ბათუმის მერია „იაფი სახლის“ მსურველთა განცხადებების მიღება-გადარჩევას იწყებს


ბათუმის მერია ე.წ. ხელმისაწვდომი საცხოვრისის პროგრამის ფარგლებში განცხადებების მიღება-გადარჩევის დაწყებას გეგმავს. პროგრამის ფარგლებში ოჯახები, რომლებიც წინასწარ დამტკიცებულ კრიტერიუმებს დააკმაყოფილებენ, მერიამ ხელმისაწვდომი საცხოვრისით უნდა უზრუნველყოს.

პროგრამა ბინების გადაცემას 15 წლის ვადით, გამოსყიდვის უფლებით ითვალისწინებს. გამოსყიდვის ფასი კი გადაცემული ფართობის თვითღირებულება იქნება.

გამოსყიდვის შემდეგ მუნიციპალიტეტმა გადაცემული საცხოვრებელი ბინა ოჯახებს საკუთრებაში უნდა დაურეგისტრიროს. თუმცა პრობლემას ქმნის ის, რომ კანონით მერიას მუნიციპალური ქონების გასხვისება მხოლოდ აუქციონის წესით შეუძლია. ამიტომაც საჭირო გახდა ამ პროცესში აჭარის მთავრობის თავმჯდომარის მონაწილეობა.

ბათუმის მერიამ თორნიკე რიჟვაძეს სთხოვა ადმინისტრაციული დაპირების გაცემა, რომელიც აღნიშნული პროგრამის მხარდაჭერას და მომავალში შესაბამისი ფართობების, მის მიერ სიმბოლურ ფასად გადაცემას გაითვალისწინებდა. მერია მომავალში ამ ფართობების მთავრობის თავმჯდომარეს გადასცემს იმ პირობით, რომ ის შემდეგ ამ ქონებას მერიის მიერ შერჩეულ ოჯახებს საკუთრებაში გადასცემს.

ასეთი დაპირება ბრძანების სახით თორნიკე რიჟვაძემ 2019 წლის 5 სექტემბერს გამოსცა. ამავე ბრძანებაში მითითებულია ისიც, რომ მთავრობის თავმჯდომარე არ იღებს პასუხისმგებლობას პროგრამაში მონაწილე პირების შერჩევასა და მუნიციპალიტეტის პროგრამის ფარგლებში მიღებულ გადაწყვეტილებებზე.

„იაფი სახლის“ პროგრამასთან დაკავშირებულ ღონისძიებებზე, რაც ბათუმის მერიამ საკრებულოში პროექტის სახით წარადგინა, საკრებულო ხვალ, 19 სექტემბერს იმსჯელებს. საკითხი უკვე დაგეგმილი რიგგარეშე სხდომის დღის წესრიგშია შეტანილი.

„იაფი სახლის“ პროექტის ფარგლებში ბათუმის მერიამ ორი ხუთსართულიანი კორპუსი უკვე ააშენა. ორივე სახლში 40 ბინაა. კორპუსის აშენებაზე 2,3 მილიონზე მეტი ლარი დაიხარჯა.

„იაფი სახლის“ ფარგლებში კიდევ ორი კორპუსის აშენება იგეგმება.

ამავე თემაზე:

ორი 5-სართულიანი კორპუსი აშენდა, ორი კიდევ აშენდება – „იაფი სახლი“ ბათუმში

ნეტგაზეთის მასალების სხვა გამოცემებში გადაბეჭდვის წესი
ავტორი