მოქალაქე გივი კაპანაძე ჯანდაცვის სამინისტროს საკონსტიტუციო სასამართლოში უჩივის. დავის საგანი საქართველოს ჯანდაცვის მინისტრის ბრძანებაა, რომლის მიხედვითაც დეკრეტულ შვებულებაში ანაზღაურებას მხოლოდ ბავშვის დედა იღებს. კანონი ითვალისწინებს ბავშვის მოვლის მიზნით შვებულებას მამაკაცისთვისაც, თუმცა შვებულების ანაზღაურების საფუძველი, ჯანდაცვის მინისტრის ბრძანებით, მხოლოდ საავადმყოფო ფურცელია, რომელსაც ბავშვის დედას აძლევენ. გამონაკლისი მხოლოდ ბავშვის დაბადებისას ქალის გარდაცვალების შემთხვევაა, როცა დახმარებას ბავშვის მამა იღებს ან მეურვე.
დავას არსებითად საკონსტიტუციო სასამართლოს მეორე კოლეგია განიხილავს.
მოსარჩელე გივი კაპანაძემ ანაზღაურებადი შვებულება 2014 წელს ითხოვა, როცა მას მეორე შვილი შეეძინა. ის თბილისის 113-ე საჯარო სკოლაში პროგრამული მენეჯერის პოზიციაზე მუშაობდა. თავდაპირველად მას დეკრეტულ შვებულებაზე სკოლის ადმინისტრაციამ უარი უთხრა, თუმცა სახალხო დამცველის ჩარევის შემდეგ დირექტორი თანამშრომლის შვებულებას დათანხმდა. მაშინ გივი კაპანაძეს სოციალური მომსახურების სააგენტომ შვებულების ანაზღაურებაზე უარი უთხრა.
სოციალური მომსახურების სააგენტოდან გივი კაპანაძეს ასევე მისწერეს, რომ „2011-2016 წლებში არც ერთ ბიოლოგიურ მამას არ უსარგებლია ბავშვის მოვლის გამო ანაზღაურებადი შვებულებით, კერძოდ მხოლოდ 5 შემთხვევაში მამაკაცისთვის გაცემული ანაზღაურებადი შვებულებიდან ერთ შემთხვევაში დახმარება გაიცა ახალშობილის შვილად აყვანის გამო, ხოლო 4 შემთხვევაში იმ საფუძვლით, რომ მშობიარე ქალი გარდაიცვალა.“
„ადამიანის უფლებების ევროპული სასამართლო ბავშვის მოვლის გამო შვებულების ანაზღაურებასთან მიმართებით არსებითად თანასწორად მიიჩნევს ქალებსა და მამაკაცებს საქმეზე Konstantin Markin v. Russia და ამ კუთხით სტერეოტიპებზე დაფუძნებულ განსხვავებულ მოპყრობას დისკრიმინაციად ცნობს. ანალოგიურ განმარტებას აკეთებს ევროპის მართლმსაჯულების სასამართლო მაისტერლისის საქმეზე, მსგავსია მიდგომა ალვარესის საქმეზეც, სადაც სასამართლო იზიარებს შეხედულებას მათ შორის იმის შესახებ, რომ ბავშვის მოვლის პერიოდში ძუძუთი კვებასთან დაკავშირებული შვებულების განსაკუთრებული რეჟიმი არ არის დაკავშირებული მხოლოდ ბიოლოგიურ მოვლენასთან და იგი ასევე ბავშვის ხელოვნურ კვებასაც გულისხმობს,“ – აღნიშნულია საკონსტიტუციო სარჩელში.
