დღეს, 18 სექტემბერს, საავტორო კინოს ბათუმის საერთაშორისო ფესტივალზე კინოთეატრ „აპოლოში“ შემდეგი ფილმები იქნება ნაჩვენები:
12 საათზე – „სამასთვის“, უაად ალ ქათები/ედუარდ უატსი, დიდი ბრიტანეთი/აშშ, 2019; 95 წთ.
„სამასთვის“ ახალგაზრდა ქალის, ვაად ალ კატეაბის ცხოვრების გზას გვაჩვენებს. ის სირიის ქალაქ ალეპოს ხუთწლიანი რევოლუციის განმავლობაში სიყვარულს, ქორწინებასა და დედობას გამოცდის. ომის პერიოდში ქალი არჩევანის წინაშე დგება: გაიქცეს თუ არა ქალაქიდან, რათა თავისი ქალიშვილი გადაარჩინოს, თუმცა წასვლა თავისუფლებისთვის ბრძოლის მიტოვებას ნიშნავს, რისთვისაც მან უკვე ბევრი რამ გაიღო.
14 საათზე – „ჩრდილოეთის სული“, შონ მაკალისტერი, დიდი ბრიტანეთი, 2018; 73 წთ.
ცნობილი დოკუმენტალისტი, შონ მაკალისტერი, მშობლიურ ქალაქ ჰალში ბრუნდება, როგორც „კულტურის ქალაქის“ ღონისძიებათა გახსნითი ცერემონიის დამდგმელი რეჟისორი. მაკალისტერი მოგვითხრობს ქალაქში მომხდარი ცვლილებების შესახებ, რაც საჯარო ხარჯების შემცირებამ და „ბრექსიტმა“ გამოიწვია.
ფოტო: seanmcallister.com
16 საათზე – პუნტო ი რაიას კინოფესტივალის (პოლონეთი) საუკეთესო აბსტრაქტული/ექსპერიმენტული ფილმების კოლექცია 2018 წ. 70წთ.
კოლექცია მოიცავს 2018 წლის 25-28 ოქტომბერს ვროცლავში – CeTA-ში(აუდიოვიზუალური ტექნოლოგიების ცენტრი) ჩატარებული ფესტივალის პროგრამის 18 ფინალისტ და პრიზიორ ფილმს.
18 საათზე – „და იქმნა ნათელი“, მარკო სკოპი, სლოვაკეთის რესპუბლიკა / ჩეხეთი, 2019; 93 წთ.
მილანს სამი შვილი ჰყავს და გერმანიაში მშენებლობაზე მუშაობს, რათა სლოვაკეთში ოჯახი არჩინოს. საშობაოდ სახლში დაბრუნებული მილანი იგებს, რომ მისი უფროსი ვაჟი ადამი პარამილიტარისტული, ახალგაზრდული ჯგუფის წევრია. ბიჭი თანაკლასელის ჩაგვრასა და სიკვდილშია გარეული. მამამ უნდა გადაწყვიტოს, როგორ მოიქცეს. ამ პროცესში, თავის ცოლთან ერთად, სიმართლეს არკვევს ვაჟის, მათი ოჯახის, საკუთარი თავისა და გარშემომყოფი საზოგადოების შესახებ.
20 საათზე – „სატყუარა”, მარკ ჯენკინი, დიდი ბრიტანეთი, 2019; 89 წთ.
შავ-თეთრ, 16 მმ. კამერით გადაღებულ ფილმში მოქმედება თანამედროვე სოფელში ხდება. უკმაყოფილო მეთევზე მარტინს, რომელიც გემის შეძენას ცდილობს, ოჯახურ პრობლემებთან, Airbnb-ისა და ქალაქის წვეულებების შემოტევის გამკლავება უწევს. ზაფხულის სეზონზე ადგილობრივ მოსახლეობასა და ჩამოსულებს შორის დაძაბულობაც მატულობს, რაც ტრაგიკულ შედეგებს იწვევს.
22 საათზე – „ტრანზიტი“, კრისტიან პეტცოლდი, გერმანია/საფრანგეთი, 2019; 101 წთ.
ნაცისტების შეჭრის შემდეგ კაცი საფრანგეთიდან გარბის, ის გარდაცვლილი მწერლის სახელით გადაადგილდება. ფილმის გმირი მარსელში აღმოჩნდება, სადაც ხვდება ახალგაზრდა ქალს, რომელიც დაკარგულ ქმარს ეძებს – სწორედ იმ კაცს, ვისი სახელითაც იგი ცხოვრობს.
კინოჩვენებებზე დასწრება „აპოლოში“ უფასოა, თუმცა დასწრებისთვის საჭიროა წინასწარ ე.წ. „უფასო ბილეთების“ (რაც კონტროლისა და ადგილების დაჯავშნის მექანიზმია) აღება. იმის გათვალისწინებით, რომ “აპოლოში” მხოლოდ 160-მდე ადგილია, დასწრების მსურველებმა უმჯობესია აიღონ უფასო ბილეთები ადგილის რეზერვაციის მიზნით. ერთდროულად შესაძლებელია მხოლოდ 2 დღის კინოსეანსების ბილეთების აღება. „უფასო ბილეთების“ დაჯავშნა შესაძლებელია ცალკეულ კინოჩვენებებზე ინტერნეტითაც. ამისათვის საჭიროა გადახვიდეთ შემდეგ ბმულზე: ბილეთების დაჯავშნა BIAFF 2019.
___________
მთავარ ფოტოზე: კადრი ფილმიდან „ტრანზიტი“. ფოტო: imdb.com
