„კომაროვის სკოლა“ ბათუმში 2020 წლის სექტემბრამდე უნდა აშენდეს – ტენდერი


„კომაროვის სკოლა“ ბათუმში 2020 წლის სექტემბრამდე უნდა აშენდეს. საგანმანათლებლო და სამეცნიერო ინფრასტრუქტურის განვითარების სააგენტომ სკოლის დეტალური პროექტის მომზადებასა და მის საფუძველზე სამშენებლო სამუშაოების შესყიდვაზე ტენდერი უკვე გამოაცხადა.

შესყიდვის სავარაუდო ღირებულება 12 935 915 ლარია დღგ-ს ჩათვლით; შეთავაზების კლების ბიჯი კი – 100 ათასი ლარი.

ტერიტორია [ორი ნაკვეთი], სადაც „კომაროვის სკოლა“ უნდა აშენდეს, მდებარეობს ბათუმში [გოროდოკის დასახლებაში], სვიშევსკის ქუჩა N1-ში და ჯამში, მისი ფართობი 97 383 კვ.მ-ია.

ამონარიდი ესკიზური პროექტიდან

ტენდერში გამარჯვებულმა, ხელშეკრულების გაფორმებიდან 30 დღის ვადაში, სააგენტოში უნდა წარადგინოს ესკიზური პროექტის მიხედვით შედგენილი შენობის კონსტრუქციული პროექტი; სრულყოფილი საპროექტო დოკუმენტაცია კი – 60 დღის ვადაში.

ტენდერის მიხედვით, პრეტენდენტს საქართველოს ტერიტორიაზე ან/და სხვა ქვეყნის ტერიტორიაზე [გარდა იმ ქვეყნის ტერიტორიისა, სადაც რეგისტრირებულია პრეტენდენტი] 2014 წლის პირველი იანვრიდან მოცემულ ტენდერში წინადადებების მიღების დასრულების დღემდე უნდა ჰქონდეს შენობის [არ იგულისხმება გზა, ხიდი, გვირაბი] სამშენებლო-სარეაბილიტაციო სამუშაოების შესრულების გამოცდილება 25 871 830 ლარის ღირებულებით, მათ შორის ერთი ხელშეკრულების ფარგლებში არანაკლებ 12 935 915 ლარის ოდენობით. გარდა ამისა, პრეტენდენტმა უნდა წარადგინოს სხვადასხვა დოკუმენტაცია, რაც მოთხოვნილია სატენდერო კომისიის მიერ.

„კომაროვის სკოლის“ [სსიპ – ვლადიმირ კომაროვის თბილისის ფიზიკა-მათემატიკის N199 საჯარო სკოლის ქ. ბათუმის ფილიალის] დაპროექტება-მშენებლობაზე გამოცხადებულ ტენდერში პრეტენდენტთა წინადადებების მიღება 2019 წლის 3 ოქტომბერს დაიწყება და ამავე წლის 8 ოქტომბერს დასრულდება.

„კომაროვის სკოლა“ ბათუმში / ფოტო ესკიზური პროექტიდან

მთავარი ფოტო: „კომაროვის სკოლა“ ბათუმში / ფოტო ესკიზური პროექტიდან
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com