„სწავლა საზღვარგარეთ“ პროგრამის ფარგლებში საგრანტო კონკურსი გამოცხადდა. კონკურსში მონაწილეობის უფლება აქვთ პირებს, რომლებიც ბოლო სამი წელია რეგისტრირებულნი არიან აჭარის ადმინისტრაციულ ტერიტორიაზე ან ზოგადი ან უმაღლესი განათლების დოკუმენტი მიღებული აქვთ აჭარის ადმინისტრაციულ ტერიტორიაზე არსებულ ზოგად და უმაღლეს სასწავლებლებში.
კონკურსში მონაწილეობა შეუძლია პირს, რომელიც ჩარიცხულია ან ჩაირიცხება ევროკავშირის წევრი ქვეყნების, ამერიკის შეერთებული შტატების, კანადის, ავსტრალიის, იაპონიის, შვეიცარიისა და ნორვეგიის უნივერსიტეტებში.
[checklist]
- მეორე საფეხურის უმაღლეს საგანმანათლებლო პროგრამაზე;
- მესამე საფეხურის უმაღლეს საგანმანათლებლო პროგრამაზე;
- პოსტ საბაკალავრო/პოსტ სამაგისტრო სახელოვნებო პროგრამაზე
[/checklist]
- აჭარის განათლების სამინისტროს ინფორმაციით, 2020 წელს კონკურსის წესით შერჩეული აპლიკანტები მიიღებენ 15 000 ლარს გრანტის სახით ერთი სემესტრის ხარჯის გაწევის მიზნით. „ერთ სტუდენტს შესაბამის სამაგისტრო ან სადოქტორო საფეხურზე შეიძლება დაუფინანსდეს არაუმეტეს 6 სემესტრი“. სტუდენტები, რომლებიც კონკურსში გაიმარჯვებენ, დაფინანსებას 2020 წლის სექტემბრიდან მიიღებენ. როგორც აჭარის განათლების სამინისტროში „ბათუმელებს“ უთხრეს, წარმატებულ სტუდენტებს სწავლა შემდგომ სემესტრებშიც დაუფინანსდებათ.
განმცხადებელს შეიძლება აუნაზღაურდეს შემდეგი ტიპის ხარჯები:
- სწავლის საფასური
- ცხოვრების ხარჯი (ბინა, კომუნალური, კვება)
- ტრანსპორტი
- სამედიცინო დაზღვევა
- უმაღლესი საგანმანათლებლო დაწესებულების სილაბუსით განსაზღვრული სასწავლო რესურსების შეძენა
- ვიზის და ვიზასთან დაკავშირებული ხარჯები
- სხვა ხარჯები, რომელთა მიზნობრიობაზე გადაწყვეტილებას იღებს სამინისტრო
გამარჯვებულ სტუდენტს აუნაზღაურდება მხოლოდ ის ხარჯები, რომელთა დაკავშირებით წარმოდგენილი დოკუმენტაცია იძლევა ხარჯების გამწევი პირის იდენტიფიცირების საშუალებას. 2020 წელს გამოცხადებული საგრანტო კონკურსის ფარგლებში დაგეგმილია 15 სტუდენტის დაფინანსება.
2020 წელს პროგრამის ბიუჯეტი 800 000 ლარია. პროგრამის ფარგლებში განაცხადების მიღება იწარმოებს 2020 წლის 20 იანვრიდან 27 მარტის ჩათვლით.
