დღეს, 19 სექტემბერს, საავტორო კინოს ბათუმის საერთაშორისო ფესტივალზე კინოთეატრ „აპოლოში“ შემდეგ ფილმებს აჩვენებენ:
12 საათზე – „სიყვარულის ავტომობილი“, ელკე მარგარეტ ლერენკრაუზი, გერმანია, 2019; 103 წთ.
შებინდებისას გერმანიის სოფლებში ძველი მინივენები მწკრივდებიან გზატკეცილზე, რომელიც კარტოფილის მინდვრებსა და ბნელ ტყეებს შორის გადის. ამ მინივენებში აღმოსავლეთევროპელი და აფრიკელი სექსმუშაკები გამვლელ კლიენტებს ელოდებიან. ფილმი გვიჩვენებს ქალებს, რომლებიც ფულისა და უკეთესი ცხოვრების საძებნელად შორიდან მოვიდნენ. ერთ დღეს სიბნელეში ერთ-ერთ მეძავს კლავენ, რაც ყველაფერს ცვლის და ყველას მოქმედებისკენ უბიძგებს.
14 საათზე – „კინომექანიკოსი“, იური შილოვი, უკრაინა/პოლონეთი, 2019; 72 წთ.
ვალენტინი 60 წელსაა გადაცილებული და ორმოცზე მეტი წელია კიევის უძველეს კინოთეატრში მუშაობს. დასალევად და საცეკვაოდ წასასვლელად ბევრი ხვეწნა არ სჭირდება. ექსცენტრიული კაცი ასაკს არაფრად აგდებს, კინოსამყაროში ბედნიერად ცხოვრობს და ავადმყოფ დედას სიყვარულითა და იუმორის გრძნობით უვლის. თუმცა ცხოვრება მასაც ახალ დაბრკოლებებს უქმნის. ფილმი მხიარული, კომუნიკაბელური ვალენტინის პორტრეტზე მეტს გვთავაზობს. ნოსტალგიური თვალით დანახული წარსული მოხუცების სახითაა წარმოდგენილი, რომელთანაც ერთადაც ვალნტინი სვამს, კინოპროექტორი კი არ ჩერდება.
ფოტო: zagrebdox.net
15.30 საათზე – „ეს ცხოვრება“, ვახტანგ კუნცევ-გაბაშვილი, საქართველო, 2016; 85 წთ.
ფილმში 5 მთავარი გმირია და ყველას თავისი ისტორია აქვს. ისინი თელავში ერთმანეთის მეზობლად ცხოვრობენ. ერთი მათგანი გერმანელია და სათნოების სახლში პიანინოზე უკრავს. ის ყოფილი მეხანძრეა. გადარჩენილი აქვს წინანდლის სახლ-მუზეუმი. მეორეც გერმანელია, რომელსაც 20 წელია, რაც ელექტროენერგიის მიწოდება შეუწყვიტეს და მან გამოიგონა ღუმელი, რომელიც დენს გამოიმუშავებს. მესამე პერსონაჟი 80 წლის, კავშირგაბმულობის ყოფილი დირექტორია. მისი სახლი ისტორიული ძეგლია, მაგრამ სახლი ავარიულ მდგომარეობაშია. მეოთხე პერსონაჟი – ყოფილი ინჟინერია, წარსულში თელავის უნივერსიტეტის ლექტორი იყო, ის სახლში ზის, როკ-მუსიკას უსმენს და ცხოვრებას უჩივის. მეხუთე პერსონაჟი – წარმატებული ფერმერია, ბიზნესმენი. მას სჭირდება დამხმარე ძალა, მაგრამ ვერავის პოულობს. მას ფერმაში მინისალოცავი აქვს და ლოცულობს უკეთესი მომავლისთვის.
17.30 საათზე – „სეზონის დასასრული“, ელმარ იმანოვი, გერმანია / აზერბაიჯანი / საქართველო, 2019; 92 წთ.
აზერბაიჯანული ოჯახი ინციდენტითაა შეძრული. მამა სამირი, დედა ფიდანი და მათი 18 წლის შვილი მაჰმუდი ოჯახის დამოუკიდებელი წევრების შთაბეჭდილებას ტოვებენ, თუმცა სრული დამოუკიდებლობა ზოგჯერ გაუცხოებას, ურთიერთგაგებისა და თანაგრძნობის ნაკლებობას იწვევს. სანაპიროზე ოჯახის გამგზავრება მოლოდინს არ ამართლებს.
19.30 საათზე – „მენკილერი“, ვალერი რედ-ჰორსი აშშ, 2017; 74 წთ.
ეს არის ამერიკული ლეგენდის, ვილმა მენკილერის ისტორია – ქალის, რომელმაც გადალახა სექსსიზმი, პირადი პრობლემები და ჩეროკის ტომის პირველი ქალი მმართველი გახდა 1985 წელს.
22 საათზე -„მოღალატე“, მარკო ბელოკიო, იტალია/საფრანგეთი/ბრაზილია/გერმანია 2019; 145 წთ.
1986 წელს Cosa Nostra-ს წარმომადგენელი ტომასო ბუსჩეტა იტალიაში მაფიის წინააღმდეგ გამართული პირველი დიდი სასამართლო პროცესის მთავარი მოწმე იყო. გამოძიებას აწარმოებდა გამომძიებელი ჯიოვანი ფალკონე. იმის მიუხედავად, რომ შესაძლოა მისი მთელი ოჯახი ამოეწყვიტათ [სასამართლოზე მოწმედ გამოსვლა მაფიისთვის ღალატს ნიშნავდა] პროკურორმა ფალკონემ დაპატიმრებულ ბუსჩეტას შესთავაზა წინადადება, რომელზეც ის უარს ვერ იტყოდა. რეჟისორი ფოკუსირდება ადამიანზე, რომელმაც მოინანია და დაეხმარა მართლმსაჯულებას მაფიის 300 ლიდერის გასამართლებაში და პოლიტიკურ წრეებთან მაფიის კავშირების გამომჟღავნებაში.
კინოჩვენებებზე დასწრება „აპოლოში“ უფასოა, თუმცა დასწრებისთვის საჭიროა წინასწარ ე.წ. „უფასო ბილეთების“ (რაც კონტროლისა და ადგილების დაჯავშნის მექანიზმია) აღება. იმის გათვალისწინებით, რომ “აპოლოში” მხოლოდ 160-მდე ადგილია, დასწრების მსურველებმა უმჯობესია აიღონ უფასო ბილეთები ადგილის რეზერვაციის მიზნით. ერთდროულად შესაძლებელია მხოლოდ 2 დღის კინოსეანსების ბილეთების აღება. „უფასო ბილეთების“ დაჯავშნა შესაძლებელია ცალკეულ კინოჩვენებებზე ინტერნეტითაც. ამისათვის საჭიროა გადახვიდეთ შემდეგ ბმულზე: ბილეთების დაჯავშნა BIAFF 2019.
___________
მთავარ ფოტოზე: კადრი ფილმიდან „კინომექანიკოსი“. ფოტო: imdb.com
