პირმა ავტომანქანა მოიპარა და ჯართში ჩააბარა – 7 წელი ციხეში


მოსამართლე დავით მამისეიშვილმა 7 წლით თავისუფლების აღკვეთა მიუსაჯა მ.ჟ.-ს ავტომანქანის ქურდობისთვის. მოპარული ავტომანქანა ბრალდებულმა იმავე დღეს ჯართის მიმღებ პუნქტში ჩააბარა.

განაჩენის მიხედვით, მ.ჟ.-მ ბათუმში, ლუკა ასათიანის ქუჩაზე გაჩერებული ავტომანქანის მისაკუთრება შეძლო. ჯართის მიმღები პუნქტიდან ამოღებული ავტომანქანა WOLKSWAGEN GOLF-ი ექსპერტიზამ 800 ლარად შეაფასა. განაჩენის მიხედვით, უცნობია, რამდენ ლარად მიჰყიდა მოპარული მანქანა ბრალდებულმა ჯართის მიმღებ პუნქტს.

ბრალდებული წარსულში ორჯერ იყო ნასამართლევი ქურდობისთვის. გამოძიების ეტაპზე მან აღიარებითი ჩვენება მისცა გამომძიებლებს და საგამოძიებო ექსპერიმენტშიც მიიღო მონაწილეობა. სასამართლო პროცესზე ბრალდებულმა დანაშაულის ჩადენა უარყო, თუმცა მოსამართლე განაჩენში აღნიშნავს:

„ბუნებრივია, რომ ისმება სრულიად ლოგიკური კითხვა: როგორ შეეძლო მ—-ლ ჟუ—––—-ს საგამოძიებო ექსპერიმენტების დროს გამომძიებლები და ექსპერტები მიეყვანა და მიეთითებინა ის ადგილები, საიდანაც მოიპარა და ჯართში ჩააბარა მანქანა, სადაც გადამალული ჰქონდა ნომრები და ტექნიკური პასპორტი, თუკი მანამდე იქ არ იყო ნამყოფი?“ – წერია განაჩენში.

დანაშაულის ჩადენის დროისთვის ბრალდებული პირობითი მსჯავრის ქვეშ იმყოფებოდა.

ნეტგაზეთის მასალების სხვა გამოცემებში გადაბეჭდვის წესი
ავტორი