Batumelebi | რივიერაზე ნებართვის გაცემით ხელისუფლება ბათუმს ეკოლოგიურ საფრთხეს უქმნის – განცხადება რივიერაზე ნებართვის გაცემით ხელისუფლება ბათუმს ეკოლოგიურ საფრთხეს უქმნის – განცხადება – Batumelebi

რივიერაზე ნებართვის გაცემით ხელისუფლება ბათუმს ეკოლოგიურ საფრთხეს უქმნის – განცხადება

საზოგადოებრივი ჯგუფები და არასამთავრობო ორგანიზაციები ეხმიანებიან აჭარის საზოგადოებრივი მაუწყებლის მიერ გავრცელებულ ინფორმაციას, რომლის თანახმადაც საქართველოს ეკონომიკისა და მდგრადი განვითარების სამინისტრომ ბათუმი რივიერაზე 42-სართულიანი კორპუსის ჩადგმის ნებართვა გასცა. დღეს, 16 იანვარს, ბათუმი რივიერასთან შემოღობილ ტერიტორიაზე ორგანიზაციების წარმომადგენლებმა ბრიფინგი გამართეს.

„რივიერასთან დაკავშირებული დანაშაულების სერია გრძელდება და ამ პროცესში ჩართულია ხელისუფლების ყველა რგოლი. მას შემდეგ, რაც ადგილობრივმა თვითმმართველობამ საზოგადოებრივი ინტერესის უგულებელყოფით და სავალდებულო კვლევების გარეშე შეითანხმა განაშენიანების რეგულირების გეგმა, უკვე ცენტრალურმა ხელისუფლებამ, ეკონომიკის სამინისტრომ, საზოგადოება „ბათომის“ თხოვნის მიუხედავად, ფარულად, დაინტერესებული მხარეების გამორიცხვით, საზოგადოების ზურგს უკან შეითანხმა პროექტი.

ბათუმი რივიერაზე მშენებლობის ნებართვის გაცემა ღია დემონსტრირებაა იმისა, რომ ხელისუფლება არსებითად უგულებელყოფს საზოგადოებრივ ინტერესს და ყოველგვარი არგუმენტაციის, სამეცნიერო დასაბუთების გარეშე მხარს უჭერს პროექტს, რითაც ეკოლოგიური საფრთხის წინაშე აყენებს ქალაქს.

მოვითხოვთ, გასაჯაროვდეს ყველა კვლევა და გადაწყვეტილების მიღების საფუძველი. შესაძლო შედეგზე, რასაც გამოიწვევს აღნიშნული ნებართვა, პასუხისმგებლობას ვაკისრებთ ხელისუფლებას“ – აღნიშნულია განცხადებაში, რომელსაც ხელს აწერენ შემდეგი ორგანიზაციები: მოძრაობა „დაიცავი ბათუმი“, საზოგადოება „ბათომი“ „მწვანე მომავალი“, „ახალგაზრდა მწვანეები“, „მწვანე ალტერნატივა“, „საქართველოს ახალგაზრდა იურისტთა ასოციაცია“ და „თავისუფალ ჟურნალისტთა სახლი“.

განცხადებაში აღნიშნულია, რომ ბრძოლა ბათუმი რივიერას გადასარჩენად გრძელდება და ორგანიზაციები აპირებენ მიმართონ სასამართლოს.

ბათუმში, იახტკლუბისა და ჭაჭის კოშკის მიმდებარედ, შპს „ბათუმი რივიერა“ გეგმავს კომპლექსის მშენებლობას, რომელიც 5 მაღალ შენობას მოიცავს.

პროექტი „ბათუმი რივიერა“ დაახლოებით ცხრა ჰექტრამდე ტერიტორიას მოიცავს. საჯარო რეესტრის მონაცემებით, აქედან  59 042 კვ/მ ტერიტორია უშუალოდ „სილქ როუდის“ საკუთრებაშია, 923 კვ/მ ნავსაყუდელის ნაგებობა და იქვე არსებული 8 533 კვ/მ მიწის ნაკვეთი 20-წლიანი იჯარით აქვს აღებული კომპანიას, 10 226 კვ/მ ტერიტორია აჭარის საკუთრებაშია, ხოლო 8 631 კვ/მ ბათუმის მუნიციპალიტეტის [ჭაჭის თაუერი] საკუთრებაა.

ბათუმელი აქტივისტები ამ მშენებლობას იმ მოტივით ეწინააღმდეგებიან, რომ კოშკების აშენების შემთხვევაში შეიცვლება ისტორიული ქალაქის იერსახე და გაუარესდება თანამედროვე ქალაქის ვენტილაცია.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.