დღეს, 14 იანვარს, უნგრეთის დედაქალაქ ბუდაპეშტში, სადაც ევროპის ჩემპიონატი მიმდინარეობს, საქართველოს წყალბურთელთა ეროვნულმა ნაკრებმა საფრანგეთის ნაკრები 9:7 დაამარცხა. ნაკრებმა ევროპირველობის ისტორიაში პირველად გაიმარჯვა ჯგუფური ეტაპის მატჩში.
პირველივე შეხვედრაში გამარჯვება არის საუკეთესო გზა 12 გუნდში მოსახვედრად, საქართველოს ნაკრებს გარანტირებული აქვს ჯგუფიდან გასვლა – ამბობენ სპეციალისტები.
ევროპის ჩემპიონატზე 16 გუნდი ასპარეზობს. იტალიის ნაკრები მოქმედი ჩემპიონია. საბერძნეთის ნაკრები, ვისთანაც მორიგ შეხვედრას გამართავს საქართველოს წყალბურთელთა ნაკრები, ერთ-ერთ ფავორიტად მიიჩნევა.
საქართველოს ნაკრები საბერძნეთს 16 იანვარს დაუპირისპირდება. შეხვედრა 19:00 საათზე დაიწყება.
მთავარი ფოტო: საწყლოსნო სპორტის სახეობათა ფედერაცია.
