მთავარი,სიახლეები

“რესპუბლიკურში ჩხუბის საქმეზე” ბრალდებულები სასამართლო დარბაზიდან გაათავისუფლეს

18.09.2019 • 2749
“რესპუბლიკურში ჩხუბის საქმეზე” ბრალდებულები სასამართლო დარბაზიდან გაათავისუფლეს

“რესპუბლიკურში ჩხუბის საქმეზე” დაკავებული ოთხივე ბრალდებული მოსამართლე გიორგი გრატიაშვილმა სასამართლო დარბაზიდან დღეს, 18 სექტემბერს, გაათავისუფლა. მათთან საპროცესო შეთანხმება გააფორმა პროკურატურამ.

ჩხუბი ბათუმის რესპუბლიკურ საავადმყოფოში 2 მარტს მოხდა – დაპირისპირების დროს ორი ადამიანი დანით დაჭრეს.

ეს ის სისხლის სამართლის საქმეა, რომელზეც ჯგუფური ხულიგნობის ბრალდებით ხუთი პირი დააკავეს, თუმცა ის, ვინც ამ კონფლიქტის დროს შეიარაღებული იყო, გირაოს საფუძველზე გაათავისუფლეს და საპროცესო შეთანხმება გაუფორმეს. ოთხი ბრალდებული კი, წინასწარ პატიმრობაში დატოვეს.

ბრალდებულების ახლობლებმა ამ დრომდე სასამართლო პროცესების პარალელურად, რამდენიმე საპროტესტო აქცია გამართეს, გადაკეტეს ჭავჭავაძის ქუჩაც.

“დღეს თუ არ გაფორმდა საპროცესო, ისევ გადავკეტავთ ქუჩას,” – ამბობდნენ დაკავებულების ახლობლები, რომლებმაც სასამართლო დიდი დარბაზი სრულად შეავსეს.

სხდომის დასაწყისშივე მოსამართლეს ადვოკატმა ჯემალ კიკნაძემ უთხრა, რომ ბრალდებულებს განცხადების გაკეთება სურდათ.

დაკავებულების ახლობლები სასამართლოსთან ელოდნენ მოსამართლის გადაწყვეტილებას

დაკავებულების ახლობლები სასამართლოსთან ელოდნენ მოსამართლის გადაწყვეტილებას

“ვაღიარებთ დანაშაულს. ბოდიშს ვუხდით სამედიცინო პერსონალს,” – უთხრეს ბრალდებულებმა მოსამართლეს. აქამდე ისინი ხულიგნობის ფაქტს ადასტურებდნენ, მაგრამ არ აღიარებდნენ მის განზრახ ჩადენას.

საპროცესო შეთანხმების მიხედვით, რეზო წულუკიძეს, დავით ქამადაძეს და ტარზან ქედელიძეს სამი წლით მიუსაჯეს თავისუფლების აღკვეთა, ელდარ ანთაძეს – 3 წლით და 6 თვით. ოთხივე მსჯავრდებულს სასჯელის მოხდა პირობით ჩაეთვალა.

“მიხარია, რომ შეთანხმდით,” – მიმართა მოსამართლემ მსჯავრდებულებს, ვიდრე იგი სხდომის დარბაზს დატოვებდა.

რატომ დათანხმდა პროკურატურა საპროცესო შეთანხმებას და ხომ არ უკავშირდება იგი ამ საქმეზე რამდენიმე თვის წინ ერთ-ერთი ბრალდებულის [ის ცეცხლსასროლი იარაღით იყო შეიარაღებული] გირაოთი გათავისუფლებას და შემდეგ მასთან საპროცესო შეთანხმებას?

ჩხუბის საქმეზე დაკავებული რეზო წულუკიძე

“არა, ამ საქმესთან შემხებლობა არ აქვს დღეს გაფორმებულ საპროცესო შეთანხმებას… შეთანხმება გავაფორმეთ მას შემდეგ, როცა ბრალდებულებმა სრულად აღიარეს ჩადენილი დანაშაული,” – გვითხრა სასამართლო პროცესის დასრულების შემდეგ პროკურორმა ალექსანდრე ძირკვაძემ.

რაც შეეხება გათავისუფლებულ მსჯავრდებულებს, მათ გვითხრეს, რომ საპროცესო შეთანხმებაზე ოჯახური მდგომარეობის გამო წავიდნენ.

“განზრახ ჩადენას არ ვაღიარებდით, მაგრამ ასე მოხდა… ოჯახური მდგომარეობის გამო ასე შევთანხმდით ოთხივე,” – ამბობს რეზო წულუკიძე. იგი ერთ-ერთია, ვინც “რესპუბლიკურში ჩხუბის საქმეზე” წინასწარ პატიმრობაში იყო.

 

 

გადაბეჭდვის წესი


ასევე: