსა და შუახევის საკრებულოებში რეგისტრირებულ 16 ფრაქციას არც ერთი ინიციატივა არ წარუდგენია.
• ბათუმის საკრებულოში წარდგენილია 25 ინიციატივა
• ქედის საკრებულოში – 6
• ქობულეთის საკრებულოში – 2

წარდგენილი 33 ინიციატივიდან, 14 ოპოზიციურ ფრაქციებს ეკუთვნოდა. ოპოზიციური ფრაქციების ინიციატივების გაზიარების სტატისტიკური მაჩვენებელი დაბალია – ოპოზიციური ფრაქციის ინიციატივას მხარი მხოლოდ ქედის საკრებულოს უმრავლესობამ დაუჭირა.

„ფრაქციათა ინიციატივების რაოდენობის კლება განსაკუთრებით საყურადღებოა იმის გათვალისწინებით, რომ კანონმდებლობაში შეტანილი ცვლილებებით, 2017 წლის დეკემბრიდან ფრაქციის თავმჯდომარის მოადგილეობაც ანაზღაურებადი თანამდებობა გახდა. ცვლილების ინიციატორი კანონმდებლების ერთ-ერთი არგუმენტი სწორედ ის იყო, რომ ახალი თანამდებობის დაწესებას ფრაქციების გააქტიურება და ეფექტიანობის ზრდა უნდა მოჰყოლოდა, თუმცა როგორც წინამდებარე კვლევამ აჩვენა, ეს მოლოდინი არ გამართლდა,“ – აღნიშნულია კვლევაში.

2017-2018 წლების საკვლევი პერიოდის განმავლობაში ფრაქციების თანამდებობის პირების (ფრაქციის თავმჯდომარე, თავმჯდომარის მოადგილე) სახელფასო ანაზღაურებაზე ჯამში 1, 394, 635. 23 ლარია დახარჯული.

„უარყოფითად შეიძლება შეფასდეს ის გარემოებაც, რომ წარდგენილი ინიციატივების უმრავლესობა ეხება არა მუნიციპალური სერვისების გაუმჯობესებისა და თვითმმართველობის აღმასრულებელი ორგანოების მუშაობის კონტროლის გაძლიერების მოთხოვნას, არამედ უმეტესწილად ადმინისტრაციული დატვირთვის საკითხებზეა ფოკუსირებული.

ამასთან, ძალიან დაბალია საკრებულოების მოქმედი უმრავლესობების მიერ ოპოზიციური ფრაქციების ინიციატივების გაზიარების მაჩვენებელი. ასეთი ტენდენცია არასასურველ გარემოს ქმნის ადგილობრივი დემოკრატიის გასაძლიერებლად და პოლიტიკურ ძალებს შორის თანამშრომლობის პრაქტიკის შესაქმნელად.

მნიშვნელოვანია, რომ ფრაქციის საქმიანობა სარგებლის მომტანი იყოს თვითმმართველობისათვის. ის ორიენტირებული უნდა იყოს მუნიციპალური სერვისების ხელმისაწვდომობის და ხარისხის გაზრდაზე. ფრაქციები მნიშვნელოვანი კომპონენტია თვითმმართველობაში მოქალაქეთა ჩართულობის ხარისხის გასაზრდელად, ადგილობრივი ინიციატივების მხარდასაჭერად და მოქალაქეთა პრობლემების გადასაჭრელად. შესაბამისად, მოვუწოდებთ ფრაქციებს, აღნიშნული ინსტრუმენტები აქტიურად გამოიყენონ.“ – ვკითხულობთ „საერთაშორისო გამჭვირვალობა – საქართველოს“ რეკომენდაციებში.

_______

ფოტოზე: ბიუროს სხდომა ხულოს საკრებულოში. ფოტო: ფეისბუქგვერდი

ბათუმში ე.წ. ბარცხანის ხიდის სარეაბილიტაციო პროექტში, რომელიც ქალაქის მერიამ 2016 წელს 25 ათას ლარად შეისყიდა, ცვლილებებია შესატანი. ამ ცვლილებების გარეშე კი, როგორც ბათუმის საქალაქო ინფრასტრუქტურისა და კეთილმოწყობის სამმართველო აცხადებს, ხიდზე სარეაბილიტაციო სამუშაოები ვერ დაიწყება. ამასთან, ბარცხანის ხიდის „არსებული მდგომარეობა იმდენად მძიმეა, რომ ხიდზე სარეაბილიტაციო სამუშაოების ჩატარება ძალზე კვალიფიციურობას მოითხოვს“.

ამ ხიდის სიგრძე 366,3 მეტრია და მასზე ინტენსიური [მათ შორის სატრანზიტო] მოძრაობაა. ხიდის სავალი ნაწილი ხშირად ზიანდება, იქმნება ავარიული სიტუაციები, მწყობრიდან გამოდის ავტომანქანები.

არსებული პროექტითა და ხარჯთაღრიცხვით ინფრასტრუქტურისა და კეთილმოწყობის სამმართველომ ხიდის რეაბილიტაციაზე ტენდერი 2019 წელს ორჯერ გამოაცხადა, თუმცა არც ერთი არ შედგა. ტენდერებში, რომლებშიც საწყისი თანხა 778 140 ლარი იყო, მონაწილეობა არავინ მიიღო. პროექტში ცვლილების შეტანას კი, სამმართველოს გათვლებით, 5 000 ლარი დასჭირდება.

„პროექტის ავტორთან ინფორმაციიის გაცვლის შემდეგ გამოიკვეთა შემდეგი: პროექტი საჭიროებს როგორც ტექნიკური პირობების ცვლილებას, ასევე, საბაზრო ფასებთან შესაბამისობას. აღნიშნულიდან გამომდინარე საპროექტო ორგანიზაციასთან მიმოწერის შედეგად დადგინდა, რომ შპს „საქგზამეცნიერებას“ სპეციალისტები გამოთქვამენ თანხმობას მათ მიერ შედგენილი პროექტის კორექტირება-რედაქტირებაზე, ვინაიდან ეს მათი ექსკლუზიური უფლებაა, მხოლოდ მათ შეუძლიათ შეცვალონ ეს პროექტი“, – აღნიშნულია ბათუმის ინფრასტრუქტურისა და კეთილმოწყობის სამმართველოს განაცხადში.

საპროექტო დოკუმენტაციაში ცვლილებების შეტანას მინიმუმ ერთი თვე დასჭირდება. შესაბამისად, დროში გადაიწევს სატენდერო პროცედურები, ხოლო ბარცხანის ხიდზე შესასრულებელი სამუშაოების ღირებულება, დიდი ალბათობით, გაიზრდება.

„გთხოვთ, კანონმდებლობით დადგენილი წესით მოგვცეთ თანხმობა გამარტივებული შესყიდვის საშუალებით (ექსკლუზიური უფლებამოსილება) გავაფორმოთ ხელშეკრულება შპს „საქგზამეცნიერებასთან“, ვინაიდან მხოლოდ ამ მიმწოდებელს შეუძლია განახორციელოს ეს ცვლილებები, როგორც პროექტის ავტორმა“, – აღნიშნულია ინფრასტრუქტურისა და კეთილმოწყობის სამმართველოს მიერ შესყიდვების სააგენტოში გაგზავნილ წერილში. ამ წერილის სააგენტოში განხილვის ბოლო ვადა 2019 წლის 4 ივლისია.

ამ თემაზე:

ბარცხანის ხიდზე რეაბილიტაციის დროს ავტომანქანები ერთ ზოლში იმოძრავებენ

See more

„მერიის ყოფილი მაღალჩინოსნების საქმეში“ შესაძლოა ბევრი რამ შეიცვალოს, თუკი ხვალ, 2 ივლისს, თბილისის საქალაქო სასამართლო ბათუმის მერიის სარჩელის განხილვას დაასრულებს. ბათუმის მერია „ბაზისბანკს“ ზიანის ანაზღაურებას სთხოვს „იაფი სახლის“ გამო. ეს ის სახლია, რომელიც ვერ აშენდა ბათუმში.

„იაფი სახლის საქმის“ გამო დააკავეს 30 მაისს 7 მაღალჩინოსანი – პროკურატურა დაკავებულებს, მათ შორის, ბათუმის ყოფილ მერს, გია ერმაკოვს, მილიონ 370 ათასი ლარის გაფლანგვას ედავება. ბათუმის სასამართლოში მიმდინარე ამ სისხლის სამართლის საქმის პარალელურად კი, თბილისის საქალაქო სასამართლომ უნდა შეაფასოს, რამდენად სამართლიანად გასცა თავის დროზე, ანუ 2016 წელს საბანკო გარანტიის დადასტურება „ბაზისბანკმა“. თუ გაირკვა, რომ „ბაზისბანკმა“ არასწორად დაადასტურა საბანკო გარანტიის ნამდვილობა, ზიანის ანაზღაურებაც მას მოუწევს, რასაც ახლა მაღალჩინოსნებს ედავებიან.

ეს ამბავი 2015 წელს დაიწყო, როცა ბათუმის მერიამ „იაფი სახლის“ მშენებლობა წამოიწყო და ტენდერი გამოაცხადა. მაშინ ტენდერი „კონვენტ ჯორჯიამ“ მოიგო. მას 4 მილიონ 279 ლარად უნდა აეშენებინა „იაფი სახლი“ ბათუმში. ხელშეკრულების გაფორმებამდე და ავანსის ჩარიცხვამდე ბათუმის მერიამ ტენდერში გამარჯვებულ კომპანიას საბანკო გარანტია და მისი დადასტურება მოსთხოვა. ტენდერში გამარჯვებულ კომპანიას საბანკო გარანტია ბრიტანულმა Point Bank-მა მისცა, „ბაზისბანკმა“ კი  – ავიზირება ანუ დადასტურება.

დავის საგანი ახლა „ბაზისბანკის“ მიერ 2016 წელს გაცემული ავიზირების დოკუმენტია, რომლითაც Point Bank-ის საბანკო გარანტიის ნამდვილობა დასტურდება. მას შემდეგ, რაც „კონვენტ ჯორჯიამ“ მერიისგან ავანსად გადარიცხული მილიონ 430 ათასი ლარი აიღო, სახლი არ ააშენა და გაუჩინარდა, ბათუმის მერიამ აღმოაჩინა, რომ საბანკო გარანტიის გამცემი ბანკი არ ყოფილა.

„დადასტურდა, რომ ეს Point Bank-ი არათუ ბანკი, არამედ სამეწარმეო საქმიანობის მქონე ორგანიზაციაც კი არასდროს ყოფილა, იგი 2006 წელს არის დაფუძნებული… „ბაზისბანკს“ თავის დროზე რომ ეთქვა, რომ ეს ბანკი რეალურად არ არის, ან ვერ გაარკვია, ბანკია თუ არა, ეს არ მოხდებოდა – აღარ გააფორმებდა მერია ხელშეკრულებას იმ კომპანიასთან, ვინც ტენდერი მოიგო,“ – აცხადებს ვახტანგ გედენიძე, ბათუმის მერიის იურისტი.

Point Bank-ი რომ ბანკი არ არის, ეს ბათუმის მერიის მიერ დაქირავებულმა ბრიტანულმა კომპანიამ „ფლექსიჯობსმა“ 2017 წელს დაადგინა. ამ კომპანიის დასკვნის მიხედვით, Point Bank – ს „არააქტიური კომპანიის კოდი აქვს“ და „არ ეწევა არანაირ სამეწარმეო საქმიანობას“.

მერიის საპასუხოდ, „ბაზისბანკი“ სასამართლოს შესაგებელში აღნიშნავს, რომ ავიზირების პროცესში მას არ დაუდგენია, ჰქონდა თუ არა საბანკო ლიცენზია Point Bank-ს.

„ბაზისბანკს“ არ მოეთხოვებოდა, არც მოუკვლევია და, შესაბამისად, არც ბენეფიციარისთვის დაუდასტურებია, ფლობდა თუ არა Point Bank-ი საბანკო საქმიანობის ლიცენზიას, რადგან გარანტიების ავიზირების პროცესში „ბაზისბანკს“ ევალებოდა და განახორციელა კიდეც მხოლოდ SWIFT-ით მიღებული შეტყობინებების ავთენტურობის დადასტურება და ადრესატისთვის მისი უცვლელად და სრულად გადაცემა“, – წერია „ბაზისბანკის“ შესაგებელში.

„ბაზისბანკი“ შესაგებელში განმარტავს, რომ მან ავიზირების პროცესში SWIFT – ის, ანუ საერთაშორისო სავაჭრო-სამრეწველო პალატის მიერ უნიფიცირებული წესების შესაბამისად იმუშავა. SWIFT -ის სისტემით „ბაზისბანკი“ უკრაინული credit Dnepr Bank-ს დაუკავშირდა. აქვე წერია, რომ უკრაინულმა ბანკმა საბანკო გარანტიის ნამდვილობის შესახებ ინფორმაცია მოსკოვში დაფუძნებული Rico Trust-გან მიიღო, რუსულმა ბანკმა კი, მიიღო დადასტურება Point Bank-ისგან.

სასამართლოს შესაგებელში არ წერია, რატომ ვერ დაუკავშირდა უშუალოდ „ბაზისბანკი“ Point Bank-ს, რომელმაც საბანკო გარანტია მისცა კომპანიას, რომელსაც ბათუმში „იაფი სახლი“ უნდა აეგო.

„რატომ არ გამოჩნდა ამ სისტემაში ის, რომ Point Bank-ი ბანკი არ არის, არ ვიცი… როგორც ვიცი, არსებობს კონკრეტული გასაღები, რითაც ამოწმებენ კონკრეტული ბანკის მონაცემებს. „ბაზისბანკი“ ამბობს, რომ მას არაფრის ნამდვილობის დადგენა არ ევალებოდა. შემდეგ გვწერს, რომ ამ უკრაინული ბანკის ნამდვილობა დაადგინა. ჩვენთვის ამოსავალია საბანკო გარანტიის ნამდვილობა. ნამდვილობა კი ნიშნავს იმას, რომ გარანტია გაცემული იყოს ბანკის ან საფინანსო ინსტიტუტების მიერ. „ბაზისბანკმა“ ისე გააკეთა ავიზირება, რომ ეს არ გაურკვევია,“ – აღნიშნავს ბათუმის მერიის იურისტი, ვახტანგ გედენიძე.

რას გულისხმობს ავიზირება, რაზეც მხარეები სასამართლოში დავობენ? – კანონმდებლობაში ეს ტერმინი და არც საბანკო გარანტიის ნამდვილობის დადასტურება არ გვაქვს. იურისტებმა გვითხრეს ისიც, რომ მსგავსი დავა აქამდე სასამართლოში არ ყოფილა და ამ კუთხით პრეცედენტული იქნება სასამართლოს გადაწყვეტილება.

„ბაზისბანკი“ სასამართლო შესაგებელში წერს: „ავიზირება გულისხმობს მეავიზის [ანუ შეტყობინების მიმღები მხარის] ან მეორე მეავიზე მხარის მიერ საერთაშორისო ბანკთაშორისო საფინანსო სატელეკომუნიკაციო არხის SWIFT-ის საშუალებით მიღებული ავიზირების შეტყობინებების [გარანტიების] გადაცემას იმავე შეტყობინებაში მითითებული ადრესატისთვის ყოველგვარი დამატებითი ვალდებულებების აღების გარეშე…“

ბათუმის მერიის იურისტი კი, იშველიებს ერთ-ერთ სამეცნიერო ნაშრომს – ნინო ჭიპაშვილის „საბანკო გარანტია საქართველოს კანონმდებლობისა და საერთაშორისო უნიფიცირებული წესების მიხედვით“, სადაც წერია: „ავიზირების მხარე ატყობინებს ბენეფიციარს, რომ გარემოების შესაბამისად ის ნათლად დარწმუნდა გარანტიის ნამდვილობაში და რომ გაგზავნილი შეტყობინება ზუსტად ასახავს იმ გარანტიას, რაც მიიღო ავიზირების გამცემმა…“

როგორია ამ ყველაფერზე ეროვნული ბანკის პოზიცია, რომელიც ადგენს წესებს კომერციული ბანკებისთვის?

„ტერმინი „ავიზირება“ სამართლებრივ დონეზე არ არის განმარტებული ქართულ კანონმდებლობაში და საქართველოს ეროვნული ბანკის ნორმატიულ აქტებში. შესაბამისად, საბანკო სექტორში ავიზირება ხორციელდება უშუალოდ კომერციული ბანკების მიერ მოქმედი პრაქტიკის და გამოცდილების მიხედვით,“ – აღნიშნულია ეროვნული ბანკის წერილში, რომელიც ასევე დევს სასამართლო საქმეში.

„ჩვენ გამოვითხოვეთ ინფორმაცია სხვადასხვა კომერციული ბანკისგან. მოგვწერეს და სასამართლოსაც დაუდასტურეს, რომ ავიზირების პროცესში, პირველ რიგში, ადგენენ ბანკის ნამდვილობას. ზოგიერთი ბანკი ავიზირების პროცესში ადგენს საბანკო გარანტიის გამცემი ბანკის რეიტინგსაც,“ – დასძენს ბათუმის მერიის იურისტი.

საბანკო გარანტიის ნამდვილობის დამოწმება „ბაზისბანკს“ „კონვერტ კორჯიამ“ სთხოვა. უცნობია, რა დაუჯდა ეს კომპანიას.

რატომ იხდის კომპანია ფულს ავიზირებაში, თუკი ამ დოკუმენტის არსებობის მიუხედავად, საბანკო გარანტიის გამცემი შესაძლოა ბანკი საერთოდ არ აღმოჩნდეს? – ამ და სხვა კითხვებით „ბაზისბანკს“ მივმართეთ, სადაც განმარტებებს დაგვპირდნენ. ჩვენ პასუხის მიღებისთანავე გაგაცნობთ „ბაზისბანკის“ პოზიციას.

თბილისის საქალაქო სასამართლოს ბათუმის მერიამ „ბაზისბანკის“ წინააღმდეგ სარჩელით 2018 წლის 5 ნოემბერს მიმართა.

პირველი ივლისიდან გარკვეული კატეგორიის მოქალაქეებისათვის პირადობის ელექტრონული მოწმობის უფასოდ გაცემის აქცია დაიწყო.

2020 წლის პირველ ნოემბრამდე პირადობის მოწმობის უსასყიდლოდ მიღება შეუძლიათ პირებს, თუ:

• მათ სახელზე 2019 წლის პირველ ივლისამდე საქართველოს მოქალაქის პირადობის დამადასტურებელი არც ერთი დოკუმენტი არ ყოფილა გაცემული;
• მათზე გაცემული პირადობის დამადასტურებელი ყველა დოკუმენტი 2019 წლის პირველ ივლისამდეა გაუქმებული ან უქმდება 2020 წლის პირველ ნოემბრამდე;
• პირადობის დამადასტურებელი დოკუმენტების ფოტოსურათები გამოუსადეგარია (უხარისხოა) ან საერთოდ არ ინახება სააგენტოს მონაცემთა ელექტრონულ ბაზაში;
• რეგისტრაციიდან არიან მოხსნილნი, გაუქმებული აქვთ პირადობის მოწმობა და აქციის ფარგლებში დარეგისტრირდებიან კორექტულ მისამართზე;
• მისამართის გარეშე არიან რეგისტრირებულნი, აქვთ გაუქმებული პირადობის მოწმობა და დარეგისტრირდებიან კონკრეტულ მისამართზე;
• რეგისტრირებულნი არიან საქართველოს ოკუპირებულ ტერიტორიაზე და არ ფლობენ იძულებით გადაადგილებული პირის სტატუსს, ამასთან, გაუქმებული აქვთ პირადობის მოწმობა და დარეგისტრირდებიან საქართველოს კონტროლირებად ტერიტორიაზე არსებულ კონკრეტულ მისამართზე.

აქციით მოსარგებლე საქართველოს მოქალაქეები თავისუფლდებიან როგორც პირადობის მოწმობის, ისე ფოტოსურათის გადაღების საფასურისგან. სურვილის შემთხვევაში საქართველოს ის მოქალაქეები, რომელთაც 2021 წლის პირველ იანვრამდე უსრულდებათ 18 წელი.

მიმდინარე აქციით სარგებლობის მსურველმა მოქალაქეებმა უნდა მიმართონ იუსტიციის სახლებს, სახელმწიფო სერვისების განვითარების სააგენტოს ტერიტორიულ სამსახურებს ან საზოგადოებრივ ცენტრებს. დამატებითი ინფორმაციის მიღება შესაძლებელია სახელმწიფო სერვისების განვითარების სააგენტოს ცხელ ხაზზე: 32 2 40 10 10.

სახელმწიფო სერვისების განვითარების სააგენტოს ცნობით, უკანასკნელი 5 წლის განმავლობაში პირადობის ელექტრონული მოწმობა 3 020 000-ზე მეტ მოქალაქეზე გაიცა, რაც იმას ნიშნავს, რომ პოტენციურ ამომრჩეველთა ბაზები მნიშვნელოვნად გაუმჯობესდა. მასში 3 მილიონზე მეტი დაზუსტებული მონაცემია. მათგან, იუსტიციის მინისტრის ინიციატივით, 1 630 000-მდე პირადობის ელექტრონული მოწმობა გაცემულია უფასოდ ან შეღავათიან ფასად.

ბათუმის მერიის პროექტის – „შენი იდეა ბათუმს“ კონკურსის სამი გამარჯვებული გამოვლინდა.  ერთ-ერთი გამარჯვებული პროექტი „ბათუმის ფრანების ფესტივალია“, რომელმაც ბათუმელებისგან 336 ხმა მიიღო. იდეის ავტორი ლაშა კუკულაძეა.

„Batumi Kite Festival პირველი ფესტივალია საქართველოში, რომელსაც  შავიზღვისპირეთში ანალოგი არ გააჩნია. მსგავსი ფესტივალის ჩატარება საქართველოში არის ახალი კულტურული მოვლენა“, – ნათქვამია იდეის დასაბუთებაში.

ფრანების ფესტივალი პირველად 2018 წელს ჩატარდა. „საზოგადოების მაღალმა აქტივობამ და დადებითმა შეფასებამ გადაგვაწყვეტინა ფესტივალს ყოველწლიური, ტრადიციული ხასიათი მიეცეს“.

ფრანების ფესტივალი ბათუმის ცენტრალური პარკის მიმდებარედ, სანაპიროს ტერიტორიაზე უნდა გაიმართოს აგვისტო-სექტემბერში. „Batumi Kite Festival ორდღიანი ფესტივალია, რომლის დროსაც გაიშვება სხვადასხვა სახის და ზომის კლუბი KiteDreams – ის კუთვნილი 30 000 ლარის ღირებულების 100-მდე ფრანი: გიგანტური ჯადოსნური თევზი, დიდი მეგა ბურთები, დელტები, რვაფეხები, გულები და ა.შ.

იდეის ავტორის თქმით, ფესტივალი ასევე გაფორმებული იქნება სხვადასხვა სახის და ზომის ბანერებითა და დროშებით. „იმისათვის, რომ ფესტივალი უფრო სანახაობრივი გახდეს, აუცილებელია ყოველწლიურად მოხდეს სხვადასხვა ზომისა და დიზაინის ფრანების შეძენა“.

„შენი იდეა ბათუმს“ კონკურსის გამარჯვებული პროექტია „ნატვრის ხე“, რომლის ავტორი თამთა ჯინჭარაძეა. პროექტმა 287 ხმა მიიღო. პროექტის ბიუჯეტი 40 ათასი ლარია. აღწერის მიხედვით, „ნატვრის ხე“ ბათუმის ცენტრალურ პარკში უნდა დაიდგას.

იდეების კონკურსის გამარჯვებულია წარწერა „ბათუმი“, რომელიც იდეის მიხედვით ბათუმგორაზე უნდა განთავსდეს. პროექტის დასაბუთებაში წერია, რომ წარწერის განთავსება „ტურისტებისა და ბათუმელებისთვის ულამაზესი სანახაობა იქნება,  ქართული და ლათინური ასოებით დაწერილი ბათუმი, შუაში ბათუმის ლოგოთი. განსაკუთრებით ღამით“.

ანბანის სიმაღლეს 3,5 მეტრია, ხოლო სიგანე  – 37 მეტრი. იდეის ავტორი თეონა კეშელევაა, იდეამ 352 ხმა მიიღო. პროექტებზე ხმის მიცემა სპეციალურ ვებგვერდზე მიმდინარეობს.

გამარჯვებული პროექტების დამტკიცება დაგეგმილია დღეს პირველ ივლისს, საკრებულოს მრჩეველთა საბჭოს სხდომაზე.

ბათუმში, არდაგანის ტბის დაბინძურების პრობლემა კვლავ მოუგვარებელია. ტბა, წვიმის დროს სანიაღვრე არხებიდან ბინძურდება, ხოლო მშრალ ამინდში დაჭაობებას იწყებს. ტბის დაჭაობების მიზეზი, ამ დრომდე დაუდგენელია და ამ კუთხით მას არავინ იკვლევს.

არდაგანის ტბის ერთადერთი „მეპატრონე“ დღეს „ბათუმის წყალია“, რომლის თანამშრომლები ბადეებით თუ სპეცტექნიკით ტბის ზედაპირს თითქმის ყოველ დღე  წმენდენ შლამისა [მშრალ ამინდში] თუ იმ ნარჩენებისგან, რომელიც ტბაში სანიაღვრე არხებიდან ხვდება [წვიმის დროს].

28 ივნისის წვიმის დროს ტბა, ძირითადად, ჯავახიშვილის ქუჩიდან მომავალი სანიაღვრე არხით დაბინძურდა. ეს არხი მოძველებულია და სარეაბილიტაციო სამუშაოები ახლა მიმდინარეობს. ამ არხის რეაბილიტაცია და ტბასთან სატუმბი სადგურის მშენებლობა, ბათუმის მერიის გეგმით, 2020 წლის მარტში უნდა დასრულდეს.

ამ თემაზე: რა მონაკვეთში გადაიკეტა და როდის აღდგება მოძრაობა სრულად ჯავახიშვილის ქუჩაზე

ჯავახიშვილის სანიაღვრე არხისა და სატუმბი სადგურის მშენებლობის პერიოდში კი ამორტიზებული არხიდან წვიმის წყალი [ნაგავთან ერთად] ღიად ჩაედინება ტბაში.

ბოლო წვიმების დროს ტბაში, როგორც სამშენებლო, ასევე საყოფაცხოვრებო ნარჩენები აღმოჩნდა:

ამ თემაზე:

„დემოკრატიის ინსტიტუტი“, პარტნიორ ორგანიზაციებთან ერთად, წელიწად-ნახევარზე მეტია ახორციელებს „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამას“  საქართველოს ოთხ რეგიონში: აჭარაში, იმერეთში, გურიასა და სამეგრელო-ზემო სვანეთში. პროგრამა გულისხმობს ბენეფიციართა დასაქმების ხელშეწყობას მცირე ბიზნესის წახალისების გზით, ტრენინგ-სემინარებში ჩართვას ინდივიდუალური საჭიროებების მიხედვით, უფასო იურიდიულ კონსულტაციებსა და სამედიცინო დახმარებას, სპორტულ და კულტურულ ღონისძიებებში მონაწილეობას.

პროგრამის მიმდინარებისას ბენეფიციარები აღნიშნავენ, რომ ყველაზე რთული პრობლემა მათთვის დასაქმებაა, თუმცა რამდენიმე მათგანმა პროექტის დახმარებით და მათივე მონდომებით შეძლო დაეძლია არასასიამოვნო დამოკიდებულება, რაც ხშირად საზოგადოებას კანონთან კონფლიქტში მყოფების მიმართ აქვთ – ამ ბენეფიციარებმა საკუთარი საქმე უკვე იპოვეს და ყველა მათგანს მიაჩნია, რომ მიუხედავად ბევრი სირთულისა, რესოციალიზაციის გზაზე მთავარი ძალისხმევაა, რაც აუცილებლად უნდა გამოიჩინონ ყოფილმა პატიმრებმა გათავისუფლების შემდეგ.

62 წლის ფოთოლა ლაგვილავამ საპატიმროში 7 წელი გაატარა და აღკვეთილი თავისუფლების წლები ხელსაქმეს დაუთმო. ახლა ხისგან ჩარჩოებს, სკამებს და საქანელებს ამზადებს, ქარგავს, ქსოვს და თექაზე მუშაობს. ნამუშევრებს ყიდის და ეს მისი შემოსავლის ძირითადი წყაროა, ამბობს, რომ 300-ლარიან სამსახურს ასე შრომა ურჩევნია – მეტსაც გამოიმუშავებს და დროსაც საკუთარი სურვილით ანაწილებს.

ხის დასამუშავებელი დაზგის შეძენაში „ყოფილი პატიმრების გაძლიერების პროექტი“ დაეხმარა. ცხოვრობს რძალთან და შვილიშვილებთან ერთად, პენსიასთან ერთად 62 წლის ყოფილი პატიმრისთვის ხელსაქმე მნიშვნელოვანი ფინანსური სიძლიერეა.

ბორის მაისურაძე 37 წლისაა და საპატიმროში 15 წელი გაატარა. მთელი ეს დრო კინოლოგიური ლიტერატურის შესწავლას მოანდომა და ციხიდან გამოსულს უკვე უამრავი ინფორმაცია ჰქონდა. ცხოველბი ბავშვობიდანვე უყვარდა. გათავისუფლების შემდეგ ცხოველთა თავშესაფარში დაიწყო მუშაობა მოხალისედ, მერე კი კინოლოგი და ძაღლების ინსტრუქტორი გახდა. ახლა მისი საყვარელი საქმიანობა ძაღლების სეირნობა, მათთან თამაში და წვრთნაა.

ბორისი „დემოკრატიის ინსტიტუტის“ ყოფილი პატიმრების გაძლიერების პროექტში ჩართვას აპირებს, რისი საშუალებითაც ის კინოლოგისთვის საჭირო ინვენტარს შეიძენს.

გრიგოლ მახარაძე მუსიკოსია, ციხიდან გათავისუფლების შემდეგ ჰობი – მუსიკა მისთვის პროფესიად იქცა: ხმის ჩამწერი აპარატურა შეიძინა და ოზურგეთში მეგობართან ერთად სტუდია მოაწყო. ოცნებობს საქართველოს სხვადასხვა სოფელსა და რაიონში კონცერტები ჩაატაროს, ზაფხულობით ბათუმის კლუბებშიც იწვევენ მუსიკალურ საღამოებზე, გრიგოლი ამბობს, რომ შეძლო და ახლა იმას აკეთებს რისი კეთებაც სულ უნდოდა.

35 წლის გიორგი თორდია მოპედებითაა გატაცებული, გათავისუფლების შემდეგ ყოფილმა პატიმარმა გადაწყვიტა, სახელოსნო მოეწყო და მოპედები, სკუტერები აეწყო – ეს მისი საყვარელი საქმიანობაა და იმასაც ამბობს, რომ ღამით სიზმარშიც კი მოპედებს ხედავს. გიორგის გაუმართლა და მოპედები საქართველოში სულ უფრო და უფრო პოპულარული ხდება, ამიტომ მომხმარებლები მის სახელოსნოს არ აკლია და საქმე სულ აქვს.

ალექს წეველიძემ მხედველობა ციხეში დაკარგა, 42 წლის უსინათლო ყოფილ პატიმარს ჟოლოსა და კენკრის მეურნეობა აქვს ქობულეთის ერთ-ერთ სოფელში და ,,ყოფილი პატიმრების გაძლიერების პროექტის“ ფინანსურ დახმარებაზე მცირე ბიზნესის წასახალისებლად უარს ამბობს, ფიქრობს, რომ ეს რესურსი მასზე უფრო ამჯერად სხვებს სჭირდებათ.

მიუხედავად იმისა, რომ ალექსი ვერ ხედავს, ახერხებს ყველგან მიმოსვლას, ამაში მეგობრები ეხმარებიან: უსინათლოთა კავშირის ალტერნატიული ორგანიზაცია დააარსა წლების წინ, სადაც არამხოლოდ უსინათლოები არიან გაერთიანებულები.

სპეციალური, ხმოვანი პროგრამების დახმარებით ალექსი შეუფერხებლად სარგებლობს ინტერნეტით, წერს პროექტებს და უვლის მეურნეობას.

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

ბათუმში, ბარგატიონისა და სელიმ ხიმშიაშვილის ქუჩების კვეთაზე, გზა ჩავარდა. ამ ადგილას კომპანია „ევროლუქსი“ 21-სართულიან მრავალფუნქციურ კომპლექსს აშენებს, გზის ჩავარდნა საძირკვლის ამოთხრის პროცესს მოჰყვა.

კომპანია „ევროლუქსში“ გზის ჩავარდნის მიზეზად უამინდობას ასახელებენ.

„აქ არის ჭაობი და სახლის მდგრადობისთვის, საფუძვლის ხარისხისთვის, საჭიროა მთლიანი ჭაობის ამოღება. ჩვენ 9 თვის განმავლობაში ვმუშაობთ და აქამდე არ მომხდარა ჩამოშლა. უამინდობამ და წყალმოვარდნამ გამოიწვია ეს, ვერ გაატარა წყალი ნიადაგმა და მოხდა მისი დამძიმება, რამაც გამოიწვია ჩამოშლა. 9 მეტრი რომ ამოღებული გექნება, საფუძველი, რა თქმა უნდა ჩამოვარდება. თუ გინდა სახლის საფუძველი კარგად გააკეთო, მაშინ უნდა იმუშაო ხარისხიანად. უკვე მოვიტანეთ ნიშნულები, მივიღეთ ბაგრატიონის ქუჩის შეზღუდვის ნებართვა, ჩამოგვაქვს თბილისიდან ნიშნულები, რომლებიც შეზღუდვას გააკეთებენ. ვმუშაობთ ამ ეტაპზეც უსაფრთხოების ნორმების დაცვაზე. მშენებლობაზე სხვა საქმე არ მიმდინარეობს, გარდა უსაფრთხოების ნორმებისა“ – გვითხრა გელა კახიძემ, კომპანია „ევროლუქსის“ წარმომადგენელმა სატელეფონო საუბრისას.

გზის ნაწილი ჩავარდნილია ჰაიდარ აბაშიძის ქუჩაზეც, სადაც კომპანია „DS ჯგუფი“ აწარმოებს მშენებლობას.

ბათუმის მერიის ზედამხედველობის სამსახურში გვითხრეს, რომ ბაგრატიონის ქუჩაზე გზის ჩამოშლასთან დაკავშირებით საქმისწარმოება მიმდინარეობს.

„თითქმის ყოველ დღე დავდივართ მაგ ობიექტზე, ობიექტს არ ვაძლევთ მშენებლობის გაგრძელების საშუალებას. სათამაშო მოედნის დაახლოებით ნახევარი „ევროლუქსის“ საკუთრებაა. პირველ რიგში უსაფრთხოების ღობე უნდა ყოფილიყო, ანუ ადამიანის მოხვედრა იმ ტერიტორიაზე არ შეიძლება. ობიექტის მშნებელობა შეჩერებულია იმ დრომდე, სანამ არ კომპანია არ გამოასწორებს [ხარვეზებს] და სანამ უსაფრთხოება არ იქნება ბოლომდე დაცული“ – გვითხრა ირაკლი მოქიამ, სამშენებლო საქმიანობაზე სახელმწიფო ზედამხედველობის განყოფილების უფროსმა.

რაც შეეხება „DS ჯგუფის“ მშენებლობასთან ჩამოშლილი გზის მონაკვეთს, ირაკლი მოქიას თქმით, ამის შესახებ ინფორმაცია არ აქვს.