კოლეჯ „ბლექსის“ ახალი შენობა ბათუმში „კომაროვის სკოლასთან“ აშენდება

კოლეჯ „ბლექსის“ ახალი შენობა ბათუმში, სვიშევსკის ქუჩის პირველ ნომერში, იმ ტერიტორიაზე აშენდება, სადაც „კომაროვის სკოლის“ მშენებლობა იგეგმება. ამის შესახებ „ბათუმელებს“ საგანმანათლებლო და სამეცნიერო ინფრასტრუქტურის განვითარების სააგენტოში უთხრეს. ამავე სააგენტოს ინფორმაციით, „ბლექსის“ ახალი შენობის მშენებლობას, სავარაუდოდ, 10 მილიონი ლარი დასჭირდება.

„ამ ეტაპზე მიმდინარეობს ესკიზური პროექტის მომზადება, რომლის დასრულების შემდგომ მომზადდება შესაბამისი დოკუმენტაცია ტენდერის გამოსაცხადებლად დიზაინბილდით. ტენდერი, სავარაუდოდ, გამოცხადდება 2019 წლის ბოლოს. კოლეჯი აშენდება ბათუმის განათლების ქალაქის ტერიტორიაზე [სვიშევსკის ქუჩა N1]. კოლეჯის ახალი შენობა იქნება სამსართულიანი“, – აცხადებენ სააგენტოში.

კოლეჯი „ბლექსი“ ბათუმში, ლერმონტოვის ქუჩის 92ა-ში მდებარეობს. ამ მისამართზე 6479 კვ.მ მიწის ნაკვეთი და მასზე განთავსებული შენობა-ნაგებობები [საერთო ფართობით 2071.99 კვ.მ] სახელმწიფოს ეკუთვნის და კოლეჯს სარგებლობის უფლებით აქვს გადაცემული.

„ბლექსი“ ბათუმში, თავდადებულის N61-ში, ასევე სახელმწიფოსგან სარგებლობის უფლებით ფლობს 2834 კვ.მეტრ მიწის ნაკვეთსა და მასზე განთავსებულ 2377 კვ.მეტრ შენობა-ნაგებობებს. თუმცა, ეს შენობა ამჟამად არ გამოიყენება სასწავლო მიზნით.

რა ბედი ეწევა ამ შენობებს კოლეჯის სვიშევსკის ქუჩაზე გადასვლის შემდეგ? –

„ჯერ არ მაქვს საბოლოო გადაწყვეტილება იმის შესახებ, თუ სად აშენდება ახალი შენობა. მიმდინარეობს ტექნიკური პროცედურები. უნდა გაკეთდეს გეოლოგიური დასკვნები… ერთ-ერთ საკითხად მშენებლობისთვის სვიშევსკის N1-იც განიხილება. რაც შეეხება ლერმონტოვისა და თავდადებულის ქუჩებზე მდებარე შენობებს, არც ამაზე ვართ შეთანხმებული. ჯერჯერობით არის ჩვენს ბალანსზე და როცა გადაწყდება, სად უნდა აშენდეს ახალი შენობა, შემდეგ ვიმსჯელებთ, იქ რა გავაკეთოთ“, – გვითხრა სატელეფონო საუბარში გიორგი გოგიტიძემ, კოლეჯ „ბლექსის“ დირექტორმა.

„ბლექსისთვის“ სარგებლობის უფლებით გადაცემული შენობა თავდადებულის ქუჩაზე ბათუმში, რომელიც სახელმწიფოს საკუთრებაშია. შენობა ამ დროისთვის უფუნქციოდაა / 18.09.2019

მთავარი ფოტო: თავდადებულის ქუჩაზე მდებარე შენობა ბათუმში, რომელიც „ბლექსის“ ბალანსზეა / 18.09.2019

– – –

სვიშევსკის ქუჩა N1-ში ვლადიმირ კომაროვის თბილისის ფიზიკა-მათემატიკის N199 საჯარო სკოლის ბათუმის ფილიალის მშენებლობა იგეგმება. საგანმანათლებლო და სამეცნიერო ინფრასტრუქტურის განვითარების სააგენტოს ინფორმაციით, ბათუმში „კომაროვის სკოლის“ მშენებლობას, სავარაუდოდ, 14 მილიონი ლარი დასჭირდება.

ამ თემაზე: