დღეს, 2 მარტს, დაახლოებით 19:00 საათისათვის, ბათუმში რესპუბლიკურ საავადმყოფოს ეზოში 2 ადამიანი დაჭრეს, ხოლო ოთხ ადამიანს სცემეს. როგორც „ბათუმელებს“ რესპუბლიკური საავადმყოფოს დირექტორმა განუცხადა, ინციდენტი პაციენტის მნახველებს შორის მოხდა.
“დაზიანდა რამდენიმე ადამიანი, მათ შორის ორი არის დაჭრილი, ერთი მძიმედ დაჭრილი იყო, შემავალი ჭრილობა ჰქონდა მუცლის არეში და ოპერაცია გავუკეთეთ. რეანიმაციაში წევს და აგრძელებს მკურნალობას. მის სიცოცხლეს საფრთხე არ ემუქრება. მეორე დაჭრილი ქალია, ბარძაყში ჰქონდა ჭრილობა, გავუკეთეთ ოპერაცია და პალატაში აგრძელებს მკურნალობას. კიდევ ერთი დაშავებული იყო, რომელსაც გავუწიეთ მკურნალობა და გავუშვით სახლში. პაციენტი, რომლის მნახველებს შორისაც მოხდა ინციდენტი, ისიც გავწერეთ სახლში, იმიტომ რომ გუშინ შემოვიდა და დღეს დაასრულა მკურნალობა. კიდევ იყო სამი ადამიანი, რომლებმაც ინცინდენტის დროს სხეულის დაზიანება მიიღეს. ისისნი გადავიყვანეთ სხვადასხვა საავადმყოფოში,” – უთხრა „ბათუმელებს“ რესპუბლიკური საავადმყოფოს დირექტორმა მალხაზ ხალვაშმა.
„ბათუმელების“ ინფორმაციით, ამ ჯგუფს შორის კონფლიქტი გუშინ, 1 მარტს დაიწყო, როცა ჩხუბის შედეგად ერთ-ერთი ნაცემი პირი საავადმყოფოში მოხვდა. ამ საღამოს [2 მარტი] რესპუბლიკური საავადმყოფოს ეზოში სწორედ ეს დაპირისპირებული ჯგუფები შეიკრიბნენ.
შსს-ს ინფორმაციით, გამოძიება სისხლის სამართლის კოდექსის 239-ე მუხლის მესამე ნაწილით დაიწყო, რაც გულისხმობს ცივი იარაღით ჩადენილ ხულიგნობას.
