14 მილიონი ლარი ბათუმში კომაროვის სკოლისთვის, როდის დაიწყება მშენებლობა


ბათუმში კომაროვის სკოლის მშენებლობა, წინასწარი გათვლებით, დაიწყება მიმდინარე წლის ოქტომბრის ბოლოს და დასრულდება 2020 წლის სექტემბერში – უთხრეს „ბათუმელებს“ საგანმანათლებლო და სამეცნიერო ინფრასტრუქტურის განვითარების სააგენტოში. სამშენებლო სამუშაოების შესყიდვაზე კი ტენდერი გამოცხადდება. სკოლის მშენებლობას 14 მილიონამდე ლარი დასჭირდება.

სააგენტოს ინფორმაციით, ტენდერი, შესაბამისი დოკუმენტაციის მომზადების შემდგომ, 2019 წლის 15-20 სექტემბერის პერიოდში გამოცხადდება დიზაინ ბილდით [ანუ, მიმწოდებელი თავად იქნება პასუხისმგებელი დეტალური პროექტის მომზადებაზე].

წინასწარი გათვლებით, სკოლის მშენებლობისთვის 13-14 მილიონი ლარია საჭირო. თანხის 20%, როგორც სააგენტოში გვითხრეს, გათვალისწინებულია 2019 წლის ბიუჯეტში, ხოლო დარჩენილი თანხა გათვალისწინებული იქნება 2020 წლის ბიუჯეტში.

საგანმანათლებლო და სამეცნიერო ინფრასტრუქტურის განვითარების სააგენტო ამჯერად ატარებს ფასთა კვლევას გენერალური გეგმის დიზაინ-კონცეფციის დასამუშავებლად. ტერიტორია [ორი ნაკვეთი], სადაც სკოლა უნდა აშენდეს, მდებარეობს ქალაქ ბათუმში სვიშევსკის ქუჩა N1-ში და ჯამში 97 383 კვ.მ-ია.

პრეტენდენტმა სააგენტოს უნდა წარუდგინოს დოკუმენტი, რომელიც აზუსტებს ცალკეული გეგმარებითი ერთეულების განთავსებას და მათ პარამეტრებს, რელიეფის ორგანიზებას, ტერიტორიების კეთილმოწყობასა და გამწვანებას, ასევე საინჟინრო და სატრანსპორტო ინფრასტურქტურით უზრუნველყოფას [ტერიტორიის კეთილმოწყობის პროექტი: სატრანსპორტო და საფეხმავლო კავშირების, ავტოპარკინგის, სათამაშო მოედნების, ღობის, გარე განათების და სხვა ნაწილების დატანით. გეგმები, მცირე არქიტექტურული ფორმები (სკამები, ნაგვის ურნები, განათება და ა.შ); დენდროლოგიური პროექტი; გარე საინჟინრო კომუნიკაციების ქსელის მოწყობის სქემატური ნახაზები, წყლისა და კანალიზაციის წერტილები; გარე განათების პროექტირება; ბუნებრივი აირის ძირითადი და ლოკალური ქსელები და სხვ.].

ამ ეტაპზე მზად მხოლოდ სკოლის ესკიზია.

ამ თემაზე:

როგორი იქნება კომაროვის სკოლა ბათუმში

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com